Inyebkas ni Abra Gov. Dominic B. Valera ti nainget a panangkondenarna iti pannakapapatay ni Atty. Maria Saniata Liwliwa "Ling-Ling" Gonzales Alzate, maysa a nalatak nga abogada iti Abra ken dati a presidente ti Integrated Bar of the Philippines (IBP)-Abra Chapter itay Septiembre 14 iti Bangued, Abra.
Segun iti imbestigasion ti Abra Police Provincial Office, dua a di am-ammo a lallaki a nakalugan iti motor ti nangpaltog ken ni Alzate iti uneg ti kotsena a nakaparada iti mismo a ruar ti balayna iti Bangued. Timmakias dagiti suspek kalpasanna, idinto nga intaray dagiti immarayat a tattao iti ospital ti biktima, a nakaideklararan daytoy a pimmusayen.
“Dawatek iti amin nga Abreño ti tulongda iti pannakabigbig kadagiti akin-aramid iti daytoy nakakaskas-ang a napasamak ken ni Atty. Alzate," kinuna ti gobernador iti paskil iti Abra Province Facebook page.
Kinuna ni Gob. Valera a natured nga abogado, manangisakit kadagiti agkasapulan, ken gayyem ti amin ti abogada.
Blazers, inatiwda ti Red Lions; kasangoda ti Cardinals iti NCAA finals
Indagadag ti gobernador kadagiti pannakabagi ti linteg ti nadaras nga imbestigasion iti pannakapapatay ni Alzate tapno mabiit a maresolbar ti kaso.
Kinondenar ni Abra PPO Chief Police Col. Froiland Lopez ti pannakapapatay ni Alzate ket inkarina ti napaspas nga imbestigasion tapno maitudo ti kinaasino dagiti nangpapatay. Kiniddaw pay ni Lopez iti publiko a mangted koma dagiti maseknan iti impormasion a makatulong iti imbestigasion. (Tristan Lozano/Manila Bulletin.)
