Nobela ni Norberto D. Bumanglag Jr.
NAMINSAN pay, siiinayad nga impadalan ni Sgt. Ramirez ti kasla selpon a multifunction bug and camera detector iti diding ti laundry room. Duan ti naduktalanda a wireless camera ken maysa a listening device, iti yanda laeng. Diniskonektadan dagitoy. Sabali laeng dagiti naduktalanda iti salas, iti master bedroom, ken iti ridaw. Awanen ti mangngegda pay a signal nga aggapu iti bug detector.
“The whole house is clear,” kinuna ni Sgt. Ramirez ken ni John.
“Mabalinmon ti agselebrar iti daytoy a balay,” innayon ni Sgt. Cortez.
“Isu ngarud a saankay pay a pumampanaw. Palpasenyo laengen daytoy a lawas. We’ll invite some friends and have a party,” kinuna ni John.
“Thanks, ngem agawidakon. Sangkaawagnak ni baket. Maminsanto laengen uray ta masiguradomi nga agyanka ditoyen. Ni Arnel, a. Baro pay ti loko,” kinuna ni Sgt. Ramirez idinto a pinabaringringanna a kinita ni Sgt. Cortez.
“Sorry, adu unay ti paperworks nga ikamakamko iti opisina. Some other time,” insungbat ni Sgt. Cortez.
Immanges iti nauneg ni John. “Sabagay, agpa-Filipinas-ak met. ‘Yawidko ti bangkay ni Remy,” nakapsut ti timekna. “Sika, koronel, ania ti planom?” Tinaliaw ni John ti koronel.
Saan a simmungbat ti koronel. Immanges ketdi iti nauneg.
“Kuyogennak a mangitulnog iti bangkay ni Remy iti Filipinas, koronel.”
Kinita ti koronel ni John.
“Ken ania ti ammom, amangan no adda magustuam a chick sadiay.”
Immisem ti koronel. “Lakayakon,” kinunana.
“Innem a diesmo laeng, koronel. Ubingka pay. Ken adda met Viagra,” inkatawa ni Sgt. Ramirez ti sutilna.
“Come on, colonel... go with me to PI.”
Immanges iti nauneg ni Col. Davis. “Okay, total awan met laeng ti obrak iti Miami no agsubliak sadiay.”
Naragsakan ni John. “Thanks, colonel,” kinunana.
“No kasta mapankam ngaruden,” kinuna ni Sgt. Ramirez.
“Ken wen gayam, inkaso a kayatmo ti agtrabaho a kas PI, let us know,” innayon ni Sgt. Cortez. “Masapulmi ti kas kenka.”
“Nangina ti singirko,” inkatawa ni John.
“It’s okay... kabaelandaka met siguro a bayadan. Or we can make you as an equal partner. Mangipatakdertayo iti Private Investigation Service ditoy Las Vegas. Adu dagiti celebrities a makasapul iti badigard,” innayon ni Sgt. Ramirez.
“Panunotek ngarud,” insungbat ni John. “Ngem padasek nga asikasuen nga umuna ti Maxi-Clean. Kalpasan dayta, we’ll talk.” Nagturong iti salas.
“Good...” kinuna ni Sgt. Ramirez a nangisurot iti panagkitana ken ni John. “I guess this is goodbye,” kinunana kada Sgt. Cortez ken Col. Davis
“Okay, guys. Take care and keep in touch.” Inalamano ken inarakup ti koronel dagiti dua a sarhento.
Nagnada a nagturong iti ridaw. Isu met a makasubli ni John.
“Agyamanak manen iti tulongyo. Saanakto a makasubsubad kadakayo.” Sinnaggaysa nga inarakup ni John dagiti dua a sarhento sa inyawatna ti saggaysada a panakkelen a sobre.
Minatmatan dagiti dua ti sobre.
“Komplimento ni Gaspar Medalla,” kinuna ni John. “Ken apaman a maawatko ti reward money iti pannakatiliw ni Gaspar Medalla, ad-adunto pay a kuarta ti umay kadakayo.”
Nagkikinnitada nga uppat. Awan ti un-unida. Nagari ti kasla makapal-eng nga ulimek.
