Nobela ni Norberto D. Bumanglag, Jr.
BINADDEKAN ni Agent Donoteli ti siliniador ti nalabaga a Ferrari agingga iti nagpundo ket ad-adda pay a nagungor ti lugan. Kasla saan payen nga agdisso dagiti ligay daytoy iti kongkreto a kalsada. Pinaludipanna ti speedometer. Itudtudo ti gauge ti 105. Kayatna a sawen, tumartarayda iti 105 a milia iti kada oras. Sangapulo ket lima a minuto laeng ti napalabas manipud ipapanawda iti Las Vegas ngem nadaliasatdan ti kagudua ti dalanenda nga agturong iti Indian Springs. Nasken a makamakamda ni John Villa iti pagbaludan.
“Slow down, man,” imbalakad ni Agent Rojas iti gayyemna. “Masiguradok nga agbayag bassit ni John iti sidong ti amana. Adu ti panawenta. Amangan no data pay ti maaksidente.”
Ngem saan a dimngeg ni Agent Donoteli. Saanna nga inalay-ayan ti sakana iti siliniador.
Madamdama pay bassit, nasiputan ni Agent Rojas ti masabatda a Nevada Highway Patrol iti bangir ti I-95 freeway. Immisem. “Makipinnustaak kenka,” kinunana, sa nagkatawa, “sigurado a subliannata ti nasabatta a highway patrol.”
“Ah, saannata a nadlaw. Saan nga agsubli daydiay...” Ngem kaisasao ni Agent Donoteli iti dayta, nakitana iti rearview mirror-na ti highway patrol nga agilapgilap ti silawna.
Nagkatawa manen ni Agent Rojas. “Ania ti kunak kenka?”
“Mabalin met nga itarayanta lattan. Sigurado a saan a makakamat daydiay,” kinuna ni Agent Donoteli.
Kinuti laeng ni Agent Rojas ti abagana. “Sika latta,” insungbatna.
Ngem madamdama laeng, naginayad met laeng ni Agent Donoteli ket nagpaigid ken nagsardeng iti emergency lane ti freeway.
“Ania, di ad-adda itan a maibayagta?” Nagkatawa manen ni Agent Rojas.
“Ah, shut up!” Masuron a makakatawa ni Agent Donoteli. Inruarna ti badge-na ket bayat ti yaasideg ti magmagna a patrolman iti luganda, inngato ni Agent Donoteli ti imana a nakaiggem iti badge-na.
Addan ti patrol iti abay ti luganda a mangmatmata iti FBI badge ni Agent Donoteli. “Excuse kadi dayta a badge iti panangbalusingsingmo iti linteg, Agent Donoteli?” sinaludsod ti patrolman bayat ti panangbasana iti nagan ti ahente. “Based on my radar gun you were gunning at 110 miles an hour. Too dangerous, Agent Donoteli.”
“Sorry, boss,” insungbat ni Agent Donoteli. “Adda emergency a kamkamakamenmi. Just go ahead and write us a ticket and send it to the bureau. Nasken ngamin a makadanonkami a dagus iti Indian Springs Federal Prison.”
Immanges iti nauneg ti patrolman. “It’s okay. I don’t have to give you a ticket. But please be carefull... Drive safely.”
“Thanks,” kinuna ni Agent Donoteli idinto a tinaliawna ti nametag ti patrolman. “Thanks, Patrolman Ryan.”
“Are we still gonna go over a hundred this time?” inkatawa ni Agent Rojas.
“Shut up, dude,” insungbat ni Agent Donoteli. Nagsubli iti kalsada ngem naginayaden iti panagmanehona. Imbes a nasurok a sangagasut a milia, nagpataray iti pitopulo a milia iti kada oras.
Apagisu met a nagkiriring ti selpon ni Agent Donoteli. Nagkinnita dagiti dua. Maiparit ti agusar iti selpon bayat ti panagmaneho iti Nevada.
Inruar ni Agent Donoteli ti selponna. Intedna ken ni Agent Rojas. “Sungbatam,” kinunana. “Amangan no pagsardengendata manen no adda makakita nga us-usarek ti selponko. Ad-adda la ket ngarud a mataktakta.”
Immisem ni Agent Rojas. Pinisitna ti buton ti Blackberry a selpon. “Hello?”
“Agent Donoteli?” saludsod iti bangir a linia.
“No... ni Agent Rojas daytoy. Agmanmaneho ket dina masungbatan ti selponna. Can I help you?”
“Agent Rojas, ni John Villa...”
