Nakairekord ti Department of Health Center for Health Development in the Ilocos Region (DOH-CHD-1) iti 221 a kaso ti leptospirosis iti rehion ti Ilokos manipud Enero 1 agingga iti Septiembre 16 iti daytoy a tawen, a 106 a porsiento a nangatngato ngem iti 107 a kaso iti isu met la a panawen idi 2022.
Iti virtual press conference nga inangay ti Philippine Information Agency-Ilocos itay nabiit, inwaragawag ni DOH-CHD-1 Medical Officer Dr. Rheuel Bobis nga iti kadagupan ti nasao a bilang dagiti kaso, 89 ti manipud iti Pangasinan, 75 iti Ilocos Sur, 19 iti Ilocos Norte, ken 38 iti La Union.
Adda nairekord a 33 a natay iti rehion gapu iti leptospirosis wenno 14.9 a porsiento ti kadagupan a kaso: 17 iti Pangasinan, 8 iti La Union, 7 iti Ilocos Sur, ken maysa iti Ilocos Norte. Nangatngato met laeng ti bilang dagiti natay ita ngem iti 18 a natay idi 2022.
Naammuan met a dagiti agtawen iti nagbaetan ti 15 agingga iti 19 dagiti nangruna a maapektaran ken kaaduanna a lallaki, 90.5 a porsiento ti kadagupan a kaso, dagiti apektado. (Hilda Austria/Philippine News Agency)
