Nobela ni DIONISIO S. BULONG
(Maika-9 a Paset)
KAS iti sigud, naginad ti trapiko iti Quirino Highway uray agalas nuebe pay laeng. Ti makadakes, bigla nga adda nangserra a dyip ken ni Johnny idi dumap-aw iti sang-atan iti nagsapalan ti Piko Street ken Quirino Highway ket naisugmek dagiti pasaherona iti bigla a panagprenona.
“Anak ng—” imbang-es ni Elmer. “Allacapan kamman ta kitaem no dika tapisen!” inkiraudna. “Hoy, abante ka. Mabibitin kami!” intudona ti tsuper ti dyip.
Tinaldiapan laeng ti tsuper ni Elmer. “Lumipad ka kung gusto mo! Bulag ka ba?”
Nangmesmes ni Elmer. Luktannan ti ridaw iti sikiganna, ngem inggawid ni Dex.
NOBELA: Apo Baboy Party-List (6)
“Relaks, relaks!” inkatawa ni Ella. “Ania ti maganabmo no kabilem? May lakad tayo, di ba?”
“Dungparem!” imbilin ni Elmer ken ni Johnny.
“Ay, kasanon ti kotsek?” insupiat ni Johnny. Minantinerna ti baddekna iti preno.
Pagpiaanna, nagsultip ti traffic aide iti pagballasiwan ti tao ket nagabante ti trak iti una. Agpagpaggaak metten ti tsuper ti dyip a nangpasayag iti luganna.
“’Ina mo!” impakamakam met ni Elmer.
“Relaks, Elmer,” impalagip manen ni Ella. “Dimo maramanan ti pulotanyo a bihag no tutopam.”
Tapno mayadayoda iti dyip, sineniasan ni Johnny ti kotse a nagsardeng tapno umunan daytoy.
Nagwagis ti tsuper ti kotse kas pagyamanna ken ni Johnny. Immipus metten ni Johnny iti kotse.
“Kasta ti manakem a driver!” inkatawa ni Jong. “Adayo a maatake ni Elmer no kasta ti amin a motorista!”
Kurang pay a maysa a kilometro manipud iti Barangay Talipapa agingga iti nagsapalan ti Quirino Highway ken Sangandaan ngem inabotda ti maysa nga oras sa nakastrekda iti kalsada a lumabas iti Sta. Ines Cockpit Arena.
Uray no kasta, kasla pag-ong latta ti kotse ni Johnny gapu iti panangliklikda kadagiti agkikibin a likkaong ti kalsada.
Bigbigat ngem napunnon ti akinsango a pagparadaan iti galiera. Insenias ti parking attendant nga aglayon ni Johhny iti likud. Ngem insardeng ni Johnny ti luganna iti batog ti ridaw ti galiera.
“Dumsaagkayon sa mapanak agparada,” kinuna ni Johnny.
Saanen a sinaludsod ti bumaket nga agbambantay iti ridaw no mano ti manokda a nagyan iti dua a plastik a bitbit da Jong ken Dex idi mabigbigna ida.
“Gumaganda si Aling Evita,” impatiray-ok ni Elmer sa linibasna a pinisel ti takiag ti agbambantay. “In love yata!”
Naggarikrik ni Evita. “Ikaw, lagi mo akong binibiro!” insungbatna sa kinamakamna a kinuddot ti pus-ong ni Elmer sa pinallilitanna.
“’Kaw talaga, walang patawad,” kinuna la ket ngarud ni Ella. “Madamdama, agmalastayo ‘ti ar-aramidem.”
“Adda kaduami a napan nagparking,” impakaammo pay ni Elmer ken ni Evita sa sinurotna da Jong.
Apaman a naidisso ni Jong ti plastik a naglaon iti manok iti abay ti puesto ti sukida nga agag-agas iti manok, kinuyognan ni Ella iti ring side.
“Wow!” nayesngaw ni Ella idi makastrekda iti ring side. Kasano ngamin ket agtaktakderen ti dadduma dita. Uray iti ngato napunnon dagiti tugaw.
Pagsayaatanna, timmakder ti dua a kristo idi makitada da Ella ken Jong ket intedda ti tugawda kadakuada. Nagyaman ni Ella idinto ta winagisanna dagiti nangisem kenkuana.
“Am-ammodakan,” kinuna ni Jong. Insaplidna ti paniona iti pagtugawan ni Ella.
