Galiera Queen (4)-Bannawag

Nobela ni DIONISIO S. BULONG

Naipablaak iti Bannawag, nangrugi iti Marso 11, 2013 a bilang.

(Maika-4 a Paset)

IMLEK ni Elmer idi makitana ni Dex nga agur-urok a nakasanggir iti diding. Insuotna ti para basketbol a kamisetana a paris ti maong a pantalonna. Agkurkuridemdem a nangsango iti sangadakulapan a sarming nga impigket ni Dex iti diding ti kabinet. Kalpasanna, sinapulna ti losion ni Dex iti uneg ti kabinet. Sinapsapuanna dagiti takiagna sa ti rupana.

Kalpasanna, linuktanna ti maysa kadagiti dua a botelia iti rabaw ti kabinet, imbukbokna iti dakulapna ti nagyanna ket insiutna iti ngiwatna.

“No haangka koma a vartek, di isurotka koma idiay heben!” kinuna ni Elmer ket nakapigpigket dagiti kiremna a rimmuar iti kalapaw. Nasisirap idi makaruar iti ruangan ta nakasindin dagiti bombilia kadagiti poste a naipaunor iti Karpa St. Impayongna ti kanawan a dakulapna iti tallo ramayan a mugingna ket kinuridemdemanna ti nagsulian a masansan a pagurayan dagiti depedal a traysikel iti pasahero. Idi awan ti makitana a lugan, inunorna ti Karpa St. sa nagmattider iti nagsulian iti Kitang St.

Ngem kaskasdi nga awan naurayna a traysikel. No siak ti presidente ti homeowners ditoy, paritak a sumrek dagitoy a traysikel tapno agnakemda, indayamudomna. Ket inkeddengna a pagnaenna laengen agingga iti nagsulian ti Karpa St. ken Raymundo St. iti Silvina Subdivision. Pagpiaanna, adda traysikel a nangitulod iti pasahero iti ungto ti Karpa St. Nagpaitulod iti Mindanao Avenue iti Gloria V. Dita, nangpara iti taksi ket nagpaitulod iti Firefly Sauna iti Quezon Avenue.

Ad-addan ti rayray dagiti bombilia ken kasla agkikinnidmat a silaw idi agpakanawan iti Quezon Avenue manipud iti EDSA. Ket idi agsardeng ti taksi iti batog ti Firefly, sinuknor ti salemsem ti gartem ti barukongna. Adda ngata kabarbaro? nasaludsodna iti nakemna. Inyawatna ti one hundred fifty iti tsuper. Keep the change, kinunana pay, ngem linibbian ketdin ti tsuper ti duapulo a pisos a tip-na.

Pinaliiwna ti bagina idi addan iti sango ti pasdek. Adda nariknana nga apagapaman a bitek ti gagar. Apagisunto, naisipna ket inasitganna ti guardia a nakatugaw iti sikigan ti ridaw a digdigosen ti lumabaga a lawag ti bombilia iti batogna.

“May bago ba, Dong?” Kiniddayanna ti guardia.

“Meron, boss! Bagong lipat, he-he-he!” Induron ti guardia ti nabengbeng a rikep. “Tuloy! Andyan si Kokoy!”

Timmakder ti pangrapisen a lalaki iti sango ti lamisaan iti kanawan a paset ti lobby idi makitana ni Elmer. Nagaruat daytoy iti maong a pantalon ken dapuen a polosert a kinorbataanna iti lumabaga. Agtallopulona, nalinis ti rupana ken pinagpigarna ti nangisit ken bumalitok a buokna.

“Tuloy, Boss Elmer. Tamang-tama ang dating mo. May mga bago kami!” Sinabat nga inalamano ni Kokoy ni Elmer. “Mamili ka!” Intudona dagiti uppat a naikadakkel a retrato iti tengnga ti agduapulo a ladawan iti sinampuso a telon a mangsarabo iti kustomer no sumrek iti lobby.

Kasla nakakakita iti marabamban a salamagi ti nuang ni Elmer idi mamingminganna ti maysa kadagiti retrato. Agsansanapsap a nangitudo iti retrato. “Maganda ba sa personal?”

