Pinadayawan ti Philippine Association of Social Workers, Inc. (PASWI) kas national awardee a public servant iti 2023 ni Marivic T. Viesta, mangidadaulo iti Municipal Social Welfare and Development Office (MSWDO) ti ili ti Santa Teresita, Cagayan.
Inawat ni Ms. Viesta ti award-na kabayatan ti 75th Platinum Jubilee Celebration ti PASWI itay Septiembre 22, 2023 a naangay iti Manila Hotel kas pammigbig iti dedikasion ken commitment-na iti trabahona a kas social worker. Naipaayan ni Ms. Viesta iti Plaque of Recognition ken Medalion babaen ken ni PASWI President Rosauro R. Luntayao.
"Utangko daytoy a panangbigbig ti ili ken ti gobierno munisipal ti Santa Teresita iti kabaelak," kinuna ni Ms. Viesta. Nagyaman iti sibubukel nga LGU-Santa Teresita nga idauluan ni Mayor Rodrigo De Gracia, ni Bise Mayor Ruben Fagela Sr. ken dagiti kameng ti Sangguniang Bayan.
Binigbigna met dagiti kakaduana iti MSWDO ken Municipal Action Team iti panagkadkadua ken suportada kenkuana. Nagyaman pay kadagiti partner ti opisinada a barangay, kadagiti opisial ti barangay ken kadagiti volunteer iti suportada. (Edison B. Tobias/Ladawan: Mavic T. Viesta)
