Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-3 a Paset)
KAS iti sigud, nakita ni Jong ni Ella iti umuna nga intar dagiti tugaw iti makanawan ti rueda. Nakaul-ulimekda ken Johnny a kumitkita kadagiti agpipinnasippit iti ring idinto a nakatakder iti abay ti balasang ti kristona nga agwagwagis iti panangyawagna iti pustada.
Inyarudok ni Jong iti ampir ti ring iti panagturongna iti yan da Ella.
“O, may kalaban na?” sinaludsod ni Ella.
“Adda. Alimbuyogen,” insungbat ni Jong.
Galiera Queen (MAUDI A PASET)
“Saantay' met la a mapeluan?”
“Pelo ti alimbuyogen, kuna ni Elmer. No kastoy kano a kadakkel ti bulan, abaken ti pulang linaw ti alimbuyogen.”
Nagtungtung-ed ni Ella. “Akinmanok?”
“Bata ni Bitangcol na taga-Project 8 ang naglabas sa ulutan.”
“Manok ngarud ni Bitangcol. Isu laengen ti makitkitak ditoy Sta. Ines nga agmanmanok ‘ti brown red. Katkatawaanda ta dina kayat ti sumurot iti uso. Ngem agab-abak met dagiti manokna. Sige, sixteen fifty laeng,” intung-ed ni Ella.
Timmallikud a dagus ni Jong. Isu met a maikasa ti kasador ti pusta dagiti aglaban.
“Jisss! Jisss!”
“’Pu-siyam! Pu-siyam! Hoy!”
Inapput ni Johnny dagiti lapayagna iti pannakatitilengna iti aglalabbet nga innawat iti pusta. Nagkatawa ni Ella.
“Masaya, ano?” kinuna ni Ella sana kinalbit ti gurong ti kristona. “Dos-dos sa wala!” kinunana.
Inwaras ti kristo ti panagkitana. “Hoy, hoy!” sineniasanna ti padana a kristo iti ballasiw ti rueda a mangisensenias iti sangaribu sa imparabawna ti kanawan a dakulapna iti ulona.
Insarang ti kristo ni Ella ti pinagsuekna a dua a ramayna iti kristo iti ballasiw ti ring. Ngem nagngilangil daytoy a bulonna a nangsenias iti sabali iti likudanna.
Iti ruar, nagtalangkiaw ni Jong idi dina makita dagiti kakaduana iti ruar ti pagataran. Tadtadianen ni Elmer ti manokda? Imposible, nakunana met laeng iti unegna. Nanglikaw iti kanigid ket tinurongna ti pagiintaran dagiti natadianen a manok. Awan pay dita da Dex. Nagsubli. Aglayon koman iti kuarto dagiti labahero idi bumtak ti parpar a timek iti megapon ti para awag kadagiti matadian.
“Number 7, 8, 9 at ten, tari na!”
Tallo a nagubba iti manok ti nagsasaruno a simrek iti gaffer's room. Isu met a rummuar da Elmer iti restroom. Sinabat ida ni Jong.
“Hinilamosan namin. Agal-al ngamin,” kinuna ni Dex.
“Maikamanotayo?” sinaludsod ni Jong.
“Maikasangapulo, ngem mabalin nga isengngatda ti super no nakasaganan ti aglaban,” insungbat ni Elmer a bulonna a nagturong iti pagtadian.
Adu latta ti pasalsali iti gaffer's room uray kanayon a maipalagip a ti laeng labahero, handler ken ti mangiggem iti manok a matadian ti mapalubosan iti airconditioned a kuarto. Adda paspasurot dagiti agpatadi, adda agsisiim iti pustaanna, adda met dagiti kunam la no tahor ngem sumursurot laeng kadagiti adu ti iserrekna a manok iti galiera tapno makalibre nga agbuya.
Inturong ni Elmer dagiti kakaduana iti akinkanawan a suli iti laem ta nakitana a bin-ig a miron dagiti nakaistambay dita. “Ditoytayo,” kinunana sa bimmislin. “Kayo naman, wala naman kayong ginagawa dito, eh!”
