Nobela ni Norberto D. Bumanglag, Jr.
ALUSIISEN ti taxi driver a tiniliw da Detective Coloma. Daytoy ti drayber ti taksi a nakita da John a nangiluganan ti dua a Mehikano iti inana. Tumanaliaw daytoy iti aglawlaw ti uneg ti maysa a bassit a kuarto a ‘yanda a kasla adda kabutengna a paspasungadanna.
“Hamad Sayef,” kinuna ni Detective Coloma kabayatan ti pananglukibna iti folder. “Pudpudno a nagan wenno napidpidutmo laeng?”
“Pudpudno a nagan, sir.”
“Good,” inyisem ti detektib. Induronna ti sumagmamano a retrato iti sango ti driver. “Malasinmo dagita a tao iti retrato, Hamad?” sinaludsodna.
Nagwingiwing ti taxi driver; tinaliawna ti one way mirror.
“Nangibabaam kadakuada?”
Nagwingiwing latta ni Hamad. “Diak am-ammo ida, sir.”
“Agul-ulbodka, Hamad,” impatangken ti detektib. Mangrugin a masemsem iti daytoy a Lebanese a driver.
“No, sir... talaga a saanko nga am-ammo ida—”
“A kas iti saanmo a pannakaam-ammo iti nagan a Khalid Mustafa?” insippaw ti detektib.
Nakigtot ti driver. Napatunganga a nangkita ken ni Detective Coloma.
“Listen, Mustafa, or Hamad, wenno ania man ti naganmo. Naminsanen a naideportarka iti Lebanon idi addaka iti New York. Nagsublika a binaliwam ti naganmo gapu iti panangipilitmo a patayendaka dagiti terorista a Hezbollah no agtalinaedka iti Lebanon. No agpatangkenka laeng iti panagulbodmo kaniak, awagak ti Immigration ket isudan ti makaammo kenka. Isu a maminsan pay a saludsodek, nangidissaagam kadagitoy uppat?”
SINIRIG nga impalawlaw ni John ti night vision a largabista iti matantannawaganda a dakkel a balay. Maysa daytoy kadagiti tallo a balay nga impatuldo ni Don Geoleti. Isu daytoy ti kaasitgan kadakuada isu nga inkeddengda a daytoy ti umuna a paliiwenda. Adda silaw iti uneg ti balay ngem awan met ti makitana a gunay ti tao.
“All clear,” inradiona.
Inturongna ti largabista iti sikigan ti balay a pagtaktakderan da Col. Davis ken dagiti dua a sarhento. Uray no nakamaskara dagitoy, kabesadona ti kinaasino ti tunggal maysa kadagitoy. Nasiputanna ti maysa kadakuada a nagturong iti likud. Dua ti nagturong iti sango. Impalawlawna pay naminsan ti largabista iti umuna ken maikadua a kadsaaran ti balay ngem kaskasdi nga awan ti makitana a garaw iti uneg.
Timmakder. Implastarna ti maskarana. Inasutna ti Glock .45-na. Pinennekna no kargado ti magasin. Napno iti bala. Insublina met laeng. Kinalbitna ti safety lock ket nagdardarasen a nagturong iti balay.
Silulukat ti ridaw iti sango idi sumrek. Um-umkis ti alarma. Tumanalangkiaw ta no di maiddep ti alarma, sigurado a dumteng dagiti security a mangmonmonitor iti alarma. Madamdama pay, nagparang ni Sgt. Arnel Cortez a manglenglengnges ken mangguyguyod iti maysa a lakay a Mehikano. Nagsardengda iti sango ti pad ti alarma.
“Desactivar la alarma,” imbilin ni Sgt. Cortez. Bilbilinenna ti lakay a mangiddep iti alarma.
Agtigtigerger dagiti ramay ti lakay a nangipisit iti kombinasion ti alarma. Nagsardeng ti panagikkis daytoy. Inyawatan a dagus ni Sgt. Cortez iti selpon iti lakay sa imbilinna nga awagan daytoy ti alarm company.
