Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-10 a Paset)
LIMTENG ti ulimek idi rugian dagiti manok ti umaddang. Adda immatiddog ti tengngedna, adda met di agkirem idinto a di napupuotan ti dadduma nga agbuybuya ti pannakalikba ti akimbaba a bibigda.
Ngem kunam la no nagtulag dagiti manok ta nagsardengda idi sangagpa laengen ti baetda. Agkarkarekkekda a timmuktok iti daga a kasla agaw-awisda iti upa. Ania ngarud, nakasuron dagiti mawaw iti aksion ket nagariwawada.
“Siooo! Siooo! Lintek !”
“Mana sa mga among walang bayag!”
NOBELA: Apo Baboy Party-List (6)
Kasla ketdin naawatan dagiti manok ti kantiaw dagiti agbuybuya ken nagbinnaribarda sa nagtinnallikudda ket rinugianda ti nagkaraykay. Ania ngarud, ad-addan ti suron dagiti agbuybuya. Gapu iti daytoy, sineniasan ti sentensiador ti handler ni Bitangcol a baliwanda ti agibbet.
“Ikaw ang manghuli!” kinuna ti handler ni Bitangcol. “Namamalo ‘yan!” Intudona ti manokna.
Inyayat ti sentensiador ti kanigidna sa indaanna ti kanawanna. Idi kitaen ti manok ti kanigid nga imana, tiniliw ti kanawanna ti ipus ti manok ni Bitangcol. Inallawat metten ti handler ti manok.
Awan ti problema ni Elmer ta naamo ti manokda. Kinitana dagiti ramay ken gurong ti Black Alabama. Idi awan ti makita ni Elmer a sugat ti saka ti manokda, binaliwanna a pinirit ti piditpidit daytoy sa nakipinnaayat iti kalabanna.
Kasla makapaypayat iti beggang dagiti manok iti yaaddangda a makisabat. Ket bimtak ti riaw dagiti agbuybuya idi timmayabda. Kasla naginnarakupda iti aire ket kinnulipagpag dayta agingga iti nagdissoda. Naikayab dagiti naragas a dutdot ngem di masinunuo no akindutdot kadagitoy. Di met ammo dagiti mammallot no ania ti sipatanda ta agpada dagiti manok nga agtedtedted ti darada. Ngem in-inut a naglugad dagiti tumeng ti manok ni Bitangcol. Ket pimmigsa ti dir-i ken palagapag dagiti dehadista.
“Patay ka na! Patay ka na, animal!” Inkiraud ni Jong ket intakderna a dinanog ti angin.
“Nalpasen, ‘balayan!” inraed met ti nakutkuttong a lakay a mangsipsiput iti sikkawil ni Ella sa nakilinnipak iti dakulap.
“He-he-he! Husto, husto, ‘balayan! Hammon a kitkitaen dayta nga ubing!” kinuna met ti naluklukmeg.
Pinunggos met ni Ella ti kuelio ni Johnny sa yinugyogna. “Banat! Banat pa! Huwag mo nang buhayin pa!” inyiriagna.
Kunam pay, nagdiwig ni Johnny a nangigawid iti ima ni Ella. “Este, El, ditoy laengen tengngedko ti rakusem ta nalaglagda!” kinunana.
Agkatkatawa ni Ella a nangiduron iti abaga ni Johnny sa dinanogna.
Dimmanog ti Black Alabama. Naubon ti luppo ti kalabanna, ngem natukmaan daytoy ti pargayna. Ginuyod ti kalaban ti manok ni Ella ket inyiladda ti nagkinnuripaspas. Ania ngarud, kasla malbon ti galiera iti riaw, palakpak ken palagapag dagiti agbuybuya.
Agpada a nagkul-ob dagiti manok idi aginnibbetda.
“Karyo, karyo!”
“Hoy, karyo! Tanga!”
Iti puestoda, kasla nabekkel ni Jong ket impapainayadna ti nagtugaw.
“Diyos ko, ‘wag naman!” Nakabbeng met ni Ella ti abaga ni Johnny idinto ta dina insina ti panagkitana kadagiti manok iti tengnga ti ring.
