Naisayangkat ti nasaknap a panagbakuna kontra rabies kadagiti taraken nga aso ken pusa iti 6 a barangay ti Santa Teresita, Cagayan itay Agosto 23-25.
Naisayangkat ti panagbakuna kas panangirusat ti munisipio babaen ken ni Mayor Rodrigo De Gracia iti programa ti gobierno probinsial a mamagbalin a "rabies-free" iti Cagayan. Inwanwan daytoy ni Municipal Agriculturist Edwin P. Madrid.
Indauluan ti Provincial Veterinary Office babaen kada Dr. Elma T. Bermudez ken Dr. Adelle Pascua ti panagbakuna babaen ti panangasistar dagiti staff ti Municipal Agriculture Office. Napili dagiti barangay nga addaan iti adu a kaso ti panagkagat dagiti taraken.
Segun ken ni Agriculture Technician Arsenio Arellano Jr., umabot iti 856 nga aso ken pusa ti nabakunaan iti tallo nga aldaw a panagbakuna. (Teksto ken ladawan: Edison B. Tobias)
