Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-8 a Paset)
SINAGGAYSA manen a kinita ni Derri dagiti kasangsangona. “Ulitek, saan a siento porsiento ti resulta daytoy a pormula,” kinunana. “Ngem naibatay iti nadumaduma a padas iti adun a tawen manipud idi nauso dagiti manok a teksas a nadumaduma ti pulida a nangbaliw a namimpinsan iti ay—“
Naputed ti panagpalawag ni Derri ta adda nagsardeng a lugan iti batog ti balay. Nabigbig met ni Ella ti ungor ti lugan dagiti dadakkelna a nakitienda idiay Balintawak. Kinitana ni Jong ket siaalisto met daytoy a nagturong iti ridaw.
Nasdaaw ni Manang Mameng iti pannakaummong dagiti nadanonda iti salas. Sa in-inut nga immalsem ti rupana iti mayam-ammo ni Ella ni Derri.
“Sige, ipagpatuloy ninyo at magluluto ako,” kinuna ni Manang Mameng a pinasarunuanna iti nakamagmaga a katawa ket inlayonnan iti kosina ti dua a bitbitna a dadakkel a supot a plastik a naglaon iti ginatangda iti tiendaan.
NOBELA: Apo Baboy Party-List (6)
Idi lumaem ni Mang Bianong, ammona lattan ti nakaummongan da Ella iti salas idi mabigbigna ni Derri. Kayatna ti makiragup ngem naisipna a misuotan no kua ti asawana. Isu a sinurotna ni Manang Mameng tapno tulonganna daytoy nga agipakni kadagiti ginatangda. Nagpakada ngamin ni Sary a mapan mangiliw iti kabsatna iti Marikina.
“Okey, ipagpatuloy natin!” kinuna manen ni Derri. “Twenty days preparation ito. Dalawampung araw na feeding sa tine-train na manok na balak ilaban. No rugianen ti training ti manok, rugian metten ti panagpakan kadagiti sumaganad.”
“Kasta met ti ar-aramidek no sanayek dagiti ilabanmi,” imballaet ni Dex. “Mangabakkami met!”
“Siyempre, lumang pamamaraan ng pagte-training at feeding ang ginagawa ninyo. Pero kailangang matuto tayong tumanggap ng makabagong paraan. Ket daytoy ti isurok kadakayo.”
Nagtungtung-ed ni Ella. Ammona no apay a kasta ti reaksion dagiti kakaduana. Saanda a kayat ti mangrugi manen, ti makigasanggasat iti kabaruan a wagas. Kadakuada, huston ti kadaanan tangay nasubokdan, nasigsiguro, ken kabesadodan.
“Makinig lang kayo, mga kasama. Ammok, adda latta mapidutyo iti ibaga ni Derri,” kinunana.
Nagulimek nga agpayso da Elmer. Ngem irubrubuat pay laeng ni Derri ti agsao manen, adda kasla nagrebolusion a makina ti kiskisan iti batog ti balay da Ella iti Ayungin Street. Ania ngarud, nakapapait ti isem ni Derri a nangibaba iti basaenna koma a nailanad iti umuna a bond paper.
“Ni BBJ!” kinuna ni Jong a bulonna a nagturong iti ridaw.
Pudno, kasta unay ti rungiit ni Johnny iti sango ti ridaw idi maguyod ni Jong ti rikep. “Good morning, good morning!” inkablaawna. Kinammetna ti siket ti pantalonna, impangatona agingga iti rusokna, sa impapainayadna ti limmaem. Inyarudokna ti napan nakikatugaw ken ni Dex iti atiddog a sopa sa impaipitna dagiti dakulapna kadagiti luppona.