Dimmuklos ti sentensiador, nagparintuod ket tinukmaanna ti bukot dagiti manok sa pinagkariona dagitoy. Indissona met la dagitoy idi nagsinnippitda. Saanen nga agpulsot ti riaw dagiti agbuybuya iti pannakakitada nga agpadpada a naslep iti dara ti ulo dagiti manok.
Nagsabat dagiti manok ket nagtinnukma ken nagkinnulipagpagda manen. Nupay kasta, nakaruk-at ti manok ni Ella ket tinaragatagna ti bukot ti kalabanna. Naikarigatan met ti manok ni Bitangcol ti nagbuelta ket tiniliwna ti ipus ti manok ni Ella sa rinapidona. Napakin-od sa napatugaw ti manok ni Ella.
“Siet!” naibang-es ni Elmer. Minulenglenganna ti manokda no nagrabe daytoy.
“Ganyan, Pretty Boy, ganyan!” insala met ti kalabanna ti Gangnam Style.
Iti agdan, dandani met natilmon ni Dex ti angesna idinto ta nagkiet a nangem-em iti bibigna. Yad-adayom, nakunana iti unegna.
Ngem nakagin-awa ni Elmer idi naparut ti lawi ti manok ni Ella a pinungot ti kalabanna. Isu met ti nagbuelta, pinungotna ti pargay ti kalabanna sa pinarakapakna. Bimtak manen ti riaw ken palagapag dagiti dehadista.
Nagkul-ob manen a kasla agdudungsa ti manok ni Bitangcol. Dandanin agdisso ti sippitna iti nadam-eg a daga ti ring.
“Karyo, karyo!”
Nagparintuod manen ti sentensiador ket pinungotna ti bukot dagiti manok. Immingar ti manok ni Bitangcol idi maangotna ti kalabanna. Pinungotna ti dutdot ti ulo ti manok ni Ella sa nagkulipagpag. Naimbag ta naigawid ti sentensiador.
Ngem imbes nga ibaga dagiti agbuybuya ti panagannad ti sentensiador, kinatawaan ken kinantiawanda ketdi.
“Sige, tatanga-tanga ka, gago!” adda nagkuna.
“Ospital lang naman kung sakali!” sabali pay ti nagkuna.
Indisso manen ti sentensiador dagiti manok. Insenias met ti timer nga innemen a minuto ti kapaut ti laban. Gapu itoy, inalusiis ni Elmer.
Pinungot ti manok ni Ella ti tengnged ti kalabanna sa intugawna ti nagkuripaspas. Ket nagdisson ti sippit ti manok ni Bitangcol iti daga.
Inyariwawa manen dagiti agbuybuya ti kario. Ket nagtabbaaw dagiti dehadista idi simmippit pay laeng ti nakakidemen a manok ni Bitangcol.
“Ang tibay ng manok ni Bitangcol!” adda nagkuna.
“Bitangcol kasi, eh! At di ako magugulat kung mananalo pa ‘yan!”’
“Baka makabawi ngayon si Ella! Matibay ang mga manok niya!”
“Naleksionan siguron. Pilpiliennan ti manokenna. Diakto masdaaw no agbalin a naiget a karibal da Gino ken Bitangcol ditoy Santa Ines!”
“Iti kasta, isu ti agbalin a reyna dagiti mammallot ditoy Santa Ines!”
“Husto. Adda metten ari!”
Nupay kasta, adda pay laeng liamadista iti ringside a mamati a mangabak ti manok ni Bitangcol. Timmakder sa nagsenias.
“Meron! Meron!”
Nagasangan ni Ella. Ania, matmatayen ti manok ni Bitangcol, abaken pay laeng daytoy ti manokna? Ket timmakder met ni Ella ket inseniasna ti tallo ribu a pustana. Insenias met ti liamadista nga awatenna ti karit ni Ella.
