Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-6 a Paset)
SINIRIG ni Elmer ti tadi sa insulbongna ti bainana. Kalpasanna, kinautna ti plastik a naglaon iti danum a pagpasuyotda iti sakbat ni Dex a bagna. Pinasango met ni Dex ti manok ken ni Elmer. Pinugsitan met ni Elmer ti rupa ti dalusapi. Kunam la no napulingan ti manok a nagkikinnamat dagiti kiremna.
“Mapankan idiay pilaan ta siakon ti mangala iti pagpasippit,” kinuna ni Elmer. “Ne, agsiputka, wen. Saklotem ken dimo idisso ‘ta manok baka adda mangipitik iti bukel a nayuper iti sabidong ket tuktokenna. Ken…” saanna a naituloy ta nadlawna a natamnay ni Dex. “Apay a kasta ti langam? Mabisinka?”
“Haan, boss. Ket no naibusko pay ti sangalata a sardinas itay nangilabbanak, he-he-he!” insungbat ni Dex. Kasano nga ibagana nga agtibtibbayo a dina maawatan? Sigurado a kantiawan laeng ni Elmer. Ania ngarud, inyarudoknan ti napan iti pila dagiti natadian a manok iti sango ti ridaw nga agturong iti agdan ti rueda.
Nagsasaruno dagiti riaw, tabbuga ken sipsipat dagiti tao. Madamdama, addan da Dex ken ti kalabanda iti abay ti ridaw. Saan a nagbayag, adda metten iti abay ni Dex ni Elmer.
Galiera Queen (MAUDI A PASET)
Saanen a nagawag ti kasador iti pusta. Kayatna a sawen, bassit laeng ti diperensia ti pusta ti Meron ken Wala ket sungbatanen ti management ti kurang ti dehado wenno adda tahor iti ringside a nangpullat iti daytoy. Isu a naibuang manen ti ariwawa ken sapri ti ngiwat dagiti agpusta.
Kellaat a limteng ti ulimek ket ammo lattan da Elmer ken Dex a maibbatanen dagiti manok.
Iti ringside, pinalabsan ni Ella ti sangkapirgis a papel a pagilislistaanna. Innem a liamado ti nagsasaruno a nangabak. Nakabales ti dehado iti napalabas a soltada. Nalagipna ti kinuna ti maysa a lakay nga Ilokano a nakaabayna iti naminsan . Makitak ket agdadamoka, basang, kinuna ti lakay. No agtrebisiaka ket agsasaruno a mangabak ti liamado sa mangabak ti dehado, posible a mapasarunsonan dayta. Ket no agsuerte ti dehado, saanmo a sinaan agingga iti matukkol ti suerte.
O, siguradoka, ama?
Laglagipem, awan sigurado iti pallot. Uray ti winning line, adda met maabak.
Ngem paliiwem ti kunak.
Ngem saanen a pimmusta ni Ella. Binuyana lattan dagiti manok a no kuan umaddangda sa agpayakpak ken agtaraokda.
Natektekan dagiti agbuybuya iti panagpinnastrek dagiti manok.
“Shooo! Shooo!”
“’Tang ina! Mana sa mga among walang bayag!”
“Shooo! Waaa!”
Madamdama pay, immaddang iti namitlo ti Meron, nagsardeng, nagsikig sa linikbana dagiti payakna a kasla mangkarkarit iti kalabanna.
Madamdama pay, timmuktok met ti Wala iti daga sa nakatangtangar ti ulona nga immaddang nga immasideg iti kalabanna. Kas iti Meron, pasikig met ti takderna a nagsardeng a kasla agtungtung-ed nga agkarkarekkek nga agayab iti upa. Ad-addan ti suron dagiti di makaur-uray nga agbuybuya ket nagtatabbaawda.
Pagam-ammuan, kunam la no nagtulag dagiti manok a nagdinnarup sa nagpanerper a rimmasuk. Ket nagriaw dagiti agbuybuya idi nagtinniliw dagiti manok iti aire, nagpinnarakapakda ket naikayab dagiti naragas a dutdotda.