“Siguro naman, kumpleto na kayo,” kinuna ni Derri ket insarangna manen ti umuna a panid ti coupon bond kada Ella. “Kastoy ti panagpakan. Day one to thirteen…” Intudona dagiti balikas a nakubong iti rektanggulo. “Umuna nga aldaw, sangakutsara a winning line, sangakutsara a ready to fight, kagudua ti kutsarita a peas ken carrots, one-fourth a kutsarita a PCF, one-fourth a kutsarita a popcorn—‘tay di napabusi, dua bukel a pasas, dua kailgat a lakatan ken sangakutsara nga Ensure. Kasta ti pagpakan iti umuna a sangapulo ket tallo nga aldaw kabayatan ti training.”
“'Gimasen, yusot!” insul-oy ni Dex. “’Bag pay ti manok ta makaraman iti kasta!”
“Sandali lang,” kinuna met ni Elmer. ”Maibus kadi met ti maysa a manok ti kasta ti kaadu a maisagana a kanenna? At kahit one-fourth laeng, hirap na. At baka tumaba ang manok!”
Nagkatawa ni Derri. “Sandali lang!” Pinarana ni Elmer. “Saan a ti kutsara ken kutsarita nga us-usarentay' a mangan ti ibagbagak. Adda magatang a maysa a set a kutsara a plastik a nairanta a pagrukod iti pagpakan. Babbabassit nga amang dagitoy ngem ti kutsara iti panganan. Ken no mano ti ikondisionmo a manok, kasta met ti bilang ti rukod ti pagpakan.”
Kinita ni Ella dagiti kaduana. “Nalawag met la kadakayo?” sinaludsodna.
Nangednged ti tung-ed da Elmer.
”Kasano met ti agas a pagindieksion ken tableta?” sinaludsod ni Ella.
“No ania ti us-usarenyo a nasayaat ti resultana, isu ti ituloyyo,” insungbat ni Derri.
“Para iti sumaruno a sangapulo ket uppat agingga iti sangapulo ket siam nga aldaw, adda kadi pagbaliwan ti pagpakan?” sinaludsod ni Elmer.
Nagtungtung-ed ni Derri. “Palagay ko’y interested na kayo. Wen, adda. Ganito ang susunod na feeding: maysa a kutsara a winning line, sangkutsara a ready to fight, sangakutsara a PCF, dua a diced peaches, one-fourth a kutsara a popcorn, dua bukel a pasas, dua kailgat a banana ken sangakutsara nga Ensure.”
Immanges iti dakkel ni Derri. Nagtilmon ta nagmaga ti karabukobna. Nagpaala ni Ella iti danum ken ni Jong.
Sinango ni Derri ni Johnny idi makainana. “Ikaw, BBJ, wala ka bang itatanong?”
Kasla napitik ti lapayag ni Johnny. Da laeng Ella ti pabpabus-oyanna a mangawag kenkuana iti BBJ. “Excuse me, Mister Yab. Please call me Doctor Johnny,” kinunana.
“Okay, Doctor Johnny. Sorry. May suggestion ba kayo?”
“Meron. Ibagayo koma dagiti sakit a gagangay a kumpet kadagiti manok iti kalgaw ken kadagiti matutudo a bulan, ken agas dagitoy a sakit,” kinuna ni Johnny.
Nagngilangil ni Derri.
Makais-isem ni Johnny a nangkita kadagiti kakaduana. “Makitayo? Natured laeng nga agsaosao kadakayo ta mamati a diyo ammo dagiti ibagbagana. Ita ta pagsaludsodan kadagiti nakasimsimple a sakit, dina pay masungbatan,” kinunana.
“Alam mo, Doctor Johnny, tamang feeding lamang ang itinuturo ko. Di ako beterinaryo tulad mo. Sika ti rumbeng a manglektiur kadakuada maipapan kadagiti nadumaduma a sakit a kumpet kadagiti ayup, nangruna kadagiti manok.”
Kasla adda nangitalmeg iti ulo ni Johnny iti kinuna ni Derri. Imparukibna laengen ti ikikitana kadagiti kaduana.
Kalpasan ti panangibinsabinsa ni Derri iti rumbeng nga ipakan iti maikaduapulo a training ti manok iti agsapa ken iti malem, timmakder ket linamanona da Ella.
