Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-7 a Paset)
NAGKURETRET ti muging ni Mang Bianong. Derri Yabe Farm? Saan a kabarbaro kenkuana dayta a nagan. Daytoy ti maysa kadagiti kalalatakan nga agpatpatanor iti dekalidad a para pallot a manok dita Pulilan. Ngem ania ti kaadda ti luganda iti batogda? Apay a kasla pinadpadaanan ni Ella ti van ta adda a nadadaan a simmabat iti daytoy?
“Kayo si Miss Ella, di ba?” Mangigis ti isem ti lalaki. “Talaga palang maganda kayo, tulad ng iniisip ko kagabi nang ka-chat ko kayo!”
Ne, tiritir ti dila ti nakisalbag, nakuna ni Mang Bianong iti unegna ket dinagdagusna ti immasideg. “Sino siya, Ella? Ania ti gagarana?”
Ngem kasla di nangngeg da Ella ken ti bisita ni Mang Bianong. Inyawat ketdi ti lalaki ti dakulapna.
NOBELA: Apo Baboy Party-List (6)
“Ako si Derri, ang ka-chat ninyo kagabi. Kumusta kayo?”
“Okey lang,” insungbat met ni Ella a bulonna a nangawat iti dakulap ti bisita. “Ano, may dala ba kayo?” Tinannawaganna ti lugan.
“Meron. Dalawang Black Alabama. At siyempre, quality cocks!” insungbat ti lalaki ngem dina inibbatan ti dakulap ni Ella.
Saanen a nakateppel ni Mang Bianong. Kasano ngamin ket nalagipna daydi panangalamanona ken ni Manang Mameng idi agam-ammoda iti coronation night iti piesta ti Buguey. Iti pannakabatombalanina ken ni Manang Mameng, no namin-ano a piniselna ti dakulap daytoy agingga iti rinabak ni Angelo, ti namagam-ammo kadakuada. Ne, napigket ti dakulapna, aya, ta dimo metten maguyod ‘ta dakulapmo? kinuna ni Angelo.
“Sino siya, Ella?” sinaludsod manen ni Mang Bianong. Ammona, aya, no pispislen met ti bisita ti balasangna?
Pudno, inibbatan ti bisita ti dakulap ni Ella.
“Derri Yabe po!” Inyawat ti bisita ti dakulapna ken ni Mang Bianong.
Mapilpilit ni Mang Bianong a nakidinnakulap iti bisita. “Kumusta, iho!”
“Siya ang may-ari ng Derri Yabe Farm, dad!” Pinangyam-ammo ni Ella iti bisita. “Kausap ko siya kagabi. Ano, may dala ka ba?”
“Sure!” Agkatkatawa ni Derri a nangtaliaw iti driver ti van. “Ilabas mo, Caloy!” imbilinna sa met la kinitana ni Ella. “Dalawang Black Alabama. Twenty four months na sila. At talagang quality!”
“Kayatmo a sawen, nagorderka iti manok?” kinuna ni Mang Bianong ken ni Ella. “Kunak no naleksionankan?”
“Dad!” inyayug ketdi ni Ella. “Kasano a makaabrotak no isardengko gapu ta naabakak? Kayatko nga iti sumaruno a labanko, dua nga isalogko, dua met laeng a yawidko, maikapat dagiti bihag!”
Ania pay, immanges laengen iti dakkel ni Mang Bianong idinto ta kinitana ti dua a karton a single nga indisso ti driver iti abay ni Derri.
“Testingin natin,” kinuna ni Derri sa nagtalangkiaw. “Saan ba kayo nagsusuga?”
“Doon!” insungo ni Ella ti nakatangep a landok a rikep ti mini-farm.
Kayat ni Mang Bianong nga atipaen ni Ella. Ngem ad-adda a nagturay ti essemna a makabuya iti ipakita dagiti manok a naggapu iti Derri Farm. Ket isu payen ti nangyuna iti panagturongda iti gate ti mini-farm.
Bitbit ni Derri dagiti karton, dina naigawid ti panagarapaapna iti panangalunos dagiti paningkiten a matana kadagiti muldotan a gurong ni Ella ken dagiti arindaraen a babassit a mukodna iti panangsarunona iti balasang.
