Nobela ni Norberto D. Bumanglag, Jr.
PIMMARDAS ti panagbitek ti barukong ni John. Nagsasallupang dagiti dakes nga eksena a simmaleksek iti panunotna. Nalagipna manen ti pangta ni Gaspar Medalla. Ti saanna a panagtalna agingga iti saanna a mapasubli ti 15 a milion a doliar a kuarta daytoy. Nangemkem. Ta agingga a saanna a mapagtalna ni Gaspar Medalla, kakuykuyogto ti peggad ti biagda iti agnanayon.
“John, mangngegnak... addaka pay laeng? Inkuyogmo ti mamangmo?” Ni manen Col. Davis.
“Saan.” Nakapuy ti timek ni John. “Awan iti kuartona? Saan nga immulog laeng iti casino floor tapno agay-ayam iti slot machine?”
“John, naiget ti bilinmi a saan a rummuar nga agmaymaysa.”
Kasanon no kinidnap ni Gaspar Medalla ti inana? Ngem iti ania koma a rason? Nakasaganan a mangisubli iti kuarta ti lakay. Apay koma a dadaelen daytoy dayta a gundawayna? Wenno ni Ricky Ramsay ti nangala?
“Adda pay laeng ti lugan iti likudta, John,” kinuna ni Sgt. Ramirez.
Timmaliaw iti likud ni John. Nakaas-asideg ti makapurar a lugan iti likudda. “Itarayam,” imbilin ni John.
“What?” sinaludsod ni Col. Davis iti bangir ti linia.
“Saan a sika, koronel. Agawidkamin. Iti treinta minuto, urayennak iti sango ti hotel,” kinuna ni John ket pinutolnan ti saritaanda.
Binaddekan ni Rick ti siliniador. Nagiwes-iwes a nanglabas kadagiti lugan. Pumarasipis ti danum iti napardas a panagmanehona. Ngem napaspaspas ti lugan a simmurot kadakuada. Immabay ti lugan, nga itan malasinda a BMW X5. Nalidem iti uneg ti lugan ta nalidem ti sarming ti tawa. Pimmardas ti taray ti X5 a nangkuros iti lane ni Sgt. Ramirez. Inawid ti sarhento ti manibela iti kanawan a nangliklik iti pannakadungparna iti X5. Natinnagda iti abaga ti kalsada ket nagiwes ti Hummer iti pettat a panagsardengda. Iti pegges ti X5 nga immadayo ken ti bumayakabak a tudo, awan ti tiempoda a nakaala iti numero ti plaka daytoy.
Nagkinnita da John ken Sgt. Ramirez ngem awan ti tagtagarida. Pinalabasda ti trapiko ket idi nawayan, nagsublida iti kalsada.
AGUR-URAYEN ni Col. Davis iti sango ti hotel. Madlaw latta ti saanna a pannakatalna. Inlawlawagna a dagus ken ni John ti napasamak. Adda ni Mrs. Villa iti bukodna a kuarto ket nabatida ken Sgt. Cortez iti sabali a kuarto nga agay-ayam iti baraha a pangpalpalabsanda iti oras. Kalpasan ti dua nga oras, kinitada ti kuarto ngem awanen ni Mrs. Villa. Napanda iti casino. Sinawarda. Ngem awan a nakitada ni Mrs. Villa. Nagturong ti sarhento iti Las Vegas Boulevard bareng no agpagnapagna laeng sadiay ti baket. Ngem awan latta.
“Sorry, John. Basolmi. Nagyankam’ koma lattan iti kuartona,” impadispensar ti koronel.
“Saanmo a basol, koronel. Namin-adu a nabagbagaan ni mom a saan a rumrummuar,” kinuna ni John. Inruarna ti selponna. Indayalna ti numero ti mamangna. Kalpasan ti naminlima a kiriring, nagturong iti voicemail.
“Mom, where are you? Please call me back ASAP,” imbati ni John ti mensahe iti voicemail. Nagsennaay. “Awagak ti Las Vegas Metropolitan Police Department?” kinunana iti koronel.