“Okey! Sapay ta masurotanyo ti insurok. Ket diakto masdaaw no awan ti patakderenyo a kalabanyo dita Santa Ines at kikilalanin si Ella na Galiera Queen doon. Ngem mapasamak laeng dayta no aggapu iti Derriyab Farm dagiti manokyo!”
“Nagngina met ti manokmo,” kinuna ni Dex.
“Mura nga ang bigay ko sa inyo. May quality cock ba na mura?” inkatawa ni Derri ket tinurongnan ti ridaw. “At bonus sa inyo ang ibinigay kong lecture!” impakamakamna idi makaruar iti ridaw.
Kinuridemdeman ni Dex ti kasla rumrumsik a pirak nga init a mangtantan-aw iti atep dagiti balbalay iti dayaenda a subdibision. Agdaydayamudom a nangsimsim iti kapena. Sakbay a tumangkayag ti init, kinunana idi kalman kadagiti taga-Dalawantan a kinatulagna a kapulis.
“Baka didan umay,” kinuna ni Elmer sa inyilutna iti pispisna ta nasakit ti ulona iti sapana a nagriing.
“Sayang no dida agtuloy. Nalaing dagiti manokda, yos. Okeyda a pakasubokan dagiti manoktayo,” kinuna met ni Jong a mangikudkudkod iti tammudona iti nagbabaetan dagiti ramay ti dapanna.
Madamdama pay, natoktok ti landok a rikep ti ruangan a landok.
“Isudan sa dagitan,” kinuna ni Jong a bulonna a timmakder.
“Namindua laeng ti toktok. Ni Boss Bianong dayta. No isuda, sigurado a nagtraysikelda ta innem kano ti itugotda a manok,” kinuna met ni Dex.
Pudno, ni Mang Bianong ti naibaskag iti ruangan idi maguyod ni Jong ti rikep. Puraw a shorts ken puraw a kamiseta laeng ti suotna. Adda simsimsimanna a kape a dakkel a tasana.
Nagtarusan ni Mang Bianong a sinirig dagiti dua a Black Alabama iti scratch pen iti nadalus a paset ti mini-farm. Nagtinnulongan da Jong ken Dex a dinalusan daytoy a paset ti mini-farm tapno adda permanente a pagpupulisanda.
“Mano nga aldawen ti training-da?” sinaludsod ni Mang Bianong idi agsubli iti kalapaw ni Dex.
“Fifteen days na, boss,” insungbat ni Elmer. “Ur-urayenmi ngarud dagiti umay makipulis tapno ma-testing-da.”
Apagisu a maibus ti kape ni Mang Bianong idi adda agsardeng a motor iti batog ti ruangan ti mini-farm. Timmakder ni Dex.
“Isuda dagitan,” kinuna ni Elmer.
“Jong, inka luktan samo ayaban ni Ella,” imbilin met ni Mang Bianong.
Tallo a naka-shorts dagiti dimteng a kataeb da Dex ken Jong. Saggaysada iti bitbit a plastik a para iti dua a manok idi sumrekda iti ruangan.
“Boss, da Boboy ken Esting,” inyam-ammo ni Dex dagiti dua nga immuna nga immasideg. Kinitana ti mangiwarwaras iti panagkitana iti pakabuklan ti mini-farm a natayag a narapis a pinulipolan ti tattoo nga uleg dagiti gurongna.
“Ni Rocky,” kinuna ni Boboy. Mahilig mag-alaga ng manok pero di nagsasabong. Nagba-buy and sell ng manok!”
Nakaptanen iti glab dagiti agpulis a manok idi dumteng ni Ella. Nakiting a kaki ti shorts ken labong a puraw a t-shirt ti suotna. Nabigbig da Boboy ken Esting ti balasang
“Anak ninyo si Ella?” kinuna ni Boboy ken ni Mang Bianong. “'Ba, nilalabanan na niya ang mga bigtime sa Santa Ines!”
“Tinalo na nga minsan si Bitangcol, eh!” kinuna met ni Esting.