“Si Elmer naman! Malamig dito, ba!” kinuna ti maysa a bulonna a naglisi. “Maaasahan ba ‘yan?” insungona ti baud nga ubba ni Dex.
“Kahit ibenta mo ang bahay mo pati asawa mo at ilogro mo!” inkatawa met ni Elmer. Indissona ti sangkaigpilna a bassit a bag iti pasamano a naimuntar iti diding.
Pinatallikud ni Dex ti ubbana a manok ken ni Elmer. Iniggaman met ni Elmer ti kanigid a saka ti baud sa tiningiganna.
“Dimo unay begkesen ti panangiggemmo tapno di aggulagol. Relaks lang,” imbilin ni Elmer ken ni Dex. Linuktanna ti pagikarkargaanna kadagiti tadi ken dadduma pay a ramitna. Inruarna ti umamarilio a lupot nga umuna nga ipatapatna iti saka ti manok. Imputipotna daytoy iti gurong ti baud, a pagsinsinnublatenna nga isallawid iti ngatuen ken baba ti kawwet. Sakbay a maungpotna ti iputputipotna, inruarna ti aw-awaganda iti unan wenno napagtimbukel a palotsina a maysa a pulgada ti kaatiddogna ngem nalaplapat ngem lapis. Pinutipotanna bassit daytoy sa impuestona iti abay ti kawwet. Kalpasanna, inruarna ti maysa a kasla sangapirgis a lalat nga adda abutna.
“Apay ‘ta lalat? Isu pay a mangpadagsen,” kinuna ni Jong ta ita laeng a naginteres a mangbuya iti panagtadi ni Elmer.
“Sapatosna,” inkidday ni Elmer ket impuestona ti lalat ket apagisu la unay ti abutna iti kawet. Kalpasan ti sabali pay a putipot, sinirigna manen ti gurong ti manok sa nangiruar iti nakasilsilap a tadi. Inrukodna ti tadi manipud iti kikit. Nalabes bassit iti tumeng ti tirad ti tadi. Nagtungtung-ed ket kiniddayanna ni Jong. “Dati, agingga laeng iti tumeng ti kaatiddog ti tadi. Saan itan. No flyer ti manok, uray aglabes iti tumengna ti ikapetmo a tadina. No kasla masinggan a pumarakapak ti danogna sa ground fighter, kaykayatko a kabitan iti pagattumengna a tadi. Depende met ketdi iti kursonada ti labahero,” inlawlawagna.
Nagkintayeg ni Jong iti simmaruno nga inaramid ni Elmer. Kasano ngamin ket inamimian ketdin daytoy ti puon ti tadi sa nangiruar iti nakawikaw a linas iti bagna.
“Sus!” Nagsul-oy ni Jong sa pinagsinnublatna nga inaprosan dagiti takiagna ta simgar.
Imlek met ni Dex. “Apay, kafuy ni Elmer ta itulokna a maiwa ti subsobna?” kinunana.
Insingkaw ni Elmer ti kasla nagbasikaw a puon ti tadi iti kikit ti manok. No namin-ano a sinirigna. Idi mapneken iti panagsimpa ti sinanpakawan a puon ti tadi iti kinunana itay a sapatos, inunnatna ti gurong ti manok ket sinirigna manen. Kinita ni Jong ni Dex.
“Kitkitaenna no bumatog met laeng ti murdong ti tadi iti ubet ti manok. Masapul a saan nga aglabes iti kanigid kasta met iti kanawan. No nauneg ti puesto ti tadi, agsarili wenno masugatanna ti bagina. No naruar met, daplis wenno damgis laeng ti sugat ti kalabanna, saanna a mapuruan. Dakkel ti tiansana a maabak ta ania ngarud ket di met makapatay ti patamana,” inlawlawag ni Dex.
Ni met Jong ti nagtungtung-ed. Inwarasna ti panagkitana. “Ti kalabantayo?”
“Dita ruar ti nagtadianna,” insungbat ni Elmer. Naipuestonan ti tadi ti manokda. Sinaggaysana a binennat iti apagapaman dagiti ramay daytoy sa insulbongna ti baina. Kalpasanna, inruarna ti pagpapugsitna a danum. Nagkiremkirem ti manok a napugsitan ti rupana.