Managsaggaysa ti addang ti manok ni Ella nga umas-asideg iti kalabanna. Ket nasdaaw laengen dagiti dehadista idi nagmulagat ken inkarigatan ti manok ni Bitangcol ti timmakder. Ngem inistreyt ti manok ni Ella ti kalabanna. Kunam la no marba ti galiera iti dir-i dagiti dehadista idi inubon ti tadi ti manok ni Ella ti ulo ti kalabanna. Tinukmaan met a dagus ti sentensiador dagiti manok sa nagpaarayat iti maysa a tao ti galiera. Inuksot daytoy ti tadi iti ulo ti manok ni Bitangcol. Nagkuripaspas ti manok ni Bitangcol apaman a naidisso ti sentensiador.
Dinanog ni Elmer ti angin. “Yes! Yes!” inridisna, nga iti panagriknana, kasla binugbogna met ti kalabanna a handler.
Iti agdan, inwalin ni Dex ti adda iti sangona ket siaalisto nga immuli iti ring. “Manok ko ‘yan!” kinunana ket siaalisto a nangpidut iti baina iti igid ti diding. “Gi’me five, man!” Nakapangpangas a nanglipak iti dakulap ni Elmer sa arintarayen nga immulog iti gradas.
Iti ringside, di naigawid ni Ella ti nalaus a ragsakna. Nagtakder iti tugawna, intayagna dagiti imana ket inseniasna ti letra V idinto nga agdirdir-i. Nakatibtibong met a palakpak ken dir-i ti insungbat dagiti dehadista.
Madamdama, agsipsippawen ni Jong kadagiti nakumel a kuarta nga ibatbato dagiti inabakda iti ruar.
“Afooo, lapsatnan daytoy nga ubing!” Saanen a naigawid ti nakuttong a lakay ti mangal-alunos a paludipna kadagiti luppo ni Ella.
“Ala, di bale, ‘balayan, ta nangabaktan. Sige lang!” inkatawa met ti nalukmeg a kadua daytoy.
Uray no di pimmusta, naaringan met ni Johnny iti ragsak dagiti kaduana. Agkatkatawa nga agsipsipat, timmakder ket inwarasna ti panagkitana iti bleachers. Idi agbalaw, awanen da Ella ken Jong iti abayna. Siaalisto a nagturong iti ridaw ti ringside.
Parparutenen ti ‘doktor’ dagiti dutdot iti aglawlaw ti sugat iti luppo ti manokda idi dumteng da Ella. Pinagdata ti ‘doktor’ ti pasientena iti saklotna. Nakataltalna met ti manok a nagdadakkel ti panagangesna.
“Agbiag met laeng?” sinaludsod ni Ella.
Nagtung-ed ti ‘doktor’. “Iggamam dagiti gurongna,” kinunana ken ni Jong.
Gapu ta dandani nasalpot ti luppo ti manok, iniwa ti ‘doktor’ ti simrekan ti tadi sa sinundana iti ramitna nga adda kapasna. Sa la sinardenganna a sinunda idi awanen ti dara ti kapas.
Insublat ti ‘doktor’ a pinunasan iti iodine a naipasagepsep iti kapas ti simrekan ti tadi ken aglawlaw ti sugat. Kalpasanna, winarakiwakanna iti pulbos nga agas. Imbes a daitenna, nanglukot iti kapas a kas iti kadakkel ti palito ti pusporo sa impastrekna iti sugat. “Mitsa ti sugat,” kinunana, “tapno saan nga agbagas.”
Nabibiit ti panangestimar ti ‘doktor’ iti sugat iti pitso. Immatiddog, ngem puro lasag ti natamaan ti tadi. Kalpasan ti panangikkatna iti dara ken kulapot, winarakiwakkanna manen iti agas sa dinaitna.
”Huwag silang pakainin at painumin sa loob ng apat na araw. Kung hindi, mamamatay sila,” impalagip ti ‘doktor’ idi yawatna ti manok ken ni Dex.
“Magkano?” sinaludsod ni Ella.
“Three hundred ang isa.”
Idi mabayadan ni Ella ti nangagas iti manokna, isu pay la ti pannakadlawna kadagiti nangaribungbong kadakuada. Kinita dagitoy no kasano ti kasasaad ti manok ni Ella.