“Ibagada laeng nga agurayka iti twenty four hours. Up-uppat pay laeng nga oras ti napalabas nanipud itay nagpukaw. Ken amangan no saan met laeng a nagpukaw,” kinuna ti koronel.
“Dakes ti agparparikna kaniak, koronel.”
“Sorry, John.”
“Mister Davis?” sininga ida ti maysa a lalaki nga aglanglanga nga Italiano. “I am Keith, Chief of Security. Imbaonnak ti CEO ta kasapulan kano a kitaem ti DVR ti security camera. Saan a makaumay ni Mister Alden gapu iti personal commitment. Ngem impanamnamak kenkuana a no ania man ti kasapulanyo, ipaaymi ti amin a maitulongmi.”
Ad-addan a rinaem ni John ni Col. Davis. Ngem ammona no apay a napigsa ti kapetna iti management ti casino. High roller a sugador ti koronel iti daytoy a casino.
Simmurotda ken ni Keith. Simrekda iti dakkel a kuarto a nakaibitinan ken nakaipaunoran dagiti high tech a gadget ti surveillance system. Dadakkel dagiti TV monitor a nakabitin a pakabuyaan iti sibubukel nga operasion iti uneg ken ruar ti casino. Ditoy ti pangsiputanda kadagiti amin a tao, sumrek wenno umuneg, dagiti makisugsugal a no atapenda nga agsuitik iti pannakisugalda, alisto laeng a mai-zoom-da. Uray dagiti ginasgasut nga agnaed kadagiti ginasgasut a kuarto iti hotel, naka-record amin a gunayda iti iseserrek wenno iruruarda iti kuarto, iti pannagnada iti pasilio ken iti iseserrekda iti elevator.
Pinagtugaw ida ni Keith iti sango ti dakkel a monitor.
“Ti laeng naibaga kaniak ni Mister Alden ket kayatyo a maammuan no kaano a pimmanaw ni... Misis...” Nagsardeng ni Keith a kasla manglaglagip iti nagan.
“Villa,” inyallawat ni John.
Immisem ni Keith.
“Iti nagbaetan ti alas kuatro ken alas sais. Iti maikasangapulo a kadsaaran. Room 1002,” kinuna ti koronel.
Rinugian ni Keith ti nangsapul iti time-frame nga inted ni Col. Davis. Tsinekna ti oras. Sinapulna kadagiti tape ti lugar a nakaipaturongan ti camera. Agingga a naipakita ti pasilio. Awan ti tao. In-fast forward ni Keith ti DVR. Napardas ti panagpuligos ti oras.“
“Hold it... freeze it,” kinuna ni John. “Iti monitor, five twenty PM.”
Nai-freeze ti ladawan ni Mrs. Villa a rumrummuar iti Room 1002. Nakapantalon iti nangisit. Naka-t-shirt iti asul a nauritan iti balikas a Las Vegas. Pinagandar ni Keith ti DVR. Magmagna ni Mrs. Villa nga agturong iti elevator. Nakabitbit iti Louis Vuitton a shoulder bag. Simrek iti elevator. Iti uneg ti elevator, adda tallo a lallaki a nadanonna.
“Mabalin nga ikadakkelmo ti ladawan dagiti tallo a lallaki, Keith?” sinaludsod ni John.
Nai-zoom dagiti tallo. Latinoda ngem awan ti mailangaan ni John.
Iti casino floor, magmagna ni Mrs. Villa. Nakilinnetlet kadagiti adu a tao iti pagsusugalan. Sursuroten latta ti camera agingga a nakagteng iti ruar a pagdissaagan dagiti guest iti hotel. Immasideg iti maysa a babai, naginnarakupda. In-zoom ni Keith ti ladawan, ni Sandra. Agsarsaritada. Pina-check ni John ti aglawlawda. Dagiti tallo a Latino iti elevator, nakatakderda iti asideg. Mangrugi manen nga agkebba ni John.
Madamdama, pimmayapay ni Sandra iti taxi. Adda immasideg a taxi. Nailukat ti ridaw daytoy. Immuna a simrek ni Mrs. Villa, sinaruno ni Sandra. Pagam-ammuan, dua a Latino ti nagdardaras a naglugan— maysa iti likud ken maysa iti sango. Nairikep ti ridaw ket naggunayen ti taxi.
