Nobela ni Norberto D. Bumanglag, Jr.
MININGMINGAN manen ni John ti kasla gumawgawawa a rupa. Ni Veronica? Indennesna ti bibigna iti bibig daytoy. Kimmayetket ti babai. Agpadpadada a napnuan bara a nangipeksa iti riknada. Anian a sam-it ti mariknana. Kasla tumtumpaw. Pagam-ammuan, binuong ti kanalbuong ti paltog ti ulimek a nangsallukob kadakuada iti babai.
Nagmalanga ni John. Itan, makitana ti babai a naidasay, agsaysayasay ti dara iti nadumaduma a paset ti bagina. Saggaysan ti panagangesna.
Nagtibbayo. “No...!” inriawna.
Ngem napigpigsa ti garakrak a nanglemmes iti pukkawna. Timmaliaw. Lalaki a nakaiggem iti paltog nga umas-asuk pay laeng ti murdongna. Nasipnget ti pagtaktakderan ti lalaki ket saanna a malasin.
“Ania ti mariknam, John? Mariknam kadi met laeng ti saem?”
Timmakder. Napigsa ti panagbayo ti barukongna. Nakamesmes a nagturong iti ‘yan ti lalaki. “Ania ti kayatmo kaniak?” Kayatna a natangken ti timekna. Ngem saanna a mayesngaw ket nagtinnag nga arasaas.
“Simple laeng, John... Kayatko a mariknam ti saem ti mapukawan iti ipatpateg. Kayatko nga apitem met ti pait ti panagsagaba ti mapukawan…”
“Ania ti inaramidko kenka? Apay a saan a siak ti patayem? Awan basolna dayta a babai!”
Naggarakgak ti lalaki. Ken idinto nga umas-asideg iti daytoy, ad-adda met a kimmusnaw ti ladawan daytoy.
“No sika ti patayek, saanmon a marikna ti saem. Napukawton ti ganasko nga agibales!” Ket addaytan a rumugma ti lalaki! Ngem nadaleb. Agsasarunon dagiti kanalbuong: adu a paltog, adu a bomba. Sa simbuag ti wanerwer ti paligpalig ti helicopter, ti sanengseng dagiti bala, ken asug ti maysa a babai. Timmaliaw iti naggapuan ti ikkis. Nakauniporme ti babai, nabessag, napandagan iti partes ti nadadael a helikopter.
“Lieutenant Villa! Help me... help me!” Makapadudog ti araraw ti babai.
“Lieutenant Presley!” Apagibalikasna, inaradon ti bala ti babai.
Impennekna ti amin a pigsana tapno makarukuas. Ngem kasla adda nadagsen a nangpandag kenkuana. Uray la a nagungor iti panagpigsana.
Bimmaringkuas. Nagtugaw iti iking ti kama. Kamkamatenna ti angesna. Binulosanna ti angin a nabunnong iti barukongna. Kasla pudpudno ti tagtagainepna! Nakasinsin-aw ti ladawan ni Lt. Presley.
“Ania ngata ti napasamakna?” naitanamitim ni John. Agingga ita, dina ammo no ania ti napasamak ni Lt. Presley kalpasan daydi a pasamakda iti gubatan.
Inyaprosna dagiti dakulapna iti rupana. Nagmulagat. Nasipnget pay laeng ngem mariknana a karkarna kenkuana daytoy a kuarto a ‘yanna. Nagpusipos ket naipasabat kadagiti matana ti nakaidda a silalamolamo a babai a naarpawan laeng iti gayadan ti ules. Nakigtot. Inarikapna ti bagina. Silalamolamo met! Nagkidem.
Simken iti lagipna ni Remy ket nakarikna lattan iti sidir.
Siiinayad a timmakder. Inarikapna dagiti lupotna iti datar. Insuotna sa sinapulna ti tulbek ti luganna. Nakain-inayad a nagna a rimmuar. Kasla birkog a nakaan-anat a nanglukat ken nangirikep met laeng iti ridaw.
Iti ruar, sinabat ti nalamiis a paluyupoy ti nasapa a bigat ti Las Vegas.