“Wala na bang bawas?” intaliaw ni Ella ken ni Derri.
Nakigtot ni Derri ket nagtalangkiaw. “Oo, presko siguro sa loob ng farm ninyo. May mga puno ng mangga!”
“Ang labo mo!” inyellek ni Ella. “Yaw-awanmo, eh! Sabi ko, bawasan mo ang eight hundred na presyo mo!”
Nagkatawa ni Derri a pangallangonna iti bagina. “Baka sakaling makalusot! Panoorin n’yo muna ang bitaw nila. Tiyak, masisiyahan kayo. Puwede ninyong isanla ang bahay ninyo, he-he-he! Joke, joke!”
Agkurkuridemdem ni Dex a nanglukat iti gate. Kasano ngamin ket naikarigatanda met laeng ti nangala iti maikatlo a botelia a gin dita kanto idi rabii ta imbaga ni Elmer a pailista ni Dex ti nagan ni Mang Bianong.
“Alaem ti dalusapi a namitlon a nangabak,” kinuna ni Mang Bianong ken ni Dex.
Inruar ni Derri ti linaon ti maysa a karton. Alimbuyogen daytoy a nakadaldalus ti pingasna isu a nakabasbassit ti ulona. Naipunget ti tapingarna sa nairaman a naukisan ti pispisna iti pannakapellas ti piditpiditna. Nawasnay dagiti gurongna ken agsabat dagiti dutdot ti payakna iti labes ti kimmolna. Natangar ti ngumisit nga ipusna.
Inyawat ni Dex ti sangaparis a glab ken ni Derri sa inkapetna ti maysa a paris iti ubbana. Nagsanud da Ella ken Mang Bianong tapno mawayaan dagiti agpolis a manok. Nagatras met ni Dex iti agarup dua deppa sa inin-inayadna nga indisso ti manokna.
Timmayab nga agpadpada dagiti manok ngem nangatngato nga amang ti Black Alabama. Tiniliwna ti manok ni Dex ket kinulipagpaganna agingga iti nagdissoda.
“Wow!” nayesngaw ni Mang Bianong. Ammona, naibagisan la ketdi ti manokda no adda koma tadi dagiti manok.
Saan met a naigawid ni Ella ti panagpalakpakna. “Ang galing! Ang galing!” kinunana.
Alimbuyogen met laeng ti maikadua a kasla agmatmata a dalag. Ken dakdakkel ngem ti immuna.
“Alaem ‘diay lasak a nangdesgrasia iti manok ni Punzalan,” intung-ed ni Mang Bianong ken ni Dex.
Saan a nagsugat ti lasak ken dua laeng a danogna ti nangpatay iti manok ni Punzalan. Ngem pulos a dina madissuan ti manok ni Derri nga agsisiim laeng iti baba. No danogen ti lasak, aglisi ti alimbuyogen sa kunam la no maigaygayang no bumales, a di malisian ti manok ni Mang Bianong.
Nabainan ni Dex ket tiniliwnan ti manokda. Tinukmaan met ni Derri ti manokna ket nakabagbagas ti isemna a nangkita ken ni Ella.
“Talagang pinili ko ang mga ito para di ako mapahiya sa iyo!” kinuna ni Derri. Kinautna ti ngiwat ti manokna sakbay nga inkartonna.
Nagtungtung-ed ni Ella. Awan pay namanokna a kas iti kinalaing dagiti Black Alabama ni Derri. “Magkano talaga?” sinaludsodna.
“Ten thousand ang isa. Quality, kita mo naman!” insungbat ni Derri.
Uray la nagsul-oy ni Mang Bianong. Kasano a gumatang iti kastoy a manok no agtigerger payen a mangparada iti manokna iti tres mil tres sientos? “Nangina unay, sumapulka laengen iti sabali. Adu ti maibaybay-on a lako kadagiti galiera,” kinunana ken ni Ella.
Ngem kasla di nangngeg ni Ella. “Six laengen. Pamadasak,” kinunana.
Nagkatawa ni Derri. “Lugi ako sa patuka, vitamins, at pag-aalaga!” kinunana ket binagkatna dagiti karton.
“Bay-amon, nangina unay,” kinuna manen ni Mang Bianong.
Ngem kasla di nangngeg ni Ella ti amana. “Sige, eight K!”