“Shit!” nayesngaw ni John.
Nagngariet ni Col. Davis a nangapros iti rupana sa immanges iti nauneg. In-rewind ni Keith ti DVR sa in-play-na ti tape iti slow motion. Dagiti dua a Latino iti elevator ti simrek iti taksi a nagluganan da Sandra ken Mrs. Villa.
“Imprintak ti ladawan, ti nagan ken plate number ti taksi agraman ti ladawan dagiti tallo a Latino,” kinuna ni Keith. “I’ll call the police...”
“No,” inyatipa ni Col. Davis.
“Sensitive nga information daytoy, Keith,” innayon ni John. “Please, don’t call the police... Dakamin ti makaammo iti daytoy. Thanks for helping us.”
“You’re welcome.”
“And, Keith, relay my thanks to Mister Alden again. And tell him nga iti sumaruno a million dollar poker tournament, masapul a pakaammuannak,” kinuna ni Col. Davis.
Innalada dagiti naiprinta a ladawan ket nagdardarasdan a rimmuar.
RASAW a rasaw ni Agent Donoteli. Agtantanubutob sa kitaenna manen ti ladawan ti amarilio a taksi a sinerkan ni Mrs. Villa ken maysa a babai nga awan ti pakainaiganna iti daytoy a kaso. Inlangaanna dagiti tallo a Latino iti elevator ngem awan ti ma-pick-up ti computer-da a pakaipadaan ti ladawan iti file-da.
Impeksa ni John ti panagduaduana iti saan a naan-anay a proteksion nga impapaayda iti inana. Binallaaganna ni Agent Donoteli a maitantan ti pannakipagkitana ken ni Gaspar Medalla agingga a dina masigurado a natalged ken awan ti dakes a mapasamak iti inana.
Nagdanag ti ahente. Ni laeng John ti kayatna a mangisubli iti kuarta. Awanton ti sumaruno a panawenda a mangaresto ken ni Gaspar Medalla.
Nagpagnapagna. Itay laeng bigat, pinagsinnungbatanda ken Agent Rojas no kaano nga irugida ti 24 hours a proteksion ni Mrs. Villa. Inton bigat, inkalintegan ni Agent Rojas. Impapatina nga itan. Ensegida. Nangatiw ni Agent Rojas. Mangrugi inton bigat ti proteksion, ngem naladawen ti amin.
Nailukat ti ridaw. Simrek ni Agent Rojas.
“Ania ti napasamak?” apagdillaw ti anal-al ni Agent Rojas a nagsaludsod.
“Isu dayta ti napasamak.” Intudo ni Agent Donoteli ti ladawan iti dakkel a TV monitor. Ni Mrs. Villa ken maysa a babai ken dua a Latino. “Maipapan a nakidnap ni Misis Villa.”
Nagtugaw ni Agent Rojas. “Adda kadin timmawag no asino ti akin-responsibilidad? No ania ti kiddaw ti kidnaper? Ken no asino dagiti dua a Latino?”
“Awan pay.”
Immanges iti nauneg ni Agent Rojas. “Basolko. Dimngegak koma kenka.”
“Nalpasen.”
“Ket, ania ti naaramidyon?”
“Napakaammuanen dagiti amin a pannakabagi ti linteg... LVMPD, North Las Vegas Police, Henderson Police, Nevada Highway Patrol, Department of Homeland Security, including the Border Patrol. Naiyisyu ti All Points Bulletin iti pannakatiliw dagiti dua a Latino ken ti driver ti taksi. Ni Detective Coloma ti coordinator kadagiti amin a local enforcement agencies.”
“Good,” kinuna ni Agent Rojas. Pinunasanna ti rupana iti napkin. “Asino iti panagkunam ti akin-aramid iti daytoy?”
“Without a doubt, ni Gaspar Medalla.”
“Ngem awan ti rasonna. Isublitayon ti kuartana.”
“Better bargaining chips. Adda sabali a kayatna malaksid iti kuarta. Ken maidiktarna ti ania man a kayatna.”
“Napukaw ngarud ti bentahetayo?”