“Ang suwerte mo, Ella. Si Mang Bianong, di pa nakapagpanalo ng dalawang sabay!” adda nagkuna.
“Hindi suwerte ‘yan! Nasa quality ng manok, pagte-training at feeding,” adda met nagkuna.
“Agasem, agpada a big time ti inabakmo.”
Naikargan ni Dex ti maikadua a manokda idi adda nalagip ni Jong. “Ang bihag!” kinunana, a ti inabakda a manok ti kayatna a sawen.
Isu met a dumteng ni Elmer a mangbilbilang iti petpetna.
“’Tay inabaktayo?” impasabat ni Johnny ken ni Elmer.
“Pinadalusakon,” insungbat met ni Elmer. Dinilpatanna ti tanganna ket intuloyna a binilang ti kinolektarna nga inabakda kadagiti dua a manokda. Kalpasanna, inlasinna ti inabakna sa inyawatna ti inabak ni Ella.
“Naabrot a dagus ti inggatangko kadagiti manok ken adda pay dimket,” kinuna ni Ella. Agkatkatawan a nangipisok iti wallet-na iti inabakna. “Suwerte yata ang padala ni dad!”
Naisupoten iti plastik dagiti pinadalusanda a manok idi dagasenda dagitoy iti paglamlamawan.
“Bakit walang mga ulo?” indillaw ni Johnny.
“Hindi lang ulo ang mawawala kung magpalinis ka. Pati naguneg, kukua dagiti agdaldalus,” insungbat ni Dex.
Idi rummuarda, naipasabat kadakuada ti intar dagiti aglaklako iti merienda, padaw, ken pasayan. Gimmatang ni Ella iti tallo a kilo a padaw.
“Pangay-ayo ken ni madir,” inkatawa ni Ella. “Nayon ti pulotanyo ti maysa a kilo.”
Nagkikinnita da Elmer, Dex, ken Jong ket agkatkatawada a naglilinnipak iti dakulap.
“'Ba, class kayo ngayon!” inyellek ni Johnny. “Urayendak ditoyen ta innak alaen ti lugantayo,” innayonna a bulonna a nagturong iti nangiparadaanna iti kotsena.
Kas iti sigud no mangabakda, pinagatang ni Ella ni Elmer iti maysa a litson a manok ken tallo a tinuno a liempo. Pinagatangna met ni Jong iti naglapayag nga Alfonso.
“Very good!” pinagrisiris ni Dex dagiti dakulapna. “Nauman san ti tianko iti empolayt. Kasla adda agboboling iti tianko no maikaaduk ti uminum!”
“Amangan no pulotan ti pakabarbartekam,” imballaet ni Jong ta isu met nga agsubli. “Agalunoska met ngamin!”
Iti ragsak ni Ella, ginaw-atna a pinisel ti bosina ni Johnny idi agparada daytoy iti sango ti gate-da.
“Daddy, mommy, andito na kami!” inyayug ni Ella.
Iti sala, nanglapayag da Mang Bianong ken Manang Mameng. Kalleppasda a nangaldaw ket buybuyaenda ti kaay-ayo ni Manang Mameng a programa iti telebision iti tengnga ti aldaw.
Rimkuas ni Mang Bianong idi mangngegna ti arimbangaw dagiti sangsangpet. Ammona lattan nga adda napintas a damag nga isangpet dagitoy.
Ngem nagtibbayo ni Manang Mameng. “Apay? Diosko, baka naan-ano ‘ta anakmo!” kinunana ket sinarunona ni Mang Bianong.
“Kunak ngaruden!” nakuna ni Mang Bianong idi makitana dagiti naisupot a naidutdotan a manok a bitbit ni Jong. “Ket dagitay manoktayo?”
“Nagsugatda, boss, ngem saan a grabe. Grabe ngamin ti tibker dagiti nakalabantayo,” insungbat ni Jong.
“Asino ti linabananyo?”
“Da Gino ken Bitangcol, boss!” sipapannakkel nga insungbat ni Elmer.
Nagmulagat ni Mang Bianong. “Apay a binanggayo ida?”
