Napadayawan ti La Union a kas maikapito a 'most competitive' a probinsia iti pagilian iti 2023 Cities and Municipalities Competitiveness Index (CMCI) ti Department of Trade and Industry-Competitiveness Bureau (DTI-CB) iti Philippine Creative Cities and Municipalities Competitiveness Congress a naangay iti Manila Hotel itay nabiit.
Kinuna ni DTI La Union Provincial Director Merlie Membrebre, naibasar ti pannakaranggo ti probinsia iti dagup a naaramidan daytoy iti lima a pakaibasaran ti competitiveness: economic dynamism, government efficiency, infrastructure, resiliency ken innovation.
Segun iti DTI, maibasar dagiti ranggo ti maysa a probinsia iti populasion ken average a kita (income) dagiti siudad ken ili nga adda iti maysa a probinsia.
Kinuna ni Membrere a nakatulong dagiti first class a local government unit (LGU) ti La Union tapno magun-od ti probinsia ti maikapito a kangatuan a ranggo.
Tobacco Farmers Tourism and Commercial Complex iti Narvacan, nainauguraran
Kadagiti LGU a top awardees iti CMCI, adda iti Top 3 ti San Fernando City iti government efficiency (kas component city) ken Top 5 iti resilience (kas component city).
Iti pakaibasaran a resiliency, adda iti Top 2 ti ili ti Agoo para kadagiti 1st ken 2nd class a munisipalidad; Top 1 ti ili ti Sto. Tomas para kadagiti 3rd ken 4th class a munisipalidad; ken dagiti ili ti Pugo ken Bagulin, Top 2 ken Top 10 para iti 5th ken 6th class a munisipalidad, kas panagsaganadda.
Ti met ili ti Bacnotan ti nakaala iti top indigenous people filers award, idinto a ti Pugo ti maika-9 iti infrastructure iti 5th ken 6th class a munisipalidad.
Maika-7 met ti ili ti Aringay kas most improved LGU para kadagiti 1st ken 2nd class a munisipalidad.
"Adda economic dynamism iti probinsia ngem resiliency ti pagpigsaan dagiti LGU ta no kasta nga adda kalamidad, nakasaganada a kanayon," inlawlawag ni Membrere.
Kinuna met ni La Union Governor Raphaelle Veronica Ortega-David, iti maysa a paskil iti social media, ngimmato ti ranggo ti probinsia manipud iti maika-11 a puesto iti 2022. (Hilda Austria/PNA)