Nagpuesto a nagtugaw ni Agent Rojas. Tinaliawna ni Agent Donoteli. “Hello, John... How are you? Ni daddym, komusta?”
“He’s okay... And we are ready to make a deal...”
Inapput ni Agent Rojas ti microphone ti selpon sa kinunana ken ni Agent Donoteli: “Nakasaganadan a makikooperasion.”
“We need to see you ASAP,” ni manen John.
“We are on our way,” kinuna ni Agent Rojas.
Apagibaba ni Agent Rojas iti selpon, inruarna ti magnetic portable flashing light. Imparabawna iti pantok ti lugan. Impundo met a dagus ni Agent Donoteli nga impaddek ti siliniador ti Ferrari. Nagungor iti napigsa ket naganit-it dagiti ligay a nangibati iti napuskol nga asuk ken nangisit nga ugis iti kongkreto a kalsada. Napanunot ita ni Agent Donoteli nga itay koma pay laeng nga inaramatda ti magnetic flashing light. Saan koma a pinasardeng ida ti highway patrol. Nakadanonda koman iti Indian Springs Federal Prison.
NAGYAMAN ni John iti guardia a nangipalubos iti panangusarna ti teleponoda tapno maawaganna ni Agent Donoteli. Nagsubli met laeng a dagus iti kuarto ti amana. Iti kaaddana iti uneg, inyam-ammo ni John ni Col. Davis iti amana.
Nagmulagat ti lakay a nangkita iti koronel, sa met laeng imbaw-ingna ti panagkitana ken ni John. Naawatan ni John ti saan a panagtalek ti amana iti koronel. Ngem inlawlawag ni John ti kinasayaat ti koronel kenkuana, dagiti panangsalaknib daytoy kenkuana iti kaaddada iti tay-ak ti paggugubatan iti Iraq ken Afghanistan.
“No talkennak, dad, mapagtalkam met ni Koronel Davis. Ken maysa, saanak a mamimpinsan nga agtalek kadagiti pannakabagi ti linteg. Masapulko ti second line of defense, inkaso nga agbiddut dagiti pannakabagi ti linteg. Diak kayat a maisagmakkay manen.”
Napalua ti lakay iti nangngegna iti anakna.
“Ita, ibagam kaniak no sadino ti nakaidulinan ti…”
Impakuros ni Roger Villa ti tammudo ti kanawanna iti bibigna. Tinangadna ti kamera sa inseniasna ken ni John. “Nakarekord amin ti mapaspasamak ditoy,” inyarasaasna.
Tinaliaw ni John ti koronel, inseniasna met iti daytoy ti kamera. Naawatan a dagus ti koronel ti kayat a sawen ni John. Impalawlaw ti koronel ti panagkitana. Mangsapsapul iti mabalin a pangisuratan ti lakay iti impormasion maipapan iti lokasion ti kuarta. Awan ti makitana.
Apagisu met a sumrek ti nalukmeg ken nataengan a nars. “Good afternoon, Mister Villa. Glad you’re awake.” Umis-isem ti nars a nangkita iti IV a nakabitin.
“Sorry, nurse, ngem saan a makasao ni Mister Villa,” insallawat a dagus ni Col. Davis. “Mabalin ti bumulod iti bolpen ken papel?”
“Oh…” Ngimmato ti kiday ti nars. “Here,” inyawatna ti post-it pad ken bolpenna.
Dinagdagus nga inawat ni John sa impaiggemna iti amana. Immabay ni Col. Davis ken ni John tapno malingdan ti kamera iti panangisurat ni Roger Villa iti lokasion ti kuarta.
NAIPIGKET ti panagkita da Agent Donoteli, Agent Rojas ken ti warden iti monitor. Buybuyaenda ti mapaspasamak iti uneg ti kuarto ni Roger Villa a nakaidda iti kama. Ur-urayenda nga agsao manen ni Roger Villa. Ngem nagsardeng daytoy. Kinita daytoy ti kamera. Simmublat ni John ken ti kadua daytoy a lakay a nangkita iti kamera. Kellaat a nagulimek iti uneg ti kuarto. Simrek ti nars, nangyawat iti papel ken bolpen.
Timmakder ti warden. Inawaganna ti maysa a correctional officer. Imbilinna a mapan a dagus iti kuarto ni Roger Villa. Naawatan a dagus dagiti dua nga ahente ti mapaspasamak. Timmakderda met ket nagsaganada a sumurot iti correctional officer.
