Nobela ni Norberto D. Bumanglag Jr.
“INKARKARIGATANMI a sinalakniban dayta a palimed iti nabayag, John, nupay dakkel ti atapmi nga ammom ti pudpudno a napasamak,” inlawlawag ti koronel.
Nagkidem ni John. Wen, dakkel idi ti atapna nga inlemmeng dagiti gagayyemna ti kuarta ni Saddam. Ngem pinilitna ti saan a namati iti impabasol ti gobierno kadakuada. Namin-adu a pinadas nga allukoyen ti commanding officer-na nga agtestigo kontra kadagiti uppat. Ngem pinilina ti kimmanunong iti rasonda nga awan ti tinakawda a kuarta.
Insakripisiona ti propesionna para kadagiti gagayyemna.
“Biddut ti inaramidmi, John. Nagbabawyanmi ti napasamak. Ngem awan met ti nabati a nagpilianmi. No annugotenmi ti pammabasol ket isublimi ti kuarta, ma-court martial-kami. No saanmi nga akuen, ket makikooperasionka iti gobierno, ma-court martial-kami latta. Either way, we were screwed. No saan a gapu kenka, naibaludkam’ koma ken naipaayan iti dishonorable discharge,” kinuna ti koronel.
“Nagtalekak kadakayo,” nakapsut ti timek ni John.
“A kas met iti panagtalekmi kenka,” kinuna ni Sgt. Cortez. “Intalekmi kenka ti masakbayanmi.”
“Sorry, John. Ket sapay koma ta mapakawannakami,” kinuna ni Sgt. Ramirez. “Ken saannakam koma a kagura.”
Immanges iti nauneg ni John. “Kasano koma a makaguraak kadakayo? Imbilangkayo a nalablabes pay ngem pamiliak.”
Nakaanges iti nalukay ni Col. Davies.
Simngat ti ulimek. Nabayag bassit.
“Nagsuspetsaka kadi nga inlemmengmi ti kuarta, John?” imburak ti koronel.
Nagtung-ed ni John.
“Ngem apay a pinilim ti nangsalaknib kadakami?”
“Gapu ta diak maitured a madadael ti uppat a biag para laeng iti pannakaispal ti propesionko.”
Napaumel dagiti tallo. Kinemkemda dagiti bibigda. Kasla adda nangbilin kadakuada, arig naggigiddanda a nagwingiwing.
“Awan ngatan ti nasaysayaat a gayyem ngem sika…” Pinekkel ni Col. Davis ti abaga ni John.
“Oh, come on guys, insakripisioyo ti biagyo iti pannakaisalakan dagiti nagannak kaniak ken iti pannakatiliw ni Gaspar Medalla.”
“And let’s drink to that,” kinuna ni Sgt. Cortez ket naggigiddanda a nangitayag iti botelia ti serbesa sada intanguap.
“And just for curiosity sake, ania ti napasamak iti kuarta?” sinaludsod ni John.
Naggiddan dagiti dua a sarhento a nangkita ken ni Col. Davies.
Timmakder ti koronel. Inruarna ti wallet-na sa nangiruar iti nalukot a papel.
“Idi koma pay laeng sangsangpettayo iti Las Vegas nga itedmi kenka ngem nagalikakakami,” kinuna ti koronel bayat ti panangyawatna iti nalukot a papel.
Agduadua ni John ngem inawatna ti papel. Inukradna. Cashier’s check iti bukodna a nagan. Kasla nasulnot dagiti matana a nakakita iti kantidad ti tseke: $1,320,040.09.
“Isu dayta ti maysa a milion a bingaymo a nanayonanen iti dividend, interest ken nakissayanen iti capital gains tax,” kinuna ti koronel. “Iny-invest-ko ti bingaymo idi nagtrabahoak iti Wall Street.”
Nakaturong latta ti panagkita ni John iti cashier’s check. Saan a mapunas ti siddaawna. Mangrugi payen nga agtigerger dagiti ramayna. Dina ninamnama a nangilatangda iti kuarta a para kenkuana. Saanda nga obligado. Indulinda dayta a kuarta iti siam a tawen!