Nagdisson dagiti manok ngem intuloyda ti nagkinnuripaspas a nakaidda. Ngem in-inut a bimmallaway ti kinnugtarda. Idi kuan, saggaysa laengen, naginnibbetda sa kellaat a nagtalnada. Simpeg ti sentensiador ket uray la immayas dagiti tumengna iti panagparintuodna a nangtukma iti bukot dagiti manok. Kellaat a naputed ti riaw dagiti agbuybuya idi agpada a nagtillayon ti ulo dagiti manok. Ania ngarud, pinagtinnallikud ti sentensiador nga indisso dagiti manok ket kudkudkoden dagiti nagibbet a napan binittatay dagiti manokda.
“Ania ngaruden?” sinaludsod ni Johnny.
“Tabla!” insungbat ni Jong nga immanges iti dakkel sa nagliad iti nagtugawanna.
Maraisem met ni Ella a nanguged iti listaanna. Saan a pimmayso ti kuna ti lakay. Sabagay, dina met impasigurado. Posible, kunana laeng.
Iti sango ti ridaw, nakatakderen ni Dex. Ngem agtibtibbayo latta. Mabutengka? Ita pay a no manon a manok ti inyulim iti rueda, inkantiawna iti bagina ket sinarunonan ni Elmer a nakataltalek ti addangna a nagturong iti agdan.
Tinurong a dagus ti agtutubo a kalabanda ti batog ti Meron idi makaulida. Sinurot ti kasador daytoy ket sinaludsodna no mano ti paradada. Twenty two, insungbat ti agtutubo. Kimmita daytoy iti kanawan a sikigan ti ring.
Isu met la gayam, nakuna ni Elmer idi makitana ti kuttongi a lakay nga agpitopulon ti tawenna a sineniasan ti kalabanda--ni Justo Bitangcol.
Insublat nga inasitgan ti kasador ni Elmer.
“Magkano ang parada ninyo?”
Nagkuenta ni Elmer. Onse mil ken ni Ella. Sangaribu ket lima gasut laengen ti kuartana. Gasanggasat, nakunana iti nakemna. Twelve thousand one hundred, kinunana.
“Kaninong manok?” sinaludsod ti kasador.
“Kay Ella!” insungo ni Elmer ti nagtugawan ni Ella.
Intudo ti kasador ti puesto ti Wala ken ni Elmer sa binatoganna ni Ella. “Pago lima!” insarangna ti pinagsuekna a kanawan a dakulapna.
Adda pay lima ribu ni Ella ngem inseniasna a huston ti imparadana. Agkatkatawa ti kasador nga immakar. Pagsayaatanna, tallo laeng a dehadista ti binatoganna napatasanen ti parada ti liamado.
Bayag la ti kasador a nangisenias iti larga, kasla naibuangen a penned ti riaw dagiti liamadista idinto a kunam la no agaarnis ti dadduma iti panangiwagisda iti pustada. Idi damo, pu-siyam ti awag. Kimmaro gapu ta awan ti mayat a pumusta iti manok ni Ella. Agingga iti immabot iti sampu-anim. Gapu itoy, napakarit ni Ella. Linintegna ti panagtugawna ket siaalisto dagiti dua a lallakay a mangsisiim kadagiti luppona a nangibaliw iti turong dagiti matada.
“Siyam-pu!” inraed ti maysa.
Nakigtot ti maysa ket inggawidna ti takiag ti kaduana. “Pu-siyam, kunam, a!”
“Ha? ‘Su met ti kunak, ba!”
“Ama!” Sineniasan ni Ella ti maysa kadagiti lallakay.
“Ne, haandaka met a sirsiripen, este, kua…” kinuna ti kubbo-a-kiad a kuttongi ket mababain a nangkudkod iti tuktokna.
“Naay, aw-awatenna ti pusta, ‘balayan!” inyellek la ket ngarud ti maikadua.
“Ha? ‘La. wen, ‘la, wen, basang!” kinuna met laeng ti immuna ket inseniasna ti pustana.
“Anian, anian,” insennaay met ni Johnny. “Sino ti agkuna a rumigrigat ti panagbiag? Agasem, marisrisayan ti tsinelasna maituredna nga igasanggasat ti ginasutna!”
