Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-5 a Paset)
NAGUNI ti selpon ni Ella. Dagus a kinautna ti bolsa ti pirpiran a shorts-na a maong. Ni Johnny ti umaw-awag.
“BBJ, huwag ka nang tumuloy sa amin. Urayennakami dita nagsulian ti Sagittarius ken highway. Kaserserrek ni mommy iti siledda. Baka makapuot no agrebolusion ‘ta kotsem,” kinuna ni Ella. “Sige, umaykamin. ‘Tay kapsula? Very good! Thank you, BBJ. Pogi kang talaga. Bye-bye!”
Kunam pay, dandani natilmon ni Johnny ti angesna iti kinuna ni Ella. “Wowow!” nayesngawna.
Bimmara met ti pingping ni Simang, ti biuda a katulonganna iti klinikana, ket naisardengna ti panagwalisna. “Alla, ni sir!” inggarikgik daytoy ket ginuyodna nga impababa ti gayadan ti lumabaga a blusana a nanglukais iti bukotna. Bimmara ti rupana ngem adda naggiteb a ganas iti daplat a barukongna. Inlibasna pay a kinita ni Johnny sa intuloyna ti panagwalisna.
Galiera Queen (MAUDI A PASET)
Indayal ni Ella ti numero ni Elmer. “Intayon!” kinunana.
Kinitana ti relona. Agalas dos gayamen idinto nga ala una koma ti rubuatda tapno masapa a mayatarda dagiti manokna. Kasano ngamin ket lineppas ni Manang Mameng ti dua nga oras a programa iti telebision a pagpalpaanna no malpas a mangaldaw. Agbuybuya pay laeng ni Mang Bianong ngem awan ti problema ni Ella iti amana.
Agtiltil-ay ni Ella nga immulog. Binisongna ti pingping ni Mang Bianong sa nagpayapay iti babassit. “Bye-bye, dad!” inkatawana.
“Sige, ingat. Tanangenyo ti agyatar. Saanyo nga ipatangad!” impalagip ni Mang Bianong. Iniddepna ti telebision ket intulodna ti balasangna iti ridaw.
Addan iti sango ti gate da Elmer idi makaruar ni Ella. Ni Dex ti nangbitbit iti karton a para dua a manok a yan dagiti para labanda, ni Jong iti single a yan ti para pasippit. Kas iti sigud, agwidwidawid laeng ni Elmer a nagaruat iti lumabaga a kamiseta a pinarisanna iti maong a pantalon. Suotna ti puraw a kipis ni Dex.
“’Tay para sanikar?” sinaludsod ni Elmer idi unorendan ti Kitang St. nga agtunged iti Apahap St. iti laud. Pinarukibanna da Dex ken Jong ta nalagipna ti tinomarna a kapsula a saan a nagepekto kenkuana.
“Adda ken ni Johnny. Ur-urayennatayo dita Sagittarius,” insungbat ni Ella.
Iti nagsulian ti Sagittarius St. ken highway, bimmaba ni Johnny iti kotsena idi mapasungadanna ti grupo iti side mirror. Linuktanna ti ridaw iti kanawan ti manibela ket inurayna ni Ella. Ket anian a pannakasalemsem ti barukongna idi malang-abna ti agatsampagita a pay-ud ni Ella iti panagrukob daytoy a lumugan iti kotse. Diosko, kaanonto ngata a maipapasko a say-upen dayta a banglo? insennaay ti unegna. Dinagdagusna ti nagsubli iti sango ti manibela imbes nga iggamanna dagiti karton a bitbit da Dex ken Jong tapno nalaklaka a makapuesto dagiti tallo iti akinlikud a tugaw.
Riaw ken palagapag ti nangsabat kadakuada idi sumrekda iti gate ti Sta. Ines Cockpit Arena. Kasla adda kuerdas a nakalbit iti kaunggan ni Ella ket nakarikna iti naidumduma a ganaygay.
“Adda man naabaken!” inyellek ni Elmer.
“Piman met, aglalo dagiti di pay makagatang iti sukat ti narunoten ti mukodna a sandaliada,” kinuna met ni Jong.
