Nobela ni Norberto D. Bumanglag Jr.
IMPALAWLAW ni John ti imatangna. Awan a makitana da Agent Donoteli ken Agent Rojas. Sawsawarenda siguro ti sibubukel a pasdek a mangsapsapul ken ni Gaspar Medalla, nakunana iti panunotna.
“Dumdumngegak,” insungbat ni John ken ni Sgt. Ramirez. “What’s your 10-20?” Dinamagna no sadino ti ‘yanda.
“Southbound Rainbow Boulevard, approaching Charleston...”
“Copy that, sergeant. And we are on our way,” kinuna ni John idinto nga imbaw-ingna ti panagkitana ken ni Sandra. “Sorry, Sandra, ngem adda nasken a papanak. No maidaw-asakto gayam iti Hawaii, no saanmo nga ibilang nga intrusion, I’d like to take you out for a dinner at Waikiki.”
Iti alintatao a linangeban ti lua, nauyos ti nasam-it nga isem ni Sandra. “I’ll be waiting,” kinuna. Dayta laeng, ginuyoden ti paramedics.
“Agang-angawka laeng iti imbagam ken ni Sandra, saan kadi?” timek ni Mrs. Villa nga adda gayamen iti likudan ni John.
Nagpusipos ni John. “Dead serious, mom. Apay? Something wrong with that?” masmasdaaw a nagsaludsod.
Ngem saan a nasungbatan ti baket ta simngat ti maysa a napigsa a timek a mangaw-awag ken ni John. Uppat a lallaki ti umas-asideg kadakuada. Tallo dagiti nakasuot iti full gear a kasla SWAT team. Nakaabadayda iti M-4 ken nakabarikesda iti hand gun.
“Yes,” insungbat ni John.
“I assume that this is Misis Villa?” Tinaliaw ti lalaki a nagsao itay ti ina ni John.
Nagtung-ed ni John.
“I am Jones, US Marshal Jones, dakami ti nadesignaran a mangprotekta ken ni Misis Villa, twenty-four hours. Mangrugi ita.”
“John,” nayesngaw ni Mrs. Villa.
“Di mabalin a mangrugikayo laengen no bigat?” sinaludsod ni John.
“Sorry, Mister Villa, but we have our strict orders to place Misis Villa on a protective custody right now. Napeggad unay, nangnangruna no agbilin ni Gaspar Medalla.”
“Ket kasano a makasaritak ni mama no kasapulak?”
“There’ll be no direct contact. Kontakem nga umuna da Agent Rojas ken Agent Donoteli. But right now, we have to go.”
“John, anakko…” Arinkedkeden ni Mrs. Villa.
“Go, mom,” kinuna ni John. “I’ll call you tomorrow. Para met laeng iti bukodmo a proteksion. Go.”
Inarakup ni Mrs. Villa ni John. “I’m gonna miss you, anakko.” Ket mangrugin nga agsangit.
“You’re not living yet, mom. Kas inkarik kenka, ipasiarkanto pay. I’ll see you tomorrow.” Immirut ti arakup ni John iti inana.
ITI underground tunnel a nagturonganda, agtigtigerger pay laeng ni Gaspar Medalla iti pungtotna iti napasamak. Kamaudiananna, napasublina met laengen ti 15 a milion a doliar a tinakaw ni Roger Villa kenkuana; natatek met iti bala ni John ket masiguradona a natayen, a kas ken ni Roger Villa a pinaipaknina iti warden. Ngem nakalasat ni Mrs. Villa! Ken napukawna ti tinaltalekna a badigard.
Nagkidem ket naganninaw iti mugingna ti pannakabawbaw ti barukong ni Ramon ken ti pannakaiparsiak dagiti dara daytoy iti rupana.
Inyapros ti lakay ti dakulapna iti rupana. Kasla marikriknana pay laeng ti bara ti dara ni Ramon.
Ut-utobenna manen no ania ti napasamak iti uneg. Idi rugianda a bangonen ti Fontainebleau, inar-arapaapna a napintas a pangibautanna iti kuartana daytoy a hotel-casino. Ngem nagsuek ti ekonomia ti America. Napukawna ti adu a kuartana. Ita, napukawna met ti adu a taona dita.
Ni John ken ti koronel laeng ti adda iti uneg, malaksid kadagiti adu a taona. Ngem itay mangrugi ti putok, kasla metten paggugubatan. Kunam no maysa nga squadron ti kaadu dagiti nangpaltog kadakuada.