“Pang-artistang beauty!” kinuna met ni Kokoy a bulonna a nangsallabay ken ni Elmer ket inturongna daytoy iti window ti kahera. “Number one!”

Saanen a nasken nga itulod pay ni Kokoy ni Elmer idi mabayadan ti naud-udi ti obligasionna. Immuli iti maikadua a kadsaaran.. Kiniddayanna ti guardia iti sungaban ti pasilio idinto a tinengngelna ti panagangesna ta sinabat ti naggampor nga angdod, agat-alkohol, ken agatpulbos nga alingasaw dagiti nakortinaan a babassit a siled a malabsanna.

Lumabaga ti lawag a nangsarabo ken ni Elmer idi iwalinna ti bumerde a nabengbeng a kortina. Bumerde met laeng ti ap-ap ti single a kama. Naguksob sa simmalpa iti kama. Ngem dimlaw idi agilad koman. Kasano ngamin ket imbes nga agpagunggan koman ti kulimbatog iti barukongna, kasla ketdin adda laeng iti kalapaw ni Dex a nakailad nga ap-appayawan ti ridep.

Apay ‘tattan? nakuna ni Elmer iti bagina. Iti kallabes, nagalisto a kuldingen ti di agpabatubat nga iliw. Ita, agduan nga oras a nakapanaw iti kalapaw ni Dex, ngem imbes a kidagen ti MB, nakaim-imnas ketdin ti pannakaililina iti nalamiis a pug-aw ti aircon. Ket nagsuyaab iti nakadakdakkel.

Ikidem koman ni Elmer pangur-urayanna ken ni Number One idi mangngegna ti nalag-an a yanasyas ti tsinelas a sinaruno ti pannakaiwalin ti nabengbeng a kortina.

“Sori, sir. Tinawag kasi ako ni manager! Powder o alcohol, sir?”

Wow! Talaga nga artista ti beauty ni Number One, nakuna ni Elmer iti unegna. Ket kellaat a nagdappuor ti gagar iti luy-ongna. “’Wag na, beybe!” kinuna ni Elmer. Bimmangon, ngem naglisi ni Number One idi guyoden koma ni Elmer ti imana.

“Hep! Ibang usapan ‘yan, sir. Sige, dapa kayo. Agpaklebkayo ta unaek a palukayen dagiti masel iti bukot ken abagayo,” kinuna ni Number One.

'Ba, kayatna ti pasakalye, inyellek ti uneg ni Elmer ket napanunotna a pagustuanna ni Number One. Ket inalus-osna ti pantalonna sa nagpakleb.

Napasul-oy ni Elmer idi mariknana ti nalag-an a pisel dagiti nalamuyot a ramay kadagiti piskel dagiti abagana. Nabayagen daydi naudi a panagpamasahena—idi nangabak ti kattiliw a manok ni Nardo Bigote a natawagan iti sampu-anim, banag a nangkatkatawaanna iti naud-udi. Ta kasano ngamin a di nadehado ti manok ni Nardo Bigote ket abus ta tiniliw laeng daytoy a manador, tapingaran ken pitakpitak pay ta siniluanna nga agkarkaraykay iti kanal. Intugotna laeng daytoy tapno adda maipakitana a manokna iti takilia ket libre a sumrek iti galiera. Kaso, naggagatelanna nga inyatar ti alimbuyogen ni Nardo Bigote iti darisayen. Sus, agmauyongkan san, kinuna ni Nardo. Kontra pelo, abaken ti alimbuyogen ti darisayen, insungbatna. Nayat ni Nardo, ngem pinustaanna nga agpada ti manokna ken ti kalabanna. Pagustuanka laeng. No maabak, ti manok laeng ti abakko, kinunana. Kasano ngamin a di naguneg ti pannakadehadoda ket baak ti kalabanda, pukol payen ti dua a ramayna, pammaneknek a ganador pay ket ngatan daytoy. Kangrunaan, manok ti koronel a napintas ti rekordna iti Sta. Ines Cockpit Arena.