“Legal a kuarta dayta, John. Nadalus. No kasano a dinalusan ti casino, nasaysayaat no saanmon a maammuan pay. Nabayadanen dagiti federal tax ken capital gains. Naguraykami iti nabayag gapu ta ammomi a sisiimendaka pay laeng ti CID. Ngem awanen ti jurisdiction-da kenka gapu ta nagikkatkan.”
Immanges iti nauneg ni John. An-anuenna daytoy a kuarta? Ket nalagipna dagiti nagannak kenkuana. Dagiti naipaidam nga arapaapda. Ti mapasamak kadakuada. Ti iseserrekda iti Witness Protection Program. Dina ammo no kaano a ma-relocate-da. Ngem adda nasken nga aramidenna sakbay a mamimpinsan a masukatan ti kinaasino dagiti dadakkelna.
NAGKIRIRING ti selpon ni John. Namin-adu, sa nagsardeng. Nagkiriring manen, ken manen. Nagareng-eng. Nagballikid iti kama. Kayatna ti agmulagat. Ngem nasugpet dagiti matana. Naulit ti kiriring ti selpon. Pinilitna nga inungap dagiti matana. Kinitana ti relo iti diding. Alas onse pay laeng iti bigat. Alas singkon itay agsisinada nga aggagayyem kalpasan a naggiinumda iti bar. Nagkidem manen. Sa nagdata a nangyunnat kadagiti takiagna. Nariknana ti sakit ti ulona.
Nagkiriring manen ti selpon.
Nagtanabutob a nanggaw-at iti selpon. “Hello,” marurod ti timekna. “This better be good.”
“John, ni Agent Donoteli daytoy. No kayatmo a makita dagiti dadakkelmo sakbay a mai-relocate-da iti nalimed a disso, umayka iti DEA headquarters.”
Bimmaringkuas ni John. “No,” dayta laeng ti nayesngawna.
“Agingga nga agtalinaed dagiti dadakkelmo iti Las Vegas, ad-adda nga agpeggad ti biagda. Ken ad-adda nga agbalin a komplikado ti mangsalaknib kadakuada.”
“Mano nga oras ti itedyo?” sinaludsodna.
“Five hours.”
“Come on... Considering that I may not see them again, I need twelve hours.”
“John, saan a siak ti mangeddeng. Dagiti US Marshals.”
“Allukoyem ida, please...”
“Narigat.”
“Come on. Insakripisiok ti biagko. Inaramidko ti amin a kiddawyo tapno matiliw ni Gaspar Medalla, dimo laengen kabaelan nga isubli dayta a pabor?”
Nauneg nga anges ti nangngeg ni John.
“Okay, twelve hours,” kinuna ni Agent Donoteli idi agangay.
“Ken maysa pay a kiddaw...”
“It better be a simple request.”
“Inkarik ken ni mama nga ipanko iti Top of the World Restaurant, iti Stratosphere Tower...”
“That’s insane, John,” insallawat ni Agent Donoteli. “Umuna, adu ti tao. Maikadua, napeggad. Maikatlo, saan nga umannugot dagiti US Marshals. Maikapat, it’ll never happen.”
“Come on, agent... you can do it.”
“John, unreasonable ti kiddawmo. Napeggad unay.”
“Close the tower...”
“Are you nuts? For what reason?”
“National security...”
Nagkatawa ni Agent Donoteli. “You’re watching too much TV.”
“No, agent. Don’t hang up... Listen to me. I’m really serious. Inkarik ken ni mama nga ipanko iti tower. Dayta ti maudi a kiddawna. Please... Saanton a makasubli pay iti Las Vegas. Ita laeng a makagteng iti ditoy. Kalpasan dagiti sinagabana gapu laeng ken ni Gaspar Medalla, saanyo laengen a mapatgan dayta a kiddaw?”
Anges laeng ti mangngeg ni John. Nagulimek ni agent Donoteli.
“Agent Donoteli...?”