Nagasangan ti naluklukmeg a lakay ket kinusilapanna ni Johnny. “Tartarimaanem ti agsarsarita, a, barok!” inkusilapna. “Uray ta nagling-etanmi ti kuartami!”
Kasla nasiraman ti rupa ni Johnny iti kinuna ti lakay. “Ne, saan met a sika ti kunkunak ket, ama!” kinunana.
Nagtanabutob pay ti lakay, ngem intuloyna ti nangyawag iti pustana.
“Ammom, adda dagiti umay makigaliera a kas paglinglingayan laeng,” kinuna met ni Jong ken ni Johnny. “Adda met dagiti umay agpusta bareng mangabakda iti nayon ti agserbi kadakuada. Adda met dagiti agbalon iti sangkabassit laeng nga ipustada tapno mapedped laeng ti gagatelda. Ti dadduma, di bale nga agbayadda iti entrada basta makabuyada. Ti madi, isu dagiti mangilako wenno mangisalda iti alikamenda wenno manglibas iti sigsiglotan ti asawada a pakitiendada sa agsapulda iti naimas a sidaenda no sumangpetda iti balayda a baliktad ti bolsada.”
“Pumustaka ngamin tapno maawatam ti rikna ti mammallot!” inyellek met ni Ella ket dinanogna iti nalag-an ti abaga ni Johnny.
Saanen a naguni ni Johnny. Sayang laeng ti kuarta, nakunana ketdi iti unegna. No kas pagarigan ta maabak iti sangaribu, mano a pusa wenno aso a pasientena ti pakateggedanna iti kasta a gatad?
Iti gradas sineniasanen ti sentensiador da Elmer ken ti kalabanna.
“Huston,” kinuna met ni Elmer tapno isardengen ni Dex a pasippitan ti manokda.
Nagtakder ti sentensiador iti nagbaetan dagiti agibbet idi mapunasanna iti kapas a napasagepsepan iti alkohol ti tadi dagiti manok. Sa nagpaigid idi seniasan ti timer.
Gimmiddan ni Elmer iti kalabanna a nangidisso iti manokna sa nagsanud ken simrek iti kubong a para kadagiti agibbet. Naaramid dagiti kubong iti dua a suli ti ring a pagyanan dagiti agibbet kas pangsakbay iti mabalin a pannakasugatda no agrapok dagiti manok iti yanda. Ti sentensiador laeng ti mabati iti ruar a mangsiput kadagiti aglaban a manok.
Dimmarup ti manok ni Ella. Rimmasuk ti kalabanna ket angin ti nagdissuan ti istreyt ti manok ni Ella. Bimtak ti riaw ken tabbuga dagiti agbuybuya. Inulit ti manok ni Ella ti dimmanog. Rimmasuk manen ti kalabanna ket nagkiet ni Elmer idi nakalawlawag a nakitana nga inipit ti kalabanda ti manokda. Naikayab dagiti naragas a dutdot.
“Ay!” nayesngaw ni Ella.
Naubadan ti kanawan a payak ti manok ni Ella ket nadadaelen ti balansena, napasikig ket nagkaykayaw-at tapno bumangon.
Limmagto ti kasupanget ni Elmer. “Buhay ka pa? Tangna mo, buhay ka pa?” inggarakgakna.
Inirik ti kalaban ti manok ni Ella ket ad-addan ti riaw dagiti tao idi naipanget ti tadina iti tulang ti duri ket ginuyodna ti naud-udi.
“Patay na! Patay na!” Nagsala ti kalaban ni Elmer.
Ngem gapu ta beterano a handler ni Elmer, kinatawaanna laeng ti kalabanna. Kenkuana, sananto la akuenen a naabak no saanen a sumippit ti manokna wenno natayen daytoy. Isu a nakataltalna a nagdalikepkep a nangbuya iti panagtinnulong ti sentensiador ken maysa a tao ti galiera a nanguksot iti naipanget a tadi.
Nagkario ti sentensiador. Nagsinnippit dagiti manok ket indisso manen ti sentensiador dagitoy. Ngem kimleb ti manok ni Ella nga agkurkuridemdem a limmitem ti rupana. Nagariwawa dagiti agbuybuya.