“Have a safe trip home, guys,” imburak ni John iti ullimek
Nagyaman manen dagiti dua. Nagturong iti luganda. Nagtalinaed da John ken ti koronel a nangsipsiput iti yaadayo ti lugan dagiti dua a sarhento agingga iti panagsikkoda iti pagkurosan.
“So, what now?” Naginnat ti koronel a nagsaludsod.
“What now?” inulit ni John ti saludsod sa nagpanunot. Piniritna ti timidna. “Call Vero tapno mangibaon iti mang-deep clean iti daytoy a balay. Call the Philippine Arlines and make a reservation for our trip to PI. Call ADT, ti alarm company a mang-install iti sophisticated a surveillance camera iti ruar ken uneg daytoy a balay tapno uray no sadino a paset ti lubong ti ‘yanko, mamonitorko ti balay babaen iti selpon. Go to...”
“Hold it, John,” pinutol ti koronel dagiti kayat pay ni John nga ibaga. “Saan a nasken a maammuak ti amin. Can I use your Dad’s car? Aramidem dagiti nasken nga aramidem ket mapanak agay-ayam iti poker. Amangan no adda gasatko ta adda nayon ti gastosenta iti Filipinas.”
“Amangan no nagasgasatta no agkalita iti uneg ti balay, koronel?”
Apagapaman a naikuleng ti koronel. “Pudno ngata nga adda naikali a kuarta?” nasaludsodna.
Namrayan dagiti dua ti nagkinnita. Uray ni John, nagmalanga. Ta kas ken ni Col. Davis, agtalinaedto latta a burburtia no adda kuarta a naikali iti sakaanan ti washing machine wenno awan. A, ngem asino ti agganat a mangammo? Agpadpadada nga adu ti asikasuenda. Makauray dayta a kuarta, no adda man!
Madamdama pay, nagpakadan ti koronel. Inasikaso met ni John ti panagreserbana iti flight-na a mangyawid iti bangkay ni Remy iti Filipinas. Idi laeng a maammuanna a nanginngina pay gayam ti plete ti bangkay nga agawid ngem ti sibibiag.
Insarunona nga inawagan ti Maxi-Clean. Ni Maria ti simmungbat. Awan kano pay ni Veronica. Kiniddaw ni John ken ni Maria a mangibaon iti cleaning crew a mangdalus iti balay ti amana. Impanamnama ti resepsionista a mangibaon a dagus iti agdalus.
Adu pay dagiti asikasuenna. Mayalis ti titulo dagiti amin a sanikua dagiti dadakkelna. Daytoy a balay ken ti balayda iti Ewa Beach. Ipatulodto kano lattan ni Detective Rojas ti death certificate dagiti dadakkelna. Ngem makapaguray dagitoy. Ti Maxi-Clean ti umuna nga asikasuenna. Para iti pannakataginayon ti lagip ti amana. Ken para kadagiti empleadoda nga ad-adda a makasapul iti daytoy a kompania.
Nagkiriring ti selponna. “Blocked” ti nai-display iti caller-ID.
“Hello?” insungbatna.
Awan ti simmungbat. Ngem natibong dagiti babassit a karasakas.
“Hello?” inulitna.
Awan latta ti simmungbat. Ulimek. Pagam-ammuan, adda nagareng-eng! Sinaruno ti sangit. Maip-ipit. Matiptiped a sangit.
“Hello?” Natalingenngen ti riknana ngem mangin-inuten a kumarab-as ti danag a dina mailawlawag.
Napukaw ti sangit. Ulimek. Ngem natibong latta dagiti babassit a karasakas. Sa naputol ti linia. Kellaat lattan a nalagipna ni Remy.
PAMPANURNORENNA ti I-215 E nga agturong iti opisina ti Maxi-Clean. Itay umawag iti opisina, imbaga ti nakasaritana nga awan kano pay ni Veronica. Saan a simrek. Pinadasna nga inawagan ti selpon ti balasang ngem awan ti sumungbat. Kalpasan ti sumagmamano a panagkiriring ti selpon, nagturong iti voicemail.
Masdaaw iti bagina, madanagan ngem dina met ammo ti gapuna.