“Saan a basta maserraantay ti tower. Ken uray no maiserra, sigurado a nangina ti pagbayadtayo. Ammom metten ti agdama a kasasaad ti ekonomia iti pagilian. Nangednged ti budget ti DEA.”
“No maipaserrak ti tower, do we have a deal?”
Nagkatawa ni Agent Donoteli. “Nalabes sa unay ti panagtalekmo iti bagim, John?”
“Pagsalsaludsodanka, agent. If I can close the tower for public use, would you take my parents to the tower?”
ALAS DOSE iti aldaw ngem naka-pajama pay laeng ni Don Geoleti. Agmaymaysa iti den nga agbuybuya kadagiti damag iti TV. Nanipud pay itay bigat, awanen ti damag a nanglayus iti TV no di ti pannakatiliw ni Gaspar Medalla, maysa kadagiti kabibilegan a drug cartel iti Mehiko. Naidaydayaw ti DEA, ti FBI ken ti Drug Task Force ti Las Vegas Metropolitan Police. Bangbangir ti isem ti lakay ta saanda a naagapad ti nagan ni John Villa, dagiti tallo a gagayyem daytoy ken dagiti taona a timmulong ken ni John. Ngem maawatanna ti gapuna: tapno masalakniban ti seguridad ni John Villa ken ti pamiliana.
Natured nga agtutubo, intanamitim ti don.
Timmakder ni Don Geoleti. Nagturong iti wet bar. Timmaog iti wine. Nangina a wine a sangkadagullitna a naggapu kano iti isla ti Sicily, Italia. Ginuduana a kinargaan ti baso iti wine sa intangadna. Napaisem manen gapu ta awanen ni Gaspar Medalla. Kayatna a sawen a bukodna ti drug distribution ti Las Vegas, Los Angeles ken Phoenix agingga iti adda manen tamanor a sabali a cartel.
Nasinga iti panagkiriring ti selponna.
“Sorry no nasingakayo, Don Geoleti,” timek ni John.
“No, John. Iti uray kaano man, saanmo nga ibilang a pannakasingak no umawagka. Utangko ti biagko kenka, laglagipem dayta.. Insalakannak kadagiti tao ni Gaspar Medalla,” insungbat ni Don Geoleti.
“Amangan no bukodko met laeng a bagi ti insalakanko, Don Geoleti. Ditay met ammo no sika wenno siak ti target-da.”
“You’re so modest, John.”
“Thanks, Don Geoleti. Ngem inawaganka gapu ta kasapulak ti tulongmo.”
“No kabaelak la ketdi.”
“Adda nasinged nga am-ammoyo iti Torre?”
“Dimmakkelak iti Las Vegas, John. Am-ammok amin dagiti nangangato nga opisial dagiti casino ditoy. Almost all of them anyway,” nagkatawa ni Don Geoleti.
“Maudi nga aldaw ni mama iti Las Vegas ita. Saanko a masigurado no makasublinto pay. Naikarik kenkuana nga ipasiarko iti Top of the World Restaurant iti torre. Ngem saan a palubosan dagiti pannakabagi ti linteg. Napeggad kano.”
“Ania ngarud ti maitulongko?”
“No mabalin, paiserram ti torre. So I can have my personal and private time with my mom. Dua nga oras laeng ti kasapulak…”
Manipud iti sango ti sarming a diding a pagtaktakderan ni John a mangbuybuya iti nalayus iti rumimrimat a lawag ti siudad, kellaat lattan a kiminnit iti lagipna ken ni Remy. Adda iti Top of the World Restaurant, paset ti kangatuan nga observation tower iti America nga agtayag iti 1,149 a kadapan, ken agpuligos iti kada walopulo a minuto a mangtantannawag ti sibubukel a siudad ti Las Vegas. Iti daytoy a lugar, bayat ti naginad a panagpuligos ti restaurant, imparintumengna idi nga inkiddaw iti balasang ti pannakikasar daytoy kenkuana, a kagiddan ti panangidiayana iti maysa a diamante a singsing. Nasin-aw latta iti lagipna: dagiti pimmerlas a tinukel ti lua a nagallin kadagiti dumerderosas a pingping, nagtulid nga immagek kadagiti naiburoy nga isem kadagiti bibigna. Inyusongna ti singsing kadagiti kimmandela a ramay daytoy ket, kalpasan ti panangpatakder ni Remy kenkuana, naglantip dagiti bibigda. Simriam ti bara a nangrunaw iti ania man a panagduaduana iti bagina a nakasaganan a mangidatag iti balasang iti altar.