Anian a riaw ken palagapag dagiti dehadista. Kasano ngamin ket nagkayaw-at laeng ti manok ni Nardo Bigote idi inistret ti kalabanna ket naisagud ketdin ti tadina iti kilikili daytoy. Iti ragsak ni Nardo Bigote, timmaray nga immuli iti gradas, inawatna ti manokna iti sentensiador ket binisongbisongna. Ket uray no apagisu laeng a sukat ti impustana iti kalabanda ti inabakna, naragsak latta daytoy ta inikkan ni Elmer iti bayad ti dua botelia nga empe ken para pulotan.

Talaga a tanga ni Nardo. Awan pay serbi ti bigotena, kinuna ni Elmer iti unegna ket nagayek-ek idinto ta dinan maigawid dagiti kalub ti matana.

Iti Karpa St., addan ni Ella iti siledna. Nakalukat ti telebisionna, ngem di met agbuybuya iti telenobela a kas kadagiti dadakkelna iti salas iti baba. Nakasuot laeng iti lumabaga a shorts a nangpatingra iti busnag dagiti luppona ken lumabaga met laeng a bra a nangsappuyot iti sumangkabusnag a barukongna, nakalupisak iti kamana a mangpalpalabas kadagiti ladawan ti nadumaduma a puli ti tatadien iti magasin nga inregalo ni Johnny kenkuana. Napaisem la ket ngarud iti nadarimusmosanna a sutil da Elmer ken Dex ken ni Johnny iti naminsan a panagbakuna daytoy kadagiti piek a napapessaan ti amana. Ayna, BBJ, saan a masukdal ti libre a panagagas ken regregalo ti puso ni Ella. Baliksem ngamin, a! Doktorka, dimo pay madoktor ‘ta pusom, kinuna dagiti dua.

Sabagay, saanen a nasken a baliksen pay ni Johnny ti riknana ken ni Ella. Ammo ti balasang ti kaipapanan ti panangirapit ni Johnny iti ramayna no awaten daytoy ti yawatna. Maawatanna pay ti maitaktakaw a paludipna. Ken lalo pay a maawatanna ti arig panagdigos ti baro iti bangbanglo uray umay laeng agagas iti masakit a manokda..

Ngem di man ammo ni Ella no apay a di maibuksilan ni Johnny ti riknana. Narigat met no iturturongna lattan ti kaipapanan ti tignay ti baro. Ken kangrunaan, kasla maysa a barkada laeng ti mariknana ken ni Johnny.

Iti salas iti baba, kinita ni Manang Mameng ni Mang Bianong a maraisem a nakakidem. Um-umlek, kinalbit ni Manang Mameng ti abaga ti lakayna. “Sus! Umis-isemka, a, ngem dimo ammo a rungrungiitannaka met ti TV. Kasano ket isu metten ti mangbuybuya kenka!

Nagkulagtit nga agkatkatawa ni Mang Bianong. “Pagin-inanaek laeng dagiti matak, 'ba!” kinunana. Linidlidna dagiti matana. “Tay anakmo?”

“Adda siguro dita kuartonan. Ayna, lakay, kasaritam ‘ta anakmo ta ituloyna ti agbasa. Agasem, imbes nga eskuela ti ayuyangna, galiera,” kinuna ni Manang Mameng.

Nagkatawa iti nakapsut ni Mang Bianong. “Ammom, baket, maysa met nga eskuela, maysa nga unibersidad ti galiera. No adda subject nga arithmetic iti eskuela, adda met iti galiera. No adda saykolohia iti kolehio, adda met iti galiera. No adda senias iti pagadalan dagiti kakabsat nga umel ken tuleng, adda met iti galiera. Adda pay maysa a klase ti honesty iti galiera a mararaem. Suitik? Adda latta met!” Ket pimgaak ni Mang Bianong.

“Hmm, uray ania ti sasawem a maadal iti eskuelam kaykayatko pay laeng a makaturpos iti kurso ni Ella!” Nagdalikepkep ni Manang Mameng. “Sika ngamin ta dimo tinungday!”

“Kunak no makiay-ayam laeng kadagiti manokko no saggaysaenna ida nga ubbaen no ip-ipusennak nga agpakan idi ubing pay. Mahilig nga agtaraken, kunkunak. Diak ammo nga agtungpal iti pannakaay-ayona met a makigaliera a kas kaniak.”