“Ibagam nga aksidente a na-trip-mo ti alarma, dayta laeng. No mas. Comprende?” Indeppel ni Sgt. Cortez ti paltogna iti pispis ti lakay.
“Si,” insungbat ti lakay a madandanagan. Kinasaritana ti nangsungbat iti telepono. Imbagana ti kas iti imbilin Sgt. Cortez. “Usted no necesita enviar a su seguridad.” Saan a nasken a mangibaonkayo iti security, kinunana.
Innala a dagus ni Sgt. Cortez ti selpon ket iniddepna.
Apagisu met a nagsaruno a simmangpet da Sgt. Ramirez ken Col. Davis.
“All clear,” kinuna ti koronel. Kayatna a sawen nga awan ti nakitada a pagilasinan a nayeg da Mrs. Villa ken Sandra iti daytoy a balay.
Inruar ni John ti retrato ti inana ken ni Sandra. “Nakitam dagitoy a tao?” sinaludsod ni John idinto nga impakitana ti retrato iti lakay.
Miningmingan a naimbag ti lakay dagiti ladawan sa nagwingiwing. Kalpasanna, sinaggaysana a kinita dagiti uppat a nakamaskara iti sanguananna. Nakabesbesagen nga agtigtigerger.
Nagkinnita da John ken Sgt. Cortez. Awan ti makitada a rason nga agul-ulbod ti lakay. Ket kas kapardas ti iseserrekda, isu met laeng ti kapardasda a rimmuar iti balay. Nasabatda iti dalan ti Armed Response Team ti kompania ti alarma nga agturong iti safe house ni Gaspar Medalla.
Naulimekda nga uppat kabayatan ti panangpampanurnorda iti kalsada nga agturong iti maikadua a safe house. Kasla addada kadagiti nasulinek a siudad iti Iraq kadagiti panag-house to house search-da kadagiti enemy combatant santo met laeng awan ti masapulanda malaksid kadagiti mabutbuteng a sibilian. Ngem ituloyda latta ti mision, agingga iti masapulanda dagiti kabusor, iti laksid ti kinapeggad ti ar-aramidenda. Nagbalinda a nasinged nga aggagayyem, nga ad-adda laeng a napakired iti pannakapabasolda a nagtakaw iti no mano a milion a doliar. Gapu iti daytoy, saan nga agmaymaysa iti gubatna kontra iti maysa kadagiti kadadakkelan a drug cartel iti Mexico.
Nailansa ti panagkita ni John iti screen ti navigation system a mangipatpatuldo iti kalsada a surotenda. Ngem naipinta iti panunotna ti inana, ken ni Sandra. Ket nangemkem a nakalagip ken ni Gaspar Medalla.
Naginayadda idi makaasidegda iti maikadua a safe house. Nakaad-adu dagiti aggilapgilap a silaw ti lugan dagiti pannakabagi ti linteg. Agkaiwara dagiti miembro ti SWAT team. Naginayadda a limmabas. Nalagip ni John ni Agent Donoteli a nangipanamnama kenkuana a sarakenda ti inana.
“IMPOSIBLE,” ngimmato ti timek ni Agent Donoteli. Kasarsaritana ni Detective Coloma iti selpon. “Kasano nga awanda? Amangan no linokonaka ti taxi driver?”
“Nope. Nayegda ditoy ngem nayalisda iti sabali a safe house,” insungbat ni Detective Coloma. Adda iti balay nga impatuldo ti taxi driver a Lebanese.
“Sadino ti nakayalisanda?”
“Awan ti agpudno kadagiti adda ditoy. Aglalo iti daydiay sal-it a Mehikano.”
“Make them talk, detective...”
“Natangken ti kusitda.”
“Smack them... beat them up. Awan ti bibiangko no ania ti aramidem kadakuada. Basta ibagada no ‘yan ni Misis Villa.”
“Ipapanko lattan a saanko a nangngeg dagita a balikas manipud kenka Agent Donoteli. Awaganka no adda man masagapko a baro nga impormasion. But right now, awan ditoy ni Misis Villa ken ti kaduana.” Tinalmegan ni Detective Coloma ti end call icon ti selponna.