Impis-itna ti remote control ti luganna tapno mapihona no sadino ti nakaiparkingan daytoy. Awan ti lagipna no kasano a nakadanon iti daytoy a lugar. Ti laeng matandaananna ket ditoy ti nangdagasanna ken ni Veronica idi mapanda agbuya iti show ni Celine Dion. Nangngegna ti sanengseng ti luganna.
Limmugan. Nagkidem a nagdumog iti manibela. Pinanunotna manen ti napasamak iti uneg ti kuarto ni Veronica ket ad-adda laeng a nangemkem iti rurodna iti bukodna a bagi. Masdaaw no kasano a dina naterred ti bagina nga imminum iti dina kabaelan. No namin-ano a napariaw.
Nasinga iti kiriring ti selponna iti bolsana. Inruarna daytoy. Ni Sgt. Ramirez.
“Hello?” Barbar ti timekna.
“Did I wake you up?” sinaludsod ni Sgt. Ramirez.
“Saan, siririingakon... What’s up? Ania ti ar-aramidem iti kastoy nga oras? Nakasapsapa pay,” kinuna ni John. Kinitana ti relona. Alas tres iti bigat. Nagsuyaab.
“I need you to come and see us. Napateg unay. Ilawlawagkonto kenka ditoy. Isuratmo ti adres.”
“Okay,” kinuna ni John idinto ta nangarikap iti papel ken lapis iti compartment ti luganna.
Binasa ni John ti insuratna nga adres: 3236 Craig Road, North Las Vegas.
“No makaasidegka ditoy, tumawagka ta rummuarak a mangpayapay kenka,” kinuna ni Sgt. Ramirez.
“Okey. Ngem sakbay nga unayak dita... kayatko a siguraduen a naikkat met laeng ti tracking device iti luganko. Diak kayat nga agtultuloy ti panangmonitorda kaniak.”
“Yeah, it’s okay now. Uray ti selponmo, awanen ti tracking device-na.”
“Okay, I’m on my way,” kinuna ni John ket impisitna ti end call icon ti selponna. Pinagandarna ti lugan sa im-program-na iti GPS ti Hummer ti adres nga inted ni Sgt. Ramirez. Kabayatan ti panagse-search ti GPS, rimmuaren ni John iti pagparkingan iti condo ni Veronica.
Nagpalaud iti Warm Springs a nangitundaan kenkuana ti GPS. Nagpakanawan iti Las Vegas Boulevard. Nagpakanigid iti Russell Road a simrek iti I-15 North Freeway. Iti kanawanna, nakalawlawag ti Mandalay Bay a kasla balitok iti tengnga ti desierto.
Makaawis iti imatang dagiti agsasaruno a natatayag a hotel ken casino a nadigos iti lawag dagiti silaw ngem sabali ti adda iti panunotna.
Kasano pay ngata nga isarangna ti rupana ken ni Veronica? No mabalin, dinan kayat ti agsubli iti opisina ti Maxi-Clean.
SINUSOP ni Sgt. Ramirez ti sigariliona. Napauyek a nangipug-aw iti asuk.
“Kunak man la ngamin no insardengmon ti agsigarilio?” insidir ni Sgt. Cortez.
“I did,” insungbat ni Sgt. Ramirez sa naguyek manen.
“Then throw that shit away,” kinuna ni Sgt. Cortez. “You’re making me sick, too. Ammom kadi a ti posibilidad ti second hand smoker a makaala iti lung cancer ket kasla met laeng iti agsigsigarilio?”
“Ah, shut up. You’re not my mom, dude. Agnernerbiosak laeng. Kasapulak ti pangpakiredko iti riknak.”
“Iti ania a gapu?” insippaw ni Sgt. Cortez.
“Dimo kadi makita?” intudo ni Sgt. Ramirez ti naiparada a van iti nasipnget a paset ti kalsada nga awan ti matagtagitao.
“No agsasaoka, kunam la no daytoy ti damom a mangaresto iti drug pusher.”