“Isu, isardengmon ti makipallot tapno tuladennaka!”

Uray la naibagkat ni Mang Bianong ti patongna iti kinuna ti asawana. Ania, isardengna ti kakaisuna a paglinglingayanna manipud pay idi nagretiro iti kompania a nagtrabahuanna idiay Makati? Ket inalusiis ni Mang Bianong. Kasano nga ilawlawagna iti asawana nga adda naidumduma a sanikar a mariknana no kasdiay nga agpakpakan kadagiti duapulo ket lima a baudna? Kasano nga ilawlawagna a kasla dengdenggenna ti panagtokar ti Cabasag Band no kasdiay a makoronaan ti reyna ti piestada idiay Buguey no kasdiay nga agkarintar nga agtaraok dagiti manokna iti parbangon?

“Duduada nga agkabsat, lakay. Saanta a nagproblema ti panagbasa ni Junior. Bukodna a gastos ti ipapanna idiay Las Vegas. Pagkatapos, agbakbaket ‘ta buridekmo nga awan kursona ken napeklan a sabungera? Matayak la ketdi, lakay!”

“Kasaritak. Ngem ammom, kastana pay laeng ‘ta anakmo ta dina pay napadasan ti nagsasaruno a naabak. No mapadasanna ti agawid a ti laeng pagpletena ti nabati a kuartana uray pupuotem agpanunot la ketdi,” insungbat ni Mang Bianong. Naginat nga agsuysuyaab.

“Apay sika? Ti kunam, diak ammo nga ad-adda ti pannakaabakmo ngem ti panangabakmo? Sa la mamatiak a nangabakka no nasarantaka a mangipasarabo iti padaw a lako dita galiera. Ngem no lagdaw laeng ti yawidmo a gagangay a dita laeng talipapa ti pakailaklakuanna sa bisongka a bisong a mangibagbaga a nangabakka ngem natay ti manokmo isu nga impadawatmo, ammokon a naabakka manen. Ay, lakay, bilbilangek met ket no mamin-ano a mangyawidka iti padaw. Ngem, ala, sige la’ng tapno dika agkabaw iti katutugaw iti sango ti TV.”

Timmakder ni Mang Bianong. “Makaturogakon,” kinunana.

Pinisel met ni Manang Mameng ti remote control sa timmakder. “Kasaritam ‘ta anakmo, lakay, ita ta nasapa pay,” kinunana.” Nasaysayaat pay no isardengmon ti agbaud tapno adda pagtuladanna.”

Kasla adda nangkuddot iti patong ni Mang Bianong iti kinuna ti asawana. Kinudkodna ti ulona. Mangiramraman daytoy nga ubing, nakunana iti unegna idinto ta sinaggaysana a kinita dagiti tawa no nakarikep met laeng dagitoy. Naudi a tinestingna ti ridaw sakbay a sinurotna ni Manang Mameng iti siledda iti ungto ti salas.

Iti siledna, ginuyod ni Ella ti switch ti bombilia iti headboard ti katrena. Ket kasla maitaytayok pay laeng a nagdata iti nalamuyot a katrena gapu iti ganas ti umuna a dakkel a balligina iti Sta. Ines Cockpit Arena.

NAGMUREGREG ti simmukat a guardia iti maikadua a kadsaan ti Firefly idi madlawna a nakasindi ti lumabaga a bombilia iti maysa a siled. Immasideg ket inwalinna ti napuskol a kortina. Napaisem idi makitana ti kustomer a nakadata a kasla nalalat a tukak iti akikid a kama. Nabigbigna ni Elmer.

“Boss Elmer, magsasara na kami,” kinuna ti guardia a bulonna a nangpikpik iti gurong ti kustomer.

Ngem nagayeng-eng ketdi ni Elmer a bulonna a nagpakleb. “Ang tamad mo naman! Sa pigi naman para magising nang husto, he-he-he!”

Um-umlek ti guardia a nangpikpik manen iti gurong ni Elmer. “Wala na ang masahista mo, sir. Tapos na siya. Magsasara na kami!”