“Kasano ngamin ket sa la malagipda nga awanen ti mukod ti sandaliada no magmagnada nga agawid,” impasaruno ni Dex.
“Nakarkaro pay, a, no mangabak dagita. Makayawidda iti inumen ken pulotanda nga agbabarkada, ngem dida man la mayawidan dagiti putotda uray maysa laeng a papsikol a pagdidinnilpatan dagiti putotda,” inyellek met ni Elmer.
Iti pagparkingan, nagpayapay ti karantiway a para bantay sa intudona ti bakante pay a puesto. Ngem insardeng ni Johnny ti kotsena iti batog ti ridaw ti galiera tapno dumsaag dagiti kaduana. Inuray met da Ella ni Johnny tapno aggigiddanda a sumrek.
“Ilan kayo, pogi?” Pinalilitan ti kimmuribot a kasla nagmaskara a babai a para awat iti tiket iti ridaw ni Elmer.
“Apat kami, tatlo ang manok namin!” Kiniddayan ni Elmer ti babai. “Gumaganda ka, a!”
Naggarikgik met ti babai idinto ta sinipatna ti takiag ni Elmer. “Ikaw naman. Binobola mo ako lagi! Sige na, pasok na kayo!”
Imlek ni Ella idi makastrekda. “Ikaw talaga, Elmer. Pag pumatol problema mo na naman.”
“’Dad’ta la ngarud ni Dex a para sippawko!” inkatawa met ni Elmer.
Kas iti sigud, tinurong da Ella ken Jong ti ridaw ti ringside ket immipus kadakuada ni Johnny a tumalangkiaw. Naglayon met da Dex ken Elmer iti puesto dagiti agag-agas iti masugatan a manok iti abay ti narehasan a pagaataran. Indisso ni Dex dagiti karton iti abay ti natayag a narapis nga agag-agas.
Rinikus ni Elmer ti pagaataran. Sinaggaysana a miningmingan dagiti manok ken dagiti nagiggem kadagiti manok sa agtungtung-ed a nagsubli iti yan ni Dex. “Iruarmo dagiti manok. Yatartan nga agpadpada,” kinunana.
Inyaon ni Dex ti darisayen iti karton sa inyawatna ken ni Elmer. Bagina nga ubba ti dalusapi idi sumrekda iti pagataran.
Timmugaw ni Elmer iti sango ti nagsaklot iti darisayen. Inseniasna ti panangidisso daytoy iti manokna. Pinagsinnublatna a kinita ti manokna ken ti manok ti lakay a kasangsangona. Nataytayag ti manokna ken nalaklakay, ngem naing-ingpis. Pinerrengna ti lakay sa kiniddayanna.
Ngem nagngilangil a mapilpilit ti isem ti lakay. “Mataas ang manok mo, bata!” kinunana a kumitkita kadagiti gurong ti manok ni Elmer. “At magulang na.”
Nadlaw met ni Elmer ket immisem. “Walang magandang kaliskis ang manok ko, at payat talaga. Kung gusto mo, hipuan tayo. Payag din akong kaliskisan mo, total yano ang manok ko,” impakagatna.
Ania pay, impaipit ti lakay ti manokna kadagiti luppona sa inawatna ti darisayen ni Elmer. Inarikapna ti pitso daytoy, sinimpana ti degrado nga anteohosna a nasingdanan iti nangisit a sag-ot, dinilpatanna ti kanawan a tanganna sa inlidlidna iti kanigid a gurong. Agtantanamitim a nangbasa kadagiti siksik. Kalpasanna, tinapaya ti kanawanna ti manok ket insublatna a dinilpatan ti kanigid a tanganna sa inlidlidna iti kanawan a gurong ti manok. Binilangna dagiti siksik manipud iti kuko ti pamayor agingga iti pungupunguanna. Insublatna dagiti siksik iti likud agingga iti kawwet. Kalpasanna, agtungtung-ed a nangisubli iti darisayen ken ni Elmer.
“Ano?” Pinerreng ni Elmer ti lakay.
Tinumeng ni Dex ti bukot ni Elmer. “Akaba ti bukotna, yos!” kinunana.
