Iti innuman iti Senado maipanggep iti badiet para iti 2024, impaganetget ni Sen. Sherwin Gatchalian a masapul nga adda mabukel ti gobierno a komprehensibo a plano tapno marisut ti ingingina ti bagas ken ti panagkurang ti suplay ti bagas.
Kinuna ni Gatchalian nga adalen koma ti gobierno ti situasion ta apektaran daytoy ti ingingina dagiti magatgatang kangrunaanna ti taraon a mayeg iti lamisaan dagiti umili.
Kiniddaw met ni Sen. Francis “Chiz” Escudero kenni Sekretario Arsenio Balisacan ti National Economic and Development Authority (NEDA) a nakipaset iti innuman maipanggep iti badiet iti 2024 wenno National Expenditure Program (NEP)a balakadanna ti Presidente a dina koma dakdakamaten no mano ti kayatna nga angkaten a bagas ta dagiti kakastoy a pakaammo, ibungana laeng ti ingingina ti bagas.
Kinuna met ni Sen. Cynthia Villar, pangulo ti Senate Committee on Agriculture, Food and Agrarian Reform, a nasken a ti gobierno ti mangpondo ken mangtulong iti lokal nga industria a mangpatanor iti inbred a bin-i ken organiko a ganagan imbes nga agpannuray iti panagangkat iti bagas. (Hannah Torregoza /Manila Bulletin)