Nagtung-ed ni Agent Donoteli. “Ania ngata ti sabali a kiddaw ni Gaspar Medalla no kaskasano laeng?”
“Ni Roger Villa,” impaspasarak ni Agent Rojas.
“Saanto a mapasamak dayta.” Nagwingiwing ni Agent Donoteli. “Kinapudnona, iti daytoy a kanito, masapul a mangibaontayo iti tao a sililimed a mangipanaw ken ni Roger Villa iti pagbaludan. Saanak nga agtalek iti daydiay a warden.” Nabayagen a sililimed nga im-imbestigarenda gapu iti corruption. Ngem agingga ita, awan ti makaanay nga ebidensia a pangtiliwanda iti butiog a lakay.”
“Wen,” inyannugot ni Agent Rojas. “Masapul a mailemmeng ni Roger Villa iti safe house sakbay nga adda dakes a mapasamak kenkuana. Saanto la ket ngarud a makikooperasion ni John Villa. We need to go to Indian Springs.”
Nagkiriring ti secured a telepono. Ti superbisorna. Impakaammo daytoy a na-intercept-da ti telepono ti warden ti Indian Springs Federal Prison. Adda hit a naiputong iti ulo ni Roger Villa. Mapasamak iti ala una iti parbangon ti Lunes.
“Right now, we have sufficient evidence to charge him of a crime. So get ready, we may have to arrest him sooner than expected,” kinuna ti supervisor.
AGTUGTUGAW ni Armando Geoleti iti sango ti lamisaanna a mangsimsimsim iti nangina a wine a naggapu pay iti Sicily, ti kadakkelan nga isla iti Italia. Iti computer monitor, buybuyaenna dagiti kuarta a naideposito iti account-na manipud kadagiti taona iti Los Angeles. Pudno ti kinuna kenkuana ni John Villa. Makaganansia iti nasurok a dua a milion iti inlako daytoy a high grade a cocaine. Iti dina ammo a gapu, raemenna ti kabaelan daytoy nga agkabannuag. Ad-adda pay siguro a dayawenna no maipaknina ni Gaspar Medalla. Awanton ti dakkel a kakompetensiana. Bukodnanton ti Los Angeles ken dagiti kabangibangna a siudad agraman ti Las Vegas. Napaisem.
Nagkiriring ti selponna. Importante la ketdi nga awag daytoy. Manmano ti makaammo iti numero ti selponna.
“Don Geoleti, pasensiakay laengen no nasingakayo.”
“John? John Villa?
“Wen, Don Geoleti. Adda koma napateg a saludsodek.”
“Saan pay a nagbayad dagiti kliente ti kompaniayo? Natangken sa ketdi ti ulo dagita a kustomermo. Ngem saanka a madanagan, ibaonko manen ni Marco ta pasitak dagiti loko.” Medio masuron ti lakay.
“No, saan a dayta ti inawagak. Nagbayadda. Kinapudnona, indeliberda a dagus ti kuarta iti daydi aldaw nga imbagak kadakayo. Thank you manen, Don Geoleti.”
“Oh…” Nakagin-awa ti lakay. “Ania ngarud ti maitulongko kenka?”
“Kinidnapda ti inak.”
Naklaat ti don. “Sorry to hear that. Any suspect?”
“Ni Gaspar Medalla.”
Nadlaw ti lakay ti nauneg a panaganges ni John.
“Ania ti maitulongko? Ibagam laeng. Mabalinko a pakaammuan a dagus dagiti taok a tumulong a mangsapul iti inam.”
“Thanks, Don Geoleti. Ngem dakami ti makaammo iti daytoy. Kayatko laeng a maammuan no ammoyo ti lokasion dagiti safe-house ni Gaspar Medalla ditoy Las Vegas.”
Nagkidem ni Don Geoleti sa immanges iti nauneg. “John,” kinunana, “mortal a kabusorko ni Gaspar Medalla. Ngem iti lubongmi, adda bukodmi a Code of Ethics. Awan pay ti inaramidna a nangdangran iti organisasionko. A kas met iti awan pay nga inaramidko a diretso a panangdangranko iti organisasionna. Malaksid laeng no dangrannak wenno dangranna ti asino man kadagiti taok. Ngem agingga a saannakami a dangran, saanmi a liputan ti paglinteganmi.”