“Danagmon! Kitkitaem a pandaka. Maigaw-atna, aya, ti tadina!” insungbat ni Elmer.
“Hanggang five-five lang kaya ko,” kinuna ti lakay a bulonna a timmakder.
Isu met nga umasideg ti maysa nga agtutubo a nareppet iti lastiko ti atiddog a kasla buok ti mais a buokna.
“Naulot na, ‘tay?”
“Oo!” insungbat ti lakay sa insungona ti darisayen ni Elmer.
Nagsinnukat da Elmer ken Dex iti manok.
“Magpa-leg band na kayo,“ kinuna ni Elmer. “Kalpasanna, ipupokmo iti kulongan ni Dok. Total mabayag pay, sapulem da Boni Kalansay ken Douglas Kabayo dita ngato. Di met isuda ti naggapuan dagiti manok?”
“Hamman!”
“Ibagam nga ilabantayo dagiti manok tapno mapustaanda met ida. Pagraramanan ti grasia!”
Nagtung-ed ni Dex a bulonna a nangsaruno iti kalabanda nga agturong iti bassit a lamisaan iti kanigid ti pagataran.
“Magkano?” Tinangad ti kuttongi a dadakkel ti matana a para puesto iti leg band.
“Regular,” insungbat ti kalaban da Dex.
Kinaptan ti para leg band iti puraw a sangaramayan a naingpis a karton ti gurong dagiti aglaban a manok. “Numero onse!” kinunana.
Iti pagataran, apagtugaw ni Elmer, sinango a dagus ti maysa a kataebna a nagubba iti dalusapi a ponkan. Inseniasna nga idisso ni Elmer ti manokna. Isu met a makasubli ni Dex iti ‘yan ni Elmer.
Miningmingan ni Elmer ti mangyat-atar iti manokna. Dina mairupaan daytoy, no asino ti akintao iti daytoy. Manokna ti ikarkaritna? Imposible, naisip ni Elmer. Nakaur-urnos ti sumilsileng nga umamarilio a dutdot ti manok nga ikarkaritna idinto a kasla di mabugbugguan dagiti dapanna a nakarugrugit ti kukoda. Baka tao ti maysa a dayo a bigtime a kayatna ti manghold-ap. Ba’am man. Dina met ammo ti laban ti manokko, nakunana met laeng. Inyasidegna ti manokna iti ikarkarit ti kataebna. Agkatayagda, ken nasabsabang pay ti bukot ti manokna.
“Mayat!” kinuna ni Dex.
Nagtung-ed ni Elmer. “Sige!”
“Super na tayo,” kinuna ti kalabanna. “Si boss ang bahala sa pinto!”
“Okey!” insungbat ni Elmer. Sika kadi laeng ti adda kuartana, laglag, kinunana iti unegna. Ket isun a mismo ti nagpa-leg band iti dalusapi. Kalpasanna, inyawatna ken ni Dex tapno ipupokna iti kulongan ni Dok, ti sukida nga agag-agas iti masugatan a manok.
Simrek ni Elmer iti gaffer room iti labes ti pagataran tapno penkenna ti tadem dagiti tadina a linaon ti beltbag-na. Inyaonna dagiti regular ti kaatiddogna. Linaglag-anna nga impadas iti butuanan nga iking ti tangan ti kanigidna, sa iti kukona. Nakapet dagitoy. Kayatna a sawen, nasayaat ti panagasa ti inrekomenda ti am-ammona a labahero a taga-Baesa.
Napan ni Elmer iti yan da Ella iti ringside pangur-urayanna iti batangda a matadian. Dandanin mapunno ti ringside.
“Mabayag pay?” sinaludsod ni Johnny a nakaal-alsem ti isemna.
“Onse ‘diay darisayen, sixteen daydiay dalusapi,” impakaammo ni Elmer. Immabay ken ni Jong. “Nangabakkayon?”
“Maab-abak. Lamang ti liamado. Ammom metten ni Ella. Manmano a pumusta iti liamado,” insungbat ni Jong.
