(Immuna a naipablaak iti Bannawag mangrugi iti Pebrero 18, 2013 a bilang.)
(MAIKA-2 A PASET)
ITI PANAGLABAS dagiti aldaw, natakuatak nga umun-uneg ken tumingtingra ti marikriknak a panagraem ken ni Maria Emmanuelle. No kasta a nakatangadak iti langit, kasla ti ladawanna ti makitkitak kadagiti ulep nga ab-abugen ti angin. Kasta met nga adda dagiti gundaway nga agay-ayam ti ladawanna kadagiti panid dagiti libro a basbasaek no kasta nga agadalak iti leksionko.
Idi agangay, sarsarungkaranna payen dagiti tagainep no di man dagiti arep-epko.
NOBELA: Saan a Rosas Amin Nga Ayat, Maria Emmanuelle (4)
Nagbalin a batibat ni Maria Emmanuelle iti biagko. Maysa nga awanan kapadpad iti kinaimnas a batibat.
Agayatak kadin ken ni Maria Emmanuelle?
No ut-utobek, kasta ti ipaspasimudaag dagiti pagilasinan. Adda naisangsangayan a rikna a makulding iti barukongko no kasta a madakamat ti naganna.
Ngem kasano ngata nga agpudnoak?
Agdardarasak iti maysa nga aldaw. Maladawakon iti umuna a klasek. Natiempuak ngamin ti kinadagsen ti trapiko.
Ngem iti uneg ti kampus, nasaripatpatak ni Maria Emmanuelle a nakatugaw iti maysa kadagiti semento a bangko iti linong ti maysa a narukbos nga akasia. Agmaymaysa.
Inasitgak. Nakitak nga adda basbasaenna a surat.
“Hi, Miss McTickel,” inkablaawko.
Dina napakpakadaan ti yaasidegko, nakitak a kasla nakigtot idi agtimekak. Nupay kasta, immisem met laeng idi mabigbignak. “Hi!” insungbatna. Sa inaprosanna ti barukongna. “Kinigtotnak, a!”
“Kasta kadi?” inkarigatak ti immisem. “Pasensiakan. Ngem apay nga addaka ditoy? Adda kadi ur-urayem? Di met adda klasetayo?”
“Awan ni Prof,” insungbatna. “Absent.”
Nakapimpintas ni Maria Emmannuelle iti panagkitak. Maibagay la unay kenkuana ti inaruatna a T-shirt a nupay napasukotan iti long sleeves, ad-adda a nangiparangarang iti sippukel dagiti makagargari a barukongna ken lap-it ti pammagina. Kumepkep met ti maong a pantalon nga inaruatna. Ngem ti ad-adda a nalibnos kenkuana, iti panagkitak, isu ti saannan a kasapulan pay ti ania man a pagpapintas. Umanayen kenkuana ti apagdillaw a pulbos, apagapaman a lipistik ken apagwarsi a bangbanglo. Ikutna daytay libnos a makakayaw, ad-adda a pumintas no kasta a matmatan.
Insungok ti ig-iggamanna a surat. “Akinsurat iti dayta? Naggapu iti boyfriend-mo?”
Immisem ngem saan a simmungbat. Ketdi, siaannad a nangkupin iti surat sa insublina iti sobre daytoy.
Airmail ti sobre. Madlaw a naggapu iti ganggannaet. Naggapu idiay USA, kas ipasimudaag dagiti timbre ken selio a naaramat.
Impisokna ti surat iti nakadisso a shoulder bag iti abayna. Saanakon a nagusisa pay maipapan iti surat.
Nagtalinaedak a nakatakder, kepkepko dagiti intugotko a libro ken kuaderno.
“Amangan no sumikkilka dita,” indillaw ni Maria Emmanuelle nga inkatawa. “Why don’t you just sit down muna? One hour pay nga agurayta.”
Dimmenden iti apagapaman iti kanigid. Nagtugawak iti abayna iti kanawan. Nalang-abko ti nakaisigudan a kinabanglona a kas babai a namagsaligemgem kaniak.
“Loner-ka kadi?” kinunak.
“Saan met,” insungbatna. “Apay?”
“Madmadlawko ngamin, awan unay ti kasarsaritam. Iti klasetayo, ni laeng Ferdie ti makitkitak a kapatpatangmo iti napaut.”