“Karyo! Karyo na, gago!”
“Tanga! Karyo mo!”
Nagtungpal ti sentensiador. Simmippit iti namitlo ti Meron. Nagsalungayngay metten ti manok ni Ella.
Nagpug-aw ni Ella a bulonna a timmakder. Timmulad da Jong ken Johnny ket kasla nasarait dagiti bibigda nga immipus ken ni Ella.
Agngilngilangil met ni Elmer a nangibato iti baina ti manokda a naipisoken ti boy ti galiera iti lata ti biscuit tapno ipanna iti pagidutdotan kadagiti maabak, a pangsakaanto met ti nangabak iti limapulo a pisos.
Nadatnganen ni Elmer da Ella iti ‘yan ni Dex a kunam la no nagpasina a nakamasngaad a nangrakep kadagiti tumengna. Nagpakada idi mayawatna ti abakda iti empleado ti galiera.
“Saan ka pupunta? Intayon,” kinuna ni Ella.
“Mabiit lang!” insungbat ni Elmer ket nagdardaras nga immadayo. Kinamangna ti maysa nga agdan nga umuli iti bleachers.
“Minamalas tayo ngayon, ha, lakay!” impasabat ti maysa a kristo idi makauli ni Elmer.
“Babawi tayo sa susunod!” kinuna met ni Elmer. “Kilala ba ninyo si Kabayo?”
“Si Kabayo na manunuba? Matagal nang pinagbawalan dito.”
“Apay?”
“Namin-adun a tinarayanna ti abakna. Ken nasukalan iti panagtakawna iti manok!”
Ket insalaysay ti kristo ti nakasukalan ni Kabayo. Nagtakawda gayam iti farm ti maysa a gayyem ti akinkukua iti Sta. Ines Cockpit Arena. Inyarogda dagiti manok iti Sta. Ines tapno ilakoda. Nabigbig ti natakawan dagiti manokna ta dida inikkat ti wing band dagitoy. Malaksid a napasubli ti akinkukua dagiti manokna, kinabil pay dagiti tao ti galiera da Kabayo ken ti kaduana.
Naimbag la ketdin, kunkuna ni Elmer iti unegna idi agsubli iti yan dagiti kaduana.
Amangan no binulbullona ni Kabayo no nasarakanna daytoy. Linoko la ketdi ni Kabayo da Ella idi imbagana a nakakondision dagiti manok. Ti makadakes, namatida met. Kasano ngamin ket nakalablabaga ti gurong dagiti manok a kunam la no pudno a nakakondisionda. Siguro ginagarada a dinalusan iti eskoba ken sabon ti gurong dagiti manok isu a dumardara iti labbagada.
“Intayon,” kinuna ni Elmer idi makadanon iti yan da Ella.
Addadan iti Quirino Highway, ngem awan pay nagtimek kadakuada. Addada iti Talipapa idi kalbiten ni Elmer ti abaga ni Johnny.
“Dumsaagak ta adda gatangek. Agpaitulodakton ‘ti padyak,” kinuna ni Elmer.
Iti balayda, agsuysuyaab ni Mang Bianong a naginat. Kinitana ti relona. Nalabesen nga alas tres. Piniselna ti remote control ti telebision sa nagilad iti marantiddog a sopa. Awanda met laengen, kunkunana iti unegna idi agkidem. Isu met nga isardeng ni Johnny ti kotsena iti batog ti gate. Bimmaringkuas ni Mang Bianong.
“Dumagaska pay ta agpagatangak ‘ti merienda a turon,” kinuna ni Ella ken ni Johnny.
“‘Ton maminsanen. Baka adda agur-uray a pasientek,” insungbat ni Johnny.
Darumog da Jong ken Dex a nagturong iti gate ti mini-farm idinto a naglayon ni Ella iti naluktanen ni Mang Bianong a ridawda.
“Panalo ba?” impasabat ni Mang Bianong.
Nakapapait ti isem ni Ella a nangipakurus iti dakulapna iti karabukobna.
“I-isuda a dua?” Nagtilmon ni Mang Bianong.