Intupakna ti likud ti ulona iti nalamuyot a tugawna. Makapungtot latta iti napasamak. Nupay kasta, nautekanna manen dagiti dua a pannakabagi ti linteg a nabayagen a mangkamkamat kenkuana. Itay makastrekda iti underground tunnel, saggaysa a sinukimatda dagiti karton a naglaon iti kuarta. Tallo a tracking device ti imbellengda. Sumagmamano pay a minuto, makaruardan iti daytoy a tunnel a nairanta a pagtarayan ti danum no kakaisuna nga agtudo iti Las Vegas. Agdiretsoda iti McCarran International Airport, ket apaman a makastrekda iti eroplano ti gobierno ti Mexico, saanen a masagid pay dagiti pannakabagi ti linteg.
Nagkidem ket immanges iti nauneg.
NALAYUS iti lawag ti flood basin iti nagsulian ti Rainbow Boulevard ken Desert Inn Road. Nauneg ken nakalawlawa nga abut a naaladan iti nabuntuon a daga a nairanta a pakaummongan ti danum kadagiti manmano laeng a panawen a panagtudo iti napigsa iti Las Vegas. Gapu iti pannakalayus ti siudad idi 1998, babaen ti tulong ti federal government, naaramid ti nagtitinnali nga underground tunnel ken flood basin a pakaurnongan dagiti danum tapno saan a malayus ti Las Vegas.
Nakatakder dagiti uppat nga aggagayyem iti tapaw ti nabuntuon a daga a mangbuybuya iti Blackberry Mobile GPS Tracker. Buybuyaenda ti nagtimbukel a dot iti selpon a napardas nga agturong iti ‘yanda.
Saan nga ammo ni Gaspar Medalla nga iti nagbaetan dagiti nareppet a kuarta, nailipit ti maysa a naingpis a tracking device a siaannad nga inkabil ni Col. Davis iti kaaddada iti dalan nga agturong iti Fontainebleau.
“Sergeant Cortez, mano pay a minuto iti panagkunam sa rummuarda iti ruangan ti tunnel?” sinaludsod ni John.
“More or less five minutes,” insungbat ni Sgt. Cortez.
“Bulodek daytoy,” kinuna ni John ket ginammatanna ti atiddog a carrying case ni Sgt. Ramirez. Imbabana daytoy sa linukatanna. Ginammatanna ti M-4 a linaon daytoy. Nakakapet pay laeng ti silencer ngem inikkatna. Sinirigna ti scope.
“Coronel Davis, awaganyo da Agent Donoteli. Kasapulantayo ida iti daytoy a lugar,” kinuna ni John.
“What’s the plan?” sinaludsod ni Col. Davis.
“Back me up, colonel... This is mine. I’ll end this war. Right now,” kinuna ni John bayat ti panangyabagana iti strap ti M-4. Nangrugi a nagpababa.
“Captain, we can make a kill at this vantage point. Saan a nasken a bumabaka. Napeggad unay,” impakamakam ni Sgt. Ramirez.
“Just back me up, guys,” inyikkis ni John bayat ti napardas a panagkaruskosna a nagpababa.
“Be careful, captain,” inyikkis ni Sgt. Cortez.
Pimmardas ti panagpababa ni John agingga iti nakadanon iti lansad. Napardas ti panagangesna. Intugkelna ti panagkitana iti wangawangan ti underground tunnel nga ita laeng a madlawna a dakkel gayam. Manipud iti ‘yanna, sangagasut ngata a deppa ti kaadayo ti wangawangan.
“Time?” inyikkis ni John ket nagallungogan ti bosesna.
“Two minutes!” nakapuy a timek nga aggapu iti tapaw ngem nalawag a nangngegna.
Inngatona ti M-4. Inuksotna ti magasin daytoy. Kinitana no adda balana. Insublina met laeng. Sinirigna ti scope. Mangngegnan ti nakapuy a naaweng nga ungor ti lugan. Umas-asideg, pumigpigsa ti ungor. Umas-asideg… Mangrugin a makapleng ti ungor. Nagin-inut a nagkawweng ti tamudona a nangarakup iti gatilio.
Immanges iti nauneg. Nakaun-uneg. Sa tinengngelna ti angesna. Sinirigna ti scope ket nakataltalna ti M-4 a nagsadag kadagiti natangken a takiagna. Iti scope, nakalawlawagen a makitana ti amarilio a Scion xB.
MADUKOTANEN ni Gaspar Medalla iti panagdaliasatda iti naangot nga underground tunnel. Masuronen daytoy. Sangkadagdagna ti driver-na. Sa la nagsardeng idi makitanan ti agaragaag a lawag iti masanguananda. Nakaisem daytoy. Ad-adda a pinataray ti driver-na ti lugan. Ad-adda met a nagungor ti lugan. Simmiag a nangsarabo iti lawag. Ngem pagammuan la ta naganit-it dagiti ligay ti lugan, nagiwas ket nakibor dagiti darat, bato ken tapok. Nabungon iti tapok ti Scion xB iti pettat a panagsardengna.