Manen, immisem. ”Isu laeng ngamin ti am-ammok. Sika, Romeo...” imbalikasna pay ti naganko, “nabayagkayo kadin nga aggayyem ken Ferdie?”
Nasdaawak. “Kasano a naammuam a Romeo ti maysa kadagiti naganko?”
“Ni Ferdie ti nakaibaga kaniak,” inyisemna. “Apay kadi a Romeo ti awagmo? Kasla adayo dayta iti naganmo a Reynaldo.“
“Basol dayta ti partera a namaltot kaniak,” inkatawak. “Kayatko a sawen... the midwife.”
“Partera?”
“Idiay ‘yanmi, dayta ti awag dagiti babbaket ken lallakay iti mammaltot, babai man wenno lalaki,” kinunak. “Idi siak ti mayanak, iti balay ti nakaipasngayak, imbes nga iti ospital. Pangadaywen ngamin ti awaymi iti poblasion. Nasurok a tallo a kilometro ti pagnaem. Iti daydi a panawen, awan pay ti uray traysikel a makastrek iti awaymi. Nalubo ti dalan no kasta a matutudo. Idi agpasikal ni mother-ko, kalubo ti dalan isu a partera ti inawaganda a mangpaltot kenkuana. Lakay daytoy nga agnagan iti Astor. Malaksid iti kinaparterana, obligasion pay daytoy ti mangirehistro iti nagan ti ubing iti presidensia. Idi mabuniaganak, Reynaldo ti naisurat a naganko. Ti ammo dagiti dadakkelko, daytoy met ti nairehistro a naganko iti munisipio. Idi agbasaakon, ti nagbuniagak ti naaramat. Ngem idi maukagan ti pagrehistruan idiay munisipio kalpasanna, naduktalan a Romeo ti nairehistro ti partera a naganko, imbes a Reynaldo. Adda nakaibaga kadagiti dadakkelko a ti nairehistro a naganko iti munisipio ti ad-adda a mabigbig, saan a ti naibuniag kaniak iti simbaan. Iti kasta, nagbalin a Romeo ti awagda kaniak idiay balay nupay di met nabalbaliwan ti naganko iti eskuela. Dayta ti gapuna a nagbalin a Reynaldo ti naganko kadagii opisial a papelesko idinto a Romeo ti nagtalinaed nga awagda kaniak idiay balay,ken sumagmamano a gagayyemko...”
“Ket maysa ni Ferdie kadagiti sumagmamano a gagayyemo, kas kunam?”
Nagtung-edak. “Kasta nga agpayso.”
“No kasta, Romeo metten ti yawagko kenka,” kinunana. “Dayta, a, no ibilangnak kadagiti sumagmamano laeng a gagayyemmo.”
“Pakaidayawak, Maria Emmanuelle.” Siak met ti nangbalikas iti naganna.
Nagkatawa. “Atiddog unay no Maria Emmanuelle,” kinunana. “Mabalinen ti Marielle...”
“Dayta kadi met ti awag kenka dagiti sumagmamano a gagayyemmo?”
“Saan,” inyisemna. “Awag kaniak ti kaaduan kadakuada.”
“Kayatko a maidumaak iti kaaduan kadakuada no awaganka.”
“Ania ngarud ti yawagmo kaniak?”
“Emma,” kinunak. “Mabalin?”
Nagpanunot, sa nagtung-ed. “Sige,” kinunana. “Sika ti makaammo.”
“Ammom kadi ti kayat a sawen ti Emma?”
“Ania?”
“Nanakman. Saan a garampingat.”
“Watch your terminologies!”
Nagkatawaak. “Sorry.”
Kinitana ti relo iti pungupungnguanna. “Nasurok pay a kagudua nga oras nga agurayta,” kinunana. “Inta idiay canteen, kayatmo? Agmeriendata. Pagur-urayanta.”
Nangriknaak. Apagisu laeng a pagpletek iti dyip nga agpapan-agawid ti adda a kuartak.
“Kua, sibubussogak pay,” impambarko.
Pinabaringringannak a kinita. “Dika agdanag,” kinunana. “Siak ti taya.”
Ad-addan ti tarabangko. “Sibubussogak a talaga,” kinunak. “Nagmeriendaak nga immuna idiay balay sakbay a rimmuarak.”
Saanen a nagpilit pay ni Maria Emmannuelle. Ngem nagling-etak iti napigket.
(Adda tuloyna)
