Mabalin a kumaro ti El Niño kadagiti sumaruno a bulan, segun iti Philippine Atmospheric, Geophysical and Astronomical Services Administration (PAGASA), ket madanonna ti "kalalainganna agingga iti napigsa" a lebel iti arinunos ti 2023 wenno iti nasapa a 2024.
Kinuna ni Ana Liza Solis, hepe ti Climate Monitoring and Prediction Section ti PAGASA, nga adda 86% a tiansa nga agbalin ti El Niño a kalalainganna a pagteng iti Nobiembre-Disiembre 2023 wenno Enero 2024. Kabayatanna, adda 56% a tiansa nga agbalin a napigsa ti El Niño iti Disiembre 2023 wenno Enero-Pebrero 2024.
Segun ken ni Solis, maipada ti nakapsut nga El Niño iti tao nga addaan pamniit wenno nababa a gurigor, idinto a kapada met ti kalalainganna nga El Niño ti gagangay a kabara a gurigor, ket maipada ti napigsa nga El Niño iti "panagkombulsion" wenno nangato a gurigor.
Inlawlawag pay ni Solis a no napigsa ti El Niño, bumara ti baybay a pakaigapuan ti nabarbara a temperatura iti pagilian ken basbassit a panagtudo.
Kiddaw ni Quiboloy a Medical Furlough, inanamongan ti Pasig RTC
Segun pay ken ni Solis, mabalin a mapagteng ti igaaw wenno tikag gapu iti nababbaba a panagtudo iti sumaruno a bulbulan.
Innayon ni Solis a kaaduan a paset ti pagilian ti makapadas pay laeng iti tudtudo maigapu iti umabagatan a laud a monsoon, nga am-ammo pay a kas abagat, nga agpaut agingga iti Septiembre. (Ellalyn De Vera-Ruiz/MANILA BULLETIN.)