Nagsubli iti ‘yan ti Mehikano a nakaposas a nakatugaw iti sopa. Adda dua a polis a mangbambantay iti daytoy.
“Nakasaganakan nga agsao, Waldo?” sinaludsod ni Detective Coloma.
“Kunak ngaruden nga awan ti ammok,” natangsit ti sungbat ti napagsaludsodan.
“Ammom a mapaibaludka no saanka nga agpudno? Accessory to kidnapping, sa nayonam iti obstruction of justice. Agsangapulo a tawenka iti uneg ti pagbaludan.”
“Ket ania pay la ngarud ti ur-urayem, detektib? Take me to jail you, fuck!”
“Excuse me?” timmangar ti lapayag ni Detective Coloma iti busorna.
“Nangngegnak, saan kadi?” Nagngirsi ti Mehikano.
Naggilap ti panagkita ti detektib. Linengngesna a pinatakder ti Mehikano sa pinarusokanna daytoy.
Naganikki ti Mehikano sa nagkatawa. “Dayta ti kapigsaan a danogmo, Pinoy?” Naggarakgak.
Pasarunuan koma manen ti detektib a danogen ngem napataliaw kadagiti maikulkuleng a dua a polis a mangbuybuya kenkuana. Induronna ti Mehikano sa kinunana: “Take him to the squad car.”
Binayabay dagiti dua a polis ti Mehikano ket rimmuardan iti balay.
Agtigtigerger pay laeng iti pungtotna ti detektib. Kayatna a bulbuluen ti nakarit a Mehikano ngem nagalikaka. Dina kayat a maikompromiso ti propesionna. Nalagipna ni John ken dagiti kakadua daytoy a Marine. Napaisem.
Nagdardaras a rimmuar. Kinamakamna dagiti dua a polis a mangbaybayabay iti Mehikano. Awanen dagiti SWAT team. Dagiti dua a polis ken isuna laengen ti nabati. Imbilinna kadagiti dua a polis a ruk-atanda ti Mehikano.
Nagkinnita dagiti masmasdaaw a dua a polis.
“Awan ti makaumanay nga ebidensiatayo a mangtengngel kenkuana. Let him go,” innayonna.
LINABASAN ti komboy ti SWAT team ti lugan da John iti nainayad a yaadayoda iti rinaut dagiti pannakabagi ti linteg a safe house. Magagaran ni John a makaammo no nasarakan dagitoy ti inana. Apagisu met nga agkiriring ti selponna. Ni Detective Coloma.
“Nasarakanyo ni mom?” sigagagar a nagsaludsod ni John.
Nauneg nga anges ti nangegna iti bangir ti selpon. “Sorry.” Nakapuy ti timek ni Detective Coloma.
“Any lead?” inuntonna.
“Nothing. Ngem adda sagutko kenka. Ti maikatlo a Latino iti ladawan iti elevator. I got him ngem winayawayaak. Natangken ti ulona. Awan ti kayatna nga ipudno. Adtoy ti address. Sikan ti makaammo kenkuana.”
Insenias ni John ti panagsublida. Daras a nag-U-turn ni Sgt. Cortez ket uray la a naganit-it nga immasuk ti ligay ti lugan iti pardasda a nagsubli. Idi makagtengda iti sango ti balay, apagisu nga adda ti lalaki iti sango ti ruangan. Pinaabayan ni Sgt. Cortez. Imbaba da John ken Sgt. Ramirez ti abungotda ket sidadarasda a nangabay iti lalaki. Sakbay a nakapaggunay daytoy, linengngesen ni Sgt. Ramirez sa induronna iti lugan. Ginuyod ni Col. Davis, sa pinosasanna daytoy. Sipapardasda a pimmanaw. Inabungotanda ti lalaki. Innikkatda dagiti abungotda.
“Quien eres?” makapungtot a nagsaludsod ti Mehikano no asinoda.
Pinarusokan a dinanog ni Sgt. Ramirez ti Mehikano. Napaanikki daytoy.
“Isu dayta ti naganmi. Ken adu pay a nagduduma a naganmi no saanmo nga ibaga ti nangipananyo ken ni Misis Villa.”
