Nangilatang ti gobierno probinsial ti Ilocos Norte iti PhP2.8-milion a pondo para iti scholarship program a maited iti 16 nga estudiante ti abogasia iti daytoy a 2023.
Inaprobaran ti Sangguniang Panlalawigan (SP) itay Oktubre 9 ti scholarship program a mangted iti tunggal benepisiario nga estudiante iti PhP5,000 a binulan nga alawans.
Sagudayen ti scholarship program a no makalpas ti scholar ken makapasanto daytoy iti bar exams, masapul nga agserbi iti dua a tawen iti gobierno probinsial.
Kinuna ni Gobernador Matthew Joseph Manotoc a nailatang ti pondo para scholarship tapno aprobaran ti SP gapu ta panggep ti gobierno ti mangala iti ad-adu pay nga abogado.
Ilocos Sur, Umuna a Puesto iti Regional SubayBAYANI Awards
Segun met ken ni SP Member Saul Paulo Lazo, babaen ti panangted iti scholarship, matulonganda dagiti interesado nga agadal iti abogasia ken makatulongda iti pannakaresolba ti adu a maitantantan a kaso iti korte.
Iti napalabas a dua a tawen, nakabusbos ti gobierno probinsial iti mapan a PhP266 a milion para iti nadumaduma nga scholarship programs. (Leilanie Adriano/PNA)