“Agpeggad ti biag ti inak, Don Geoleti. I am begging you to make one little exception this time. Please...”
Nagpanunot ti lakay. “Meet me in thirty minutes. Sunset Park.”
NASIPNGETEN iti parke. Nalamiis pay laeng ti palayupoy ti angin nga insangbay ti tudo itay malem. Nakasuot ni John iti sweat shirt nga adda hood-na a nakadalungdong iti ulona. Sumagmamano laeng ti tao iti asideg ti pond a pagtaktakderanna. Iti saan unay nga adayo, adu dagiti agaayam iti baseball iti nalayus iti lawag a ball park. Naringgorda. Iti pagparkingan, agur-uray ken agsipsiput kenkuana ni Sgt. Ramirez. Panglawaen ti sweatshirt-na ket saan a malasin ti Glock .45 nga insalikadna. Impuestona ti naka-on a Bluetooth-na. Nakapuy ti sayengseng ti Bluetooth.
“Six o’clock,” timek ni Sgt. Ramirez.
“John…”
Nalasinna a dagus ni John ti timek ni Don Geoleti iti likudanna. Agpusipos koma ngem binallaagan ti don a saan a tumaliaw.
“Agyamanak iti yaannugotmo a makipagsarak kaniak, Don Geoleti.”
“Diak talken ti selponko. Narigaten no adda sabali nga agdengdengngeg.”
Nagna ni John ngem saan a timmaliaw iti lakay a sumarsaruno kenkuana. Naginad ti pannagnada.
“Tallo ti safehouse ni Gaspar Medalla,” kinuna ni Don Geoleti. Narigatmo a mastrek. They are all well protected, surveillance security camera… ken nagtagiarmas a guardiana. You need my help. Kayatka a tulongan.”
“Thank you, Don Geoleti... ngem kabaelanmi daytoy. Ken maysa, naalertuanen dagiti pannakabagi ti linteg. Agdama a sapsapulenda ni mama. Ngem saanak nga agtalek kadakuada. Ti laeng kasapulak kenka ket ti lokasion dagiti safehouse ni Gaspar Medalla.”
“John, possible compromise...” ni Sgt. Ramirez iti Bluetooth.
Inwaras ni John ti panagkitana.
“Okey... ngem no kasapulam ti tulongko, dika agalikaka nga umawag kaniak,” kinuna manen ni Don Geoleti.
“Check two o’clock, John...” Ni Sgt. Ramirez.
Inturong ni John ti panagkitana iti kanawan a sanguananna. Dua a tao a nakadalungdong iti hood ti nakitana.
“Abort, John... abort!”
Ngem naladawen ti amin. Naalibtak dagiti mata ni John a nakakita kadagiti dua a lallaki iti masanguananda a nangasut iti paltog. Nagsidduker. Naipaturong dagiti paltog ken ni Don Geoleti. Sipapardas a nangasut iti paltogna. Rinugmaanna nga imbaliktad ti lakay. Naibaltogda nga agpadpada iti karuotan, kinagiddan dayta ti nagsasaruno a panangkalbit ni John iti gatilio ti paltogna.
Nabuak dagiti agaayam iti baseball. Nagikkisda.
“Are you okay, Don Geoleti?” sinaludsod ni John.
“Yeah... I’m okay,” agtigtigerger ti timek ti lakay. “Ania ti napasamak?”
Napardas nga immasideg dagiti badigard ni Don Geoleti. Pinaturonganda a dagus iti paltog ni John.
“Not him, you idiot!” imbugkaw ti lakay sa intudona dagiti dua a nalusdak iti karuotan iti saan unay nga adayo kadakuada. Nangiruar ni Don Geoleti iti sobre, inyawatna ken ni John. “You need to go. Dakamin ti mangdalus iti daytoy. As far as I’m concerned, you were never here. And thank you for saving my life.” Inarakup ni Don Geoleti ni John sa induronna daytoy. “Go!”