Nagsisinan dagiti tallo idi rummuarda iti pagtadian: naglayon ni Jong iti yan ni Ella, nagturong ni Dex iti puesto dagiti natadianen nga aguray ti batangda nga umuli iti gradas, napan met nagistambay ni Elmer iti puesto ti “doktor” dagiti masugatan a manok a nangitalkanda iti karton ti manokda a yan ti para pasippitda. Urayenna dita ti batangda iti ring.
No kastoy a bigbigat iti Sta. Ines Cockpit Arena, kaaduanna kadagiti masapa a laban ti saggabassit ti pustana. Adda pay agibbet iti lima ribu, lima gasut. Agingga laeng iti onse mil ti regular. Kinse mil met ti super. Nupay kasta, manmano nga adda super iti agsapa ta kaaduanna nga alas onse, alas dose no agsangpet dagiti ibilangda a big time. Isu nga itay kumarit iti super ti kalabanda, pinababa-pinangato ni Elmer. Impapanna a dayo daytoy a mabalin nga agsapsapul ti umakaranna a galiera ta nagmalas dita La Loma, Kaybiga, Sta. Monica, Meycauayan, Texas, Blue Mountain, Elorde, Taguig ken sabsabali pay a kabangibang a galiera.
Di pay nabaraan ti nagtugawan ni Elmer idi sultipan ni Dex. Isensenias ti Dex nga isudan ti sumaruno iti kalleppas a regular.
Innala ni Elmer ti intugotda a pagpasippit. Alimbuyogen daytoy a kasla mestiso. Pinagretiro ni Mang Bianong kalpasan ti maikalima a panangabakna ta naibusen dagiti ramay ti kanigid a sakana. Suerte kano ta awan pay naabak a pinasippitda iti daytoy.
Addan iti gradas ti kalabanda idi makauli da Elmer ken Dex. Inasitgan ti kasador ken ti para lista ni Elmer. Imbaga ni Elmer ti paradada sa sineniasanna ni Ella.
Nasiputan ti kasador ti panagsenias ni Elmer. “Manok ni Ella?
Nagtung-ed ni Elmer. Insenias ti kasador ti batog ti wala kada Elmer. Nagpuesto metten ti kalabanda iti batog ti meron.
Binatog ti kasador ni Ella. “Pago ka ng lima. Fifteen ang diperensiya!” inseniasna.
Nagpanunot ni Ella. Limapulo ribu ti balonna a naurnongna kadagiti panangabakna. No kas pagarigan, adda pay trenta mil a mabati. Ngem apay a panunotenna ti pannakaabakna? No mano ti balonem no mapanka iti galiera, lipatemon a kuartam pay dayta. Panunotem ngarud a dakdakkel pay ti yawidmo ngem ti balonmo, nalagipna ti kunkuna ni Mang Bianong.
“Sige!” kinunana sa pinagsuekna ti dakulapna.
Inkur-it ti para lista ti pago ni Ella sa inseniasna ti lima ribu a bulonna a nangsurot iti kasador a mangsensenias iti maysa a tahor a katugaw ti manager ti galiera iti espesial a puesto iti bangir a ringside.
“Ano, Bossing Gino? Sampu na lang. Larga na?”
“Kaninong manok ang pulang linaw? Kaninong tao ang handler? Si Bitangcol ang kalaban,” kinuna met ni Gino.
“Kay Ella, ang anak ni Mang Bianong.” Intudo ti kasador ni Ella.
Nagkatawa ni Gino. “Sige, kahig!”
Sineniasan ti kasador ni Elmer. Nagpinnasikad da Elmer ket Dex. Ket nagtungtung-ed ni Gino idi namermeran ni Elmer iti nadam-eg a tapok nga inkup-ay ti manokna.
“Bitawan!” kinuna manen ni Gino.
Nagtungpal ni Elmer. Nagpayakpak iti nakapigpigsa ti manok ni Ella sa nagtaraok ken sinarigsiganna ti saka ni Elmer.
“Sige, larga!” insenias ni Gino. “Maganda ang manok ni Bitangcol pero ayaw ko.”