Iti bangir a ring side, nadlaw met dagiti dua a lallakay a nakayawan ni Ella ti idadateng ti balasang. Sinikil ti maysa ti kaduana.
“’Makarta, ‘balayan…”
“Awan pagtugawanta, ‘balayan!”
“Aginsasapulta iti patugawanta iti asidegna. Sa agsardengta iti ‘yan dagiti ub-ubbing. Itedda no kua ti tugawda ta makitada met a senior citizen-ta.”
Ket pinanawan dagiti dua ti puestoda tapno mayasidegda ken ni Ella.
Iti sikigan ti pagaataran, inruar da Elmer ken Dex dagiti manokda ken pinasuyotanda ti rupa dagitoy sa inamloyanda.
Nakilinnetlet da Elmer iti iseserrekda iti pagaataran ta adu ti agtatakder. Agpipinnaris pay ketdin ti dadduma uray nakatakderda.
Nupay kasta, inanusan da Elmer ken Dex ti nakilinnetlet. Nairuamda iti kastoy no aldaw ti Domingo. Dupudop dagiti mammallot ta isu ti kaadda ti waya ti dadduma aglalo dagiti empleado. Isu a masapa a mangrugi ti sultada ket rabiinton no malpas ti maudi a laban.
Natandaanan dagiti para atar, tao man ti big time wenno likud ti balay laeng ti pagtartaraknanda iti manok, ti nagsasaruno a pannakaabak da Elmer. Ania ngarud, inarakda da Elmer ken Dex. Karkaritenda ida ket maysamaysa ti agkuna, basbassit ti manokko, nakuttong ti manokko, ubing ti manokko, baldado ti kanawan ti manokko, bulding ti manokko. Ken adu pay a bin-ig a pakapilawan dagiti manokda tapno labanan da Elmer dagitoy.
Ngem sarkastiko met ti sungbat ni Elmer kadagiti kumarkarit kadakuada. Partiem la ngaruden ‘ta manokmo tapno sigurado a maramanam ti bunga ti impakpakanmo, kunana sa agmusiig.
Ngem ti kinapudnona, agpilpili ni Elmer iti labananna kadagiti kumarkarit. Dagiti darisayen ti sirsirigenna ta kenkuana, tiempo ti alimbuyogen ita ta tallo pay nga aldaw sa aglenned.
Ket nagbunga ti panagur-urayna. Dua a nagubba iti darisayen ti immabay kadakuada.
“Baba mo nga, pare. Parang match ang manok natin,” kinuna ti kataeb ni Elmer.
Bimmislin ni Elmer iti tugaw sa indissona iti sango ti ubbana a Black Alabama. Sinirigna kampay idi ti takder ti darisayen, ngem ti puraw a gurong daytoy ti puntiria ti matana. Awan ti nadlawna a siksik a lislisianna a kalabanen.
“Hawakan mo ang manok mo,” kinuna ni Elmer idinto ta iruprupaanna ti mangkarkarit iti manokna. Inyabayna ti manokna. Agkatayagda. Nasabsabang pay ketdi ti bukot ti manokna.
“Ano?” kinuna ti kumarkarit.
Adda nagrukob iti abay ni Elmer. “Labanan mo na, pare. Kayang-kaya ng manok mo ‘yan. Bata pa!” kinunana iti nababa a timek.
Lokditmo. Siak pay ti durogam, kinuna ni Elmer iti unegna. Kasano ngamin ket rusangeren ti rupa ti darisayen ken manggapun nga umalsa dagiti siksikna. Sabagay, agduan a tawen ti manokna, kas kuna ni Derri.
Kinita ni Elmer ti mangdurdurog kenkuana. Tao gayam ni Gino.
“Super tayo para madali,” kinuna manen ti kumarkarit.
Timmakder ni Elmer. “Sige,” kinunana. “Magpa-legband ka,” kinunana ken ni Dex. Inyawatna ti nayatarna ken ni Dex sa innalana ti maikadua a manokda.
Iti ringside, namin-adun nga aw-awisen ti maysa a kristo ni Ella a pumusta, ngem madi ti balasang. Ipustakto laengen kadagiti manokko, kunkunana.
“Manok ni Gino. Taona ti nangyuli!” Intudo ni Jong ti ponkan iti Meron a maikatlo a soltada. Dalusapi met laeng ti Wala ngem nataytayengteng ti dutdotna.