Nagkidem ket binungon ti sipnget ti lubongna. Nagwingiwing a nakarikna iti pait gapu ta ammona a saan a nagbaliw ti paniriganna iti matrimonio. Dagiti nalaad a naikitikit a lagip iti kalbario a matrimonio dagiti dadakkelna, nagtalinaedda a nangkullaap kadagiti desisionna.
Inallilawna ni Remy!
“John,” nasinga iti timek ti inana a dina nadlaw ti iseserrekna. Nagpusipos. Adda innem a nababaked a lallaki iti asideg ti inana nga ammona lattan a US Marshals wenno FBI wenno DEA. Nadusol ti naisakibot iti siketda ken napuskol dagiti lupotda ket mailangaanna a naka-bullet proof vest dagitoy. Uray ti inana, dakkel ti jacket-na a nangilinged iti bullet proof vest.
“Thanks for bringing me up here, anakko. And—“ saan a natuloy ti inana ti saona. “Are you crying again?”
Nabainan ni John. Dinagdagusna a pinunasan dagiti matana.
“Okey laeng nga agluaka, anakko... mariknak ti marikriknam.” Immarakup ni Mrs. Villa ken ni John. Imbaw-ing ti baket ti panagkitana iti disso ti Las Vegas Strip, kadagiti nangayed nga agsasaruno a natatayag a pasdek dagiti casino. “So beautiful,” nayesngawna. “Ania koman a ragsakko no makapagtalinaedak pay ditoy iti sumagmamano nga aldaw.”
Immanges iti nauneg ni John. “Ania ti oras ti flight-yo, mom?”
“Ala una.” Nagbanarbar ti timek ti baket a timmangad ken ni John. “Agkitatanto pay ngata, anakko?” dandani saanen a makasngaw dagiti balikasna.
“I hope so, mom... Imbagadan no sadino ti destinasionyo?”
“Filipinas. Ngem diak ammo no sadino a paset ti Filipinas. Ti laeng inpasiguradoda ket saan nga iti probinsia a dinakkelak.” Nagsennaay manen ti baket. Imbakalna ti panagkitana iti ruar, nga itan, ti nasipnget a paset ti Mt. Charleston ti sangsanguenda. “Ni daddy-m, awan ti damagmo?” sinaludsodna nupay no kawaw dagiti balikasna.
“Okey isuna, mom. Idi awagan ni Gaspar Medalla ti warden ti Indian Springs Federal Prison tapno papatayenda, nailemmengda idin. Ngem nagparang latta a napapatay ni Dad ta isu dayta ti naipadamag ken ni Gaspar Medalla. Paset dayta ti ebidensia iti panangisaklangda iti warden ti pagbaludan.” Saan nga impudno ni John a nagkitadan iti amana. Nagsaritaanda ti maipapan iti kasasaadda, ti pannakaiserekda nga agpadpada iti Witness Protection Program ngem iti agsina a lugar.
Immanges laeng iti nauneg ti baket.
“Excuse me, ma’am, nakasaganan dagiti makan iti lamisaanyo,” insinga ti waitress.
Nagturongda iti lamisaan. Tallo a naiplato a California Muscovy Duck Breast with Orange and Lime Hoisin Sauce, a napakuyogan iti pechay ken green papaya salad. Pagaayat dagiti dadakkelna ti karne ti pato. Adda met maysa a botelia ti wine.
Nadlaw ni John ti siddaaw ti inana a mangmatmatmat iti maikatlo a plato. Malaksid kadagiti serbidora ken dagiti innem a pannakabagi ti linteg, awan metten ti makitana a maikatlo.