Nagkatawa ti kasador. Saan ngamin nga agkadutdotan da Gino ken Bitangcol ta isuda ti mabigbig nga ari-ari dagiti mammallot iti Sta. Ines. Nupay kasta, ad-adu pay laeng ti panangabak ni Gino ngem ni Bitangcol.
Nasiputan dagiti tao ti senias ni Gino ket bimtak ti arimbangaw. Liamado latta ti manok ni Bitangcol kadagiti pumapago.
“Meron! Meronnn!”
“Diyes! Diyesss!”
Nagrukob ti kristo ni Ella. “Ano, bossing?”
“Sige, tawag ka ng five thousand!” insungbat ni Ella.
“Oy, ang laki na’ng pusta mo, ah!” imbabalaw ni Johnny. “At tingnan mo sila!” Intudona dagiti makipimpinnukkaw iti ngato. “Kasano nga ibagam nga agrigrigat ti adu a Filipino ket maituredda met nga ipusta ti kuartada iti saan a sigurado nga investment?”
“C’mon, BBJ!” Nagkatawa ni Ella. “Gasanggasat ngarud. Bareng mangabak.”
“Ket no maabak?”
“Paset ti ay-ayam dayta. Saan met a kankanayon ti malas ket!”
Kimmaro ti pannakadehado ti manok ni Ella idi isenias ti sentensiador nga umulogen iti gradas dagiti para pasippit. Ngem napatured dagiti dehadista idi kimmaro ti karit dagiti liamadista.
“Anim! Animmm!”
Timmulad ti dadduma. Agingga iti awanen ti arindenggan.
“Ano, bossing? Malalim na ang tawagan. Six hundred mananalo ng one thousand!” kinuna ti kristo ken ni Ella.
“Tama na, El!” inyanawa ni Johnny. “No maabakka, pordios! Nagdakkelen a kuarta!”
“Johnny!” inyayug ni Ella nga agkatkatawa. “No umayka iti galiera, kasla awanen ti kuartam uray no mano ti balonmo! Sige, one eight na lang,” kinunana iti kristona.
Saanen a nagtimek ni Johnny. Ngem iti unegna, kunkunana a dina la ketdi kayat nga igasanggasat ti mapaspastrekna iti klinikana iti ayup. Agasem a rigatna a nagadal iti veterinary medicine? Uray la immabot iti innem a tawen ti uppat a tawen a kursona gapu iti napalalo a rigatna. Naimbag ta dinengngeg sa (wenno naasian sa ketdi) ti anghel a kasigudna, dagiti kararag ken atangna a sinukat a nagsusuon iti liningta nga itlog ket tinulongan daytoy iti board exam ta nakaruar iti umuna laeng a panageksamenna.
“’Tay PA, impatomarmo met laeng?” inyarasaas ni Elmer ken ni Dex.
“La ketdi, a. Apay, kefuy ni Dex? Ngem dandani nalipatak. Nakaruarakon idiay gate itay malagipko. Pinasublik ken ni Jong. Kasta unay ngarud ti sakuntipna a nangsubli.”
Adda naggilap iti muging ni Elmer. Pinerrengna ni Dex. “Kabesadona ti langa ti agas ken ti nangikkam?”
“Imbagak. Danagmon, aya! Apay, kefuy ni Jong? Ammona nga idiay rabaw ti bassit a kabinet a pagiduldulinak iti pomadak ti yan dagiti agas. Ken para andur ken pagpatured laeng dagiti kapsula. Dimo madlaw a kasta unayen ti garawna? Gumanaten a makipinnatay!”
Pudno, gulagol a gulagol ti manokda. Ken taraok a taraok. Namamaalam na, ikankantiaw ngarud dagiti miron.
“Pasippitam pay,” kinuna ni Elmer ket insarangna ti luy-ong ti manokna.
“Baka aglabes ti uyongna,” impalagip met ni Dex, ngem kaskasdi a pinasippitanna ti manokda. Uray la nagkiok ken pimmugtit ti lugit ti manokda idi masippit ti ubetna. “Sinal-it a manoken. Nakamagmaga itay agsapa ti lugitna!” immusiigna sa inlagidna ti bukot ti dakulapna a nalugitan iti gayadan ti maong a shorts-na bulonna nga immulog iti gradas.