Arintukiaden ni John a pumanaw. Imbolsana ti sobre nga inted ni Don Geoleti. Nagtaray a nagturong iti lugan a pagur-urayan ni Sgt. Ramirez. Agan-andaren ti lugan idi sumagpat daytoy. Pimmanawda a dagus iti parke. Iti saan unay nga adayo, napigsa ti adu a sirena nga umas-asideg iti ‘yanda.
Nakaul-ulimekda kabayatan ti panangpampanurnorda iti kalsada a pimmanaw iti Sunset Park. Padpadasen ni John a punasen iti panunotna ti panaggilap ti apuy iti murdong ti paltogna a sinaruno ti pannakaitublak ti dua a tao.
Nakaun-uneg ti angesna ket mariknana itan ti panagtigerger dagiti ramayna. Iti umuna a gundaway, nakapaltog iti tao iti ruar ti teatro ti paggugubatan! Saan nga iti Iraq wenno Afghanistan!
“Nainkalintegan ngata ti panangpaltogko kadagiti dua?” nakunana.
“Siempre, nainkalintegan,” insungbat ni Sgt. Ramirez.
Impagarup ni John a kasarsaritana laeng ti bagina. Tinaliawna ti sarhento.
“Nabayagen a naideklara ti gubat kontra iti pamiliam, captain. Iti panangputolda iti ramay ni mamangmo, iti panangbulbulloda ken ni Mister Villa iti pagbaludan, iti panangkidnapda ken ni Misis Villa ken iti pananggandatda a mangpatay kenka. Awan ti nabati a pagpiliam. Sika wenno isuda ti matay. Sinalaknibam laeng ti bagim.”
Naun-uneg manen ti anges ni John.
“Relaks. Panunotem ketdi ti panangisalakantayo ken ni Misis Villa sakbay nga adda dakes a mapasamak kenkuana,” kinuna ti sarhento.
DUAPULODA amin. Uppat a kameng ti US Marshall, dua nga FBI ken sangapulo ket uppat a kameng ti SWAT team ti DEA. Naka-full gear-da amin: bullet proof vest, helmet, Sig Sauer P229 ken sumagmamano a magasin iti siketda. Nagduduma a klase ti M16 ti iggemda. Agbibitin dagiti waya iti lapayagda.
Nagtakder iti agsumbangir a sango ti ridaw da Agent Donoteli ken Agent Rojas nga agpada a nakaiggem iti paltog a naipaturong iti ngato. Nagpipila dagiti dadduma iti sango ti ridaw a nakasagana dagiti M-16-da. Segun kadagiti nakasaritada a correction officer, uppat ti adda iti opisina ti warden.
Maysa a nabisked a DEA ti adda iti sango ti ridaw a nakaiggem iti battering ram, landok a nairanta nga usaren dagiti pannakabagi ti linteg iti aw-awaganda iti “no-knock warrants.” Nagsenias ni Agent Rojas. Intag-ayna ti kanigid nga imana, sa nangrugi a nagbilang iti ramayna. Iti maikatlo a bilang, sipipigsa nga indugsol dagiti kameng ti DEA ti battering ram iti nakatulbek a ridaw. Apaman a naipanalbaag a nailukat ti ridaw, nagdardaras a simrek dagiti pannakabagi ti linteg.
“Freeze! Don’t move! Raise your hands!” inriawda.
Nakigtot ti warden ken dagiti tallo a correction officer. Awan a pulos ti gundawayda a nangasut kadagiti paltogda. Iti lamisaan, naiparabaw dagiti narepreppet a kuarta.
“What the hell are you doing in my office? This is my prison! You don’t have the right to barge in without my permission!” makapungtot ti warden a nagkuna ngem nakadidillaw ti nabessag a rupana ta iti panagkarayam ti panagkitana kadagiti kuarta iti lamisaan, ammona a nagpatinggan ti nabayagen nga ilimlimedna a kinataona.
Pinosasanda ti warden ken dagiti tallo a correction officer.
“You guys have been arrested for corruption activities. You have the right to remain silent...” imbaga ti FBI lead investigating officer ti Miranda Rights kadagiti uppat. Idi malpas, sinangona da Agent Donoteli ken ni Agent Rojas. “Now, go get Roger Villa and good luck!”
(Maituloyto)