“Ammok met ti kalidad dagiti manoktayo, boss. Ket aglataktayo no abakentay' ida. Ket nangabaktayo met. Isu a kasta unay ti panangpalakpakda ken ni Ella!”
Nagpaggaak ni Mang Bianong, ngem nagrupanget ni Manang Mameng. Kinitana ti balasangna.
“Sika nga ubing, wen. Kaanonto nga isardengmo ti makigaliera? ‘Mayka ta agsaritata ‘ti nalapat!” kinuna ni Manang Mameng.
Nagkatawa ketdi ni Ella. Binisongna ti inana. “Sandali lang, mom, at mag-shower lang ako!” kinunana ket arintarayen a nangkamang iti agdan.
Nagbannikes ni Manang Mameng. “Kasarita, kunak…” dina naituloy ta addan da Mang Bianong iti gate ti mini-farm.
Kunam la no kaippasngay a maladaga ti annad ni Dex a nangsappuyot iti nasugatan a manokda idi mayaonna daytoy iti plastik a nagkargaanda. Inikkat met ni Jong ti plastik a panganan-paginuman a naisab-it iti tawa ti kulongan. Insublida ti tarpaulin ti kandidato a linapgis ni Dex iti poste ti elektrisidad nga abbong ti kulongan tapno saan a makita dagiti nasugatan dagiti nakawayway.
Inruar ni Elmer iti supot ti pulotanda sa inkargana iti bandehado ni Dex. Impaabayna iti daytoy ti naglapayag nga Alfonso sa nangala iti baso. “Nalamiis a danum, Jong!” kinunana.
“Dumawatka ken ni Sary,” imbilin met ni Mang Bianong.
Iti balayda, nakadigos ken nakasukaten ni Ella. Nakatapungor iti tualia a rimmuar iti siledna. Ur-urayen gayam ni Manang Mameng iti sakaanan ti agdan. Adda kinautna iti bolsa ti shorts-na.
“Ania metten, anakko. Kastam kadi lattan?” impasabat ni Manang Mameng ken ni Ella.
“'Ba, itong ganda kong ito, wala na akong makita na dapat baguhin sa pamamagitan ng plastic surgery, mom. Kontentoakon iti kinaseksik!” Nagkatawa ti balasang.
“Saanak a making-angaw, anakko!” Lalo a nagpormal ni Manang Mameng. "Isardengmon ti makipallot. Dika maalas, aya? Maysaka a babai a makilagudlagod kadagiti lallaki iti galiera! Ituloymo ti agbasa!”
Imbes a sumungbat, binisong ketdi ni Ella ti inana, iniggamanna ti dakulap daytoy sa impapetpetna ti tallo ribu a pisos iti inana. “Kuartam, mommy. Baratom. Gastuem iti kayatmo a pangigastuan. No saan, inkay' agbuya iti sine ken daddy sa mangankayo iti ruar!”
Napanganga ni Manang Mameng idi mabilangna ti saglilima gasut nga inted ti balasangna. Sa immanges iti dakkel. “Thank you, anakko. Ngem kaykayatko pay la nga amang no ituloymo ti panagbasam.” Naalumamayen ti bosesna. “Inka manganen. Nangankamin ken daddy-m.”
“Mamaya na. Innak kitaen dagiti kaduak,” insungbat ni Ella ket tinurongna ti ridaw.
Nasabat ni Ella ni Johnny iti ruangan ti mini-farm. Pumpunasan ti baro iti panio ti nalanit a subsobna.
“Huwag ka munang umalis. Makisaya ka naman!” Inggawid ti balasang ti ima ti baro.
“Saanen. Nangisuboakon. Ammom met a diak umin-inum,” insungbat ni Johnny. Ngem idi umaklili ti balasang kenkuana, saanen a simkad ti baro. “N-nangisuboak itayen iti litson a manok ken liempo,” nakunana laengen.
Inted ni Ella ti puonan ken inabak ni Mang Bianong sa winarasanna da Jong ken Dex. "Balato ninyo,” kinunana. Linukotna ti para ken ni Elmer sa inyawatna.