“Diak am-ammo ti Misis Villa.”
Linukaisan ni Sgt. Ramirez ti maysa a mata ti Mehikano ngem pinagdumogna daytoy tapno saan a malasin daytoy ida. Inyasidegna ti retrato ni Misis Villa. Insarunona ti ladawanda a tallo a Latino a kaduada da Mrs. Villa ken Sandra iti uneg ti elevator. Insubli met laeng ni Rick ti abungot daytoy.
Napardas latta ti panagmaneho ni Sgt. Cortez nga agpadaya iti Lake Mead Boulevard nga agturong iti Sunrise Mountain.
“Ammomon no asino ti sapsapulenmi. Ita, saludsodek manen kenka, sadino ti ‘yan ni Misis Villa?”
“Diak ammo.”
Dua a nagsaruno a nadadagsen a danog ti nagdisso iti rusok ti Mehikano. Naganikki. Nagduaan ti koronel ti tengnged daytoy. Naggulagol. Umanangsab. Marigatan nga umanges. Saggaysan ti kamkamatenna nga angesna. Agkuyegyegen dagiti sakana. Rinuk-atan ti koronel ti tengnged daytoy. Nagbaeng a nagkubbo.
“Saludsodek manen... Sadino ti ayan ni Misis Villa?”
Nagulimek ti Mehikano.
“Me has oido?” imbugtak ni Sgt. Ramirez. Nangegnak? kinunana.
“No se. Diak ammo.”
Nagdisso manen ti nagsaruno a nadagsen a danog iti batog ti paragpag ti Mehikano. Kasla adda nagrippiis iti uneg daytoy ket napakiet iti sakit. Nagareng-eng.
Apagsang-atda iti bantay, kellaat a nagsardeng ti luganda. Naglukat ti ridaw. Ginuyod ni Sgt. Ramirez ti Mehikano nga imbaba sa intublakna kadagiti natitirad nga iking ti bimmato a bantay. Tantannawaganda ti sibubukel a buya ti nakalawlawag a siudad ti Las Vegas. Iti amianan, nalayus ti lawag ti silaw ti Nellis Air Base iti kangitingitan ti panag-practice-da a makigubat. Makatitileng ti daranudor dagiti fighter jet nga ag-take-off ken ag-touch down.
“Sadino ti ‘yan ni Misis Villa?” inriaw manen ni Rick ngem linemmes laeng ti daranudor ti limmabas nga F-18.
“Diak ammo!” insungbat ti Mehikano nga agsansanud a nakadalupisak iti kabatuan a daga. Mangrugin a maalana ti agbuteng.
Inasut ni Sgt. Ramirez ti Sig Sauer P229 a paltogna. Inkasana. Nangngeg ti Mehikano ti lanitek ti paltog ket ad-addan ti panagsanudna. Immungor manen ti F-18 a limmabas iti yanda. Namitlo a nagpaputok ni Sgt. Ramirez iti asideg ti ulo ti Mehikano. Nagtigerger daytoy.
“Pangngaasiyo, saandak a patayen,” impakpakaasi ti Mehikano. “Talaga a saanko nga ammo. Inyegda iti nakadanonanyo kaniak a balay ngem inyalisda met laeng. Saanda nga imbaga no sadino ti pangilemmenganda kadakuada. Saandak a talken iti dayta a banag.” Agtigtigerger daytoy, sa nagsiwisiw ti isbo iti pantalonna.
Nagkikinnita dagiti uppat.
“Por favor... saandak a patayen...”
Nagwingiwing ni John. “Awan ti ammona,” kinunana. Nalpay dagiti abagana. “Let him go,” imbilinna ken ni Sgt. Ramirez. Timmangad. Iti kinasipnget ti bantay a pagtaktakderanda, nakitana dagiti agtitimpurok a bituen a nangsilnag iti law-ang. Ammona nga atiddog daytoy a rabii. Inton bigat, agsaganada a mangisubli iti 15 milion a doliar ni Gaspar Medalla. Ideliberna ti kuarta ngem siguraduenna a sakbay a maapiras ti lakay dagiti papel de banko, mapasublina ti inana a sibibiag. Ta no saan, agbalin a nategteg a napino a papel ti kinse milion a doliar.