Kimmita ti baket ken ni John. Agsalsaludsod dagiti matana.
Ngem saanen a nasken a sumungbat pay ni John ta isu met a sumrek ti amana a sinaruno ti innem a security detail daytoy. Kas iti inana, nakasuot iti bullet proof vest dagitoy.
Saan a nakaasngaw ni Mrs. Villa. Liningayna ni John a kasla agsalsaludsod ti langana ngem kawaw ti ekspresion ti rupa ti anakna. Nagtugaw ti barona idinto a nagtalinaed a nakatakder. Ngem itan, nakaturong ti imatangna ken ni Roger Villa. Sangapulo ket duan a tawen a dina nakita ti lakayna. Malagipna latta daydi naudi nga aldaw a kaaddada iti korte a mang-finalize iti nabara a divorce proceedings. Immannugot ni Roger Villa a 50/50 a mabingay ti amin a sanikuada. Ngem saan nga umannugot nga agbayad iti alimony. A mailako ti balayda ket pagguduaanda ti no ania man a mabati iti paglakuanda. Saan nga immanugot. Ngem ti ad-adda a nagpudotan ti ririda ket no asino ti mangtagikua iti na-restore a 1976 a Ford Mustang. Pinagtangtangsit ni Roger dayta nga antigo a lugan ta mapataliaw dagiti tao no patarayenna iti Ala Moana Boulevard iti Waikiki. Dayta a rason a kayatna a tagikuaen ti Mustang. Gapu iti gurana iti lalaki nga iti naminsan, inayatna nga awan ti patinggana, kayatna a malabusan iti kakaisuna a pagtangtangsitna.
Adu a sinnungbatda; nagduduma a pinnasakit; nakuspag a panangtagibassit iti tunggal maysa; awan ti nangako iti basol no asino ti nakaigapuan ti pannakadadael ti matrimonioda.
Ngem iti ud-udina, kellaat a nagbaliw ti pangeddeng ni Roger. Kasla naparukma nga atap nga alingo. Insanud ni Roger dagiti amin bukodna a kiddaw ket inted daytoy ti amin a kinalikagumanna.
Ti balay: bukodna.
Alimony: agbayad ni Roger iti las-ud ti tallo a tawen.
Ti antigo a Mustang: maipanagan kenkuana.
Nagbingayda iti nabati a kuarta iti banko.
“Komusta?” nakapuy ti timek ni Roger a nagkuna apaman a nakaasideg iti lamisaanda.
Saan latta a nakaasngaw ni Mrs. Villa. Ngem matmatmatanna ni Roger nga adu unayen ti limmakayanna. Kimmuttong, ngem nakired pay laeng ti takderna. Mangrugin nga agkurenren ti rupana nupay adda pay laeng tugot daydi nakagutigotanna a kinataer. Iti kaungganna, kalpasan ti diborsio, pinilitna nga intanem ti impapanna a nakullaapan nga ayat. Ngem maamirisna itan a saan a natay dayta a rikna. Iti sango ti lalaki a nangitaklinanna iti biagna iti nasurok a duapulo a tawen, dina napupuotan dagiti lua a nabuslon a nagarubos.
Nalawag a nakita ni Roger Villa dagiti lua a nagtulid iti pingping ti dati nga asawana. Nayon ti saan ngata a nagsarday a lulua ni baketna manipud pay nagdiborsioda. Ammona nga nga isu ti nakaigapuan dagita a lulua. Gapu kadagiti darepdep ken arapaap nga awan ti naituding a pagpatinggaanna. Nakipagbaklay ti asawana kadagiti tuok, ken liday a ginubuay ti naatap a namnama. Insakripisiona ti amin matungpal laeng dagiti arapaapna. Bulsek nga araapaap.
Nagmalanga ni Roger idi agangay. Zeny Villa, nayesngawna iti panunotna. Ita laeng a maamirisna a saan a binaliwan ni Zeny ti apeliedona. Adda ngata pay la nabati a rikna ni Zeny kenkuana?