“Cabron!” inyikkis ni Gaspar Medalla iti driver-na bayat ti panangarikapna iti mugingna a naitupa iti dashboard ti lugan. Inlippaakna ti kanigid a dakulapna iti ulo ti agtutubo a Mehikano a driver-na. Ngem saan a nangikankano ti driver-na. Napatengngaag a mangmatmata iti windshield.
Inturong ti lakay ti panagkitana iti disso a matmatmatan ti agtutubo. Ngem nalidem ti sango ti windshield. Nabungon iti tapok ti aglawlaw. Ngem idi agalinsaed dagiti tapok ket limmawag ti windshield, maysa a ladawan ti lalaki ti nakatakder iti agarup dua gasut a kadapan iti sangoda. Nakaiggem iti dakkel a riple. Nakapaturong ti paltog kadakuada.
In-on ni Gaspar Medalla ti windshield wiper. Nagpusitsit ti danum iti sarming a sinaruno ti wiper a nangpunas. Ad-addan a limmawag ti sangoda. Nalawagen a makitana ti lalaki. Malasinnan. Ngem imposible! Kasano koma a nakalasat?
“Que quieres que haga, señor?” sinaludsod ti agtutubo a madandanagan. Damdamagenna no ania ti kayat ti lakay nga aramidenna.
“Conducir,” imbilin ti lakay. “Drive!”
“Pero, señor…” kinuna ti agtutubo a nalausen ti butengna.
“Patarayem, kunak!” imbilin ti lakay. Innalana ti paltogna, inkasana sa impaturongna iti pispis ti agtutubo. “Nangngegnak?”
“Si, si, señor,” kinuna ti agtutubo a napalalon ti tigergerenna.
“Dungparem dayta nga estupido! Awan pay ti nagbiag a nangsalungasing iti paglintegan ni Gaspar Medalla. Matay ti amin a di agtungpal iti bilinko!”
Immanges iti nauneg ti agtutubo, agtigtigerger dagiti dakulapna iti rabaw ti manibela, kasta met ti dapanna a nangbaddek iti siliniador. Nagallangogan ti napigsa nga ungor ti bassit a Scion xB.
NALAWAG a makita ni John ni Gaspar Medalla iti scope-na. Ur-urayenna nga aggunay ti lugan. Nakaung-ungor ti mabambanubor a lugan ngem saan met nga agtaray.
“Come on, Medalla. Come and get me,” itantanamitimna. Mangrugin nga agluluken ti takiagna.
Kellaat, naggunay ti lugan. Nakapaspaspas nga agturong iti ‘yanna! Ken pagam-ammuan ta nalayus iti lawag ti ‘yanna. Dumanarudor ti helikopter iti tangatang. Ngem addaytan ti amarilio nga xB. Kasla sumiwsiwet nga agturong iti ‘yanna. Inling-ina ti barrel ti M-4. Nakitana ti driver. Kinalbitna ti gatilio.
Napigpigsan ti palagapag ti helikopter nga agpababa ngem saan nga insina ni John ti matana iti scope. Nakitana ti pananglussok ti bala iti windshield ti Scion xB. Ngem agturong latta ti lugan iti ‘yanna! Naminsan pay a kinalbitna ti gatilio. Naburak ti sarming. Nadalupaypay ti driver. Saan a nagkir-in ni John. Nagtalinaed iti pagtaktakderanna. Nagiwas ti lugan. Nagbaliktad a nanglisi kenkuana. Ket binungon ti tapok ti lugan.
Naglanding ti helikopter iti saan unay nga adayo iti ‘yanna. Makapauyeken iti puskol ti tapok nga akupen ti paligpalig ti helicopter. Sa nagin-inut met laeng a nagsardeng ti panagwerret ti paligpalig.
Indisso ni John ti M-4. Inasutna ti Glock .45-na nagturong iti nakaibaliktadan ti Scion xB.
“John, hold it,” ikkis ni Agent Rojas manipud iti likudanna.
Saan a nangikaso ni John. Napardas ti pannagnana nga immasideg iti Scion xB. Iti nailukat a naibaliktad a lugan, agkarkaradap ti maysa a parsua a rummuar. Iti pannakaipaturong dagiti spotlight iti lugan, nabeddak dagiti dara iti rupa ti lakay. Narigatan a timmakder. Nakaiggem ti kanawan nga imana iti paltog. Insanggana ti dakulapna kadagiti matana iti pannakapurarna.
