NI MANCIELITO S. TACADENA
Indauluan da Gob. Jeremias “Jerry” Singson (maikatlo manipud iti kanawan) ken Bise Gobernador Ryan Luis Singson (maikadua iti kanigid) ti pannakagetteng ti laso a kas mangipasimudaag iti pannakalukat ti Kape de Ylocos Trade Fair idi Oktubre 24, 2022. Mairaman kadagiti sangaili da Vigan City Mayor Bonito Singson, sigud a Mayor Chavit Singson ken LMP President Germelina Goulart.

Tapno mapagtalinaed ti kinangato ti kalidad ti Robusta a kape a patanor ti Ilocos Sur, inyusuat ti Gobierno Probinsial ti Ilocos Sur ti Kape de Ylocos Trade Fair nangrugi itay Oktubre 24 ken agpatingga iti 28, 2022 iti Provincial Farmers Livelihood Development Center iti Siudad ti Vigan.

Sangapulo ken lima a coffee shops/establishments ken lima nga coffee-producing upland municipalities ti nangipatakder iti booth-da iti nasao a lugar nga inarak dagiti managkape nga Ilokano tapno ramananda ti templa dagiti propesional a barista a nagusar kadagiti lokal a binukel ti kape (coffee beans) nga apit dagiti ili ti Sigay, Sugpon, Gregorio del Pilar, Salcedo, ken Suyo.

       Dagiti booth dagiti coffee shops a nakipaset iti trade fair.

Iti panglukat a programa, kinuna ni Gob. Jeremias “Jerry” Singson a wagas ti gobierno probinsial daytoy tapno makapatanor pay ti probinsia iti ad-adu pay nga award-winning coffee producers a kas ken ni Mabini Ubuan ti ili a Sigay a nangyalat iti umuna a puesto iti International Cupping Event iti World of Coffee sadiay Milan, Italy itay nabiit ken tapno makabangon dagiti coffee shops ken mannalon nga agmulmula iti kape manipud iti epekto ti pandemia a COVID-19.

Naangay met iti maikadua nga aldaw ti Sustainability Coffee Forum a nagsaritaan ken nangipaayan dagiti mangibagi iti Department of Agriculture ken Department of Trade and Industry iti tulong teknikal kadagiti coffee stakeholders ti Ilocos Sur.

Lokal
Begnas Di Ilocos 2024, maangay inton Okt. 9-11

Begnas Di Ilocos 2024, maangay inton Okt. 9-11

Iti panagsaritana iti nadakamat a forum, dinawat ni Bise Gobernador Ryan Luis Singson kadagiti producers ken amin a negosiante nga agur-usar iti kape a kasapulan ti pananggundawayda iti dumakdakkel a merkado ti lokal a  kape tapno makatulong iti lokal nga ekononia ti Ilocos Sur.

“Itultuloytayo a pasayaaten ti kalidad ti patanortayo a kape, saluadantayo ti aglawlaw ken siguraduentayo ti agtultuloy a pannakapasayaat ti ekonomia para kadagiti amin nga stakeholders ti kape,” innayon ti bise gobernador.

Naangay pay pay dagiti nadumaduma a salip a pakairamanan ti Latte Art ken Specialty Competition para kadagiti barista. Agpada nga inyalat ti Café Amian dagiti nadakamat a salip. Iti met Latte Art Competition (Student Category), inyalat ni BJ Padre ti Ilocos Sur Community College ti umuna a puesto. Iti Top Three Best Aroma Coffee Beans, inyalat ti ili a Suyo ti umuna a puesto, Sigay ken Sugpon iti maikadua ken maikatlo a puesto, kas panagsaganadda.