“Agent Donoteli, just let my guy handle this. Just stay here,” kinuna ti warden idi addadan iti ridaw ti kuarto ni Roger Villa.
Ngem saan a nangikaso dagiti dua nga ehente.
KELLAAT, nailukat ti ridaw. Simrek ti correctional officer, da Agent Donoteli ken Agent Rojas, ken maysa a nakasuot iti cowboy hat a butiog a lakay a lumanitok ti cowboy a sapatosna.
“Hold it! Hold it!” imbilin ti butiog a lakay.
Napataliaw ni John, uray ti amana ken ti nalukmeg a baket a nars.
Dinardaras ti correctional officer a rinabsut ti post-it pad nga ig-iggaman ni John. Napataliaw met da Agent Donoteli ken Agent Rojas iti ridaw ti banio iti pannakangngegda iti pannakai-flush ti kasilia. Sa kalpasan ti sumagmamano a kanito, rimmuar ni Col. Davis dita.
Inyawat a dagus ti guardia ti pad paper iti butiog a lakay. Immabay ni Agent Donoteli iti panangbinsir ti lakay iti nakasurat iti papel.
“Wish you luck, son…” intanamitim ti lakay ti nangbasa. Linukibna ti sumaruno a panid. Blangko.
“Both of you, raise your hand,” imbilin ti correctional officer kada John ken ti koronel nga addan iti abay ni John.
Inngato dagiti dua dagiti imada.
Agpadpada a rinikisa ti correctional officer da John ken ti koronel. Binaliktadda dagiti bolsa ti pantalonda ngem awan ti nasarakanda.
Tinaliaw ti correctional officer iti butiog a lakay. Nagwingiwing.
“Shit!” naibassawang ti butiog a lakay. Sirururod a nagturong iti kasilia. Nadalus iti uneg. Agtantanabutob man met laengen a nagsubli iti ‘yan da John.
“Asino ‘ta kaduam, John?” sinaludsod ni Agent Rojas. “Dimi ammo nga adda gayam kaduam.”
“Gayyemko. Commanding officer-ko idi addakami idiay Iraq ken Afghanistan, ni Retired US Marine Colonel Davis.”
Immisem ti koronel. Sinubadan met dagiti dua nga ahente.
“If you don’t mind, colonel, di la mabalin nga agurayka iti ruar?” Ni Agent Donoteli.
“Sure,” siiisem nga insungbat ti koronel. Rimmuar iti kuarto. Uray ti nars, pinaruarda.
“Okay, John… you and your dad is ready to cooperate with the government, is that true?” impennek ni Agent Donoteli.
Nagtung-ed ni John, sa kinitana ti amana. “But...” inulodna ti saona.
Naguray dagiti dua nga ahente iti ibaga ni John. Uray ti butiog a lakay, serioso a dumdumngeg.
“Ti laeng gapuna a kayatnak a makita ni Gaspar Medalla ket no isublik ti kuarta nga impabasolna a tinakaw wenno inlemmeng ni dad.”
“Ammomi dayta. Go on...”
“Ngem kuna ni dad, awan ti kuarta. Agul-ulbod ni Señor Medalla. Kayatna laeng a balsen ni dad.”
Naklaat ni Roger Villa iti sinao ni John, ngem saan a nagpadlaw. Ken saan a simmawat.
“That’s bullshit!” ngimmato ti timek ni Agent Donoteli.
“Isu a kastoy ti aramidentayo,” intuloy ketdi ni John. “Ti gobierno, ti FBI, ken ti DEA ti mangukkon iti 15 a milion a doliar. Aramatentayo nga appan tapno makipagkita kaniak ni Señor Medalla. Palawlawanyo ti pasdek wenno lugar a pagkitaanmi. Yawattayo ti kuarta a kasapulanna. Kalpasanna, rabsutenyo, agraman ti kuarta. Awan ti pukaw ti gobierno. Matiliwyo ti nabayagen nga an-anupenyo a drug kingpin. Makaruar ti amak. Itedyo ti Witness Protection Program. Agpukaw iti agnanayon a saanyonton a makita. And everybody lives happily ever after.”
“You’re dad is lying,” insakuntip ni Agent Rojas. “Mister Villa, apay no iruarmo laengen dayta a kuarta?”
Nagwingiwing ni Roger Villa.
“Now, do we have a deal?” sinaludsod manen ni John.
KINITA ni John ti relona. Agalas singkon iti malem. Maysa nga oras ti biaheda nga agsubli iti Las Vegas. Naulimek nga agpadpada da John ken Col. Davis, nga adda ita iti likud ti manibela ta inkiddaw ni John nga isu metten ti agmaneho ta nabannog unayen. Dumdumngegda kadagiti makapaturog a musika iti XM radio, iti “The Blend” nga estasion.