Inawaganna ni Detective Coloma a mang-pick-up iti Mehikano.
SIMREK ni Agent Rojas iti fortified a ridaw ti Communication Room iti DEA. Adda daytoy iti maikasangapulo a kadsaaran ti DEA headquarters. Iti uneg, napunno daytoy kadagiti moderno nga electronic listening device. Sumagmamano a bilingual translator a nakasuot iti headphone ti nakatugaw iti sango dagiti monitor.
Nagdiretso ni Agent Rojas iti opisina ti supervisor a mangsangsango kadagiti agkaiwara a napuskol a papeles iti lamisaanna.
“Good morning Agent Donovan,” inkablaaw ni Agent Rojas.
Immisem ti lakay. “Good morning, Agent Rojas. How’s the world of chasing drug warlords?”
“Makabannog ken frustrating but at the same time, rewarding,” insungbat ni Agent Rojas.
Ad-adda a napaisem ti lakay. “Makabannog... makabannog, ken napeggad.” Immanges iti nauneg. “Agyamanak laengen ta impuruakdak iti daytoy a posisionko. Agtalinaedak iti uneg ti proteksion ti DEA a dumdumngeg kadagiti adu a bullshit a pagsasaritaan dagiti tattao iti sibubukel a lubong. Makabannog ken makauma met ngem awan ti peggad.”
“I guess, you deserve it. Naipaaymo metten ti serbisiom iti DEA.”
“Yeah, a few more months to put up with the bullshit and bureaucratic intrigue in the DEA.”
“That some of us has to suffer for a lot of years more,” innayon ni Agent Rojas. “Okay, ania ti maipadamagmo kaniak?” imbaliw ni Agent Rojas iti saritaan.
“Adu nga intercepted messages. Adda high profile a tao a sumangpet iti Las Vegas.”
“Ni Gaspar Medalla?”
“Dimi masigurado. Naalami pay dagiti amin a passenger manifest kadagiti amin nga eroplano nga aggapu iti Mexico ngem awan ti nagan ni Gaspar Medalla. Natsekmi pay dagiti amin nga incoming flight kadagiti amin a pagilian a mabalinna a pagserkan ngem awan latta. Amangan no saan nga agpakita.”
“Imposible. How about all those border crossings? Tijuana, Juares, Nogales, Laredo, Canada...?”
“Nothing.”
“Agpakita ngata?” adda naibuntuon a panagduadua iti timek ni Agent Rojas.
“Sika ti bounty hunter, Agent Rojas. Figure it out.”
Immanges iti nauneg ni Agent Rojas. Liman a tawenna iti daytoy a kaso: “Operation Medalla Cartel.” Nabannogen a mangkamkamat ken ni Gaspar Medalla. Saan a mabalin nga agpaltos iti daytoy a gundaway.
“Ti high profile a kunam a sumangpet iti Las Vegas, opisial ti gobierno ti Mexico?” nalagip nga inimtuod manen ni Agent Rojas.
“High ranking officer at Mexico’s State Department. Bumisita iti Mexican Consulate.”
“Dayta laeng?”
Nagtung-ed ti lakay. “Sorry, no awan ti makaanay nga impormasion a maipaaymi. Ngem namnamaem nga iti kanito a makasagapkami iti baro nga impormasion, ipasami a dagus kenka.”
McCARRAN International Airport. Iti hangar a nairanta a para kadagiti pribado a jet ken eroplano dagiti nagduduma a pagilian a maipaayan iti diplomatic immunity, nagparada ti Falcon 900 jet a namarkaan iti Gobierno Federal de Mexico. Dimsaag ti sangapulo a nababaked a lallaki a naka-Rayban. Naka-coat and tie-da ken nadusol dagiti bakrangda. Nakabitbitda amin iti atitiddog a briefcase. Nagsardengda a nagpipila iti agsumbangir a sakaanan ti agdan ti eroplano. Madamdama pay, immulog ti dua a natakneng ti panagkawkawesda a nataengan metten a lallaki. Nagturongda iti nakangisngisit ti tint-na a limousine. Simrek dagiti dua a nataengan a lallaki. Sipapardas metten a limmugan dagiti sangapulo a nababaked a lallaki iti dua a nangisit a Navigator iti likud ti limousine. Rimmuarda iti hangar. Simmalpotda iti Las Vegas Boulevard a nakigrupo iti napuskol a trapiko. Iti sunroof ti limousine, nabatad dagiti napuskol nga asuk nga aggapu iti uneg.