Immisem ni Derri a bulonna a nangidisso kadagiti karton. “Sige na nga. Pero sa susunod di ko na babawasan ang ten thousand. Pangpadasam no apay nga agkamkampeon iti derby dagiti palahi ti Derri Farm!”
Nagpakada ni Ella tapno alaenna ti pagbayadna kadagiti manok. Ngem nagtibbayo idi maduktalanna a dose mil laengen ti natda iti in-inutenna a kauten no mapan iti galiera.
Kasano itan? nakuna ni Ella iti unegna. Saan, di mabalin a palusposanna ti maysa kadagiti manok ni Derri.
Dumawat ken ni Manang Mameng iti nayon ti pagbayadna? Pordios! No di pay ikkan ti inana ni Mang Bianong iti igatangna iti conditioner no maibusan ti amana aglalo no maabak daytoy. Ayna, lakay, dinak iramraman iti bisiom, kuna no kua ni Manang Mameng. Saan la ket ngarud a naigawid ni Ella ti yiisemna iti pannakalagipna iti naminsan a panagpasig ti amana iti inana. Sus, Bianong! No dagiti koma ik-ikkam iti barato no mangabakka ti kalbitem no maabakka? Inkatawa ti inana dayta a kinunana, ngem nagkiet ti amana.
Ammom, baket, paset ti panagkakadua ti barato no mangabakka dita galiera, no kabaelam ti mangted. Ngem pada a matiktikagan dagiti umasideg nga agpasig no mangabakka.
Ket no pagbalinenyo met koma a paset ti panagkakaduayo ti panangtulongyo iti maabak? kinuna latta ni Manang Mameng. Ti ket ammok a kunkunam a paset ti panagkakaduayo a mammallot, adu ti makipagkatawa iti mangabak aglalo no agpabarato. No maabak? Solona a sangitan ti gasatna, piman! Ti ket nasayaat, isardengmon ti makipallot, lakay, ta in-inutek nga adobuen dagiti baudmo!
Ania ngarud, saanen nga immud-od ni Mang Bianong. Pagpiaanna, adda pirpir a sangagasut a nasukainan ni Dex iti petakana ket nakagatang iti uppat a kilo a conditioner. Impakan metten ni Mang Bianong ti inyuperna nga ittip iti aso ti kaarrubada.
Ngem saan a naupay ni Ella. Dinardarasna ti nagsubli iti mini-farm. Siuumbi a nagbitin iti tengnged ni Mang Bianong sa rinapidona iti bisong ti pingping ti amana.
Nagdanag ni Mang Bianong. Adda nagparikna kenkuana. “O, apay?”
“Dad…” Binisong manen ni Ella ti amana. Pinalanayna dagiti matana sa umis-isem a nangitaya iti kanawan a dakulapna.
“Ha? Apay?”
“Kulang ang pambayad ko, eh!”
“Apay, mano ti kuartam?”
“Twelve lang, dad…”
“Ne, sobra met gayam. Dimo kuna a siak ti mangbayad!”
“Alaek ngarud a dua. Parehong magaling eh!”
“Ha? Isa lang muna para masubukan!”
“Kasano a makaabrotak no maysa laeng? Dad, dalawa ang natalong manok ko. Sige na!” Nagmisuot kampay idi ni Ella sa nagdalikepkep a nangtallikud iti amana.
“Awan kuartak, 'ba!”
“Adda!”
“Pangalaak? Kaya nga di ako makapaglaban!”
“Ow?” Manutsutil ti panangkita ni Ella iti amana. “Talaga, dad? Apay ngarud a diyo maidisso ti petakayo? Kanayon nga adda dita bolsayo, di ba? Ken kanayon nga agtultulakak manipud idi dinaka inikkan ni mom iti igatangmo iti conditioner! Di ba?!” Naggarikgik ni Ella.
Kasla adda nangtugkik iti ipel ni Mang Bianong ket napakiad iti kinuna ti balasangna. Kinarawana ti nabungkong a petakana iti akinlikud a bolsa ti shorts-na a kaki. Pudno met ngamin a kanayon nga ibolbolsana ti wallet-na, aglalo ita a yur-urnonganna ti dua a manokna nga ikonkondision ni Dex
“Paano? Next time na lang?” imballaet met ni Derri sa nagin-aaddang nga umadayo.
“Wait lang!” inggawid ni Ella ti takiag ni Derri. Isu met a maiduron ti landok a rikep ti gate ti mini-farm ket inyulana ni Johnny.
Nailabeg ni Johnny iti pannakakitana a kumkumpet ni Ella iti takiag ni Derri. Bimmara ti rupana. Isu met a nakita ni Dex.
“BBJ, halika!” inyayab ni Dex. “Kitaem man no awan met la ti sakit dagiti manok a gatgatangen ni bossing!”
“Alan, a, dad!” Nagkutagtag ni Ella.
Ania ngarud, inruar ni Mang Bianong ti petakana ket agsulsul-oy a nangdutdot iti uppat a sagsangaribu sa inyawatna ken ni Ella. “Sika nga ubing, wen. Mailakok amin a daan a diario, plastik a botelia ken lata ti softdrink ken beer isu pay a nayon ti urnongko.”
“Thank you, dad!” Nagbitin ni Ella iti tengnged ni Mang Bianong sa binisongna ti amana.
Ngem idi yawat koman ni Ella ti pagbayadna ken ni Derri, inatipa ni Johnny. Napanunotna ngamin no kasano a makasengngat iti eksena tapno maipakitana met ti panangisakitna kada Ella.
“Sandali lang,” kinuna ni Johnny. “Puwede bang tingnan ko ang mga manok bago bilhin?”
Kinita ni Derri da Ella ken Mang Bianong.
“Si BBJ pala, ang beterinaryo namin,” pinangyam-ammo ni Mang Bianong ken ni Johnny.
Umis-isem ni Derri a nangidisso kadagiti karton. Inyaonna ti maysa a manok sa inyawatna ken ni Johnny. Inawat met ni Johnny sa sinirsirigna ti manok, binukiladna dagiti mata daytoy sa impiselna ti tangan ken tammudona iti agong daytoy. Kinitana dagiti ramayna. Nagtungtung-ed a nangisubli iti manok ken ni Derri.
“Awan panatengna,” kinuna ni Johnny. “Nabakunaan met laeng dagiti manokyo idi piekda pay?” sinaludsodna.
“Opkors. May sarili akong veterinarian. Di puwedeng magtatag ka ng malaking farm tulad ng Derriyab kung wala kang veterinarian na tumitingin sa kalusugan ng mga alaga mo,” insungbat ni Derri.
“Derriyab? Ano yon?” Nagkuretret ti muging ni Johnny.
“Ang sikat na farm na pinanggagalingan ng mga champion sa derby!” insungbat ni Mang Bianong. “Sabagay, di ka kasi nagsasabong kaya di mo kilala ang Derriyab Farm!”
“Kilala mo si Dr. Jumar Pacni, di ba? Siya ang veterinarian ko,” kinuna met ni Derri. “Dating nagtuturo sa Araneta.”
Nagtungtung-ed ni Johnny. Kasano a dina am-ammo ni Jumar Pacni ket maysa daytoy kadagiti propesorna idi nagadal iti Araneta?
Yaon koma pay ni Derri ti maikadua a manok ngem inatipa ni Johnny.
“Huwag na, brad,” kinuna ni Johnny a mababain. “Regards na lang kay Sir Jumar.”
Impetaka ni Derri ti pinagbayad ni Ella ket agsagsagawisiwen daytoy a nagturong iti gate ti mini-farm.
“Mapantayo dita balay ta agkapetayo,” inyawis ni Mang Bianong ken ni Johnny.
Ngem nagngilangil ni Johnny. Mabisin itay. Ngem kasla nangrikna ti tianna. Kasano ngamin ket kasla ketdin saan a nadlaw ni Ella ti kaaddana. Ni Derri lattan ken dagiti nakakarton a manok ti agsinsinnublat a kitaenna. Ket itay makatallikud ni Derri, dagiti manen ginatangna a manok ti sinangona, inruarna ti maysa ket kunam la no maladaga daytoy nga inubba ken inam-amloyanna ti ulona.
“A-e, ‘ton maminsanen, ama. Napanunotko ngamin itay ti dumagas ta naggapuak dita San Agustin,” insungbatna.