Sineniasan ti sentensiador dagiti agibbet. Inukas dagitoy ti linas a naiputipot iti gurong dagiti manokda a gawid ti baina dagiti tadida. Pinunasanna iti kapas nga adda alkoholna dagiti tadi. Ad-addan ti panagariwawa dagiti liamadista.
Nagtakder ti sentensiador iti nagbaetan dagiti agibbet sa intudona ti puraw nga uged kas panangpalagipda kadagitoy a di rumbeng a lumbesda dita. Kinitana ti timer iti ngatuen ti booth ti kahera. Nagsenias met ti timer. Kunam pay, kasla nasarait ti bibig dagiti tao idi isenias ti sentensiador ti larga a bulonna a pimmanaw iti nagbaetan dagiti agibbet.
Pinirit ni Elmer ti piditpidit ti manokna sa pinikpikna ti bakrang daytoy idi aggulagol. Siniguradona a nangatngato ti manokna idi agpinnaayatda iti kalabanna. Sa nakatantanang a nangidisso iti manokna idi ibaba ti kalabanna ti manokna. Nagsanud sa kinitana ti kalabanna. Nakasimsimbeng ti langa daytoy, umis-isem a mangsipsiput iti manokna idinto nga iggemna dagiti ungto ti inyukkorna a tali daytoy.
Paarudok a pasarigsig ti darup ti manok ni Elmer a kasta unay ti pasgar ti patengngedna. Bimtak ti riaw dagiti agbuybuya idinto a kasla marba ti galiera iti palagapag dagiti adda iti bleachers.
“Masinggan, bebiii!” inriaw ni Elmer.
Iti ringside, kinabbeng ni Ella ti abaga ni Johnny sa impennekna a winagwag. “Ganyan, ganyan! Huwag pauunahan!” inraedna.
Kunam pay, uray la nagdiwig ni Johnny idinto a kimpet iti iking ti tugawna tapno di matnag.
“El, ano ka ba? Matnagakon, 'ba!”
Nagkatawa ni Ella. “Sori!” Kaskasdi a pinanalpaakna ti abaga ni Johnny.
Nagriaw met dagiti liamadista idi rimmasuk ti alimbuyogen sakbay a maasitgan ti kalabanna. Ngem saan a simmurot iti aire ti manok ni Ella. Tinangadna laeng daytoy ket ad-addan ti pasgar ti tengngedna idinto nga immurnos ti nakaukrad nga ipusna iti bagina.
“Susmariosep!” nayesngaw ni Elmer. Tinengngelna ti angesna amangan no tumayab met ti manokna ket ipiten ti kalabanna.
“Bagsakan mo, bata!” inriaw ti nangibbet iti alimbuyogen.
Nakagin-awa dagiti dehadista idi saan a simmurot iti ngato ti pinustaanda. Ngem apaman a nagdisso ti alimbuyogen, dinarup ti manok ni Elmer. Nagriaw ken nagpalagapag dagiti dehadista.
Ngem kasla nasigkat ti ngiwat ni Elmer idi linagto ti manokna ti teltel ti kalabanna, pinungotna ti teltel daytoy sa inisiisna ti ipusna. Bimtak ti katkatawa dagiti agbuybuya idi nadlawda a dinakayan gayam ti manok ni Elmer ti kalabanna.
“Mana sa amo! Mana sa amo na ma-el!”
“Pahingi naman ng lahi niyan, ha-ha-ha!”
Kasla nadiram-osan iti danum a napis-itan iti sili ni Elmer iti bainna. “Nakisal-it a manoken! Mangibabain!” imbanang–esna.
Nakipagkatawa met ni Ella, ngem kasta unay ti labagana.
Nagriaw manen dagiti agbuybuya idi inkuduag ti alimbuyogen ti kalabanna ket nasarukigkig daytoy. Apagkirem, inistret ti alimbuyogen ti manok ni Elmer. Napatugaw ti manok ni Elmer. Idi tumakder nga umasideg iti kalabanna, ul-ulodennan ti kanawanna.