SIIINAYAD dagiti electronic technician a nangi-tape iti transceiver system iti barukong ni John. Insimpada ti earpiece iti lapayagna. Sineniasan ti technician ni Agent Donoteli tapno testingenda ti transceiver.
“This is a test... John, can you hear me? Acknowledge. Over,” timek ni Agent Donoteli.
Nagpusipos ni John a nangsango iti pangadaywen a pagtaktakderan ni Agent Donoteli sa impangatona ti tammudona.
“Say something!” impukkaw ni Agent Donoteli.
Natitileng ni John. Winagwagna ti ulona. “Too loud!” inyikkisna.
“Sorry. Can you hear me?” natibong ti timek ni Agent Donoteli a mangngegna.
“Hear you loud and clear, Agent Donoteli,” immisem ni John.
“10-4, captain. Everything is fine,” kinuna ni Agent Donoteli.
Iti asidegda, madama pay laeng nga ikapkapetda ti transceiver iti barukong ni Col. Davis. Minatmatan a naimbag ni John ti koronel. Iti laksid ti tawen daytoy a 60, natangken pay laeng dagiti takiagna. Nagbalin a kasla pannakaamana iti pannakayadayona iti bukodna nga ama. Nagbalin a taklinna kadagiti nadara a ranget a nakirupakan ti squadronda. Intalekna ti biagna iti lakay a kas met iti panangitalek ti lakay iti biagna kenkuana. Idi agsina ti lubongda iti panagretiro ti koronel iti serbisio, impapanna idin a saannanton a makita pay daytoy. Ngem iti daytoy a gundaway, adda iti sibayna, nakasagana pay laeng a mangipusta iti biagna uray no awandan iti serbisio ti US Marine.
Naidumduma a lakay. No kas koma kenkuana ti amana… Immanges iti nauneg ket nariknana ti panagbabasa ti baba dagiti matana. Itan, malagipna manen ti inana, ken ni Sandra iti ima ni Gaspar Medalla. Kayatna nga alawen ken biagen ti nairebreben a biagda. Ngem mapasamak ngata? Kinemkemna dagiti sangina.
“Captain,” timek ni Agent Donoteli.
Timmaliaw ni John iti pagtaktakderan ni Agent Donoteli. Ur-urayenna ti sumaruno nga ibaga daytoy. Nauneg nga anges ti simngaw iti earpiece-na.
“Uray no ania ti mapasamak iti daytoy a gundaway, ipakpakaunakon ti panagyamanmi iti itutulongmo kadakami. Isu ngata a nagbalinka a Marine gapu iti panangipategmo iti pannakatagiben iti agnanayon ti wayawaya iti lubong. Isu met laeng ti nangitunda kenka iti itutulongmo manen iti pagiliam, ta iti pannakatiliw ken pannakaipakni ni Gaspar Medalla iti kaikarianna a pagbaludan, maisalakanmo ti masakbayan dagiti agtutubo nga agtinnag laeng nga adipen dagiti droga nga iwaras ni Gaspar Medalla. Thank you, John... Thank you, Colonel Davis.”
Napaisem ni John iti arigna panagbitla ni Agent Donoteli. Pinatakderna ti tammudona ken ni Agent Donoteli. Thank you, naitanamitimna. Ngem ammona met a saanna nga aramiden daytoy gapu iti panangipatpategna iti pagilianna. Aramidenna daytoy para kadagiti dadakkelna. Ta barbareng iti uray no sangkaiit laeng a namnama, matiliwda pay ti ipus dagiti naatap nga arapaapda.
(Maituloyto)