Nabaringkuas ni Elmer. “Ha?” Inwarasna ti panagkitana iti siled. Pudno, awanen ti masahistana. Riniknana ti bagina. Nakaturog? Awan ti napasamak?

“Okey ba siya, boss? Ang sarap ng tulog mo, e!” Imlek ti guardia.

Nabainan ni Elmer ngem pinilitna ti imlek. “Oo, grabe!” kinunana a bulonna a timmakder. Nagbrip sa nagpantalon. “Talaga a nalaing, he-he-he! Anong oras na?” sinaludsodna, ngem kinitana met laeng ti relona.

“Alas dos na, bossing. Kayo na lang ang naiwan. Di kayo ginising?”

“Diak ammo,” insungbat ni Elmer. Isusuotna ti tisertna a rimmuar iti kuarto.

Addan iti taksi idi malagip ni Elmer ti napasamak kenkuana. Apay a nakaturog ket nagtilmon met iti para murmuray? Ania ngarud ti pangkantiawna kada Dex ken Jong? Numona ta bilib a bilib dagitoy kenkuana.

Nakidiallo, intebbag ti uneg ni Elmer. Kinitana ti relona. Agalas tres gayamen. Sabagay, kasano nga agtuglep ket nagimas ti turongna? “Mindanao, kanan sa Sauyo Road at kaliwa sa Magnolia,” kinunana a bulonna a nagliad iti tugaw ti taksi sa nagkidem.

AGSISINNUNGBAT a taraok ti nanglukag ken ni Ella. Kimmita iti tawa iti makusayanna. Nalawagen. Nakalaglag-an ti riknana a bimmangon. Inamuyna ti buokna sa rimmuar iti siledna. Nadatnganna ni Manang Mameng iti salas nga agkapkape nga agbuybuya iti para agsapa a damdamag iti TV a gagangay nga aramidenna sakbay a sanguenna dagiti orkidiana. Kas gagangay, awan ni Mang Bianong iti salas ket ammo lattan ni Ella nga adda ti amana iti yan dagiti baudna. Iti komedor, agidasdasaren ni Sary iti pamigatda.

“Morning, mom!” inkablaaw ni Ella sa binisongna ti pingping ti inana.

“Ayabamon ni daddy-m ta mangantayon,” kinuna ni Manang Mameng.

Rimmuar ni Ella idi makapaglabar. Nadlawna ti nakaparada a traysikel iti sango ti ruangan ti mini-farm. Nagallingag. Adda kapatpatang da Dex ken ti amana iti uneg.

Nagtogtog ni Ella iti ruangan. Madamdama, nangngegna ti arintarayen a paddak. Ginuyod ni Dex ti rikep. Dua a lallaki a makisarsarita ken ni Mang Bianong ti naipasabat ken ni Ella. Seniasanna koman ti amana idi nadlawna a saggaysa dagiti sangaili iti baud nga ipaspasirig iti lakay--maysa a dalusapi ken maysa a darisayen a puraw ti gurongna. Immasideg iti kalapaw ni Dex.

“Ready to fight, sir. Kahit ilaban na mamaya,” kinuna ti lampong a kasla agdaig.

“Nasa ospital kasi ang asawa ni Boni at walang pambayad. Kaya nagpahanap sa akin ng buyer,” kinuna met ti pandek a kunam la no nagsaklot iti karamba iti kadakkel ti butitna. “Dakayo ti immuna a nalagipko. Didak kadi matandaanan? Kristoak dita Sta. Ines. Siak ni Douglas alias Kabayo. Naminduan a pinangabakkayo.”

Nagkatawa ni Mang Bianong. “Ngem awan kuartak ita ken narigat ti agbaud ‘ti adu. Mahal ang patuka at vitamins. Kasano a natuntonanyo ti farm-ko?”

“Alam kong taga-Mendoza kayo. Nagsaludsodak kadagiti traysikel dita Solville.”

“Plis, sir... kailangan ng misis ko ng gamot,” impasaruno ti nakuttong.