“I’m sorry,” nagtigerger ti boses ni Roger a nagkuna.
Ngem awan latta ti simngaw a balikas ni Zeny.
“Adu dagiti nagbiddutak. Nabulsekak kadagiti saan a magaw-at nga arapaap. Ngem saankon nga irasonan. Ammok a nagkurangak kadagiti pagrebbengak a kas asawa ken ama. Ken ammok dagiti panaas a sinagabam.”
Mangrugin nga agsangit ni Zeny.
“Agbabawiak ngem diak ammo no adda pay gundawayko a mangbalbaliw iti amin. Kalpasan ti sangapulo a tawen, impagarupko a malipatanka, ngem nagbiddutak.”
Nagsaninglot ni Zeny.
“I love you. I still love you,” natibongen ti timek ti lakay.
Inapput ti baket ti ngiwatna. Simmallin iti lagipna ti panangtagiben ni Roger kadagiti retratona iti opisina ken pagtaengan daytoy.
“No ikkannak pay iti maminsan a gundaway, ipaneknekko kenka ti panagbalinko a naidumduma nga asawa,” kinuna ni Roger bayat ti panangiruarna iti maysa a diamante a singsing. “Will you marry me... again?” Nagparintumeng a nangyawat ken ni Zeny.
Addan dagiti dua nga agtigtigerger a dakulap ni Zeny iti ngiwat ti lakay. Napardas latta dagiti agar-arubos a luana. Tinaliawna ni John a maimaymayeng ken nalabbaga metten dagiti matana. Saan latta a naguni. Imbabana ketdi ti kanawan nga imana. Inyawatna ken ni Roger. Inawat met daytoy. Ket iti panangyusong ni Roger iti singsing iti ramay ni Zeny, saannan a nalapdan ti bagina. Inarakupna daytoy sa kinunana: “I love you... I never stopped loving you...” Gapu ta iti laksid dagiti amin nga inaramid ni Roger, saan a napunas ti ayatna iti daytoy.
Naginnarakupda. Nairut.
“We are ready, John,” kinuna ni Roger a nangtaliaw ken ni John.
Nagtung-ed ni John. Sineniasanna ni Agent Rojas.
“Nakasagana iti ania?” sinaludsod ni Zeny.
Maysa a lalaki ti simrek. Sinabat da Agent Donoteli ken Agent Rojas ket inatibayda nga inyasideg kadakuada.
“Hello, Daniel, Rose,” siiisem nga inkablaaw ti lalaki a bulon ti panangyawatna iti dakulapna ken ni Roger. Nagalamanoda. Insublatna ni Zeny a masmasdaaw pay laeng.
Asino ti Daniel? Salsaludsodenna iti panunotna. Asino ti Rose? Impalawlawna ti panagkitana.
“Nakasaganakayon?” sinaludsod ti lalaki.
“Nakasagana iti ania?” sinaludsod manen ni Zeny. Tinaliawna ni John.
“Agkasarkay ken ni daddy sakbay a mapankayo iti pakailemmenganyo,” inyarasaas ni John.
“Sika ti nangplano iti daytoy?”
“Dayta laeng ti pamuspusan tapno makapagkuyogkayo ken dad, mom. You need each other.”
Agarubos manen dagiti lua ni Zeny. “Saantayton nga agkikita, anakko?” sinaludsodna.
“We will, mom. No sadino man ti pangipanan ti gobierno ti America kadakayo, sapulenkayto. Ibagadanto kaniak ti pangilemmenganda kadakayo ken no kaano ken kasano a makontakkayo. Aguraytay siguro iti sumagmamano a bulan wenno tawen. No maalay-ayanton ti peggad, sumarungkarakto.”
Pinunasan ni Zeny dagiti luana. “Thanks for everything, anakko... agyamanak.”