Manipud iti I-215, kimmamang iti I-15N. Apagserrekna pay laeng iti I-15, puro nalabaga a brake light ti makitana iti likudan dagiti lugan a bumper to bumper gapu iti trapik. Nagsanamtek. Naginad unay ti trapiko. Mabayag a dumanon iti Maxi-Clean.
Inruarna ti selponna. Indayalna manen ti numero ni Veronica. Kaskasdi nga awan ti simmungbat. Insublatna iti opisina. Simmungbat ni Maria. Ngem awan kano pay ni Veronica. Pinakitana dagiti nakakalendario nga aramiden ni Veronica. Ngem awan kano ti naka-schedule nga appointment-na.
Nadegdegan ti danag ni John.
Kellaat nga innalana ti akinkanawan a lane. Simmina iti freeway. Kinamangna ti pagruaran iti Russell Road nga agturong iti Las Vegas Boulevard. Dalan nga agturong iti condo ni Veronica.
Nagpakanigid sakbay a nagtengna ti Las Vegas Premium Outlet. Apaman a nakagteng iti compound ti condo, limmabas iti naireserba a pagparkingan ni Veronica. Adda nakaparking a Lexus RX350. Nagparking sa nagturong iti nakaiparadaan ti Lexus.
Bayat ti pannagnana, indayalna manen ti selpon ti Veronica. Nagkiriring daytoy. Simmirip iti uneg ti Lexus idinto a dengdenggenna ti kiriring ti selpon. Adda iti uneg ti Lexus ti kiriring!
Kimmita a naimbag ni John iti uneg ti kotse. Adda nakasilaw a selpon iti driver’s seat. Iti passenger seat, adda handbag.
Nagbayon ti barukong ni John.
Iniggamanna ti door handle ti lugan ngem sakbay a naluktanna ti ridaw, nakigtot iti napigsa a timek.
“Freeze, dirtbag! Don’t move!” agarup agtigerger ti timek.
Timmaliaw ni John. Maysa a nakauniporme a lakay a security ti agtigtigerger dagiti imana a nangipaturong kenkuana iti rebolber.
Immisem ni John. Inlawlawagna iti lakay a security guard nga isu ti boss ni Veronica. A kayatna laeng a penken ti lugan gapu ta saan a simrek iti opisina ni Veronica.
Naimbag laengen ta am-ammo ti lakay ni Veronica. Namati daytoy ket pinalubosan daytoy ni John a nanglukat iti lugan. Innala ni John ti selpon. Duapulo ti missed calls, 10 ti voicemail. Kaaduanna a naggapu iti Maxi-Clean ti awag. Impapan ni John a ni Maria ti immaw-awag. Sumagmamano ti naggapu kenkuana. Dinengngegna ti voicemail.
“Hi, Vero. I haven’t heard from you. I want to see you. Please call me back. You got my number. Call me.”
Inkur-it ni John ti numero iti bassit a papel.
Sinaludsodna iti security guard no nakitanan ni Veronica, nagwingiwing ti lakay. Inlawlawagna iti lakay nga amangan no adda napasamak ken ni Veronica isu a kiniddawna no mabalin a mapanda kitaen ti kuarto ti balasang. Kinuyog ti lakay a nagturong iti opisina. Innalada ti master key ket nagturongda iti unit ni Veronica.
Nagtoktokda. Awan ti simmungbat. Linuktan ti security guard ti ridaw. Simrekda. Awan ti tao. Naurnos iti uneg. Awan met ti pagilasinan nga adda dakes a napasamak. Nagyaman ni John iti lakay. Nagsubli iti luganna.
Iti uneg ti SUV, binidingbiding ni John ti numero nga inkur-itna iti papel. Atapenna nga adda dakes a napasamak ni Veronica. Indayalna ti *69 ken ti numero nga inkur-itna. Nagkiriring.
“Hello, Ricky here...” Kasla nabartek ti adda iti bangir a linia.
Ngem saan a dayta ti namagtibbayo ken ni John no di ket ti nagan a nadakamat.
“Ricky…” intanamitimna idinto a pumigpigsa ti panagangesna.
“Hey, answer me. What do you want? Do you want to talk? Hey!” makapungtoten ti adda iti bangir ti linia.
Iniddep ni John ti selpon. Nagdayal manen. Iti numero ni Detective Coloma.