Nagtung-ed ni Ella a bulonna a nangkamang iti agdan nga agturong iti kuartona. Kasla napaksuyan unay, nagbaltog iti katrena sa nagkidem.
Ngem uray iti panagkidemna, kasla makitkitana nga agtartaray nga agkikiok ti manokna a darisayen idinto a kasla maitubtubong iti lapayagna ti kantiaw dagiti agbuybuya. Running line, running line! Awan lat’ kabagisnan wenno kasinsinna? Ala, saan a bale ti naudi nga inlabanda ta natay a lumablaban. A, ngem kaskasdi a dakkel ti impaabak ti dalusapi.
Iti sakaaanan ti agdan, nakamattider pay laeng ni Mang Bianong a mangtangtangad iti nakatangep a ridaw ti siled ti balasangna. Isuda laengen a dua? Kasla dina patien. Iti agduapulon a tawen a pannakipalpallotna, dina pay napadasan ti nasero. No maabak man ti maysa a manokna, mangabak met ti maikadua. Ngem no agusisa ni Manang Mameng no kasdiay a sumangpet. Iruarna iti karton ti nangabak a manokna kas pammaneknekna iti panangabakna. Mano ngarud ti inabakmo? no saludsoden ni Manang Mameng, ibagana nga apagisu laeng a sukat ti pinagpakpakanna ta bassit met ti impustana. Kasano ngamin ket intayab met ti naabak ti dadduma a balonna.
Pagammuan la ta adda naggilap iti mugingna. Saan ngata a linoko da Kalansay ken Kabayo? Ngem apay a namatida a nakakondision dagiti ginatangda a manok? Losing breed isu a nalaka?
Agturong koman iti ridaw ni Mang Bianong tapno mapan makidamag kada Dex, ngem isu met a rummuar ni Manang Mameng iti kuartoda iti makanawan a laem.
“Adda ‘tay anakmon?” dinamag ni Manang Mameng.
Nagtung –ed ni Mang Bianong.
“Nangabak manen?”
“Naabak nga agpadpada dagiti insalogda.”
Imbes a malidayan met ni Manang Mameng, nagkatawa ketdi a nangtangad iti ridaw ti siled ni Ella. “Kunakto met! Apay, bukodna ti suerte? Pagpampanunotan ‘ta anakmo dayta. Kasaritam manen ta ituloyna laengen ti agbasa. Isardengmon tapno awan tuladenna, kunakto met ngamin."
“Wen, wen!” inyanamong lattan ni Mang Bianong tapno sumardengen ni Manang Mameng. “Iti pannakariput a naabak ti dua a manokna, sigurado nga agpanunoten ‘ta anakmo. Diakto masdaaw no ilakonan no bigat dagiti natda a manokna.”
“Ayna, innak la ketdi itugkelan iti kandela dita simbaan ti panagyamanko no mapanunot ni Ella nga isardeng ti pannakipallotna,” kinuna ni Manang Mameng ket tinurongna ti lamisaan tapno kitaenna no ania ti pagmeriendada nga insagana ti katulonganda.
Iti kalapaw ni Dex, naukas ti tapayada ken Jong idi matugtog ti rikep ti mini-farm.
Aglaladut ni Dex a napan iti gate.
“Anusan, a, ti gin,” kinuna ni Elmer idi awan man la ti rimat dagiti mata ni Dex a nakakita iti bitbitna a supot a naglaon iti dua a botelia a gin ken no mano a bungon a kinirog a mani. “Napianto no mangabaktay' manen.”
Implastar ni Jong ti makupin a lamisaan ni Dex iti pataguab ti kalapaw ket imparabaw ni Elmer ti dua a botelia a gin. Nangala met ni Dex iti maysa a baso.
“’Nak gumatang iti ice water,” impakada ni Jong ket nagdardaras a rimmuar iti kalapaw.
Binukbokan ni Dex ti baso iti dua ramayan a gin apaman a dimteng ni Jong. Inyawatna ken ni Elmer. Nangipatedted met ni Elmer.
“Bagiyo, apo,” kinunana. Kalpasanna, insublatna a pinatedtedan ti tammudo ken tanganna sa impiritna iti agsumbangir a piditpiditna. Nakatantanang a nangitangad iti basona ket di pay naggaraw ti karabukobna a nangpaatian iti baso. Agsansanapsap a nangidisso iti baso.