“Bargain, s—“ Saan a naituloy ni Douglas Kabayo idi mairupaanna ni Ella. "Di ba ikaw ang tumalo sa manok ng sikat na taga-Project 8? Kayo na ang bibili sa mga manok ni Boni. One five na lang ang dalawa. Talagang gipit. Baka matay ni baketna no di makagatang iti agasna.”

Pinagsinnublat a kinita ni Ella dagiti ilaklakoda a manok. “Bitawan nga.”

Nagtungpal da Kabayo ken Boni. Natarakida, naisip ni Ella. Kinitana ni Dex. “Kunin mo ang talusapi at ang winner ni dad at ibitaw natin,” kinunana.

Nagtungpal ni Dex. Pinolisda ti darisayen. Pumarakapak dagiti napino a gurong ti darisayen ket nagtungtung-ed ni Ella. Imbilinna nga isublatda ti dalusapi.

Nagtungtung-ed ni Mang Bianong uray sagpaminsan laeng a dumanog ni dalusapi. Kasano ngamin ket nalisi ken sigurado dagiti danogna. Ngem nalagipna ti kinuna ni Manang Mameng.

“Adda ibagbagada, ngem talaga nga awan igatangko,” kinuna ni Mang Bianong.

“Sige, ako na’ng bibili,” kinuna ni Ella. “Sandali lang,” impakadana tapno mangala iti pagbayadna kadagiti manok.

“Agurayka!” Pinara ni Mang Bianong ni Ella. “Mahirap mag-alaga ng marami. Mahal ang patuka, mahal ang…”

“Ako ang bahala,” kinuna met ni Ella. “Kasaritak ni Jong ta bagina a taraknen dagiti manokko. Siak ti makaammo iti kanen ken bitaminada.”

Ania ngarud, immanges laengen iti dakkel ni Mang Bianong a nangisurot iti panagkitana iti balasangna nga agturong iti ruangan.

“Ready to fight talaga?” sinaludsod ni Ella idi mabayadanna dagiti manok.

“Oo, ma’am,” insungbat ni Boni. “Kahit na ilaban na mamaya. Pero mas maganda kung ipahinga muna. Winning line ang mga iyan!”

Binilin ni Ella ni Dex nga iwaywayna dagiti manok. Nagkukuyogdan kada Kabayo a rimmuar iti mini-farm.

“Kain na tayo at mamamalengke ako sa talipapa,” kinuna ni Manang Mameng. “Lakay, ikkannak pay la dita iti pakitiendak.”

Napitpit ti isem ni Mang Bianong. Kasano ngamin ket agur-urnong iti ipustana iti maysa a ganadorna a namnamaenna a pagabrotna iti dua a nagsaruno a pannakaabakna. Ket kunam la no napasikkilan ti tengngedna a nagtung-ed iti panaglayonna iti komedor.

Imbes a sumurot ni Ella iti panganan, immuli ketdi. “Sandali lang,” kinunana.

“Ayaw ko ng ganyan. Sumabay ka sa amin!” kinuna ni Manang Mameng. “Lakay, kasaritam ’ta anakmo no malpastay' a mangan!”

Ngem intuloy ni Ella ti immuli. Saan a nagbayag, rimmuar met laeng iti siledna sa nakaparparagsit nga immulog. “Mom, pakitiendam. Gatangem ti kayatmo a tiendaem,” kinunana ket impapetpetna ti nalukot a kuarta iti inana.

Saan a naituloy ni Manang Mameng ti panagtugawna iti makanawan ni Mang Bianong. Inukradna ti impapetpet ni Ella kenkuana. Ket nagnganga idi makitana ti tallo a sagsangaribu nga inted ni Ella. Kinitana ti balasangna sa kinitana manen ti kuarta iti dakulapna. Inlibas met ni Ella nga insuksok iti akinlikud a bolsa ti shorts ni Mang Bianong ti nalukot a baratona iti pananglikawna a mapan iti puestona iti makanigid ti amana.

“Ania, pakitiendak amin daytoy? No agsasaoka nga ubing kasla mapidpidut ti kuarta,” kinuna ni Manang Mameng nga intuloynan ti nagtugaw. “Para groseria no bigat ti dadduma.”