“’Ta Wala?” aleng-aleng a sinaludsod ni Ella.
“Taon sa ni Bitangcol,” insungbat ni Jong.
“Sino ti pilim?” sinaludsod ni Johnny a nagtugaw iti kanawan ni Ella.
Nagngilangil ni Ella. “Awan,” kinunana. Binaliwanna ti sikkawilna ket narenren ti gayadan ti kaki a shorts-na.
Iti nagtugawanda, kunam la no masulnot ti tengnged ti nakutkuttong a lakay a mangsipsiput ken ni Ella. “Apo, ‘balayan! Ganusnan, aya!”
“Ha?” Sinimpa ti maikadua a lakay ti nalikba nga anteohosna. Ket nalikba met pati bibigna idi maipasabat iti panagkitana dagiti muldotan ken napudaw a luppo ken tumeng ni Ella. “Anian, pulos a di maikarkari ti luppo ni bumaket uray idi balasang pay!”
Iti ruar, nayataren ni Elmer ti maikadua a manokda. Padana met laeng nga alimbuyogen, ngem basbassit. Pinatangadanda. Manok kano ni Bitangcol. Apay, awan kad bakrangna, kinuna met ni Elmer iti unegna.
“Number eight ti umuna,” impakaammo ni Dex idi agsubli iti ‘yan ni Elmer. Inawatna ti maikadua a manokda tapno mapanna manen paikkan iti leg band.
“Nasayaat tapno masapatayo a makaiwakas,” kinuna met ni Elmer. “Denggem ti panagyawagda ta innak dita ring side."
Tinakderan ti kristo ti tugawna iti abay ni Jong idi umasideg ni Elmer. “Boss Elmer, may manok ba tayo?” sinaludsodna.
“Meron. Abangan mo, bata. Lalabanan natin sina Gino at Bitangcol.” Kiniddayan ni Elmer ti kristo.
Ngem nagarko dagiti kiday ti kristo. Nalagipna ngamin ti pannakaabak ti dua a manok da Ella a kuna dagiti padana a kristo a tiope wenno nairanta a naipaabak ta pimmusta da Elmer iti kalabanda.
Nadlaw ni Elmer ti langa ti kristo. “Bakit? Alaws ka yata bilib sa mga manok namin. Sige lang kung ayaw mong sumama sa amin. Sabong lang naman. eh!” inkatawana.
Saan a simmungbat ti kristo. Napanna inabay ti am-ammona a napigsa a pumago.
“Ano?” kinuna ni Ella idi makasimpa ni Elmer iti abay ni Jong.
“Nayatardan a dua. Number eight ti umuna.”
“Kaninong manok?”
“Ni Gino!”
“N-ni Gino?” Adda panagduadua iti timek ni Ella.
“Wen. Nasaysayaat tapno matesting ti patanor ni Derri. No abakentayo ni Gino, agbalintayo a sikat ditoy Santa Ines!” Nakataltalged ti timek ni Elmer.
“Ti maikadua?”
“Manok met ni Bitangcol.” Naulod ti katawa ni Elmer.
“Ha?” Inukas ni Ella ti sikkawilna.
Iti nagtugawanda, dandani naggiddan dagiti dua a lallakay a nangyasug iti riknada idi mataldiapanda ti sellang ni Ella.
Timmangad ti nakutkuttong a lakay ket insurotna ti panagkitana iti babai a tin-edier nga aglaklako iti naibotelia a danum, kendi, ken softdrinks. Sa kiniddayanna ti kaduana.
“No mangabakta, ‘balayan, aggimikta met!”
Kinudkod ti maikadua a lakay ti sellangna a nangtangad met kadagiti babbai nga aglaklako iti bleachers. “Mangabakta la ketdi, ‘balayan. Kuna ni German a labahero a kalbitek laeng no kayatko ti gumimik. Agsa-sideline kano ti dadduma kadagita nga ubbing!” Tinangadna manen dagiti aglakolako.
“Dua a bangolan ti kalabantayo? Wow!” nakuna laengen ni Ella sa nagsikkawil manen.
“Afooo, ‘balayan!” insennaay manen ti nakutkuttong ta nakakita manen iti langit.
“Ania ti pustaanta, ‘balayan?” sinaludsod met ti kaduana.
“Aggimikta, este…dita Meron, ‘balayan!” natiritir la ket ngarud ti dila ti nakuttong.
Kinuenta ni Ella ti balonna nga inyaonna iti ATM-na idi kalman. Five-five ti umuna ta bassit ngarud ti balonna. No mangabak, agbalin a sangapulo ti puonanna. Mabalin a pustaanna no kuan iti sixteen-six ti maikadua a manokda. Ah, lugi pay laeng. Kurang pay la no kua a sukat ti inggatangna. Kasanon ti impakan ni Dex? Ti tangdanna, ti para kada Jong ken Elmer?
Gasanggasat, inkeddeng ni Ella idi agangay. No mangabakda iti umuna a laban, pustaanna ti maikadua iti onse mil sa pumago. Sigurado a dehadoda ta sikat dagiti kalabanda. Baka awaganda pay ida iti sampu-anim.
Bimtak ti riaw ken palagapag. Idi kumita ni Ella iti gradas, napakleben ti Meron a luglugoban ti Wala.
“Naimbag ta dimo pinustaan ti liamado,” kinuna ni Johnny. Wala palang sinabi.”
Aglulupoy met ti naluklukmeg a lakay a nagtugaw idi yawat ti sentensiador ti nangabak iti nangibbet iti daytoy. “Tinto la ngamin makitkitam, ‘balayan. Minalasta la ket ngarud,” kinunana.
Nakasugsugpet ti rungiit ti nakuttong a lakay a nagtugaw sa inyamlidna ti takiagna kadagiti kasla mais a ling-et iti mugingna.
“Anim, pito, walo, siyam! Magpatari na kayo!” nayawag iti megaphone iti ruar.
Timmakder ni Elmer. “Mano ti paradam?” sinaludsod ni Elmer ken ni Ella.
“Five-five muna.”
Nasdaaw ni Elmer. “Siguradoka?”
Nagtung-ed ni Ella. Ngem nalagipna ti inyarikap ti amana a dos mil dos ket innayonna.
Nayaonen ni Dex ti manokda iti kulongan ti agag-agas iti manok a nadatngan ni Elmer. Nupay kasta, pinara ni Elmer daytoy.
“Madamdama. Urayenta a matadian ti maikanem ken maikapito satanto manadi tapno di maktangan. Agpilay no kua ti manok no mabayag unay nga aguray,” kinuna ni Elmer.
Agpayso, sa la tinadian ni Elmer ti manokda idi rummuar iti kuarto a pagpatadian ti sarunuenda a numero. Naglayonen ni Dex iti pila dagiti natadian kalpasan a mapugsitan ni Elmer iti danum ti rupa ti manokda.
Saan a nagbayag ti maikanem ken maikapito a sultada. Liamado latta ti agab-abak. Uray saan a mabuya dagiti adda iti ruar ti laban, ammo a kasta gapu iti riaw ken palagapag dagiti agbuybuya. No kasla marba ti galiera iti riaw ken palagapag dagiti agbuybuya, dehado ti nangabak. Nakapkapsut ti riaw ken palagapag dagiti agbuybuya no liamado ti mangabak.
Immuna ni Dex a nangubba iti ilabanda nga immuli iti ring. Simmaruno ni Elmer a nagubba iti para pasippit, sa ti handler ni Gino ken ti para pasippitna. Nagtarus ti naud-udi iti Meron ta ammona lattan a liamadoda.
Inasitgan ti kasador ni Elmer ket sinaludsodna ti paradada.
“Nine-nine,” insungbat ni Elmer. Ninayonanna iti dua ribu dua gasut ti pusta da Ella ken Mang Bianong.
Insublat ti kasador ti Meron. Beinte dos ti parada daytoy. Sinublianna ni Elmer.
“Pago ka limang libo!”
Imbes a sumungbat, intudo ni Elmer ni Ella. Binatogan met ti kasador ni Ella.
“Pago ka sampu!”
“Mamaya na. Magtawag ka muna!” insungbat ni Ella
Manmano ti dehadista a mayat a makigasanggasat iti manok ni Ella. Napukaw ngamin ti panagtalek ti kaaduan iti kalidad dagiti manok daytoy iti nagsasaruno a pannakaabakna. Agingga iti immabot iti sampu-anim ti pinnusta.
“Ania, pumustaka pay?” sinaludsod ni Jong ken ni Ella.
“Saanen. Nagdakkel la ngaruden ti impustam. Baka maabak manen,” kinuna met ni Johnny.
Inwaras ni Ella ti panagkitana. Sinitsitanna ti maysa a kristo ti liamadista ket inseniasna ti dua ribu. Insenias met ti kristo ti panangawatna iti pusta ni Ella. Inkanayon ti kristo nga imparabaw ti dakulapna iti ulona, a kayatna a sawen, talaga a ti Meron ti pustaanna.
Kalpasan ti napaut a panagitudtudo ti kasador kadagiti dehadista, napataranna met laeng ti parada ti Meron.
Ngem iti nagtugawanna, tungtung-edan latta ni Gino dagiti kristona tapno ituloyda latta ti agawag.
Nagsenias ti kasador a bulonna a napan iti ‘yan ti timer iti batog ti kubong ti management iti kanawan a sikigan ti agdan.
Inubba ni Elmer ti manokda ket insarangna ti bukot daytoy iti para pasippit. Nagkulipagpag nga immingar ti Black Alabama idi masippit ti bukotna. Namitlo a napasippitan sa pinasikad ni Elmer. Timmayok ti nadam-eg a daga nga inkup-ay dagiti kasla nakuerdasan a saka ti Black Alabama idinto a nagpanerper dagiti payakna.
“Mayat, mayat!” intungtung-ed ni Jong.
Simmanikar met dagiti dehadista iti nakitada a saranta ti manok ni Ella. Uray dagiti dua a lallakay, imbabawida ti pustada iti Meron sa impustada iti Wala.
Iti suli ti Meron, pinasippitan laeng ti handler ti pakilabanna ket pinaulognan ti para pasippit. Saanna pay ketdi nga indisso ti manokna a kasla ketdin paglenna a marugitan ti saka daytoy. Nakapangpangas ketdi a mangtungtung-ed kadagiti agbuybuya.
Nagsenias ti timer. Immulog ni Dex iti gradas. Inukas met ni Elmer ti bedbed ti baina ti manokna.
Immuna ti Meron a pinunasan ti sentensiador iti naalkoholan a kapas ti tadina. Nakatantanang met ni Elmer a nangisarang iti tadi ti manokna idi isublat ti kasador.
Nagtakder ti sentensiador iti nagbaetan ti dua a puraw nga uged ket inurayna ti senias ti timer. Bayag la ti timer a nangsenias kenkuana, sineniasan met ti sentensiador dagiti aglaban sa siaalisto a pimmanaw iti nagbaetan dagitoy.
Nagburek ti dara ni Elmer idi idisso ti kalabanna ti manokna iti labes ti uged.
“’Ina mo!” intabbaaw ni Elmer sa siaalisto a nagsanud ket siaannad a nangidisso iti manokna iti asideg ti diding.
Agresibo ti darisayen ket maawatan ni Elmer no apay nga insubo ti kalabanna ti manokna. Pagpiaanna, nakasaganan ti manok ni Elmer idi darupen ti darisayen.
Kunam la no naibiat ti darisayen. Naglisi met ti manok ni Elmer iti kanigid. Ket naibagkat ni Gino ti patongna idi manakliing ti tadi ti manokna iti fiber glass a diding. Nagkiet met ti nagibbet ta ammona lattan a natippingan wenno nauped ti tirad ti tadi ti manokda.
Nakabuelta a dagus ti darisayen. Dinarupna manen ti kalabanna. Ngem rimmasuk ti Black Alabama ket inipitna ti kalabanna. Nagriaw dagiti dehadista idi naikayab dagiti naragas a dutdot. Ammoda lattan a nasugatan ti Meron.
Ad-addan ti riaw ken palagapag dagiti dehadista idi leppay ti kanawan a payak ti darisayen idi agdisso. Ngem nasippitna ti pargay ti kalabanna idi darupen daytoy. Ania pay, kunam la no agbugbugsotda a nagkinnuripaspas. Awanen ti aridenggan iti riaw ken palagapag dagiti tao.
“Diosko!” naitanamitim ni Ella ket timmangken dagiti gurongna nga insekkadna iti tugaw iti sangona.
Iti agdan, kasla mabekbekkel ni Dex iti danagna nga agtiltil-ay a mangtantannawag kadagiti manok.
Nagsardemg ti kuripaspas dagiti manok. Nakasigsiglat ti sentensiador a nagparintumeng ken nangtukma iti bukot dagiti manok. Pinagkariona dagitoy. Simmippitda nga agpadpada. Ket indisso met laeng ti sentensiador dagiti manok nga agpada nga agdardara.
Timmukkaw manen darisayen. Rimmasuk ti Black Alabama ket tinaragatagna ti bukot ti kalabanna. Nagriaw manen dagiti dehadista idi maipalok ti tadi ti Wala iti bukot ti Meron.
Tinukmaan manen ti sentensiador dagiti manok. Immarayat ti maysa a tao ti galiera ket inuksotna ti tadi ti manok ni Elmer a naipanget iti tulang iti bukot ti darisayen.
Indissona manen dagiti manok.
Mabadbaddekanen ti darisayen ti leppay a payakna, ngem nauyong latta. Tinukmaanna manen ti kalabanna ket intuloyda ti nagkinnuripaspas. Nagtuloy met ti riaw ken palagapag dagiti agbuybuya.
Pagammuan la ta nagsardeng ti darisayen. Rimkuas ni Ella iti nagtugawanna. “Patay na! Patay na!” indir-ina nga agpalpalakpak.
Naglinnipak met da Jong ken Johnny iti dakulap sa nagpalakpakda.
Ngem idi agkario ti sentensiador, saan a sumippit ti Black Alabama, ala, ket nakatingtingra ti rupana. Intupak ti sentensiador dagiti manok sa binaliwanna a pinagkario dagitoy. Nagbissayoten ti ulo ti darisayen, ngem kaskasdi a di sumippit ti Black Alabama.
Pagam-ammuan, rimmuar ni Elmer iti kubongna ket inwitwitna ti gemgemna iti sentensiador. “’Tang ina mo! Bitiwan mo ang pulok ng manok ko para makatuka! Kung hindi, papatayin kita!”
Nakadlaw met dagiti dehadista ket nagiiriag dagitoy.
“Mandaraya! Mandaraya!”
”Tamaan ka sana ng kidlat, gago!”
Aglabbeten ti iriag dagiti tao. Nagdanag ti sentensiador amangan no lig-isenda. Intakawna a kinita ti handler ni Gino. Linukayanna ti pargay ti Black Alabama. Ket bimtak ti nakapigpigsa a dir-i, palagapag, ken sipsipat idi sinippitna ti salungayngayen a kalabanna.
Timmakder ti sentensiador ket inyawatna ti Black Alabama ken ni Elmer. Agririaw metten ni Dex a nangbaina iti tadi ti manokda. Nakapangpangas a nangitag-ay iti daytoy, sa dandanogenna ti angin nga immulog iti gradas.
Iti ragsak ni Ella, dina napupuotan nga inarakup ni Johnny. “Panalo tayo! Panalo tayo!” inlaglagtona.
Nakigtot ni Johnny ket kunam la mapugsat ti angesna tunggal mairidis ti barukong ni Ella iti abagana. Anian, anian, apo, insennaay ti unegna idinto ta kasla agbalbaliktad dagiti bukel ti matana a nakatangad.
Arintarayen da Ella ken Jong a rimmuar iti ring side. Isu pay la ti pannakaallangon ni Johnny iti riknana. Ania ngarud, siaalisto a nangsurot kadagiti kaduana.
Maag-agasanen ti manokda idi dumteng da Ella. “Grabe ti sugatna?” sinaludsodna.
“Naiwa ti kanawan a luppona ken ti pitsona!” insungbat ni Elmer.
“One week lang, magaling na ito,” kinuna met ti agag-agas.
“Fourteen, fifteen, sixteen, seventeen, tari na!”
Kinita ni Elmer ni Dex. “Aniat’ number-tayo?”
“Seventeen!” insungbat ni Dex. “Paunaem latta idan,” imbilin ni Elmer. Kinitana ni Ella. “Magkano ka sa pangalawa?”
“Pagtulidem ti inabak ken impuonak ta pumustaakto iti ruar,” insungbat ni Ella.
“Sika?” insublat ni Elmer ni Johnny. “Pumustaka met, a, tapno adda gunggonam a sumursurot.”
Nagmusiig ketdi ni Johnny. “Maabakakto pay, yos!” kinunana. “Indakdakkelmi nga agkakabsat ti palagip ni ama a maysa met a sugal ti pallot!”
