Ni VILLAMOR VISAYA, JR.
ALICIA, Isabela - Pimmusay ni Rogie Baysa, mannurat ti Bannawag, idi kalman, sakbay ti tengnga ti rabii (Mayo 18), iti edadna a 71 gapu iti kanser a nangdadael ti dalem ken dadduma pay nga internal organs-na.
“Nagaget, nasingpet ken managtulong a manongmi. Saanminto a malipatan dagiti naitulongna kadakami,” kinuna ni Rosalyn Baysa-Navarro, maysa kadagiti kakabsatna.
Iti naudi a pannakayospital ni Rogie iti maudi a lawas ti Abril, kinuna ni Rosalyn a naikkan iti dua a dominggo laengen nga agbiag ngem maragsakanda ta limmabes pay iti dua a lawas sakbay a pimmusay.
Agarup maysa a dekada nga adda Parkinson’s disease ni Apo Baysa ket mabalin kano a dagiti adu a tomtomarenna nga agas tapno malapdan ti isisikad ti nasao a sakit ti nangdadael iti dalem ken dadduma pay a lalaemna.
Ilocos Sur, Umuna a Puesto iti Regional SubayBAYANI Awards
“Nakabotos pay ngarud isuna ngem saanen a makasao ken makatakder kalpasanna,” innayon ti kabsatna.
Nayanak kada Eugenio A. Baysa, Sr. ken Cristina G. Cudiamat (agpada a pimmusayen) iti M.H. del Pilar, Alicia, Isabela idi Nobiembre 13, 1950. Nupay agtrabaho a kas postmaster (nangrugi a kas letter carrier) ti Philippine Postal Corporation, inkagumaananna nga inleppas ti BS Business Administration ( Major in Accounting ) iti Isabela Colleges, Cauayan City, Isabela.
Retirado a Postmaster iti Post Office, Alicia, Isabela. Kas mannurat, nag-Secretary General iti dua a dadakkel a gunglo dagiti mannurat nga Ilokano, ti GUMIL Filipinas ken TMI Filipinas. Addan sumagmamano a pammadayaw a naawatna iti nadumaduma a salip iti sarita, salaysay ken daniw. Kangrunaan a pammadayaw a naawatna ti Most Outstanding Isabelino 1999 (Media Category) nga inted ti LGU iti probinsia ti Isabela ken Most Outstanding Postmaster iti Cagayan Valley iti namindua daras, 2000 ken 2004.
Ni Preciosa C. Baysa ti kapisi ti pusona. Naparaburanda iti dua nga annak, da: Pregieson, 28, nakalpas iti BS Animal Husbandry, ken Pregielyn, 27, nakalpas iti BS Business Administration, iti Isabela State University Main Campus, Echague, Isabela.
Maidulin ti bangkay ni Rogie inton Mayo 25 (saan a Mayo 26 a kas immuna a naipadamag) iti sementerio ti Del Pilar, Alicia, Isabela.
Mainaig itoy, impeksa ni Apo Remy N. Albano, presidente ti GUMIL Filipinas, ti naimpusuan a pannakipagladingit ti gunglo iti ipupusayna.