“Siempre, dakdakkel ti abaken iti dehado!” inkatawa ni Ella. Nagliad iti tugawna ket manutsutil ti parukibna ken ni Johnny. “Pumustaka man ketdi, BBJ!” kinunana. “Ammom, adda ‘tay kunkunada a beginner’s luck. Suerte kano ti agdadamo. Kas kaniak idi damok ti sumurot ken ni dad. Namindua a nagsaruno a nangabakak. Diakon inulit baka maabak. Tarkokak pay idi!”
Iti rueda, nakaulin dagiti sumaruno nga aglaban: alimbuyogen ken darisayen. Abus ta liamado ti alimbuyogen iti pusta, liamado pay kadagiti pumupusta.
“Alimbuyogentayo,” kinuna ni Elmer. “Mano ti ipustam?”
“Ano ka ba? Ang laki ng talisayin!” insungbat ni Ella.
“Kontra pelo ngarud,” impalagip ni Elmer. “Ken tiempo ti alimbuyogen, lenned no bigat!”
Nagkatawa ketdi ni Ella. Ket idi adda mangyawag iti sampu-anim, saannan nga inuray da Elmer ken Jong. Sinitsitanna ti nangyawag.
No apay ketdi met a kasla ketdin itaytaya ti darisayen ti bagina idi maibulosda. Nagkiad laeng idi palsiitan ti kalabanna. Ket idi baliwan ti alimbuyogen a ballasiwen, napanganga laengen dagiti dehadista idi naidugmam daytoy sa nagkuripaspas.
“Sanamagan!” imbanang-es ni Ella. Inyawatna ti pustana ken ni Jong.
Ania ngarud ken dika met dumngeg, kuna koma ni Jong, ngem rigatenna a masaktan ni Ella. Kinunesna ti kuarta, pinekkelna iti nairusat sa imbatona iti kinapinnusta ni Ella iti ballasiw ti ring.
“Sayang!” Nagngilangil ni Johnny. Kasano ngamin ket bayad ti konsultasion iti dua a pusa nga imported ti impaabak ni Ella. Ti makadakes, saandanton nga isubli dagiti pusa ta kas damagna, natay dagitoy. Kas kadagiti doktor ti tao, malidayan met ni Johnny no adda matay a pasientena nga ayup. Ngem kasano ngamin ket no ipakita ti dadduma dagiti dinguenda, graben ti sakit dagitoy. Ngem amang a nasaksakit ken ni Johnny no maidanon kenkuana ti kunkuna dagiti natayan iti dinguen. Danum sa met ngamin ti intudokna, kasano a masalbar, kunkunada kano. Impakitak la koman ken Mang Arnold nga erbolario. ‘Imbag kenkuana ta libre, kuna kano met ti dadduma.
Alisto ti soltada gapu ta adda pay agpaut laeng iti sumagmamano a segundo a laban.
Madamdama pay, agrikrikusen ti naka-megaphone nga agyawag kadagiti sumaruno a matadian.
“Onse, dose, trese, katorse, tari na! Onse, dose, trese, katorse, tari na!”
Timmakder ni Elmer. “Mano ti paradam iti darisayen?” sinaludsodna ken ni Ella.
“Kalabanmo?”
“Five-five laeng. Pumagokami ken Jong.” Kinitana ni Johnny. “Pumustaka?”
“Haan. Sayang no maabakak!” Napitpit ti isem ni Johnny.
“Sika?” insublat ni Elmer ni Jong.
Ngem saan a simmungbat ni Jong. Kasano ngamin ket no kuan tangadenna dagiti nakasuot iti short-shorts nga aglakolako iti uray ania la ditan a makilagudlagod kadagiti tao iti bleachers.
“Jong, manoka?” inulit ni Elmer.
“Ha? Maymaysaak, este, diak pumusta, he-he-he!” Limmabaga ni Jong.
“Okey, otso-otso pati pustak,” kinuna ni Elmer ket timmallikuden daytoy.
Nagkasangpetan da Elmer ken Dex iti puesto ni Dok.
“Diak nakita da Boni Kalansay ken Douglas Kabayo,” impakaammo ni Jong.