Ngem nagriaw met dagiti dehadista idi nagmattider ti alimbuyogen ket naglugad dagiti sakana.
“Tinamaan sa likod, ha-ha-ha!” adda nangiriaw idi agtedted ti dara ti alimbuyogen.
Dimmanog ti manok ni Ella, gimmiddan ti alimbuyogen, ngem akimbaba. Agpada a naluspak dagiti manok idi agdissoda. Pinungot ti sentensiador ti bukot dagiti manok sa inkariona. Nagsinnippit dagiti manok. Indisso ti sentensiador dagiti manok nga agpadpada nga agtedtedted ti darada. Ngem saan nga immakar dagiti manok iti nangidissuan ti sentensiador kadagitoy. Sa idi kuan, in-inut a nagkulpi dagiti tumengda sa kasla makadungdungsada a kimleb.
“Paglapitin mo!” imbugtak ni Elmer iti sentensiador sa pinidutna ti naibbatanna a baina ti tadi ti manokna ket pinuyotpuyotanna daytoy.
Ngem nagtalinaed a kalmado ti nangibbet iti alimbuyogen. Ur-urayenna nga umasideg ti kalabanda ta kasta ti ugali ti puli ti manok ti amona. Agingga iti umang-angesda ket maangotda nga adda iti asidegda ti kalabanda, ikarkarigatanda a tukmaan sa pagkuripaspasanda.
“Kario!” adda nangiriaw kadagiti agbuybuya iti ngato. Tinulad ti dadduma.
Nagparintuod ti sentensiador ket tinukmaanna manen ti bukot dagiti manok. Pinagkariona dagitoy. Naggiddan a simmippit dagitoy. Indissona manen dagiti manok ngem agarup sangadangan laengen ti baetda.
Pudno, immaddang ti alimbuyogen ken insapulna ti sippitna. Pimmungot met ti manok ni Elmer ket kunam la no agbugbugsotda a nagkinnuripaspas. Sa nagtalnada.
“Meron! Meron!” adda nangipakamakam.
Timmulad ti dadduma a makaammo iti kalidad dagiti alimbuyogen ni Bitangcol. Isu man met a natalged ni Bitangcol a mangibaon kadagiti taona a mangilaban iti ‘lahi’ ti alimbuyogenna ta manmano ti maregreg. Kunada ngarud iti Sta. Ines, agingga nga umang-anges dagiti alimbuyogen ni Bitangcol, saanka a makasigurado.
“Kario! Kario!”
“Meron! Meron!”
“Bangon, bata! Bangonnn!” imbirakak met ti nangibbet iti alimbuyogen ket kinarintarna nga inyudaod ti tali ti manokna iti teltelna.
Kinarintar met ni Elmer a pinuyotan ti baina ti manokna. Uray manggapun nga awan sumngaw a puyotna.
Madamdama pay, inulod ti manok ni Elmer ti kanawanna ket inkarigatanna ti immasideg iti kalabanna. Tinaragatagna ti bukot ti alimbuyogen sa nagtalna a pinandaganna ti kalabanna.
Nagparintuod manen ti sentensiador. Pinagkariona dagiti manok. Simmippit naminsan ti alimbuyogen.
“Isa!” Nagdadanggay dagiti tao.
Insublat ti sentensiador ti manok ti Elmer. Simmippit met daytoy. Isu nga indissona manen dagiti manok.
Iti ringside, agkaling-etanen da Jong ken Ella idinto a saanen a maitured ni Johnny ti kumita iti ring. Iti ridaw a sumrekan dagiti natadian a manok, kakaasi ni Dex nga agtiltil-ay a sumirsirip ta natatayag dagiti adda iti sanguananna. Awan ngaminen ti panawenna itay a mangitaray iti pinagpasippitna iti kartonda ket inanusanna lattan ti nagtakder iti ridaw.
Ngem nagdisson ti ulo ti alimbuyogen iti daga. Natangar pay laeng ti ulo ti manok ni Elmer ngem lumitemen ti rupana. Inulodna manen ti kanawan a sakana agingga iti nakaasideg iti kalabanna. Ket nagriaw manen dagiti agbuybuya idi rabawanna daytoy sa inkarigatanna nga inisiis ti ipusna. Intallikud la ket ngarud ni Elmer ti mababain nga isemna. Iti ringside, inapput met ni Ella ti rupana.