“Hey, ten pounds a marihuana ti kadaklan a natiliwta, amigo. Small time drug users and drug pushers. Dayta a van, cocaine ti nagyanna. High grade cocaine. Ammom dayta. Ken five hundred pounds. And those two idiots inside the van, tao ida ni Gaspar Medalla.”
“So?” inyaleng-aleng latta ni Sgt. Ramirez.
“Napeggad ti aramidentayo.”
Nagkatawa latta ni Sgt. Ramirez. “Apay, naibusmon ti turedmo idiay Iraq?”
Kinusilapan ni Sgt. Cortez ni Sgt. Ramirez. Apagisu met a nagkiriring ti telepono ni Sgt. Ramirez. Ni John.
“Asidegkan?” sinaludsod ni Sgt. Ramirez.
“Apagruarko iti I-15, going westbound at Craig Road...”
“Maysa a milia ti kaadayom. Addakamto iti kanawan a paset ti kalsada. Iti nailet a kalye.”
Sumagmamano pay a minuto, simmangpeten ni John. Nagparada iti likudan ti lugan dagiti dua a sarhento. Limmugan iti Hummer dagiti dua a sarhento.
“Iti panagsiimmi iti warehouse, sinurotmi ti van a nagluganan ti lalaki a nangikapet iti bomba iti van iti inaladan ti Maxi-Clean. Nagsardeng dagiti Mehikano iti maysa a restaurant. Bayat ti pannangan dagiti dua, pinilitmi a linukatan ti van. Naduktalanmi nga adda kargada a cocaine. Pinarmekmi dagiti dua a Mehikano, rinimpong ken inabungotanmi ida tapno didatay mairupaan, sa inyegmi ida ditoy,” kinuna ni Sgt. Ramirez.
“Addada idiay van,” innayon ni Sgt. Cortez. “Nasipnget ken nalemmeng ditoy, natalgedtayo.”
“Sika ti mangeddeng no ania ti aramidentayo,” kinuna manen ni Sgt. Ramirez. “No awagam dagiti polis wenno ti DEA, desisionmon dayta.”
Nagpanunot ni John. “High grade cocaine?” sinaludsodna.
Nagtung-ed dagiti dua a sarhento.
Pinagandar ni John ti luganna. Inyabayna iti van. Imbilinna nga ikargada iti luganna ti 300 libra a cocaine, ibatida ti 200 libra. Nasdaaw dagiti dua a sarhento ngem saandan a nagsaludsod. Dimsaagda ket sipapardasda a nangyakar iti cocaine iti lugan ni John. Aggulgulagol dagiti dua a Mehikano a nakagalut ken nakaabungot. In-lock-da ti van. Sipapardasda a pimmanaw.
Nagkalugan da Sgt. Ramirez ken John idinto a sumarsaruno kadakuada ni Sgt. Cortez. Ni Sgt. Ramirez ti nagmaneho. Nakaul-ulimek ti sarhento ngem kasla alusiisen.
Inruar ni John ti selponna ket indayalna ti numero ti selpon ni Detective Coloma. Nagkiriring ti bangir a linia. Naminlima a nagkiriring sa napan iti voice message. Binaliwanna ti nagdayal.
“Wake up... wake up,” ulit-uliten ni John bayat ti panagurayna iti pannakasungbat ti selponna.
Naglitek iti bangir a linia. “Hello,” barbar ti timek, malasin a naggapu iti napilit a nakariing.
“Sorry no nasingaka, lakay. Ni John daytoy.”
“Alas kuatro iti parbangon, lakay. Dika kadi makaturog?”
“Adda sagutko kenka, ti lalaki a nangbomba iti van idiay Maxi-Clean. Ken ti kargana a cocaine,” kinuna ni John. “No nakasaganaka, itedko ti adres. Ken masapaul a mapanka a dagus amangan no saanmo a madanon ida.”
Inted ni John ti adres ti lugar, ken ti license plate, ken kolor ti van.
“Thanks, John... I owe you one this time.”
Imbolsa ni John ti selpon.