Pagam-ammuan, in-inut a timpuar ti isem ni Col. Davis. Inyakarna ti estasion ti radio, iti estasion nga agipatpatokar kadagiti rap songs. Madamdama pay, mayugyugyogen ti kotse iti pigsa ti radio.
“You’re brilliant, my boy. As briliant as your dad,” imbir-it ti koronel.
“Is that suppose to be a compliment or an insult?” kinuna ni John a timmaliaw iti koronel. Masemsem iti tokar.
“Of course, it is a compliment, you, idiot. Agasem ta inallilawmo dagiti dua nga ahente? Awan ti kuarta…” Nagkatawa ti koronel.
“Ngem saanda a mamati. Ken saanda nga immannugot iti kayatko.”
Nagkatawa manen ti koronel. “Umannugotdanto. Desperadoda a mangtiliw ken ni Gaspar Medalla.”
Nagulimek ni John. Umanamong iti kinuna ti koronel.
“No patayem koma dayta radio tapno dita agpimpinnukkaw?” kinuna ni John idi agangay.
“Panagkunak, naka-bug ti luganmo. Tracking and listening device. No adda man bug-na, ti laeng um-umkis a musika ti mangngegda.”
Naparasaw ni John. Apay nga ita laeng a maamirisna no apay nga ammo da Agent Donoteli ken Agent Rojas ti ‘yanna iti tunggal panaggunayna?
“Dika madanagan, adda tracking and bug detector da Sarhento Ramirez. Apaman a makaawidta, patsekta kadakuada.”
Nagtungtung-ed ni John. Kinitana manen ti relona.
Nakadlaw ti koronel iti assideg a panangtaliaw ni John iti relona. “Adda kamkamakamem?” sinaludsodna.
“Nothing,” impukkaw ni John.
“Come on... you can tell me anything,” kinuna ti koronel.
Immanges iti nauneg ni John. “Kuyogek ni Veronica a mapan agbuya.”
“What?” Natural ti riaw ti koronel. Riaw ti masdaaw-a-di-makapamati.
“Nothing!”
“Is it a date?” agkatkatawa ti koronel a nagkuna.
“No!” insippaw ni John. “Kuyogek laeng a mapan agbuya.”
“That’s it?”
“That’s it.”
Saanen a naguni ni Col. Davis. Ngem nagtalinaed a naisem ti rupana agingga iti makagtengda iti nagkukurosan dagiti dalan nga agturong iti downtown Las Vegas, iti Las Vegas Strip, iti Los Angeles, iti Arizona ken iti Utah. Nagin-inut nga imminayad ti trapiko iti kaadu ti lugan. Agingga a nagbalinen a kasla di maungpot a pagparkingan ti I-15 freeway.
Nagsakuntip ni John a nangtaliaw manen iti relona. Agpada a napunas ti isemda.
ADDADA iti uneg ti “The Colosseum” iti Caesars Palace Hotel and Casino. Okupado amin dagiti nasurok a lima ribu a tugaw a nabinsabinsa segun iti klasena. Ti front orchestra ti akinsango, sumaruno ti rear orchestra, sa dagiti dua a parte nga ad-adayo iti entablado— ti First Mezanine ken Second Mezzanine nga agpada nga adda iti maikadua a kadsaaran. Nakatugawda iti Front Orchestra, Row 4 nga asideg ti entablado.
Impapan itay ni John a saanna a makamakam ti alas siete media nga inkarina ken ni Vernonica a panangdagasna iti daytoy ngem nakamakamna met laeng. Nagdardaras a nagaruat apaman a nakagtengda iti hotel ket saan a nagsarday ti panangkantiaw dagiti tallo a gagayyemna. Saan a nagtimtimek ti inana, ngem naisem a nangpalubos kenkuana.
Itay dagasenna ni Veronica iti condo daytoy, addan nga agur-uray iti pagparkingan. Anian a libnos ti balasang, ket iti panangilukatna itay iti ridaw ti lugan tapno lumugan ni Veronica, uray la a napakidem iti pannakasay-upna iti makaapiang nga ayamuom ti bangbanglo daytoy. Apaman a nakatugaw iti likud ti manibela, saannan a maitured pay a taliawen ti balasang, ta iti kinakipet ti skirt daytoy, ad-addan a nagparang ti nawasnay ken napudaw a luppo daytoy.