Pinagrubuat ni Manang Mameng ni Sary idi makapamigatda. “Sika ti kaduak. Diakto manen matutor ti makitienda no ni manongmo ti kaduak,” kinunana.

“Adu ti labaak, manang,” inkedked ti katulongan.

“Usarem ‘ta washing machine no sumangpetta. Lakay, sika ti agiwardas kada Dex ken Jong. Diak kayat nga aguper dita farm ‘ta anakmo,” kinuna ni Manang Mameng ket tinurongnan ti ridaw.

“Di met kasaritak?” intesting ni Mang Bianong. Ngem kasla awan ti nangngeg ti asawana. Kinautna ti insuksok ni Ella iti bolsana. Ket kasta unay ti rimat dagiti matana idi mulagatan ti tallo met a sagsangaribu. Yes! indir-i ti unegna. Addan nayon ti puonanna nga agabrot.

Mapan koman ni Mang Bianong iti mini-farm idi kamakamen ti balasangna.

“Thank you iti barato!” imlek ni Mang Bianong.

“Dad, adda pay ‘tay ipatpatomarmo sakbay a matadian ti manok?” sinaludsod ketdi ni Ella.

Nagatap ni Mang Bianong. “Naibusen,” inlibakna. “Apay?”

“No awanen, pagbirokek ni BBJ,” kinuna ketdi ni Ella.

Pordios daytoy nga ubing, nakuna ni Mang Bianong. Ammonan a namati ti balasangna iti kinuna da Douglas Kabayo ken Boni a mabalinen nga ilaban dagiti inlakoda a manok no makainana dagitoy.

“Paliiwem pay no talaga a mabalinen nga ilaban dagiti ginatangmo. Mamatiak nga adda kakuykuyogna a suerte ti pannakitadi, ngem nataltalgedka met laeng no kapkapnekam ti training ken pannakaagas ti manokmo. Maabak pay ‘tay kompleto ti training ken bitaminana, anianto la ketdin ‘tay saan a kompleto ti pannakaestimarna? Panagkunam, kabaelan ni Boni nga ikkan iti bitamina ti tarakenna? Mariosep! Dandani payen matukno dagiti abagana dagiti piditpiditna, unaenna pay la nga igatangan iti bitamina dagiti manokna imbes nga igatangna iti bagas nga apuyenna?”

Nagkatawa ni Ella. “Kuna met da Elmer nga adda dagiti mammallot a mapagtomarna iti bitamina ti manokna ngem di makagatang iti para kenkuana!” kinunana. “Winning line kano met. Padasek. Kamakamek ti suertek. Pasenialak dagiti manok ken ni Elmer no madamdama. Awagak ni BBJ!” Tinurongna ti telepono iti center table.

Iti mini-farm, naisardeng da Dex ken Jong ti panagpatangda idi matugtog iti napigsa ti ruangan. Nagkinnitada.

“Isu daytan!” kinuna ni Jong ket kiniddayanna ni Dex. .

“Luktam. Sigurado a napintas manen ti istoriaenna!” kinuna met ni Dex. “Ammom metten, wid aksion pay no agistoria!”

Immigup ni Jong iti kapena sa napan iti ruangan. Sigagagar a nangguyod iti rikep. “Itay pay nga ur-urayennaka ti kapem!”

Mangigis ketdi nga isem ken agkikinnamat a kidday ti impasabat ni Elmer ken ni Jong. “Ania a klase? Three in one, naipaburek, naibotelia?” inkatawana. Inserrana ti ruangan sa sinarunona ni Jong.

“Ania ti kabarbaro, idol?” impasabat ni Dex. Linengngesna ti tengngedan nga empel a teddada iti napalabas a rabii, binukbokanna ti mug ni Elmer, sa inyawatna iti daytoy.

Ania, dadaelek ti rekordko kadakuada? Saan a mabalin, a, kinuna ni Elmer iti unegna. “Siempre, nagpatnag, he-he-he!” insungbatna.

“A naturog!” inkantiaw ni Jong.