“So, ania ti aramidentayo iti three hundred pounds a cocaine?” iti kamaudiananna, nasaludsod met laeng ni Sgt. Ramirez.
Saan a simmungbat ni John. Inruarna ketdi manen ti selponna.
KAPIGSA ti urok ni Armando Geoleti. Ngem nariing iti kiriring ti telepono nga adda iti night stand iti abay ti katre. Namin-adu ti kiriring ti telepono sa nagsardeng. Ngem madamdama, nagkiriring manen. Agsardeng sa manen agkiriring. Nagareng-eng ti lakay. Agsusugel. Minatmatanna ti relo iti abayna ket napurar iti lawag a naggapu iti digital a relo. Alas kuatro media iti bigat. Nagdayamudom sa nagilunod. Ngem pinidutna ti telepono.
“Hello,” napigsa ti timekna a makasuron.
“Sorry no nariingka, Don Geoleti. Ni John daytoy.”
Apagapaman a nagpanunot ti lakay. Sa dimmakkel dagiti matana. Kasla namurmurayan.
“Napateg la ketdi ti ibagam ta sininganak. Ammom siguro a kagurgurak ti maririing?”
“Adda kargak nga ammok a paginteresam, Don Geoleti. I need to see you right away.”
“Kargam ti pagbayadmo iti utang ti amam?”
“Napatpateg nga amang ngem iti dayta. Ibagam kadagiti guardiam a luktanda ti gate.”
Naklaat ti boss ti Mafia. “Kasano a talkenka?” kinunana kalpasan ti sumagmamano a kanito.
“Diak ammo. Ngem no awan ti panagtalekmo kaniak, pumanawak ket ideliberko daytoy kargak ken ni Don Bertolino. Your choice...”
Ad-addan ti pannakakellaat ti lakay. Kasano nga ammo daytoy nga agtutubo ni Don Bertolino a pangulo met laeng ti sabali a grupo ti Mafia? Kagurgurana dayta a lakay. Nalastog. Arogante. Dakkel a kakompetensiana.
Pampanunoten itan ni Don Geoleti no ania ti karga ni John. Immanges iti nauneg. Ta no ania man dayta, dina kayat nga agtungpal iti kabalubalna.
Pinisitna ti buton ti intercom iti guardia iti ruangan.
ALUSIISEN ni John a nakaparking iti sango ti landok a ruangan. Uray ni Sgt. Ramirez, alusiisen metten. Maripiripnan ti kayat ni John a mapasamak. Ken ti mabalin nga ibunga ti napasamaken. Kinurosda ti dana ni Gaspar Medalla ket ammona dagiti peggad nga agur-uray kadakuada no maammuan ni Gaspar Medalla ti panangtakawda iti cocaine daytoy.
“Aglukatka… aglukatka,” itantanamitim met ni John idinto a dina mailisi ti imatangna iti ruangan.
Pagam-ammuan, naglukat ti ruangan. Simrekda iti inaladan.
Naggaabayda a tallo bayat ti panangitalmeg ni John iti door bell iti ridaw. Dagdagus a nailukat ti ridaw. Tallo a nababaked a guardia ti simmabat kadakuada. Naka-upholster dagiti paltogda iti abagada.
“Carrying any weapon?” sinaludsod ti maysa a guardia.
Nagtung-ed dagiti tallo.
Insenias ti guardia ti panangisukoda. Tinung-edan ni John dagiti dua a sarhento. Inyawatda dagiti paltogda iti guardia.
Impadalan ti sabali a guardia ti metal detector kadagiti tallo. Nagiri ti detector apaman a naibatog iti tumeng ni Sgt. Cortez. Kinita ti guardia ti sarhento.
“Metal rod... iti tumengko,” kinuna ti sarhento, bulonna a nanglislis iti pantalonna. Naminar pay laeng ti atiddog a piglat ken dagiti nagdaitan iti sakana. Pakalaglagipanna iti serbisiona iti Iraq.
Nagngirsi ti guardia. Rinikisana dagiti tallo. Kayatna a siguraduen nga awan ti ‘wire’ a naikapet iti bagida. Kalpasanna, insenias ti guardia ti iseserrekda.