Binukbokan manen ni Dex iti dua ramayan ti baso sa inyawatna ken ni Jong. Intangad met a dagus daytoy ti baso ket nagaruyot ti nagkallasawan kadagiti gigisna.
“’Bag daytoy ta nalaka a kumagat,” kinuna ni Elmer nga agkarkarut-om iti kinirog a mani. “’Ton mangabaktayo manen, ninto lapayagan a Ponso ken liempo ti pagraragsakantayo!”
“Okey lang, boss!” inkiremkirem met ni Jong.
“Linakuanda ni Ella iti pipitsugin,” kinuna met ni Dex.
“Naimbag ta diak nakita ni Kabayo!” imbang-es la ket ngarud ni Elmer. “Ngem bay-anyon dagiti 'ninada a suitik. Addanto panagbayadda. Sige, uminumtay ketdi!” Pinaatiananna ti baso ket inallawat met ni Jong a mangrugin a lumanay dagitoy matana.
INUKSOB ni Manang Mameng ti apronna idi makalutoda ken Sary iti pangrabiida. Agsangapulo a tawenen ni Sary kadakuada, ngem tultulonganna latta daytoy nga agluto ta saan a mapugpugtuan ti katulonganda ti templa ni Mang Bianong. Ultimo a danum ti apuyenna, masapul a penken ni Manang Mameng ta dina kayat ti nabasa nga innapuy. Anian, tsokolate laengen ti kurangna tapno tsamporado, dagdagulliten no kua ti lakayna agingga iti malpas a mangan.
“Inka ayabanen ni manongmo ta mangrabiitayon,” kinuna ni Manang Mameng. “Ni Ella, di pay immulog?”
“Saan pay, ate,” insungbat ni Sary. Nangipakleb iti tallo a pinggan iti lamisaan, pinarisanna iti kutsara ken tenedor, sa nagpakada a mapan mangayab ken ni Mang Bianong iti farm.
Nakalukat ti ruangan ti farm a nadatngan ni Sary. Idi iduronna ti rikep, naipasirna ti amona a lalaki nga agpakpakan iti manok. Agsaludsod koma, ngem nakitana ni Dex a naibalat iti kalapawna—nalislis ti gayadan ti tisertna ket ngilngilawen ti tunnal a pusegna.
“Kuya, mangantayon,” kinuna ni Sary. “Apay a dakayo ti agpakpakan?”
“Naulaw ni Dex ket naturogannan dagiti aywanna,” insungbat ni Mang Bianong. “Nakapanaw metten da Jong ken Elmer. Sige, umunakan. Agpainumak laengen.”
Nakaidasaren da Manang Mameng idi lumaem ni Mang Bianong. Inwarasna ti panagkitana. “Ni Ella?” kinunana idi dina makita ti balasangna.
“Inawaganen ni Sary, ngem di sumungbat. Sika man ti mangayab,” insungbat ni Manang Mameng. “Baka agpaspasanaang iti pannakaabakna. Kasaritam. Ibagam a lalo a dumakkel ti abakna no dina isardeng ti makipallot.”
Nagkatawa ketdi ni Mang Bianong. “Saanen a masapul a kasaritam ‘ta anakmo. Dayta a kadakkel ti abakna, agbabawi la ketdi no apay a nasumokna ti makigaliera!” kinunana.
“Apay, mano ti abakna?”
“Baka agbeinte mil!”
Uray la nagtimbukel dagiti mata ni Manang Mameng. “D-duapulo ribu?” Kinamatna ti angesna.
“Wen. Onse iti maikadua ta kayatna kan' ti bumawi. Kayatna a sawen a dakkel met ti kayatna nga abroten iti abakna iti immuna a manokna.”
“Anian! Kastan ti kapigsa ‘ta anakko a makipallot? Ayna, Sabiniano, anianto ti biagna no dina isardeng ti makigaliera? Kaasiam ti anakko, Apo!” Nagakkub ni Manang Mameng.