Siaalisto ti sentensiador a nangpungot iti bukot ti manok ni Elmer. Ngem idi bagkatenna koman ti alimbuyogen tapno ikariona, limmagto daytoy iti nakangatngato. Idi agdisso, nagkuripaspasen daytoy.
Impempennek ni Elmer ti limmagto nga agririaw a mangdandanog iti angin. “Tinalo ko si Bitangcol! Tinalo ko si Bitangcol!” Idi maipapasna ti agririaw, inawatna ti manokna. Ngem apagisulbong ti sentensiador ti baina, natay metten daytoy.
“Yesss! Yesss!” indir-i met ni Dex sa siaalisto a timmallikud. Napanna impisok iti karton ti pinagpasippitna sa arintarayen a nagsubli tapno alaenna ti inabakda a manok.
Iti ringside, di napupuotan ni Ella nga inarakup ni Johnny ket uray la nagtunglab ti baro iti pannakakigtotna.
“Yesss! Yesss! Yesss!” indir-i ni Ella ket yinugyogna ni Johnny.
Namunaw metten ti pannakakigtot ni Johnny. Kunam pay, uray la naikidemna ti imnas a nariknana iti naidennes a barukong ni Ella iti puon ti takiagna.
Madamdama pay, immasideg ni Gino iti nagtugawan ni Ella. “Congratulations! Napaspasarakam ti manok ni Bitangcol!” kinunana ket linamanona ti balasang.
Paspasarak man ken saan, saanen nga inkaskaso ni Ella ti kinuna ni Gino. Ti napateg, nangabak ti manokna, ken ti bolsada.
Nakapangpangas ni Dex a nangbittatay iti alimbuyogen idi umulogda ken Elmer iti gradas. Natay met ti manokda apaman a nakasippit ngem inubba latta ni Elmer a kasla sibibiag.
Nakaruaren da Ella iti ringside idi makadanon da Elmer ken Dex iti labes ti pagataran. Naglilinnipakda iti dakulap.
“Padalusak ‘toy bihag?” sinaludsod ni Dex a ti inabakda ti kayatna a sawen.
“Sikanton ti manglamaw ken mangparti. Pulotanyo no bigat,” kinuna ni Ella.
“Ipumpontayo ‘ta manoktayo,” kinuna met ni Elmer. “Ania, agpustatayo pay?” Kinitana ni Ella.
Nagkatawa ti balasang. Saantay' a mayawid amin ti kuarta ditoy galiera. Intayon. Huston ‘toy inabaktayo!” kinunana a bulonna nga immaklili ken ni Johnny. “Di ba, BBJ?”
Kinamat manen ni Johnny ti angesna idi mariknana ti bara ti barukong ti balasang a nailagid iti puon ti takiagna. “A, w-wen, wen! Ania ‘diay kunam?”
“Si BBJ talaga! Hanggang ngayon nininerbiyos pa. Nangabaktayo la ngaruden!” Pimgaak ni Elmer.
Nagkakatawa met da Dex, Jong, ken Ella. Ania ngarud, nagsintonado manen ti panaganges ni Johnny iti pannakaidennes ti barukong ni Ella iti bagina.
Pinaisardeng ni Ella ti luganda idi makadanonda iti nagsulian ti Saguittarius St. ken Quirino St. Linuktanna ti nakabungbungkong a wallet-na. Inikkanna ni Elmer iti sangaribu.
“Pulotan ken mainum. Madamdama ti kuartayo,” kinunana.
Agsulsul-oy ni Elmer a dimsaag. Arintarayen a bimmallasiw iti kalsada. Nagtarus iti Mang Junne Fried Chicken. Nagorder iti dua a fried chicken sa nagturong iti Highway Supermart. Gimmatang iti dua nga Empe. Naisupoten ti orderna a manok idi agsubli.
Kalleppas a nangaldaw da Mang Bianong ken Manang Mameng ket agbuybuyada iti telebision. Nagtengngaag ni Manang Mameng idi makangngeg iti rebolusion ti makina ti lugan ken nasarangsang a katkatawa.
