Nagpatingga ti gubat ti dua a pamilia iti Lanao del Sur kalpasan a nagkallaysa ti dua a kameng ti pamiliada idi Hulio 8, 2023 iti Xavier Estates Sports and Country Club iti Cagayan de Oro City.
Nasuroken a 50 a tawen ti panagginnubat ti pamilia ni sigud a Mayor ti Bacolod Kalawi a ni Diarangan Dipatuan ken ti pamilia ti sigud a Mayor Pacalna ti Tugaya, a nangrugi idi 1964 gapu iti politika nupay saan pay idi a nadara.
Ngem idi napapatay ti ama ni Dipatuan iti Manila idi 1971, nangrugin ti nakaro a panagpipinnatay. Kuna ni Dipatuan a nasuroken a 50 a katao ti napapatay iti agsumbangir a pamilia.
Namitlon nga inkagumaananda a risuten ti dida panagkakatunosan, ngem tunggal eleksion mapataud manen ti riri.
COC ni Doc Willie Ong a para senador, impila ti asawana
"Iti biangmi, napudnokami a makikappia, ngem dimo met makontrol dagiti tattaom no eleksion," kinuna ni Dipatuan.
Kalpasan ti naunday a negosasion, immanamong ti agsumbangir a partido a ti panagasawa dagiti annakda ti maudi a solusion ti "rido" wenno panagginnubat ti pulida.
"Kadakami a Maranao, ti panaginnasawa ti maudi a solusion iti panagginnubatmi, awanen ti panagbabawi. Adu a gubat ti puli ti rinisut ti panaginnasawa dagiti puli," kuna ni Dipatuan.
Segun ken ni Nordjiana Dipatuan-Ducol nga ina ti nobia, inarem ni Jalal ti anakna kalpasan ti napintas a pannakiuman dagiti dadakkelda ken dadduma pay a nataengan ken ni Gob. Mamintal "Bombit" Alonto Adiong Jr.
"Nangrugi ti panagarem idi nagtulagen dagiti dua a pamilia. Pinalubosanmi ni Norol nga agarem ken ni Nessanya ket naginnayatda a dua. Napudno ken nadayaw ti panggep ni Norol (wenno Jalal). Okey isuna," kinuna ni Nordjiana iti maysa nga interbiu.
Kinuna ni Nordjiana nga awan ti panagduaduana iti kasla alipugpog a panaginnayat.
"Komportablekami ta nairuamen ti relihion ken kulturami iti dayta," innayonna.
Naaramid ti historikal a kasar nakurang a dua a bulan kalpasan ti panagarem ket kiniddaw ni Jalal ti dakulap ni Ressanya tapno agkallaysada.
Napalalo ti panagyaman ni Nordjiana ken ni Allah ta naggibusen ti nabayag a rido, ket agkakappiadan. "Awan maganabtayo no kinatangsit ken politika ti agturay. Adda koma talinaay iti pusotayo," kinunana.
Kinuna ni Police Col. Rex Derilo, sigud a hepe ti Lanao del Sur, a sumayaat la ketdi itan ti kasasaad ti talna ken urnos iti probinsia gapu iti panagkappia dagiti dua nga aggingginnubat a pamilia.
Segun ken ni Derilo, adu a pannakiuman ken pannakisarita ti naaramid tapno marisut ti panagriri.
Innayon ni Derilo a masapul a panunoten ti masakbayan ti pamilia ken dagiti kaputotan. Masapul a tuladen dagiti kakabagian ken gagayyem dagiti dua a partido no kasano a nakitinnulagda, ken no kasano a naragpatda daytoy a nasayaat ita a relasion.
Ti panagkallaysa da Jalal Norol Balindong Pacalna ken Ressanya Hessa Dipatuan-Ducol ti manamnama a mangpatalged iti aglaylayon a talinaay iti pamiliada.
(Bonita Ermac/Manila Bulletin)