Saanen a naguni ni Elmer. Inseniasna ketdi nga alaen ni Dex ti darisayen ket tinurongnan ti kuarto dagiti labahero.
Pinasango ni Dex ti manok kenkuana idi makapuestoda iti nawaya a lugar iti pagtadian. Sinirig met ni Elmer ti gurong ti manokda sa nangiruar iti tadi. Inrukodna iti gurong ti manok. Apagisu ti murdong ti tirad iti tumeng.
“Rumasuk daytoy isu a mabalin ‘tay atiddog a tadim,” kinuna ni Dex. “Oras a maigaw-atna ti tadina no tumayab, sigurado a ray-ab ti kalabanna. Suertena no maulitna pay ti makidinnungpar iti ngato.”
Nagtungtung-ed ni Elmer. Inruarna ti atiddog a tadina ket daytoy ti inkapetna iti manokda. Insulbongna ti baina. Kalpasanna, sinaggaysana a binennat dagiti ramay ti manok. Sakbay a rimmuarda iti pagtadian, inruar ni Dex ti abadayna a kasla agmangmang a lumabaga a bag ti naiplastik a danum ket pinugsitanna ti luy-ong ken rupa ti manokda.
Naglayon ni Dex iti pilaan iti sango ti ridaw a kumamang iti agdan ti ring. Adda iti sikigan ti agdan ti puesto ti kahera ken ti manager ti galiera a nakubong iti nasin-aw a fiber glass a sumango iti ring. Timmugaw ni Dex iti abay ti maikasangapulo a paris nga aglaban.
Pagammuan la ta bimtak ti nakapigpigsa a riaw a dinanggayan ti palagapag ken sipsipat.
“Nakabawi ang dehado!” kinuna ti kaabay ni Dex.
“Pagkunaam?” kinuna ti sabali.
“Sobra ti pigsa ti riawda dita ngato. Kasta dagiti dehadista no mangabakda.
Nakastreken iti ridaw ti paris a sarunuen da Dex idi umasideg ni Elmer a nagubba iti pagpasippitda. Dina pay nabaraan ti nagtugawanna no ar-arigen, bimtak manen ti riaw iti uneg, ngem nakapkapsut ngem ti immuna.
“Liamado manen!” adda nagkuna.
“Uray pupuotenyo, oras a makasubbot dagiti dehadista narigaten a makasublat dagiti liamadista,” imbales ti sabali.
Immuna a timmakder dagiti kalabanda. Ti ub-ubing ti nagubba iti para laban. Ti lakay iti tapingaran a puraw a pagpasippitda.
“’Maykan,” kinuna ni Elmer ken ni Dex.
Kas iti sigud, nagtambor ti barukong ni Dex. Apo, pangabakennakami, plis, intanamitimna ket simmuroten ken ni Elmer.
Nasabatda ti kalabanda iti uppat-a-tukad nga agdan. Aprosan koma ni Elmer ti impangabakda a manokna, ngem naunaan ti lampong nga agtutubo. Inaprosan daytoy ti bukot ti nangabak sa inyamloyna iti manokna. Manutsutil ti isemna a nangtaliaw ken ni Elmer.
Lungat, intebbag ti uneg ni Elmer. Makitanto, a!
Iti ringside, naibagkat ni Jong ti patongna idi makitana da Dex ken Elmer nga umul-uli. Kalbitenna koma ni Ella, ngem kumitkita met gayamen daytoy kadagiti kaduada.
Kinasarita ti kasador da Elmer ken ti agtutubo. Madamdama, intudona ti puesto ti Wala iti agtutubo. Tinurong met da Elmer ken Dex ti Meron.
“Ano sa tingin mo, Jong?” kinuna ni Ella. Nakasimsimbeng ti langana a nagliad iti tugawna sa nagsikkawil
“’Nay ko po!” inyayug la ket ngarud ti dua a lallakay a nagtugaw iti likudan da Jong idi lalo a narenren a gayadan ti maong a shorts ni Ella.
“Sika ngamin. No ania la dita ti makitkitam. Isu nga agmalmalasta, eh!” inyellek met ti kaabayna.