“Drop your weapon, Señor Medalla!” kinuna ni John idinto nga impaturongna ti paltogna iti lakay.
“John, don’t do it! Drop your weapon! Dimo kayat ti maibalud gapu laeng iti daytoy,” imballaag ni Agent Donoteli.
Agtigtigerger dagiti ramay ni John iti putan ti paltogna. Tumukno iti langit iti gurana iti daytoy a lakay. Pinagbalin daytoy nga impierno ti biagda nga aggaama. Sa sumken manen iti lagipna iti inaramid dagiti tao ti lakay iti inana. Ken ti panangitukitna iti buteng kadakuada.
“Ulitek, Gaspar Medalla. Drop your weapon,” inriaw manen ni John ket ad-addan ti panagtigergerna.
Nakita ni John ti sikakapuy ken in-inut a panangingato ti lakay iti paltogna.
Kinalbit ni John ti gatilio. Immaweng ti kanalbuong. Sinaruno dayta ti pannakayikkis ti naganna. Ngem awanen ti mangngegna. Kinalbitna manen ti gatilio. Manen. Ken manen. Agingga a ti lanitek laengen ti firing pin ti mangngegna. Agtigtigerger. Ken kasla mauyos ti pigsana iti pungtot.
Nariknana ti nadagsen nga ima a nangibaba iti takiagna. Situtulok a nangited iti paltogna idi alaenda.
“It’s over, John... It’s over,” kinuna ni Col. Davis a nangarakup ken ni John.
Nagkidem ni John iti panangarakup kenkuana ti koronel. Nariknana dagiti lua a nagpilit a rimmuar kadagiti matana. Nagmulagat. Madama a posposasan da Agent Rojas ken Agent Donoteli ni Gaspar Medalla a salloy ti abagana.
“Let’s go home,” kinuna ni Col. Davis.
Immanges iti nauneg ni John. Immukas iti arakup ni Col. Davis. “Maysa a maudi a banag nga aramidek,” kinuna ni John ket nagturong iti ‘yan ni Gaspar Medalla a binayabay dagiti dua nga ahente a napalaus ti ragsakda.
“John, it’s over,” kinuna ni Agent Donoteli a nagturong iti sango ni Gaspar Medalla.
“It’s okay, Agent Donoteli.” Nasimbeng ti sungbat ni John. Kayatko laeng a kasarita ti lakay.
Immanges iti nauneg ni Agent Donoteli. Immaddang iti sikigna a nangipalubos iti panagsarita da John ken Gaspar Medalla.
Nailansa ti panagkita ni Gaspar Medalla ken ni John. Uray no kasla nakaay-ay-ay ti langa ti lakay, adda pay laeng kasla simmibeg a sidap dagiti matana.
“Ania ti imbagak kenka, Señor Medalla? Nga agpullokanto kaniak. Nagasatka ta saanka a pinatay. Panagkunak, nasaysayaat no mabaludka tapno maramanam ti rigat ti uneg ti pagbaludan.” Manglalais ti isem ni John. Ket iti saan a napakpakadaan ni Agent Donoteli, panarusokannan ti lakay. “Dayta ti subad ti panangparusokmo kaniak iti pagtaengam,” kinuna ni John sa timmallikuden.
Nakadua pay laeng nga addang ni John idi awagan ni Gaspar Medalla. Nagsardeng ngem saan a timmaliaw.
“Siempre recuerde mi nombre. Gaspar Medalla. Gaspar Medalla!” Natangken ti timek ti lakay a nangulit-ulit iti naganna. “Laglagipem ti naganko iti agnanayon!”
Saanen nga inkaso ni John ti lakay. Nagabayda ken ni Col. Davis a nagturong iti pagur-urayan da Sgt. Ramirez ken ni Sgt. Cortez.
“John, mabiit laeng,” timek ni Agent Rojas manipud iti likudanda, agtartaray daytoy nga immasideg kenkuana.
Inyawat ni Agent Donoteli ti dakulapna ken ni John. “Thank you, John. Dakkel ti utang kenka ti gobierno ti America.”
“You’re welcome,” immisem ni John. “Utangko kadagiti gagayyemko.”
“Mautangkami kadakayo nga uppat... And, go. Nairadio itay a sumangpet kano dagiti reporter ken TV newscaster. Nasaysayaat no saandakayo a makita ditoy.”
Siiisem a nagtung-ed ni John. “And make sure a guardiaam a naimbag dayta a fifteen million a doliar iti dayta a lugan.”