“Tsamba lang yon!” inkatawa ni Mang Bianong.
Darisayen ti manok ni Boboy a kapolis ti Black Alabama ni Ella.
Pinirit ni Elmer ti piditpidit ti Black Alabama sa nagsanud a nanguray ken ni Boboy. Pinikpik met ni Boboy ti bakrang ti manokna a nakatantanang a nangidisso iti daytoy
Timmayab nga agpadpada dagiti manok. Nangatngato ti tayab ti manok ni Ella ket tinukmaanna ti kalabanna. Pinarakapakna ti darisayen agingga iti nagdissoda. Apagdissoda, tinukmaan manen ti Black Alabama ti darisayen ket nagkinnuripaspasda.
Di naigawid da Ella ken Mang Bianong ti palakpakda.
“Ang galing!” indayaw ni Boboy iti manok ni Ella. “Kailan ninyo ilalaban, boss?”
“Two weeks pa!” Ni Elmer ti simmungbat.
“Sana matiyempuhan namin para mapustahan,” kinuna met ni Esting.
“Ang manok mo, Rocky,” kinuna ni Boboy.
“Ha? Oo nga!” Kasla nakigtot ni Rocky. Nakaal-alisto a nangyaon iti langawen a manokna. Pinatallikudna ken ni Boboy tapno kabitan daytoy iti glab.
Nasikap ti maikadua a manok ni Ella. Ur-urayenna a dumanog ti langawen, aglisi sa balsenna a dagus.
Napigsa pay ti maikadua a Black Alabama. Agkiok a maiwarsi ti langawen no maipuro ti danog ti kapulisna.
Kuminniten ti darang ti init idi maipulis amin ti innem a manok dagiti taga-Dalawantan. Naglilinnipak iti dakulap da Ella ken dagiti kakaduana idi makalikud dagiti immarog a nakipulis.
“Malaking pag-asa na makabawi tayo sa dalawang talo natin!” kinuna ni Ella.
“No aggiddanda a mailaban, sagdudua ribu ti pustak kadakuada!” kinuna met ni Mang Bianong. “Bayadamton ti utangmo kaniak,” kinuna ken ni Ella.
“Si daddy naman!” immisuot ti balasang. “Di pa nga ako nakakabawi, eh! Kumusta ang feeding mo?” sinaludsodna ken ni Dex.
Nagpinnarukib da Dex ken Jong. Kasano ngamin ket naibusda ti pasas ken saba nga amorosa nga impanganda iti napalabas a rabii ta awan sidada. Ti makadakes, awan kuartada nga igatangda iti sukat ti kinnanda a pasas ken saba.
“Nagpigsada ngarud a mangan!” insungbat ni Dex. “Naibusen ti saba ken pasas!”
Nagmulagat ni Ella. “Ket no kaano laeng a ginatangko ti sangakarton a pasas ken sangasapad a saba dita Hypermart!”
Napaisem ni Elmer ta nasiputanna ti panagkinnita da Dex ken Jong.
“Di bale. Inka gumatang no madamdama iti pasas ken saba, Jong. Diyo sursurokan ti pagpakanyo baka lumukmegda!” kinuna ni Ella. “Kasano ti training-da?” Sinangona ni Elmer.
“Nakitayo met ti garawda, he-he-he!” impannakkel ni Elmer. “Ngem bassiten ti tableta, mamindua la ngata metten ti para ineksion.”
”Inkanto dumaw-as dita Progresibo iti agas. Sige, estimarenyo a nalaing dagiti manoktayo bareng makaabruttayo,” kinuna ni Ella ket pimmanawdan ken ni Mang Bianong.
APAGLABES nga ala una iti parbangon. Nakapanawen da Elmer ken Jong ket ipakpakni ni Dex dagiti kutsara ken malukong nga inusarda a nagpulotan iti kudil ti baka. Nakadagdagsenen dagiti kalub ti matana.
