Al-allukoyen ti Departamento ti Salun-at (DOH) dagiti nagannak a palubosandan dagiti annakda a sumrek iti eskuela tangay bassit metten ti maim-impektaran iti COVID-19.
Kuna ti DOH nga awan kas iti face-to-face classes ta ad-adu met laeng ti masursuro dagiti ubbing malaksid a mapasayaat pay ti laingda a makilangen iti sabali a tattao.
“Maikabassit ti gundaway a pannakaala iti COVID-19 no la ketdi nabakunaanen dagiti mannursuro, adalan, ken dagiti dadduma nga empleado ti pagaladan ken maipaayanda iti booster iti kanito a kualipikadodan,” kinuna ti DOH iti maysa a public advisory.
Igunamgunam laeng ti DOH a nasken pay laeng ti panangsurot kadagiti pagannurotan iti salun-at a kas iti panagusar iti face mask, panagaaddayo, panangbuggo kadagiti ima, ken pannakamantener ti nasayaat nga iruruar-iseserrek ti angin iti uneg ti klasrum.