“Uray pupuotem, agbabawin ‘ta anakmo iti dayta a kadakkel ti abakna. Siakto pay, maabakak la iti sangaribu, diakon maiturturog!”
“Ngem nangalaanna iti kasta a kuartana?”
“Naurnongna nga inab-abakna.”
Immanges iti dakkel ni Manang Mameng. Tinangadna iti uluanan ti agdan ti nakatangep a ridaw ti kuarto ti balasangda. “Barbareng ngarud, a, Apo, no makapanunoten ti anakko. Kayatko pay ketdin a maki-boyfriend bareng maibaliw ti turong ti panunotna. Ania, di pay naibaga ni Johnny ti riknana?”
Nagkatawa ni Mang Bianong. “Mapeluan sa met ni Johnny!”
“Inka ngarud ayabanen ta mangantayon,” kinuna ni Manang Mameng ket napanen iti puestona iti panganan.
Tinoktok ni Mang Bianong ti rikep ti kuarto ni Ella. “Kain na tayo, iha, halika na!”
Ngem awan nauray ni Mang Bianong a sungbat ni Ella wenno arimpadek la koma nga agturong iti ridaw. Isu nga inulitna. Ken inulitna pay.
Madamdama bassit, adda kayaskas ti tsinelas nga umas-asideg iti ridaw. Naguyod ti rikep ket naipasabat ken ni Mang Bianong ti muregreg a rupa ti balasangna.
“’Maykan. Simmangon ni mommy-m,” kinuna ni Mang Bianong. “Kasta laeng ti pallot. Adda panangabak, adda met pannakaabak.”
Ngem nagmisuot ni Ella. “Diak mabisin, dad,” kinunana. “Adda kukueek. Nag-i-internet ako.”
Pudno, nakita ni Mang Bianong a nakalukat ti laptop ti balasangna iti rabaw ti kama daytoy.
“Ituloymonto no malpaska a mangan.”
Ngem saan a napilit ni Mang Bianong ni Ella nga umulog.
“O, apay?” kinuna ni Manang Mameng.
“Di raw nagugutom. Agin-internet. Siguro, pangyaw-awanna iti pannakaabakna,” insungbat ni Mang Bianong ket timmugawen iti kabesera.
Ngem iti kabigatanna, nasdaaw da Mang Bianong ken Manang Mameng idi nagriing iti alas singko ni Ella. Nadatngandan iti salas ti balasangda nga agbasbasa iti diario idi rummuarda iti siledda. Nagkinnita dagiti agassawa.
“Dinan sa naiturog ti pannakaabakna idi kalman,” dandani saan a simngaw ti timek ni Mang Bianong.
“Agasem, aya, ti beinte mil a basta mapukawmo lattan iti apagkanito?” kinuna met ni Manang Mameng.
Nadlaw ni Ella kadagiti dadakkelna. Indissona ti basbasaenna a daan a diario ket sinabatna dagiti dadakkelna. “Morning, mom, dad!” inkablaawna ket binisongna dagiti dadakkelna.
“Maaga kang gumising…” kinuna ni Manang Mameng. “May lakad ba kayo ni Johnny?”
“Makimisakayo idiay Baclaran?” sinaludsod met ni Mang Bianong.
Nagkatawa ni Ella. “Lakad?” inyayugna. “Makimisa? Diak pay nadamag a nakimisa ni BBJ!”
“Apay ngarud a nagsapaka a bimmangon?”
“Wala lang. Type ko lang!” insungbat ni Ella.
Saanen a nagunton da Mang Bianong ken Manang Mameng. Idi makakapeda, napanen ni Mang Bianong iti mini-farm-na ket napan met ni Manang Mameng iti yan dagiti orkidiana.
Ngem iti agalas nuebe, adda nagsardeng a van iti sango ti ruangan da Mang Bianong. Nasdaaw ti lakay ta dinagdagus ni Ella ti rimmuar a nangsabat iti dimsaag a kadua ti tsuper. Ket nagkuretret ti muging ni Mang Bianong idi mabasana ti marka iti bakrang ti van: Deriyab Farm.
(Sumaruno a paset)
Napalabas a paspaset: 1 | 2 | 3 | 4 | 5
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