Naguldag lattan ni Dex iti nakataptapok a basar ti kalapawna idi makaipakni. Nagpungananna ti apagkalima ti sako a conditioner. Insakona dagiti gurongna tapno di kinniten ti lamok dagiti sakana idinto ta kaatagna ti talunasanna a panday ti Santa.
Saanan nga iniddep ti bombilia ti kalapawna, immanges iti nauneg a bulonna a nagkidem.
Agalas tres ngatan idi malukag ni Dex. Naitubong ngamin iti lapayagna ti linitok ti kasla naipabanto a bisil iti yero nga atep ti kalapawna. Siaannad a nangarikap iti talunasan iti sikiganna. Tinengngelna ti panagangesna.
Naulit ti lanitok iti atep ti kalapawna ket pimmigsa ti atap ni Dex. Adda mangsubsubok no nakaturogen. Adda la ketdi agpanggep a sumrek iti mini-farm. Adda mannanakaw nga umar-arubayan.
Pagsayaatanna, naminduan nga adda nagpanggep a sumrek iti mini-farm ket saanen a basta agnerbios ni Dex no adda madlawna a karkarna iti mini-farm. Lalo pay a saan a mabuteng iti al-alia ta saan a mamati nga adda al-alia. Idi adda pay idiay Sanchez, awan amakna a mangpagpagna iti no mano kilometro a baet ti barangayda ken ti sentro no maimasanda ti agiinnistoria kadagiti gagayyemna iti Angeline uray lenned. Kaamak dagiti pilio iti ilida uray no apagsurok laeng a lima kadapan ti tayagna ta adun ti imbatbatna a daddadakkel ngem isuna.
Naulit pay ti lanitok ti yero ket napatalgedanen ti atap ni Dex. Siaannad a nagsikig a sumango kadagiti aywanna a manok ket ad-adda a pinatademna ti panagrikna ken panagkitana.
Madamdama pay, adda kasla nairidis iti ‘yan ti ruangan. Saan a nagbayag, adda naipasirna nga ulo iti nagbaetan ti siitan a barut iti rabaw ti nasurok a sangapulo kadapan a bakud. Simmaruno a naipasirna ti kasla dakkel a plais a nadlawna idi agangay a pinangputed ti tao iti siitan a barut.
Sige, bumabakan, animal, ta uragaenka, impangta ni Dex. Adda pay, aya, makaammo no ikalina daytoy iti uneg ti mini-farm?
Simmaruno a naipasir ni Dex ti panagkaruskos ti uksob ken narapis a lalaki iti uneg ti bakud ket ammona lattan nga adda nagbitinanna a tali nga inggalutna iti landok a nakaikapetan ti siitan a barut. Babaen ti lawag dagiti bombilia a naibarteng iti mini-farm, nadlaw ni Dex nga agtaltalangkiaw ti lalaki nga adda iggemna a sako a pimmideg biit iti landok a rikep. Kalpasanna, nakaal-alisto a nagpatengnga iti mini-farm. Ket agturongen iti nakaiwaywayan dagiti Black Alabama.
Bimmaringkuas ni Dex. Limmagto a timmapuak iti kalapawna ket dinarupna ti lalaki.
“Hoy! Magnanakaw! Magnanakaw!”
Nagbuelta ti sumilsileng iti ngisitna a lalaki. Adda inasutna iti salikadna.
Ngem saan a naklaat ni Dex. Dinarupna latta ti lalaki nga impapanna a nagsapsapo iti usado a langis tapno nagalis.
Tinagbat ni Dex ti lalaki. Ngem imbes a lumaban ti lalaki, inibbatanna ti bitbitna a sako sa timmaray nga agturong iti ruangan.
'Ba, aglibas ti animal! imbang-es ni Dex ket sinalikawkawanna ti kamkamatenna.
“Hapon, tulungan mo ako!” inyawag ti lalaki.
Napataliaw ni Dex idi nagit-it ti ruangan. Adda gayam kadua ti kamkamatenna ket induron daytoy ti rikep. No kasta, linettat ti kamkamatenna ti lock ti rikep sakbay a nagpatengnga iti mini-farm?