“Manyakis a lalllakay!” indayamudom ni Jong. “Ilokanokay pay met!”
Ngem imlek laeng ni Ella. “Hayaan mo sila,” kinunana. “Tiyak, mas maganda ako sa asawa nila. Maduling kayo!” Ket lalo nga inngatona ti sikkawilna.
Nagbang-es ni Jong a nangkemkem iti sangina. Addatay kamman idiay Banurbor ta makitayo, impangta ti unegna.
“Tatlong libo lang ang diperensiya!” impakaammo ti kasador. Binatoganna ni Ella. “Sanlibo ka!”
“Di puwede, manok ko ang meron!” inkatawa met ni Ella.
Immakar ti kasador iti batog ti butiog a nakakamiseta. “Mang Junse, dos mil ka!”
Ngem imbes a dua ribu laeng ti ipusta ti butiog, inseniasna ti larga. Ania ngarud, kunam la no naibuang a puttot ti pinnukkaw dagiti agpusta. Liamado da Elmer.
“Pu-siyam! Pu-siyam”
“Onseee! Onseee!”
Ngem sagsaggaysa ti kimmagat a dehadista. Agingga iti immuneg ti innawag.
“Anim! Anim! Anim!” Ad-addan a kasla agarnis dagiti liamadisda iti panangiwagisda iti pustada.
“Kasano?” Kinita ni Jong ni Ella. “Pimmustata koma itayen. Uray kaskasano adda pay ganaben!”
Binaliwan ni Ella ti sikkawilna. Ania ngarud, na bennat manen ti tengnged dagiti dua a lallakay iti likudanda.
”Diosko, maatakeakon!” insennaay ti maysa.
Iti sangoda, timmakder ti dua a kristo. Agpadada a mangisensenias ken mangipukpukkaw iti pustada, ngem dagiti met luppo ni Ella ti kitkitaenda. Ket uray no kasano ti suron ni Jong, kinemkemna lattan dagiti sangina a kimmita iti sabali a direksion.
Iti ring, pinatangad ni Elmer ti darisayen sa inyasidegna ken ni Dex. Pinasippitan met ni Dex ti lilidduokan ti darisayen iti namitlo.
“Ibabam!” kinuna ni Elmer. Indissona ti darisayen sa inipusna.
Nagtungpal ni Dex. Indissona ti para sippit sa inipusna. Pinagsanudna daytoy.
Impakamat ni Elmer ti darisayen ngem iggemna latta ti ipus daytoy. Pimlatok ti nadam-eg a daga ngad inkup-ay ti darisayen.
Pinasippitanda pay ti tengnged ken bukot ti darisayen sa tinung-edan ni Elmer ni Dex.
“Huston!” intung-edna. Inkautna ti tammudona iti ngiwat ti darisayen sa inapnutanna ti sippit daytoy.
Nagsultip ti timer a pangipakaammona nga ibbatandan dagiti manok. Sineniasan met ti sentensiador dagiti agibbet.
Nakawayas ti kasupangetna a nangikkat iti baina ti tadi ti manokna. Pinuyotanna ti baina sa imbolsana. Pinunasan ti sentensiador iti kapas a naslep iti alkohol ti tadi sa sineniasanna ti mangibbet.
Nagaraw ti saka ti manok ni Elmer isu nga inayabanna ti sentensiador. Inikkat ti sentensiador ti baina ti manok ni Elmer sa pinunasanna ti tadi daytoy. Sineniasanna ni Elmer sa nagtakder iti tengnga ti dua a puraw nga uged iti tengnga ti ring a nagbaetan da Elmer ken ti kalabanna. Inurayna ti senias ti timer.
Madamdama pay, nagsenias ti sentensiador sa pimmanaw iti nagbaetan dagiti agibbet. Bigla, kasla nasarait ti ngiwat dagiti agbuybuya.
Agpada dagiti manok a mangkutikuti kadagiti uloda a no kuan tumuktok iti daga, agbaribarda sa umaddangda nga umasideg iti uged. Nagtalinaed met a nasarait ti bibig dagiti tao.
