Nainget a kinondenar ti grupo dagiti babbai a Gabriela ti pannakapapatay itay nabiit ti abogado a babai a ni Maria Saniata Liwliwa Gonzales Alzate iti mismo a sanguanan ti pagtaengan daytoy iti Bangued, Abra.
"No kasla awan aniamanna laeng a pappapatayenda dagiti pro-people nga abogado a kas ken ni Atty. Alzate, ad-adda a naatap ti hustisia para kadagiti agrabiado a babbai ken umili, nangruna kadagiti biktima dagiti puersa ti estado," kinuna ni Gabriela Secretary Clarice Palce.
Innayonna nga ipasimudaag ti pannakapapatay ni Atty. Alzate ti agtultuloy a pannakaatakar ti sistema ti hustisia a mapapati a mangipapaay iti gundaway tapno maasikaso dagiti biktima ti panaglabsing kadagiti karbengan ti tao.
Segun iti Gabriela, maibatay iti datos ti National Union of Peoples' Lawyers (NUPL), ni Alzate ti maikatlo nga abogado a napapatay kabayatan ti administrasion ni Presidente Marcos Jr. Adda 66 nga abogado ken hues a napapatay manipud 2016 agingga iti 2021, sangapulo kadagitoy ti babbai.
Blazers, inatiwda ti Red Lions; kasangoda ti Cardinals iti NCAA finals
Dinakamat met ti Gabriela ti dadduma pay a panagatakar a naiwayat kontra kadagiti miembro ti hudikatura a nangyetnag kadagiti pangngeddeng a pabor kadagiti tattao a patien ti gobierno a "kabusor ti estado."
Imbinsa ti Gabriela ti kaso ni Judge Gaminde-San Joaquin a nakalasat iti pannakasaneb kenkuana idi Oktubre 2020 sumagmamano a lawas kalpasan nga imbilinna ti pannakawayawaya ti ilegal a naidetener a woman human rights defender (WHRD) ken dati nga opisial ti Gabriela a ni Jen Nagrampa-Caballero; ni Judge Monique Quisumbing-Ignacio nga inyaramidan dagiti di am-ammo a tattao kadagiti pagyaman a tarpaulin nga addaan naiprinta a logo ti CPP-NPA-NDF gapu iti panangabsueltona kadagiti kaso a naipila kontra iti na-red tag (napabasol a kas 'komunista') nga agiwarwarnak a ni Lady Ann Salem idi 2021; ni Judge Marlo Magdoza-Malagar a nakaro nga inre-red tag ni dati a PCOO Undersecretary Lorraine Badoy gapu iti panangabsueltona iti proscription case ti gobierno kontra iti CPP-NPA-NDF; ken ni Judge Aimee Marie B. Alcera a maak-akusaran iti "grave abuse of discretion" gapu iti pangngeddengna a maabsuelto ti 10 a human rights defender a nairaman iti darum a perjury nga impila ni dati a National Security Adviser Hermogenes Esperon Jr.
"Saantayo nga ipalubos nga agtultuloy dagitoy a taktika ti pammutbuteng ken panangatakar kadagiti abogado ken iti hudikatura, nangruna iti panawen nga umad-adu dagiti kaso ti panaglabsing iti karbengan ti tao kontra kadagiti babbai ken iti dadduma pay a mairurrurumen ken mailanglangi a sektor,” kinuna ni Palce.
"Masapul nga irupirtayo ti para iti independiente ken accessible a sistema ti hustisia tapno malabanan ti agraraira a kultura ti kaawan sawsawir a panagiwayat iti pammapatay wenno panangdangran (impunity)," innayonna. (SONNY DAANOY/ Manila Bulletin)