Dandani naibbatan ni Elmer ti mug. Sinalbag itoyen, indayamudom ti unegna. “Nagtrabaho, a! Kilala ninyo ako!” insungbatna ket nagputaren iti istoria. “Kefuykayo ngamin. No nakaiggemkayon iti kuarta, siglotanyon. Diyo man la ikkan ti bagiyo iti naimnas a watwat ken liwliwa!”

“Apounayen!” insanapsap ni Dex.

“Ipaw-itko ngamin idiay Banurbor a tangdan ti agraep,” kinuna met ni Jong a madlaw ti apal kadagiti matana.

Natogtog ti ruangan. Nagkikinnita dagiti tallo.

“Ni Sir Bian,” kinuna ni Elmer.

“Baka ni Ella. Immay itayen ni Sir Bian,” kinuna ni Dex.

Siaalisto met ni Jong a napan iti ruangan. Ket pudno, ni Ella ti adda iti sango ti ruangan.

“Ni Elmer?” sinaludsod ni Ella idinto ta tinannawaganna ti kalapaw ni Dex. Simrek idi makitana ni Elmer “Maglalabantayo,” kinunana.

Nagkikinnita dagiti tallo.

“Awan nakasagana a manok,” insungbat ni Elmer.

“Adda. Dagitay ginatangko. Nangikkam, Dex?” Tinannawagan ni Ella dagiti nakawayway a baud.

Nagnganga ni Dex. “Naku! Ditay' pay ammo no kasano ti kondisionda. Nasaysayaat met laeng, a, no datayo ti agikondision tapno maammuantayo ti husto a garawda,” kinunana.

“Ken maitedtayo ti husto a bitaminada,” impasaruno ni Jong.

“Aguraykayo!” Saggaysa a kinita ni Elmer dagiti kasangsangona. “Nangisangpetkayo iti manok a diyo ammo ti pulida? Ania ti bloodline dagiti manok? Naggapuanda?”

“Adda kinuyog ni kua… Kabayo kano… a naglako,” insungbat ni Dex. “Kristo kano dita Santa Ines, kuna ni Sir Bian.”

“Ni… ni Douglas Kabayo, ti kristo nga agbubutit? Matagal nang di nagpapakita sa Santa Ines ang tao na ‘yon. Mandurugas ‘yon. Diak naipusta, kunana no kua iti amona uray naipustana ti pusta. Isu nga awanen ti mayat nga agpakristo kenkuana.”

“Uray ta napintas dagiti immayda inlako. Nalaka pay,” kinuna met ni Ella. "Ipadastayo uray ta nakakondisionda kano. Mayat met ti garawda itay impolismi ida.”

Timmakder ni Elmer. “Yan dagiti manok, Dex?”

Inturong ni Dex ni Elmer iti nangiwaywayanna kadagiti manok. Binagkat ni Elmer ti maysa, dinilpatanna ti tanganna sa inlidlidna kadagiti gurong ti manok. Agtantanamitim bayat ti panangbasana kadagiti siksik. Agtungtung-ed a nangidisso iti manok.

“Sulo gettang a mabedbedan,” kinuna ni Elmer sa insublatna a sinenialan ti maikadua a manok. Ket nagrimat dagiti matana idi makitana ti umuna a siksik ti pamayor ti kanigid. “Wow! Gettang ti umuna a siksik. Kastoy daydi tiniliwko a manador nga impangabakko ‘ti tupada, diallo!” Sa met la nagpormal a nangkita ken ni Ella. “Apay a ditay i-training dagitoy iti bukodtayo a teknik?”

“Agsusuertetayo. Kayatko a sarunsonen baka lumamiis,” kinuna ketdi ni Ella. “Ikulongyo ket idan tapno makainanada. Intayonto no ala una. Awagak ni BBJ ta umayna ida ineksionan,” innayonna a bulonna a nangtallikud kadagiti tallo.

Kinita ni Elmer dagiti kaduana. Kinuti laeng dagitoy dagiti abagada.

“Bilin ti amo, awan mabalintayo,” kinuna ni Elmer. Nagsubli iti kalapaw, pinuyotanna ti tasana, sa met la nagmusiig idi maramananna nga empe ti inigupna.

(Maituloyto)

Napalabas a paspaset: 1 | 2 | 3

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine