(MAIKA-7 A PASET)
NAGTAKSIAK nga agpa-Mandaluyong. Dimsaagak iti sanguanan ti panakkelen met a balay iti uneg ti maysa a subdibision.
Naulimek ti aglawlaw. Dandani awan ti lugan nga agas-assisaw kadagiti kalye. Nakaserra ti landok a ruangan ti inaladan ti balay a rantak. Adda sumagmamano a nakamasetera a masetas iti uneg. Iti pungupunguak, agalas diesen iti agsapa.
Nakitak nga adda gayam buzzer iti ampir ti bakud. Intalmegko daytoy. Bayat ti panagurayko, kinitak manen ti pakabuklan ti balay. Akimbalay ngata iti daytoy? Da Maria Emmanuelle ngata? Wenno agup-upada laeng?Asino ti kadua ni Maria Emmanuelle itoy a balay? Apay a dina maitalek ti address daytoy iti uray asino man iti klasemi? Ania a palimed ti binalkot daytoy a balay, no adda man? Dakkel kadi ti pakaseknan ni Maria Emmanuelle iti dayta a palimed?
NOBELA: Apo Baboy Party-List (27)
Pinis-itko manen ti buzzer. Kalpasan ti sumagmamano a kanito, naglukat ti ruangan. Maysa a babai a naka-apron, mapugtuan a naggapu iti kosina, ti nanglukat iti daytoy. Pattapattak nga agtawen la ngata daytoy iti sangapulo ket walo wenno sangapulo ket siam. Gagangay ti langana.
“Good morning,” inkablaawko.
Saan nga ammo ti katulongan ti umisem. Minulenglengannak ketdi. Naatap dagiti matana; kasla agduadua. Kasla awan ti uray ania man la koma a pakadlawan ti panagtalekna iti asino man.
“Ania ti masapulyo, mister?” dinamagna.
“Adda kadi ni Emma... ni Maria Emmanuelle?”
“Awan,” kasla awan as-asin ti ayugna. “Rimmuar itay laeng. Adda napananna.”
“Sadino?”
“Diak ammo. Saanna nga imbaga.”
“Ania ngata nga oras no agsubli?”
“Awan ti imbagana nga oras nga agawid. Ngem kunana nga amangan no agbayag. Apay kadi? Ania ti masapulyo ken ni Ate Marielle?”
“K-kua, adda agpapaited iti daytoy ken ni Emma... Maria Emmanuelle,” kinunak. Impakitak ti ig-iggamak a tallo a sabong ti rosas. “Ngem rimmuar met gayam. E, ania ngata no ibatik laegen daytoy kenka? Itedmo laengen kenkuana.”
Nagpanunot ti katulongan. “Sige,” kinunana idi agangay.
Inyawatko dagiti nabungon iti plastik a rosas.
“Agurayka biit, miss,” kinunak. “Pasensiakan no usiseroak. Ngem di met... adda cell phone ni Maria Emmanuelle?”
“Ay, adda dati. Ngem napukawna. Nasipdut sa kano idi aglugan iti dyip...”
“Ngem adda teleponoyo iti balay? Land line...”
“Adda.”
“Mabalin kadi nga itedmo kaniak ti numero ti teleponoyo iti balay?”
“Ay, sus, saan a mabalin!”
“Apay?”
“Maiparit!”
“Apay a maiparit?”
“Kasta ti bilin kadakami. Saanmi nga it-ited ti numero ti telepono iti asino la ditan. Nangruna no kas kadakayo a saanmi pulos nga am-ammo. Pasensiakayon...”
Nalpay dagiti abagak. “Saan a bale,” kinunak. “Sige, ibagamto la bassiten ken ni Emma a naisar-ongak...”
Masmasnaayanak a timmmallikud.
LUNES. Sinapsapak ti sumrek iti unibersidad. Ala una pay laeng, addaakon iti dalan. Kayatko a maammuan no inted a talaga ti katulongan dagiti imbatik a rosas para ken ni Maria Emmanuelle.
Ngem nasapsapa pay gayam a simrek ni Maria Emmanuelle. Iti kampus, adayoak pay laeng, nasaripatpatakon a nakatugaw iti sementado a bangko iti linong ti narukbos nga akasia. Nariknak ti kellaat nga ipapardas ti bitek iti barukongko.
Adayoak pay, nakitanak metten ni Maria Emmanuelle. Inisemak idi makaasidegak iti ‘yanna.
“Nasapakan sa ita?” inkablaawko kenkuana. “Nabayagkan?”
“Medio,” inyisemna. “Kayatka ngamin a kasarita.”
“M-maipapan iti ania?”
“Agtugawka nga umuna.”
Serioso ni Maria Emmanuelle, nadlawko. Naannadak a nagtugaw iti abayna. “A-ania ti kayatmo nga ibaga kaniak?”
Minulenglengannak. “Immayka gayam idiay balay idi agsapat’ kalman.”
Immisemak. “Indanon kadi ti kaduayo iti balay dagiti rosas?”
“Intedna kaniak idi makasangpetak.”
“Sayang ta awanka idi kalman,” kinunak. “Personal koma a naitedko kenka dagidiay.”
“Agyamanak iti adu kadagiti rosasmo,” naem-eman ti timekna. “Ngem kua.... adda koma kayatko nga ipakaasi kenka, no mabalin.”
“A-ania?”
“Ikarim koma a saanmon ul-uliten ti umay mangpasar kaniak idiay balay.”
In-inut, naglumen ti isemko. “A-apay? Adda kadi mangiparit a sarungkaranka sagpaminsan?”
“Adda,” natarus ti sungbatna.
Saanak a nakatimek. Diak ammo ti sawek.
“Balay daydiay ti maysa nga ikitko,” intuloy ni Maria Emmanuelle. “Istrikto ti ikitko. Nabaketan a balasang. Dina kayat nga adda sumarungkar kaniak sadiay. Ken kua... saanmo koman a pagdadaelan pay iti panawen a sagutannak iti rosas.”
“D-diak maawatan. Apay—“
“Saanen a nasken a maawatannak. Basta pagbigyan mo na lang ang pakiusap ko sa iyo. Please...”
Pinerrengko ni Maria Emmanuelle. “Burburtiannak,” kinunak.
“Dinak pay unay am-ammo,” kinuna ni Maria Emmanuelle. “Iti kasta, ibilangnak ngarud a maysa a burburtia. Burburtia a dimo ammo ti sungbatna. Ken saanmo koman a gamden a biroken pay...”
Nariknak ti kuddot ni saem iti barukongko.
NADAGSEN man iti barukong, tinungpalko ti dawdawaten ni Maria Emmanuelle. Saankon a pinanggep pay a sarungkaran iti balay ti ikitna idiay Mandaluyong. Diak kayat nga adda tumubo a gurana kaniak. Diak kayat nga agbalinak pay a maysa kadagiti tagtagibienna a parikut, no ania man dagita.
Ti dakkel laeng a parikut, saanko pay a naipudno kenkuana ti panagayatko.
Agingga idi dumteng dayta a gundaway. Kompleanio ti maysa a kaklasemi a babai. Imbitado ti sibubukel a klase. Rabii ti Sabado ti pasken. Nairanta a kasta gapu ta piesta opisial dayta nga aldaw.Inkissiim kaniak ni Ferdie a panggep ni Maria Emmanuelle ti dumar-ay.
Ayos, nakunak met.
(Maituloyto)