Ginundawayan ti agtatakaw ti panagliway ni Dex ket simyag daytoy iti ruangan. Ket idi makadanon ni Dex iti ruangan, nagbanesbesen iti Karpa Street ti dua a nakabisikleta a kamkamaten ti taul dagiti aso kadagiti malabsanda a balay.
“Animal! Ket animalkayonto manen! Agtatakaw!” inriaw ni Dex ket bimtak ti ad-adu pay a taul.
Nasindian dagiti silaw kadagiti ruangan dagiti kakaarruba, ngem awan ti rimmuar nga umarayat wenno agusioso la koma. Ngem idi rikpan koman ni Dex ti mini-farm, arintarayen ni Mang Bianong a dimteng.
“Dex, apay?”
“Adda nakastrek nga agtatakaw, boss!” insungbat ni Dex.
“Ha? Adda naalada? Dagiti manok ni Ella?” Naglagaw ni Mang Bianong.
“Awan naalada, boss, ta nakapuotak.”
“Yaman pay, apo!” Immanges iti dakkel ni Mang Bianong.
Nagruar met laeng dagiti kakaarruba. Maysamaysa nagsaludsod. Sa idi kuan, nagkikinnitada a nagiinnisem a kumitkita ken ni Mang Bianong.
Nakadlaw ni Mang Bianong. Kinitana ti turong ti panagkita dagiti kakaarrubada. Nagyudyod a brip la gayam ti suotna ket sumirsirip ti pingir ti ilemlemmengna iti nalawa a putol ti suotna.
Nadlaw met ni Dex ti panagiinnisem dagiti kakaarrubada. Ket nagmulagat iti nakitana a langa ni Mang Bianong. Ngem sakbay a madillawna, timmarayen ni Mang Bianong a nagawid. Idi agsubli, nakasuoten iti shorts ken kaduana da Manang Mameng ken Ella.
“Anong nangyari, Dex? Ang mga manok ko?” dinamag a dagus ni Ella.
“Walang nakuha. Nagising ako bago makapasok,” insungbat ni Dex. Inistoriana ti napasamak.
“Diosko! Dayta ti kunkunak, Bianong. Araken dagiti mannanakaw dagiti manokyo. Ilakoyo idan!” kinuna ni Manang Mameng.
Nagdanag ni Mang Bianong. Pagpiaanna, simngat ni Ella.
“Kasaritak ni Jong ta agyanen ditoy. Ikadakkelyo ti kalapawyo. Kasaritak met ni Johnny ta ipabulodna ti maysa kadagiti aso a di sinaka ti akinkukua ta taraknenyo ditoy,” kinunana.
Nagwawara dagiti kakaarrubada idi naumada nga agsalsaludsod ken ni Dex. Simrek met da Ella iti mini-farm. Sinapul ni Dex ti pagarupenna a sako nga inibbatan ti agtatakaw itay kinamatna.
Nakita ni Dex ti nabasa a sako iti asideg ti maysa kadagiti Black Alabama. Impakitana ken ni Mang Bianong.
“Talaga a kayatda nga ukkonen dagiti manok.” Nagwingiwing ni Mang Bianong. “No mabasa ngamin ti sako a pakaikargaan dagiti manok, saanda nga agkakabil uray kasano ti uyongda iti ruar. Aglalo ket rabii.”
Saanen a nakaturog ni Dex idi nakapanaw da Mang Bianong. Inikkatna ti tali nga inusar ti agtatakaw iti ibaballasiwna iti pader. Inandingayna laengen ti panangurayna iti agsapa babaen ti agsisipol a panagkapena.
IMMUNA a dimteng ni Elmer iti mini-farm. Nalabes nga alas sais iti agsapa. Nadatnganna ni Dex a mangpalpalugit kadagiti ilabanda iti scratch pen.