ALA UNA iti parbangon, iti salinong ti maysa a pribado a hangar iti McCarran International Airport, nakapuesto dagiti nababaked ken natatayag a US Marshals a nakaabaday iti M-4 ken nakasalikad iti Glock a pistola iti lawlaw ti Lear jet a pagluganan da Mr. ken Mrs. Daniel ken Rose Galindo. Nagpakadan ni John iti inana itay ket iti maudi a panaginnarakupda, saan lattan a napengdan ti baket ti panaganug-ogna. Uray ni John, ikarkarigatanna a pakirden ti nakemna, ngem nababasa latta dagiti matana. Ita ta nagkappian dagiti nagannak kenkuana, mapukawna met laeng ida. Ket mapanda iti lugar a saanna nga ammo no sadino.
Iti asideg ti sakaanan ti agdan ti jet, agsangsango dagiti agama— ni John ken ni Daniel Galindo.
“Siguradoka a saanmo a masapul ti kuarta, dad?” inulit ni John a sinaludsod.
“Dika madanagan kadakami iti inam. Dakkel met ‘ta kantidad ti binulan nga ited ti gobierno ti America kadakami. Ken maysa...” saan nga intuloy ni Roger ti kayatna a sawen. Tinaliaw ni Daniel Galindo dagiti US Marshals sa insublatna ni John. “Saandaka a kinaptan iti listening device?” inyarasaasna.
Immisem ni John. “Agingga ita, agat-atapka pay laeng, dad?”
“Diak agtalek iti uray asino. Malaksid laeng kenka ken iti inam.”
“Tandaanam dayta iti agnanayon, dad, gapu ta kastanton ti agbalin a biagyo.”
“Ammok. Ngem pinilik daytoy a biag, anakko. Basolko. Agyamanak laengen ta napasublikayo nga aginak. Nangnangruna ta natungpal met laengen dagiti arapaapko.”
Ngimmato ti kiday ni John.
“Adu ti nalimed a naipatulodko a kuarta iti Filipinas,” inyarasaas ni Daniel Galindo ken ni John.
“Kasano ti kaaduna, dad?” aggagar a makaammo ni John.
“Nakalablabon. Dimo pay kayat a bilangen iti kaaduna.” Immisem ti lakay. Timmangad sa intanamitimna. “Thanks, Gaspar Medalla.” Nagkatawa iti nakapuy.
“Mister Galindo, we have to go,” impukkaw ti maysa kadagiti US Marshals.
“Laglagipem ti balay, John... ti kuarta. Ken kangrunaan ti amin, take care of Maxi-Clean. Adda napintas a masakbayan dayta a kompania. Ken ni Veronica, nasayaat nga ubing. Ammok a masursuromto nga apresiaren. Thanks for saving me.” Nagtigerger ti timek ni Daniel Galindo.
“Thanks, dad. Agan-annadkayo. Ken salaknibam ni mama.” Nagarimasa dagiti mata ni John.
“I will. Ken idanonmo ti panagyamanko kadagiti tallo a gagayyemmo.”
Naginnarakupda nga agama. Idi agsinada, saanen a maiperreng ti lakay dagiti matana iti anakna. Nagpusipos ket nagnan a nagturong iti jet.
Nabati ni John a mangkutkutim kadagiti bibigna. Itan, mariknanan ti pait. Nagkidem ket nagpilit manen a timbog dagiti lua.
“Dad…”
Nagsardeng ni Daniel Galindo. Nagpusipos. Lima nga addang laeng ti nagbaetanda.
“Naibagak kadi kenka nga iti laksid ti amin a napasamak that you are a great father?”
Saan a nakauni ti lakay iti pannakakitana kadagiti lua nga agar-arubos kadagiti pingping ti anakna. Agtigtigerger dagiti bibigna a nagpusipos ken immuli iti jet. Idi makagteng iti ridaw ti jet, nagpuligos ket nagwagis.
Nagungor ti jet. Iti sarming a tawa, agpaypayapay dagiti dadakkelna.
Idi alun-onen ti nasipnget a law-ang ti jet, isu pay laeng ti pannakaamirisna nga indeklaran ti gobierno ti America ti ipupusay dagiti dadakkelna a Roger ken Zenaida Villa.
Napasennaay. Ita, maipamaysanan nga asikasuen ni Remy.
(Maituloyto)