Nagkuyogen da Mang Bianong ken Johnny a rimmuar iti mini-farm idinto ta bilbilinen ni Ella ni Dex no sadino ti pangiwaywayanna kadagiti manokna. Saan pay a napnek, inturongna ni Dex iti kayatna a pangiwaywayan daytoy kadagiti manokna—iti puesto ti dua a manok ni Mang Bianong iti asideg dagiti pinuon ti saba iti ungto ti farm iti abagatan.
“Puesto dagiti ikonkondisionko a manok ni Boss Bianong dagita, ma’am. Suerte kenkuana. Manmano ti maabak nga iwaywayna dita,” kinuna ni Dex.
“Okey ngarud no kasta. Sige, yakarmo dagiti manokna ta ditoy ti pagyanan dagiti manokko. Siak ti makaammo kenka!” Kiniddayan ni Ella ni Dex.
Naawatan ni Dex ti kayat a sawen ni Ella ket nakakarkarting a nangyakar kadagiti manok ni Mang Bianong sa inwaywayna dita dagiti kassangpet a manok ni Ella.
AGSAPA ti Domingo. Naisibeten da Mang Bianong ken Manang Mameng a mapan makitienda iti Balintawak Market. Apaglabes a maikapito iti agsapa ngem nakariingen ti Ella. Awan ti iskediulda iti Sta. Ines ngem umay ita ni Derri tapno lektiuranna ti Team Ella maipapan iti umno kano a taraon ti manok a maisagana a mailaban. Twenty days na paghahanda, kinuna ni Derri idi naminsan nga aldaw. Ikaw lang ang bibigyan ko ng ganitong tips, kinuna ni Derri. Masapul a danggayan iti umno a diet ti training ti manok tapno dakdakkel ti tiansana a mangabak. Saan met a siento porsiento ti panangabakna ngem, at least, dakdakkel ti gundawayna ngem dagiti mapakpakan lattan iti irik, mais, ken ittip.
Immuna a dimteng ni Jong a narusep iti ling-et. Kalleppasna kano a nag-jogging. Dita laeng ballasiw ti Mindanao Avenue ti pagnaedanna, iti balay ti kapiduana a dati a kaarrubada idiay Banurnor. Baro pay iti tallopulo ket lima a tawenna. Timmangken ti nabukel a pammagina iti panagtrabahona iti konstruksion.
“Sika pay laeng ti simmangpet,” kinuna ni Ella. “Ni Dex nga adda laeng iti arubayan, awan pay.”
Saan a simmungbat, kunam la no bumalay ni Jong nga agsagsagawisiw a nagturong iti komedor. Gapu ta nairuamen iti balay da Ella, saannan nga impakada ken ni Sary ti panangtemplana iti kapena sa napan nagsikkawil iti salas.
Simmaruno a dimteng ni Elmer. Kas iti sigud, nakakipis daytoy iti ngumisit, nakasando iti nalabaga a pinarisanna iti umasul a shorts. Nakasandalia ta asideg laeng ti Quimco Subdivision a ‘yan ti balay ti kabsatna a nabayagen a pimmanaw idiay Allacapan nga ilida. Baro pay iti tallopulo ket walo a tawenna. No dagdagen idi dagiti dadakkelna a mangasawan tapno agtalna ken tapno isun ti mangsukay iti lima ektaria a taltalonen ti amada, irasonna a narigat ti adda sawsawirna. Agingga iti napanunotna ti simmurot iti taga-Lasam nga adda farm-na a nagideliber iti manok iti siudad. Saanen a nagawid idi maam-ammona ni Mang Bianong iti Sta. Ines.
Iti Quirino Highway, nakarubuaten ni Johnny. Nagaruat iti maong a pantalon a pinarisanna iti maris dapo a polosert a kunam la no malettat dagiti butonesna iti pannakabegkes ti tianna.
Binilinna ni Bituin, ti balo a kabarbaro a para dalus iti BBJ Animal Clinic, nga ikabil daytoy ti kartolina a nakaisuratan ti "Doctor on Call" iti sarming ti kotsena. Ilagay mo rin ang “Doctor is Out” sa door ng clinic, kinunana pay.