“John?” agsalsaludsod ti timek iti bangir a linia.
“I need a favor, Fred... Are you in your office?”
“Yeah, what’s up?”
“Can you run an NCIC on a Ricky Ramsay?” Ti National Crime Information Center ti kayatna a sawen.
“I can’t. Privacy reason. Asino ngamin ti Ricky Ramsay? Saanmi a basta mai-run ti criminal record ti asino man, malaksid no madama a maim-imbestigar iti krimen,” kinuna ni Detective Coloma.
“Please. Dakkel ti atapko nga adda dakes a napasamak ken ni Veronica, ti manedier ti Maxi-Clean. Ket atapek nga adda pannakainaig ni Ricky Ramsay. Veronica is missing.”
“Manon nga oras a nagpukaw?”
“Five or 6 hours.”
“You got to wait twenty four hours sakbay a maibilang a missing ti tao. Amangan no adda laeng napananna. Let’s wait.”
“Dimo maawatan. Suspetsaek a ni Ricky Ramsay ti nangpapatay iti girlfriend-ko idiay Oceanside, California. Can you just do this as a favor for me, please? Sakbay nga adda dakes a mapasamak ken ni Veronica.”
Nangngeg ni John ti nauneg nga anges ni Detective Coloma.
“Okay,” inyannugot ni Detective Coloma. “Awagankanto iti resulta.”
NAKATAKDER ni John iti sango ti lamisaan ni Veronica. Sangsanguenna ti naipadakkel a ladawan ti balasang. Minatmatanna dagiti narimat a mata, ti apagbukar nga isem dagiti naingpis a bibig, dagiti atiddog ken nalamuyot a buokna.
Nagkidem ket nalagipna daydi rabii a kasla tagtagainep a naaprosanna ti nalamuyot a bagi ni Veronica. Nabartek idi ket nakudrep iti lagip. Ngem natarnaw iti panunotna ti kinaprangka ti babai. Nga inar-arapaap kano daytoy.
Nagwingiwing. Sumagmamanon a babbai ti dina inkaskaso; tinallikudanna dagiti dadduma; napukawna ti babai a ninamnamana nga idatagna iti altar. Gapu iti ania?
Awan ti nakabasolan ni Remy. Uray ni Veronica. No adda man nagbasolanna, isu ti rumbeng a mangsungbat. Saan ket a sabali.
Nasinga iti panagkiriring ti selponna. Ni Detective Coloma ti nai-flash iti caller ID.
“Got something for me?” kinunana a magagaran.
“Panagkunak, we are dealing with a serial killer and a rapist. Adda sumagmamano a babbai a na-rape ken natay a saan pay a narisut. Iti maysa kadagiti kaso, natiliw ni Ricky Ramsay a kas suspetsa. Naimbestigar. Naikabil iti linia dagiti posible a kriminal tapno itudo ti saksi, ngem saanna a nailasin. Adda nalagda a rasonna isu a pinalusotan ken binaybay-anen ti LVMPD.”
“Thanks. Ita, kasapulak ti local address ni Ricky Ramsay.”
“I can’t do it. Dakamin ti makaammo iti daytoy.”
“Right away?” inunton ni John.
“John, we have to build the case. Check every possible lead.”
Nagwingiwing ni John. “Fred, naladawton ti amin! Something is really wrong. Mariknak. Isu a nasken nga inka kitaen.”
Immanges iti nauneg ni Detective Coloma. “Okay, off the record. Ngem stay out of it. Let me handle it.” Imbaban ti detektib ti selpon.
Ngem saan a makatalna ni John. Dakes latta ti agparparikna kenkuana. Kayatna a maammuan no sadino ti pagnaedan ni Ricky Ramsay iti Las Vegas. Inawaganna ni Sgt. Ramirez.
SAANNA nga insina ti panagkitana iti balay iti ballasiw ti kalsada. Nalawag a makitana daytoy iti nagparkinganna iti igid ti kalsada. Nakarikep dagiti blinds kadagiti tawa ket awan ti makitana a garaw iti uneg. Iti driveway, nakaparking ti maysa a BMW X5.
Nalagipna daydi agtudtudo a rabii a naggapuda iti Harmony Adult Care. Isu ngata dayta daydi BMW X5 a nangpideg kadakuada iti kalsada?
