Ni LEILANIE G. ADRIANO

SIUDAD TI LAOAG – Ar-araken dagiti ubbing ken nataengan ti pop-up library a naipuesto iti akindaya a paset ti Kapitolio ti Ilocos Norte. Naglaon ti nasao a libraria kadagiti magasin a pakairamanan ti Bannawag, pocketbook, libro a para ubbing, ken dadduma pay.

Naisaad iti asideg ti parke ti Kapitolio a pagaayaman dagiti ubbing ken imatonan dagiti tattao ti Ilocos Norte i-hub center, panggep ti nasao a libraria nga abbukayen kadagiti Ilokano ti liwliwa manipud iti panagbasabasa.

    POP-UP LIBRARY. Makais-isem ti maysa a barito kalpasan a nayawatan iti babasaen manipud iti pop-up library ti Siudad ti Laoag. Naisaad iti akindaya a payak ti Kapitolio, pagayaat a bisitaen dagiti ubbing ken nataengan ti nasao a pop-up library nangruna itan ta limmukayen ti restriksion iti kuarantina iti nasao a siudad. (Leilanie G. Adriano)

    Babaen ti naluklukayen a panagtignay dagiti umili, kuna ni Grace Justo a maysa nga  staff ti Provincial Library itay napan a bulan a nangiwayatda pay iti panagistoria kadagiti ubbing iti parke ken nangisagutda iti libre a babasaen kadagiti interesado nga indibidual.

    Lokal
    Ruth Padilla, agngayangay a kas Diputado ti Nueva Vizcaya

    Ruth Padilla, agngayangay a kas Diputado ti Nueva Vizcaya

    Agpatingga ti pop-up library agingga iti katapusan.

    Sakbayna, naipatakderen daytoy a mobile library iti nadumaduma a disso iti probinsia agraman iti Ilocos Norte Provincial Jail, ngem temporario a naiserra gapu iti yaadu ti kaso ti COVID-19 iti probinsia.

    Gapu iti agtultuloy a panagbaba ti bilang ti kaso, intuloyen ti libraria ti probinsia daytoy a programana a pop-up library ken manamnama a mapatakder daytoy iti nadumaduma a disso iti probinsia. 

    Iti ili ti Vintar, nayalnag met ti mobile library tapno masupusopan ti panagkamtud dagiti marigatan a makabasa ken makaawat iti leksion. 

    Inrusat daytoy ti Florentino Camaquin Integrated School (FCIS) a makadandanonen kadagiti barangay ti Parut, Margaay, Lubnac, ken Parparoroc a lugar dagiti agad-adal nga addaan iti nakapsut a signal wenno awanan iti koneksion iti internet. 

    Iti immun-unan nga interbiu, kuna ni Arnel Sabuco nga school head ti FCIS a naiwayat daytoy a proyekto tapno makatulong a mangrisut ti dawat ti Department of Education (DepEd) a makipaset amin a pagadalan iti sibubukel a pagilian iti panggep nga amin nga agad-adal, agbalin a nalaing nga agbasa. 

    Segun iti lokal a panagadal, mapan a 8 iti 10 nga agad-adal iti tunggal barangay ti marigatan nga agbasa gapu iti panagkurkurang kadagiti material ken pannakayasideg kadagiti moderno a material iti panagadal.

    Gapu iti daytoy, nangiwayat ti FCIS kadagiti aktibidad iti panagur-or iti pondo babaen ti tulong ti Parents-Teachers Association, ken babaen ti tulong ti lokal a turay ti Vintar, tapno makaparnuay iti moderno a mobile library tapno agpaay iti kasapulan dagiti agad-adal, manipud iti panagbasa agingga iti panagusar iti teknolohia. 

    (Damag manipd iti Philippine News Agency.)