Itultuloy ti programa nga agrarian reform iti pagilian ti panangtubngar iti kombersion dagiti agrikultural a daga.
Segun ken ni Undersecretary Luis Pangulayan ti Department of Agrarian Reform (DAR), mandato ti agrarian reform ti mangbantay kadagiti masuksukay a daga iti pagilian, ken ti pannakasaluad dagitoy, tapno mausar laeng para iti agrikultura.
"Dagiti daga a mabalin a maapektaran ti agrikultural a pannakadebelop ti madakdakamat ditoy. Iti sabali a bangir, adda dagiti ancestral domain, ancestral land, forest land, timberland, ken dagiti mineral park ti DENR," kinuna ni Pangulayan iti maysa a media forum. Innayonna a "dagiti masuksukay a daga a rebbengna a mamulaan, mulaantayo dagita – dagita ti bantayantayo."
Inlawlawagna pay a babaen ti Comprehensive Agrarian Reform Program (CARP), itultuloy met ti Kongreso ti mangilatang kadagiti pondo para kadagiti ahensia a mangisaysayangkat iti agrarian reform. (Betheena Unite/MANILA BULLETIN)