Madamdama pay bassit, adda nagsardeng a lugan iti sango ti driveway. Iti sumagmamano a babassit nga antenna iti tuktok ti lugan, malasin a lugan ti pannakabagi ti linteg. Maysa a lalaki ti dimsaag. Ni Detective Coloma. Tinaliaw daytoy ti aglawlawna. Nagliad ni John a nagkul-ob iti tugawna. Dina kayat a makita ni Fred. Ngem iti likudan ti nasipnget a tint ti sarming ti SUV-na, buybuyaenna ti ar-aramiden ni Detective Coloma.
Simmirip iti tawa. Timmangad iti ngato. Nagna a timmannawag iti sidiran ti alad ti balay sa nagturong iti sango. Intalmegna ti door bell. Nakatakder latta iti sango ti ridaw. Tinogtogna ti ridaw. Awan latta ti nanglukat. Iniggamanna ti seradura ti ridaw. Inruarna ti paltogna iti siketna. Siiinayad, inrugina ti simrek.
Implastar ni John ti nagpuesto.
Pagam-ammuan ta pinisang ti kanalbuong ti paltog ti natalna a malem.
Nakigtot ni John. Ad-adda pay a napakintayeg idi makitana ni Detective Coloma a nakusbo iti ridaw. Kellaat a nairikep ti ridaw.
Napaestatua ni John. Dina ammo ti aramidenna. Agtibtibbayo. Gayyemna ti napaltogan iti uneg. No matay, nayon manen a konsensiana. Inlukatna ti glove compartment ket inruarna ti Glock .45-na sa inarikapna ti bassit a Sig Sauer P290 nga inggalutna iti gurongna. Impagarupna no nalpasen ti bukodna a gubat.
Intalmegna ti 911 iti selponna.
“Las Vegas nine-one-one, is there an emergency?” timek ti 911 operator.
“Yes, someone got shot. Hurry. Send cops right away… and ambulance.”
“Hold it, sir. Asino ti napaltogan?”
“Maysa a pannakabagi ti linteg.”
“Sadino? Itedmo ti adres.”
Inted ni John ti adres.
“Ania ti makitam? Ania ti mapaspasamak? Madama pay laeng pinnaltog?”
“Awan ti makitak. Ken nagsardengen ti pinnaltog. Addada iti uneg ti balay. I’m going in.”
“No! Who are you? Don’t... Stay out of it. Wait for the cops. Sir, I’m warning you. Stay out. We’ll handle this.”
Iniddep ni John ti selponna. Iggemna ti paltogna, nagtaray a nagturong iti sango ti balay. Nagallingag iti ridaw. Naulimek.
“Who the heck sent you?” natangken ti timek a nangngegna manipud iti uneg. “Pagsalsaludsodanka, asshole!” Kinagiddan dayta ti nanabtuog sa asug.
Pinuligos ni John ti seradura. Nakatulbek.
Pagam-ammuan, nangegna ti ikkis ti sirena nga umas-asideg. Sinaruno ti daranudor dagiti lugan ken anit-it dagiti pilid iti kellaat a panagsardengda.
Nagpusipos ni John.
“Freeze! Drop your weapon,” inyikkis dagiti polis. Limada a nakaipaturong dagiti paltogda kenkuana. Aggilapgilap dagiti silaw iti tuktok ti luganda.
“Not me... they are inside.” Intudona iti uneg ti balay.
“I said, don’t move!” inriaw manen ti maysa. “Drop your weapon!”
Naggigiddan dagiti polis a nangikasa kadagiti paltogda.
Inin-inayad ni John nga impauyaoy ti paltogna iti kanawan a tamudona. Sa indissona iti daga.
“Turn around. Put your hands behind your head and slowly move backward.”
Nagtungpal ni John. Nariknana lattan ti pannakagutta dagiti takiagna sa natiritir a naitallikud. Nagklik ti posas ket nareppeten dagiti takiagna. Inlawlawag ni John nga isu ti immawag iti 911 ken ti kaadda iti uneg ni Detective Coloma a napaltogan.