Natalna dagiti tao a mangdengdengngeg iti “Goldfinger” a kankantaen ni Celine Dion. Nakalalasin latta ti kinagalante ti natalak a kumakanta iti suotna a nangisit a terno ken ti adda riangna a ternona— a nangipasirip iti napudaw ken atiddog a gurong daytoy.
Madamdama pay, narikna ni John ti pannakaisadag ti ulo ni Veronica iti abagana. Dina ammo no ti lamuyot ti boses ni Celine Dion wenno ti pannakalang-abna iti nasam-it a bangbanglo ti balasang ken ti makapasalibukag nga angot ti shampoo iti buok daytoy ti nagkidemanna. Nariknana ti panagbara ti bagina ket namrayanna lattan ti nagsikkawil.
Awan ti tagtagarida a dua, malaksid laeng no agpalakpakda no malpas ti panagkanta ni Celine Dion. Agpadada a natalinaay iti panagdinnennes dagiti takiagda, iti panangiparabaw ni Veronica iti ulona iti abaga ni John, ken ti sagpamisan a panagdennes dagiti dakulapda no ibaba ni Vero dagiti imana no kasta a malpas nga agpalakpak. Nalipatan pay ketdin ni John dagiti agsusukot a pakarikutanna.
Agpadpadada a nangdaydayaw iti pabuya ken panagkanta ni Celine Dion idi malpas ti show. Immaklili ni Veronica ken ni John idi rummuarda. Dimmagasda iti bar-restaurant iti uneg met laeng ti Caesar’s Palace. Nagorderda iti makan ken wine. Imminum a dagus ni John apaman a nayeg ti wine. Nagustuanna daytoy ket nakaaduna ti imminum. Bayat ti pannanganda, nagorder pay iti scotch on the rocks. Simmimsim laeng ni Veronica iti wine.
“Amangan no saankanton a makapagmaneho,” impalagip ni Veronica ken ni John.
Immisem ni John. “It’s okay, kabaelak. Ken no saan man, uray ta addaka met a designated driver-ko,” inkatawana.
Immisem ni Veronica ngem madanagan ta saan met nga agsardeng ti panaginum ni John.
Adu ti nagsarsaritaanda ken John: maipapan iti mapaspasamak iti pamilia ti baro, ti pannakatay ti nobia daytoy… Inyad-adda la ket ngarud daytoy ti naginum.
“Apay nga agingga ita ket awan pay asawam?” pagam-ammuan ta sinaludsod ni John. “Napintaska. Apay nga ad-adaywandaka dagiti lallaki?”
Napaumel ni Veronica. Kasano nga ibagana a sumagmamano metten dagiti nakaayan-ayatna ngem agpapadada amin nga irresponsible? A dagiti babbaro a naggapu iti Mexico, intugotda dagiti dakes nga ugalida idiay Mexico? Aginumda kalpasan ti trabahoda, dandani minalem. Ibilangda dagiti babbai a nababbaba ngem isuda. Ammona, saan met nga amin dagiti lallaki iti pagilianda ket kastada. Nalabit, saan laeng a nagasat a nakasarak iti maitutop kenkuana. Malagipna met ti kinarigat ti biagna idiay Mexico ket dina kayat a maulit dayta kadagiti sumaruno a kaputotanda.
Usigen kadi ti gimong no nangato met ti arapaapna? Ket iti panagkurkuridemdemen ni John gapu iti bartekna, binussog ni Veronica dagiti matana iti nabayagen nga inil-iliwna a lalaki a mangisangbay kenkuana ti pannakatungpal dagiti arapaapna.
Ni Veronica ti nagmaneho idi agawiddan. Sinallabayna ni John a simrek iti condo-na agingga iti kuarto. Idi ipaiddana ni John iti kama, naituon ti mata ti baro kenkuana. Anian a nagimnas ti panangmatmat ti baro kenkuana! Dagiti mata daytoy a mangipekpeksa iti awan katukadna nga iliw.
Ginuyod ni John ti imana. Napakleb iti barukong ti baro. Inapiras ti baro ti agsumbangir a pingpingna, sa ingguyod daytoy ti rupana ket nagdennes dagiti bibigda. Nagballikid ni John, ket addan iti rabawna a kasla nawawan a nangagek kenkuana. Nabara ti dakulap ni John a nagkarayam iti sibubukel a bagina. Simriam dagiti dutdotna; linemmes ti areng-engna ti batingting ti grandfather’s clock iti salas.
(Maituloyto)