Nagtungpal ni Bituin. Ngem idi matungpalna ti naibilin kenkuana, inasitganna ni Johnny a nakatugaw a mangipilpilut iti gel iti panguloten a buokna tapno agpigar iti tuktokna.
“Sir, puwede bang magpareseta?” kinuna ni Bituin.
“Bakit, anong nararamdaman mo?” sinaludsod met ni Johnny a mangitultuloy iti aramidna.
“Ano, sir… kuwan…” Nakasamsam-it ti isem ti balo a nangilisi iti panagkitana ken ni Johnny.
“Ano?”
“Ang lakas ng kabog ng dibdib ko!”
“Baka naman umiibig ka?”
“Ba’t mo nahulaan, sir?”
“Maligo ka lang, mawawala na ang init ng katawan mo,” kinuna ketdi ni Johnny a bulonna a timmakder. “At doktor ako ng hayup. Di ka naman hayup, di ba?” Agkatkatawa a nagturong iti ridaw. Limmugan iti kotsena, inkurikorna ti tulbek sa binombana ti gasolina ket nakagin-awa idi nagbanurbor ti makina. Isuna laeng ta nagipugso iti nakangisngisit nga asuk ket uray la nagapput dagiti aglabas.
Saan nga inawis ni Ella ni Johnny. Ngem idi naammuanna ken ni Jong a lektiuran ida ni Derri iti balay da Ella, inkeddengna nga agatendar met. Sus, adun ti naipuonanna nga anus ken agas ket dina la ketdi itulok nga agtungpal ni Ella ken ni Derri. No adda gundawayna, yarasaasna itan ti ayatna iti balasang.
Iti ungto ti Karpa Street iti abagatan, nagbosina iti namitlo nga abbaba ti puraw nga Sportivo iti sango ti gate da Ella. Madamdama pay, bimmaba ni Derri a nakaanteohos iti dekolor iti abay ti driver ket nakatangtangar ti timidna a nagtimre.
Iti salas, saan a naikaso da Ella, Jong, ken Elmer ti panagtimre ni Derri ta ipalpalawag ti balasang ti panggep ti yaay ni Derri.
“Wala siyang pakialam sa method mo bilang trainer,” kinuna ni Ella ken ni Elmer. “At tested na natin a training mo, di ba, Jong? Ang feeding sa inihahandang manok ang ise-share ni Derri sa atin. Datayo, umanayen a pakanentayo iti conditioner ti manoktayo, subuantayo iti tableta a bitamina satay' tudokan iti sabali pay a bitamina. No adda madamagtayo a napintas nga agas, subuantayo pay ti manok iti dayta nga agas sakbay a matadian ta hustonto nga agepekto no maibbatan. Mainugot laeng a taraon ti maikondision a manok ti panggep ni Derri,” inlawlawag ni Ella.
Naulit ti timbre ket timmakder ni Jong.
“Wala naman akong makita na mali sa ginagawa natin. Apay a baliwantayo pay laeng?” kinuna ni Elmer. “Kadaanan ngem tested met, kontra kabaruan ngem adalentayo pay met. Baka nagasgastos pay. Baka agkamalitayo pay.”
“Good morning, Ella!”
Simrek a dagus ni Derri apaman a naluktan ni Jong ti ridaw. Bitbitna ti eppes a bagna, naglayon iti sanguanan ni Ella ket indiayana ti imana. Ania ngarud, timmakder ni Ella ket nakidinnakulap ken ni Derri.
“Kayo lang?” Nagtugaw lattan ni Derri. “Akala ko maraming members ang Team Ella!” inkatawana.
“Uppatkam' laeng, ngem adda pay ar-aramiden ti maysa,” impakaammo ni Ella. “Isu ti para pakan.”
“Naku, mahalaga pala ang role niya. Tawagin siya.”
Timmakder ni Derri a kasla maestro iti sango dagiti adalanna. Linukatanna ti bagna. Dudua met gayam a panid a bond paper ti linaonna.
“Langsot!” imbanang-es la ket ngarud ni Elmer.
”Ano ‘yon?” kinuna ni Derri.
“Siguro, talagang magaling ito, sabi ko,” inkatawa ni Elmer ti sungbatna sa kiniddayanna da Jong ken Dex.
(Maituloyto)
Napalabas a paspaset: 1 | 2 | 3 | 4 | 5 | 6
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