“And what the heck are you doing here? Trying to be a hero? Or obstructing justice?” imbugtak ti maysa nga opisial a babaen ti insigniana, naammuan ni John a maysa a teniente.
Nagkiriring ti selpon ni John. Ngem awan ti nangikaso.
“Take him out of my sight,” imbilin ti teniente kadagiti kakaduana.
Nagkiriring manen ti selpon. “Mabalin a sungbatam ti selponko, officer? It could be the guy inside.”
Ad-addan a nakasuron ti polis. Innalana ti selpon. “Hello,” indil-agna. “Excuse me? Say that again, you, SOB. Who are you calling, asshole? Bitch!”
Pagam-ammuan ta nagtalna ti polis. Saanen a naguni pay. Dumdumngeg lattan iti no ania nga ibagbaga ti immawag. “Wait! Don’t hang up. Kasano a maammuak a hostage-mo da Detective Coloma ken Veronica? Kasapulak ti pammaneknek. I need to hear them talk. Ken masapul a makitak ida. Then I could deal with you. No... denggennak... Let me talk. Don’t hang up... no!” Nagtanabutob ti teniente a nangibaba iti selpon sa sinangona ni John. “Sika ti John Villa?”
Nagtung-ed ni John.
“Shit. What the hell is going on?” nayesngaw ti polis. Imbilinna iti sabali a polis ti panangikkatda iti posas ni John. Nasdaaw ni John. “Kasano nga am-ammom ni Ricky Ramsay?”
“Kapadpadak a Marine.”
“Shit,” nakuna manen ni polis. “You guys are acting like you are in Iraq or in Afghanistan. Extending your war in my city? Are you guys all suffering from PTSD? Ken asino ti Veronica?”
Inlawlawag ni John.
“Imbilin ni Ricky Ramsay a sika ti kasapulanna. No mapanka iti uneg, ruk-atanna kano da Detective Coloma ken Veronica.”
“Then let me go. Saan a nasken a dagiti dua ti agikaro iti no ania man a nakabasolak kenkuana.”
Nagwingiwing ti teniente. “Saanmi a maipalubos dayta. Umuna, awan ti pammaneknek no pudno nga adda hostage-na. Kasapulak ti pammaneknek. So get the hell out of here. We’ll handle this!” inyikkisna. Nagpusipos daytoy a nangsango kadagiti kaduana. “Sergeant Ryan, radio the SWAT team. Masapultayo ti back-up,” imbilinna.
“10-4, lieutenant,” insungbat ti sarhento.
“Teniente, dumngegka kaniak. Adda dakes a mapasamak kadagiti dua no dimo tungpalen ti kidkiddawenna.”
Madamdama pay, nailukat ti ridaw. Nagparang ni Ricky a mangtengtengnged ken ni Detective Coloma a daradara ti barukongna. Ken adda tali nga iggemna. Nakapaturong ti paltogna iti pispis ti detektib.
Nagkaribuso dagiti polis a nagturong iti likudan dagiti squad car. Impaturongda ken ni Ricky dagiti paltogda.
“Officer, are you sending John Villa or not?” impukkaw ni Ricky.
“Take it easy, Ricky... I need to see the other hostage. Are you okay, detective?” impukkaw ti polis.
“Shoot him, captain!” inyikkis ni Detective Coloma.
“Shut up!” Nagpungtot ni Ricky ket tinibabna ti detektib. Ginuyodna ti tali nga iggemna. Nagparang ni Veronica. Kusokuso ti buokna. Naka-tape ti ngiwatna. Agsangsangit.
“Now, do we have a deal, officer?”
“Why don’t you just give it up, Ricky. Release the hostages. And I promise to convince the judge to be lenient on you. Ket no ania man ti krimen nga inaramid ni John, dakamin ti mangisaklang kenkuana. We’ll prosecute him to the fullest extent of the law. Come on. Release your hostages...”
“Talaga a dimo ammo ti kasarsaritam, officer!” impukkaw ni Ricky a makapungtoten. “You’re not taking me seriously. Panagkunam, agang-angawak laeng? Ulitek, I want John inside this house!” nagparaw pay ti boses ni Ricky iti panagririawna.
Pagam-ammuam, pinisang ti makatitileng a kanalbuong ti riaw ni Ricky.
(Maigibusto)