“Ne, nagsapadan a nagawid? Naabak siguro ‘ta anakmo!” kinuna ni Manang Mameng a bulonna a timmakder.
“Baliktadna ti pampanunotem!” inkatawa met ni Mang Bianong. “Nangabakda. No naabakda, kasla nagminatayda koma a sumangpet.” Timmakder ket sinurotna ni Manang Mameng iti ridaw.
Aggargarakgak ni Elmer a nangisarang iti pinatangarna a tangan ti imana ken ni Mang Bianong. “Nangabaktayo, boss!”
Agkatkatawa met ni Ella a nagmano iti inana. “Gutom na kami. Anong ulam, moma?”
“Dinengdeng a nasagpawan iti daing nga aramang,” insungbat ni Manang Mameng.
Nagmusiig ni Ella. Kinitana ti supot a bitbit ni Elmer. “Pangaldawtay' pay la dagita ta tumaraykayonto iti sabali a pulotanyo?”
“Dakayo laengen ti mangaldaw, boss,” kinuna ni Elmer ket inyaonna ti maysa a supot ket inyawatna ken ni Ella. “Huston ‘toy maysa a pulotanmi. Tumarayto ni Jong iti tinuno a bangus a nayonna.” Kinitana da Mang Bianong ken Manang Mameng. “’Tang, ‘nang, ditakam' farm nga agiinnistoria!”
“Ala, wen. Ngem diyo palaluan ti aginum, a. Sakitto met la ti bagiyo,” kinuna met ni Mang Bianong.
“’Maykonto ipan ti kuartayo no malpaanak,” impakamakam ni Ella kadagiti tallo.
“OKEY. Adjourn muh-na ang hession, hik-hik!” Intangad ni Elmer ti basona. Nagaruyot ti Empe kadagiti gigisna.
“Tos!” intim-og met ni Dex ti basona iti baso ni Jong ket naggiddanda a nangitangad. Nagsanggir iti diding. Madamdama, agur-uroken daytoy.
“Mafanak ‘diay heben, he-he! ‘Maykayo? Dhiyo kuna nga ibankoyo ‘ta dua rivu nga inted ni Ella!”
“Naulawakon. Mapanakon baka rikpannak ti pagkaseraak,” insungbat ni Jong.
“Agdigosak viit sakonto tilmonen ti kakaisunan nga MB, hik-hik! ‘Bag la ketdin ta adda pay maysa. Wait ka lang, magic bukel, hik-hik!” Intudo ni Elmer dagiti botelia ti agas iti rabaw ti bassit a kabinet ni Dex. Ginuyodna ti tualia ni Dex iti pagsalapayan ket napanen iti gripo iti likud ti kalapaw.
Nagtalangkiaw ni Jong idi makalikud ni Elmer. Magic bukel? Adda pay maysa a nabati? Kinitana ni Dex. “Dex…”
Ngaretnget ken urok laeng ti sungbat ni Dex.
Nangnangngegen ni Jong ken ni Elmer dayta kunkuna daytoy a bukel, ngem awan man la ti interesna a mangkita iti dayta. Dina pay ket ammo nga agiduldulin ni Elmer iti bukel iti kalapaw ni Dex. Umasul met a kapsula a kas iti ipatpatomar ni Dex kadagiti para labanda ti kakaisuna nga agas a nagyan iti linuktanna a botelia, nga isu ti intedna ken ni Dex.
Ngem kaskasdi a nagtibbayo ni Jong. Sanamagan, nakunana iti unegna. Ginaw-atna ti maysa kadagiti botelia ket kinulogna. Adu ti nagyan daytoy.
Nagtalangkiaw ni Jong. Pumarasapas pay laeng ni Elmer iti yan ti gripo.
Nangipisok ni Jong iti maysa a kapsula iti botelia a nangalaanna iti intedna ken ni Dex sa nagdardaras a rimmuar iti kalapaw. Nakaruaren iti gate idi mangngegna ti katawa ni Elmer.
“Hagsaganaka, beybe, hik-hik-hik!”
(Maituloyto)
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
