Pinirmaan ni Presidente Ferdinand "Bongbong" Marcos Jr. idi Hulio 7, 2023 ti Republic Act (RA) 11953 wenno New Agrarian Emancipation Act a mangpakawan iti utang ti nasurok nga innem a gasut a ribu a benepisiario ti Agrarian Reform Program (ARP).
Iti sigud a linteg (Comprehensive Agrarian Reform Law wenno RA 6657), rumbeng a bayadan dagiti benepisiario ti ARP ti naited a daga agraman ti 6% nga interes daytoy iti las-ud ti tallopulo a tawen; ngem iti baro a linteg, imbaklayen ti gobierno ti amin nga utang, interes, ken dadduma pay a gatad a nagdagup iti P57-bilion para iti 1.173 a milion nga ektaria a daga.
Naragsakan ni Presidente Marcos a nangpirma iti RA 11953 ta kas kunana, daytoy ti mangruk-at kadagiti mannalon iti utangda ken babaen daytoy, manamnama a dumakkel pay ti mapastrek dagiti mannalon. (Argyll Cyrus Geducos/MANILA BULLETIN)
