Naangay ti panagsanay iti panagpatanor iti uong iti Santa Teresita, Cagayan itay Oktubre 2-3 babaen ti panangisayangkat ti gobierno munisipal nga idauluan ni Mayor Rodrigo P. De Gracia ken iti panangiwanwan ti Public Employment Service Office (PESO) ken Technical Education and Skills Development Authority (TESDA)-Lasam.
Aganay a 62 a partisipante dagiti nagsanay a kaaduanna manipud kadagiti 13 a barangay ti ili. Nakipartisipar met ti 21 a persons deprived of liberty (PDL) ken 8 nga empleado manipud iti Bureau of Jail Management and Penology (BJMP)-Santa Teresita babaen ti iti panangikalikagum ni BJMP OIC SJO3 Rolando B. Eugenio.
Inwanwan ti opisina ti PESO, babaen ken ni Jocelyn D. Baldiviso, ti panagsanay. Nagpaay a trainor da Jomaldrein D. Caypuno ken Herson Antolin ti TESDA-Lasam.
Segun ken ni Caypuno, sensitibo ti panagpatanor iti uong ta nalaka a makontaminaran dagiti bukel ti uong. Kinunana a saan koma a maanginan dagitoy kabayatan a maipan iti pagpatubuan a polypropylene bag a naglaon iti nagragadian (sawdust), tuyo (rice bran), apog (lime), ken brown sugar.
Ilocos Sur, Umuna a Puesto iti Regional SubayBAYANI Awards
Kinuna pay ni Caypuno a tapno maliklikan ti kontaminasion, masapul a nadalus dagiti aramaten a materiales tapno maliklikan ti bakteria. (Edison B. Tobias)