“Linaokam met la ‘ti innapuy ken puraw ti itlog ti impakanmo idi malem?” sinaludsod ni Elmer bayat ti ilalaemna iti kalapaw ni Dex. Ginaw-atna ti apagkissay a botelia ti empelayt iti rabaw ti cabinet sa nangtempla iti kapena. Linaokanna ti kapena iti empelayt sa nagmasngaad iti abay ni Dex a sumangsango kadagiti scratch pen.
“Kompleto, pati tabletana,” insungbat ni Dex.
Ilabanda ita dagiti manok a ginatang ni Ella iti Derriyab Farm. Kas iti sigud, imbaga ni Johnny a masapul a makitana dagiti manok sakbay a mapanda iti Sta. Ines.
Naibusen ni Elmer ti kapena idi dumteng ni Jong. Simmaruno ni Johnny. Nagbannikes daytoy idi makadanon iti sango ti kalapaw ni Dex tapno di madlaw da Elmer ti panangigawgawidna iti panagalus-os ti pantalonna a maong.
“Kitaek man, Dex,” intudo ni Johnny ti manok iti scratch pen iti sangona.
Innala ni Dex ti manok sa inyawatna ken ni Johnny. Sinirsirig met ni Johnny ti rupa ti manok. Kalpasanna, piniselna ti agong ti manok sa kinitana ti tammudo ken tanganna. Agtungtung-ed a nangisubli iti manok iti scratch pen.
“Okey, awan panatengna. ‘Ta maysa.”
Innala ni Dex ti maikadua a manok. Inyawatna ken ni Johnny. Napnek met ni Johnny iti langa ken garaw ti manok. Insublina ken ni Dex.
Nalabesen nga alas otso idi agtugtog ni Ella iti ruangan ti mini-farm.
“Agsaganakayon. Eight thirty aalis na tayo,” kinuna ni Ella. “Sunday ngayon, maraming manok.”
Linukatan ni Elmer ti bassit a bagna a nangisit ket binilangna dagiti alikamenna a manadi. Kalpasanna, kinitana no kompleto met laeng dagiti tadina.
Kinargaan met ni Dex iti danum ti botelia a pagpaspasuyotda iti manok. Inkargana iti backpack-na ti botelia ken dadduma pay nga alikamenna.
“Ditay' kad’ agbalon iti merienda isu pay a di paggastuan dita galiera?” Sinaludsod ni Jong.
“Hamman. Dumawatka ken ni Ella iti tinapay nga adda palamanna ken dua a family sized a Coke,” kinuna ni Elmer.
“Umunaakon dita ruar,” kinuna met ni Johnny ket tinurongna ti ruangan.
Eksakto nga alas otso media idi rummuar da Dex iti mini-farm. Nakasagana metten ni Ella.
Lumuglugandan iti kotse ni Johnny idi asitgan ni Mang Bianong ni Ella. Impaarikapna ti dua ribu dua gasut iti balasangna.
“No mangabak ti first fight, ipagulongmo iti second fight,” inyarasaasna iti balasangna.
“Ayos, dad!” Pinatangad ni Ella ti tanganna.
Ni Dex nga adda iti akinlikud a tugaw ti nangsaklot iti plastik a naglaon iti dua a manok nga ilabanda, ni Jong iti single a karton a ‘yan ti para pasippitda.
“Intayon, BBJ!” kinuna ni Ella.
Please lang, dinak pabainan, intanamitim ni Johnny idi ikurikorna ti tulbek ti kotsena. “Yesss!” dina naigawid ti ragsakna idi agbanurbor ti makina ti luganna.
Imlek ni Ella idinto ta nagkakatawa dagiti tallo iti likud a tugaw.
“Okey, good luck! Dua ti isalogyo, uppat ti yawidyo!” Pammalubos ni Mang Bianong kada Ella.
“Thank you, dad!” kinuna met ni Ella.
Ket inunoren ni Johnny ti Karpa Street a rummuar iti Mendoza Subdivision.
(Maituloyto)
Napalabas a paspaset: 1 | 2 | 3 | 4 | 5 | 6 | 7
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