Immisem ni Agent Rojas. “Thanks again.”
Timmallikuden da John ken Col. Davis.
“John…” timek manen ni Agent Rojas.
Intuloy dagiti dua ti nagna.
“Pai-process-ko daras ti pannakaited ti gunggonayo iti pannakatiliw ni Gaspar Medalla. Bareng no maawatyo daras.”
Nagsardeng ni John sa nagpusipos. “Just for the sake of curiosity, Agent Rojas, mano ti gunggona ti makatiliw ken ni Gaspar Medalla?”
“Two million dollars.”
Intuloyen dagiti dua ti nagna.
SUMAGMAMANO laengen dagiti parokiano iti uneg ti maysa a nalatak a bar. Alas tres iti parbangon isu a narasayen ti tao. Addada nga uppat nga aggagayyem iti naiputputong a lamisaan. Maysa ti kurangda, ni Captain Smith a natay iti maysa nga aksidente. Limada koma. Limada nga aggagayyem a nangbukel iti Al Sujud Brotherhood. Limada a nangisapata iti tunggal maysa a no adda pakarikutan ti maysa, pakarikutanda a lima.
Ti nagan ti grupoda, naadaw iti palasio ni Saddam Hussein, a nakaidulinan dagiti kinabaknang ti diktador. A nakapabasolanda a nagtakaw iti kuarta.
Napasennaay ni John iti dayta a napanunotna. Ta awan ti tinakawda a kuarta!
Intag-ay ni John ti botelia ti serbesana. “Para iti Al Sujud Brotherhood!” kinunana.
Nagkikinnitada nga aggagayyem. Intag-ayda dagiti boteliada sa pinagpipingkida.
“Para iti Al Sujud Brotherhood!” naggigiddanda a nagkuna sa intanguapda dagiti boteliada agingga a naawangan.
“Ita ta nalpasen ti amin, John. What’s next?” sinaludsod ni Col. Davis.
Immanges iti nauneg ni John. Nagkidem ket malagipna lattan ni Remy. “Going back home. Itulodko ti bangkay ni Remy iti Ilokos.”
Awan ti nakatimek kadagiti tallo. Naipasngay ti ulimek a kasla makipagpanesda iti panagladingit ni John iti ipapatay ti girlfriend-na.
“Sorry, John... Sorry,” agarup naggigiddanda a nangisawang.
Intuloyda ti naginum. Nabannogda. Ngem naragsakda. Ta agingga nga addada nga uppat iti maymaysa a lamisaan, dida kayat a dadaelen dagiti kanito. Kalpasan daytoy nga aldaw, agsubli dagiti dua a sarhento iti Los Angeles. Ni Col. Davis, agsubli met iti Miami. Isuna, dina pay ammo no ania ti aramidenna. Timmangad iti bubongan. Nagsubli iti lagipna iti kaaddana iti US Marine. Nasursurona nga impateg ti propesionna. Ninamnamana nga agtalinaed agingga nga agretiro. Ngem nadadael ti career-na. Immanges manen iti nauneg. Nagkidem. Napaut.
Idi agmulagat, naiturong iti panagkitana ken ni Sgt. Ramirez.
“Arnel, apay a nabaliwan ti planoyo?” sinaludsod ni John.
Napamuttaleng ni Sgt. Ramirez. Kinitana ni John sa insublatna da Col. Davis ken ni Sgt. Cortez.
Nangitangguap ni John iti serbesa. “Saan kadi a planoyo nga agawen ti kinse a milion? Ilemmengyo tapno saan a maammuan dagiti pannakabagi ti linteg ket ninto lattan Gaspar Medalla ti mapabasol, ket libretayton a mangtagikua iti kuarta?”
Saan latta a makauni ni Sgt. Ramirez. Uray da Col. Davis ken ni Sgt. Cortez.
“Saan kadi a kasta ti plano, koronel?” impasa ni John ti saludsodna iti koronel.
Timmakder ti koronel. Timmallikud. Nangitanguap iti serbesa. “Dayta ti orihinal a plano?”
“Ania ti napasamak?”
“Pinilik a saan nga ipatungpal,” imballaet ni Sgt. Ramirez. “Inaramidmin iti naminsan, captain. Ngem pinilik a saan a mapasamak manen. Dinadaelmi ti propesionmo gapu kadagiti nagbiddutanmi. Umanayen ti maminsan a pananggundawaymi kenka.”
“Pudno ti napasamak iti Al-Sujud, John,” nakapuy ti timek ni Col. Davis. “Inlemmengmi ti lima a milion a doliar a kinabaknang ni Saddam.
(Maituloyto)