Pagam-ammuan, simiag ti Wala a nangdarup iti Meron. Kimleb met ti Meron sa nagtalangkiaw. Nagtengngaag sa nagkutak. Ket nagariwawa manen dagiti agbuybuya.
“Mangingitlog! Mangingitlog!” adda nangiriaw. Pinasarunuanna iti garakgak.
Nagkakatawa dagiti agbuybuya.
Simiag manen ti manok ti lampong. Kasla nakigtot ti manok ni Ella ta bigla a rimkuas. Ket limmagto ni Elmer idi naleppay ti kanawan a payak ti kalabanda.
Rimkuas met ni Jong ket dinanogna ti angin. “Papatay na ‘yan!” inriawna.
Immisem laeng ni Ella a di nangisina iti panagkitana kadagiti manok. Binaliwanna ti sikkawilna, ngem saanen a pinarukiban dagiti dua a lakay iti likudanda dagiti luppona.
Lalo nga immunget ti kalabanda. Leppay ti maysa a payakna, inistretna ti kalabanna a bulonna a natulid sa napasikig. Ngem imbes a dumanog, kasla immatiddog pay ti tengnged ti manok ni Ella, nagpasgar sa nagkutakkutak.
“Animal a manok!” intabbaaw ni Elmer.
Iti arsadanan ti agdan a pagsirsiripanna, mababain ni Dex a nagsanud.
“Shio! Shio! Shiooo!”
Ket pudno, tinarayan ti manok ni Ella ti kalabanna nga agkaykayaw-at pay laeng a nakasikig. Bimtak ti riaw ken kantiaw dagiti agbuybuya.
“Running breed! Running breed!” Ket bimtak manen dagiti garakgak.
“Pahingi naman ng kapatid niyan!”
“Kahit pinsan na lang sa akin!”
Iti suron ni Elmer, dinan inuray a maikario dagiti manok. Agasem met ngamin, manipud idi rugianna ti manadi ken agibbet agduapulon a tawen ti napalabas, ita laeng nga adda timmaray nga inibbatanna. Superboy, kunkunada idi kenkuana idiay Allacapan ta pagiinnagawan dagiti mammallot a mangibbet kadagiti manokda. Ita, nadadael ketdin ti rekordna ditoy Sta. Ines.
“Kunak man no winning line dagiti ginatangyo a manok!” kinuna ni Elmer idi nakadanon iti yan ni Dex.
“Isu met ti kuna da Kalansay ken Kabayo,” insungbat ni Dex.
Madamdama pay, addayta manen ti para awag kadagiti matadian, a pakairamanan ti dalusapi a manokda.
Inruar ni Elmer ti manokda iti kulongan. Binagtinna. Indissona sa pinasikadna. Impaiggemna ken ni Dex sa pimmanaw. Naglayon iti yan da Ella. Nakarupanget ti balasang a nadatnganna.
“Ania, ilabantay pay ti maysa wenno saanen?” sinaludsod ni Elmer.
“Ania ket ngaruden? Bareng makasubbottayo,” insungbat ni Ella. Inyawatna ken Elmer ti abakna iti darisayen
Kayat ni Johnny a tipden ni Ella, ngem kasla nasarait dagiti bibigna. Sabagay, asino koma a denggen ni Ella? Ket tinangadna laengen dagiti tao iti bleachers.
“Manom ngarud?”
“Onse. Ikaw?”
“Bahala na,” kinuna ni Elmer a bulonna a timmallikud.
Natadianen ti kalabanda idi sumrek da Elmer ken Dex iti pagtadian a kuarto. Ngem idi irukodna koman ti inasutna a tadi para iti dalusapi, naibbatanna ti tadi ket dandani natugkelan ti kanawan a sapatos ni Dex.
“Sus!” nayesngaw ni Elmer ket siaalisto a nangpidut iti tadi sa pinuyotanna.
Nagnganga met lattan ni Dex a kunam la no dapdappuoran dagiti dalluyon ti atab ti barukongna.
(Maituloyto)
Napalabas a paspaset: 1 | 2 | 3 | 4
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