Iti dayta a kinuna ni Johnny, agkatkatawa laengen ni Ella nga immadayo tapno agsubli iti right side. Kinuti laeng met ni Elmer ti abagana.
Inuray da Dex ken Elmer a matadian ti maikasangapulo ket innem nga aglaban sa tinadianda ti maikadua a manokda. Idi mapan ni Dex iti pila, nadanonnan ti handler ken para pasippit ni Bitangcol.
Apagtugaw da Ella iti puestona, nakitana nga umas-asideg ni Gino. Awan a pulos ti tugot ti liday wenno mamayo iti daytoy iti pannakaabak ti manokna. Nagaruat iti maong a shorts a pinarisanna iti puraw a t-shirt. Agtiltillayon iti tengngedna ti balitok a kuentasna idinto ta nawarasan dagiti ramay ti kanigid nga imana iti balitok met laeng a singsing. Adda igpilna a panakkelen a clutch bag.
“Congratulations!” indiaya ni Gino ti dakulapna ken ni Ella. “Tinalo mo ako. Ganyan ang klaseng manok na dapat alagaan mo.”
“Tsamba lang!” agkatkatawa met ni Ella a nangwagwag iti dakulap ni Gino.
Pumarpardas ti sultada iti panagtulid ti oras. Agtultuloy met ti panagsangpet dagiti mammallot, kasta met dagiti manok. Isu nga imbes a rumasay dagiti manok iti pagaataran, umad-aduda ketdi.
Naukasan ti sarunuen da Elmer ta namilay ti maysa. Isu a naisapsapa ti yuulida iti ring.
Kas iti immuna a labanda, naglayon ti handler ni Bitangcol iti puesto ti Meron. Nagdiretso met ni Elmer iti Wala ta ammona a basbassit nga amang ti pustada.
“Magkano?” sinaludsod ti kasador ken ni Elmer.
Kas kuna ni Ella, impagulong wenno impatulid ni Elmer ti puonan ken inabak ni Ella iti umuna a labanda.
“Twenty thousand and diperensiya!” impakaammo ti kasador idi mapagsaludsodanna ti handler ni Bitangcol. Binatoganna ni Ella. “Dagdagan mo. Total nanalo ka na!” kinunana.
Tapno di met kuna ti kasador, insenias ni Ella ti dua ribu.
Immakar ti kasador. Nagtuloy met dagiti agsasallupang nga innawag. Immadu ti agawat iti pusta dagiti liamadista gapu iti panangabak ti immuna a manok ni Ella, aglalo ket agkakaingasda iti maikadua. Uray dagiti dua a lallakay a mangsipsiput iti sikkawil ni Ella, pumuspustada iti manok ti balasang.
“Hangkan a kumita kenkuana, ‘balayan, tapno hanta agmalas,” impalagip ti naluklukmeg.
“Tatlong libo!” Sineniasan ni Ella ti agtutubo a pagarupenna a maysa kadagiti kristo ni Bitangcol.
Nupay kasta, kellaat a nagbaliw ti turong ti angin. Nagkontra barata wenno nagbalin a liamado kadagiti pumupusta ti manok ni Ella ken nagdehado ti manok ni Bitangcol. Gapu iti daytoy, timmakder ni Bitangcol, ti kuttong a lakay a nakaanteohos iti dekolor a kabatog da Ella, ket sineniasanna dagiti kristona nga alaenda amin a pusta iti manok ni Ella.
Saan a nagbayag, nagwagis ti kasador a pangipakdaarna iti larga. Kimmaro ti ariwawa dagiti agpusta ta kayatda nga ikamakam ti pustada.
Nagsultip ti timer. Sineniasan met ti kasador nga isardengen dagiti handler ti pinnasippit. Tinung-edan ni Elmer ni Dex ket immulog metten daytoy.
Nagtakder ti sentensiador iti nagbaetan dagiti agibbet idi mapunasanna dagiti tadi. Sa inseniasna ti larga idi wagisan ti timer.
Pinikpik ti handler ni Bitangcol ti manokna idinto a pinirit ni Elmer ti rupa ti manokna. Nagsinnanudda ket nakatantanangda a nangidisso kadagiti manokda iti labes dagiti uged iti tengnga ti gradas.
(Maituloyto)
Napalabas a paspaset: 1 | 2 | 3 | 4 | 5 | 6 | 7 | 8
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