Nadatnganda ni Armando Geoleti nga agur-uray iti salas.
“Nakasapsapa a sininganak, John. So, it better be good,” impasabat ti don.
“Ammok a saanka a mapaay, Don Geoleti. Adtoy ti tulbek ti luganko. Paiserrekyo iti warehouse. Nabulgar unay a lukatanyo iti ruar, iti imatang ti no asino a mangsisiim kadakayo.”
Nagmulagat ti lakay a mailangaan nga agdudua.
“Trust me, Don Geoleti,” impasingked ni John.
Sineniasan ti lakay ti guardia. Kimmita met ti guardia ken ni John a nangibato iti tulbekna iti guardia a nagturong metten a dagus iti ruar. Imbilin ni Don Geoleti ti panangsurotda kenkuana iti warehouse. Nakaparadan ti Hummer idi makagtengda iti warehouse. Dinagdagus ni John a linukatan ti lugan.
“Dagitoy dagiti ‘goods’, Don Geoleti.” Intudo ni John dagiti nakabalkot a droga.
“Drugs?” nayesngaw ti don.
“Cocaine, Don Geoleti. High, pure grade cocaine.”
“Nangalaanyo?” sinaludsod ti lakay sa sineniasanna ti maysa a badigardna a mangamiris iti droga.
“Saanen a nasken a maamuam, Don Geoleti.”
“Diak kayat ti sorpresa. No kayatmo ti maki-deal kaniak, masapul a maammuak no asino ti naggapuanna. Wenno pumanawkayon ditoy ket awanen ti bibiangko no asino ti pangipanam.”
Kinita ni John dagiti dua a sarhento. Agpadada a nangkuti laeng iti abagada. Ammo ni John a sao laeng dayta ti lakay. Saan koman a pinastrek daytoy ida.
“Pure grade, boss,” kinuna ti guardia sa nagtupra iti panangsimsimna iti cocaine.
“Agur-urayak pay laeng iti sungbatmo, John. Naggapuanna?”
Minatmatan ni John ti lakay. Nakipinnaliiw. Idi agangay, immanges iti nauneg ni John. “Ni Gaspar Medalla,” arinkedkeden a nagkuna.
Immisem ti lakay. “Tinakawyo?”
“Kinompiskami.”
“Nabayagen a kayatko a pagnakemen daydiay a loko. Kasano a naaramidyo? You guys are impressive. Sadino a paset ti lubong ti naglemlemmenganyo? Masapulko dagiti tao a kas kadakayo. Mabalinyo ti agtrabaho kaniak. Sigurado nga adda lugaryo iti organisasionko no mapanunotyo ti agtrabaho kaniak,” sifisem ti lakay a nangkallabay ken ni John.
“Thanks, Don Geoleti, but not this time.”
“Ammom nga indeklaram ti gubat iti daydiay a drug cartel?” inimtuod ti lakay.
“Ammomi. Ngem siguradok a saannanto a maammuan ti nangaramid iti daytoy.”
“Okey, ania ngarud ti kayatmo nga aramidek iti daytoy?”
“Six hundred K in cash, right now… ken pakawanem ti utang ni daddy… ken proteksionmi nga awan ti mangsagid kadakami..”
Nagkatawa ti lakay. “Imposible!”
“Pure grade ti indeliberko kenka, Don Geoleti. Aggatad iti dandani lima a milion.”
Nagkatawa manen ni Don Geoleti. “Kinuentam iti street value-na, iho. Ngem napagraemnak. Nag-research-ka a talaga. Ngem panunotem… bayadam dagiti distributor, adu a chain ti mabayadan… ken ti peggad a siak laeng ti mangibaklay no matsambaandakami dagiti pannakabagi ti linteg. Mapakawan ti utang ti amam, ikkankayo iti proteksion... that’s it...” Nagwingiwing ni John. “Four hundred K in cash. That’s my final offer. No saan, idelibermi iti makaited kadakami iti dayta a kantidad. Your decision, Don Geoleti."
(Maituloyto)