“Everybody happy except Johnny!” Nagpalakpak ni Jong.
“Pagraramanan ti sangkabassit a grasia!” kinuna ni Ella. Nangdutdot iti lima gasut iti bolsana. “Sukat ti gasolinam, BBJ!”
“Ne, saan. Talaga met nga immayak nagbuya. Nagganasak met!” Saan nga inawat ni Johnny ti kuarta.
Adda nalagip ni Elmer. Kinautna ti bolsana ket inruarna ti nakupin a papel nga innalana iti takilia ti Sta. Ines. Inyawatna ken ni Ella.
Binasa ni Ella. “Two Cock Ulutan? Ngem pangalaantay' ngarud iti manoktayo?”
“Derriyab, siempre. Nasuboktayon, di ba?” insungbat ni Elmer. “Adda pay panawentayo nga agsagana ta makabulan pay.”
Nagkatek ni Ella. Umis-isem a nangkita iti amana.
“'Ba, apay a kasta ti panagkitam kaniak?” Nagkatawa met ti lakay. “Awan kuartak. Nalipatak nga inikkat iti bolsitok idi aglaba ni Sary ket intedna ken mommy-m!”
Insublat ni Ella a kinita ni Dex. Napitpit ti isem ni Dex a nangbukbok iti basona sa intangadna.
Ania ngarud, kinudkod laengen ni Mang Bianong ti ulona. Ammona lattan a linamlamiong ti balasangna ni Dex ket naipug-aw ti naud-udi nga adda pinaidulin ni Mang Bianong a puonanna iti daytoy.
“Awagak ni Derri!” kinuna ni Ella. Pimmidut iti sangaiwa a liempo sa insakmolna.
“Agawidak metten,” kinuna met ni Johnny. Kinitana nga immuna ni Ella sa kasla nakaem-emma a balasang a nangpidut iti kabassitan nga iwa ti litson a manok sa insakmolna. “Hagawidakon, hama,” innayonna bayat ti panagngalngalna. Sa dandani naltotan idi umaklili ni Ella iti panangiturong daytoy kenkuana iti gate.
“Let us selibret, boss!” kinuna ni Dex idi agtangep ti gate. Intag-ayna ti basona sa inlayonna nga intangad idi awan makitinnik-ol kenkuana.
Namagusto ni Mang Bianong iti sangatilmon. Ngem idi awan maurayna a nalawag nga istoria no kasano a nakilaban dagiti manokda, nagpakadan. Kasano ngamin ket limmalaingan a simsimpuonen ni Elmer ti panagistoriana, kellaat a sallinan da Dex ken Jong. Numona ta no saan nga iti tengnga ti pangirugianda, iti met panangsentensia ti sentensiador kadagiti manok ti unaenda. Naulawen dagiti lokdit, nakunana laengen ket nagpakadan.
Nakarupanget ni Ella a nadatngan ni Mang Bianong a makisarsarita iti selpon iti salas. No kuan ngumato ti boses ti balasang, sa no kuan agpakpakaasi.
“Please naman, Derri. Kahit dalawang pares lang. ‘Tay kaedad dagiti ginatangko. Ano, wala na talaga? May anim kang twenty four months? E, ayaw mo namang bawasan ang presyo mo…”
Ni Derri ti kapatpatangna, naisip ni Mang Bianong ket limmaemen ti lakay. Nadatnganna ni Sary a mangsapsaplid kadagiti sopa. Saludsodenna koma iti katulongan no ‘yan ni Manang Mameng, ngem nakadagdagsen dagiti paddak ni Ella a limmaem.
“Apay, iha?”
“Hmmp, lastog dayta a Derri!” inkiraud ni Ella a nagpusot iti sopa. “Idi intulodna dagiti ginatangko, imbagana nga adu ti kasdiay ti edadna a manokna. Ita, kunana nga awanen. Sanak lakuan iti matured kano a sagdodose mil!”
Sinango ni Mang Bianong ti balasangna. “Simple lang, iha. Ammona nga impangabakmo dagiti naggapu kenkuana. No saan, dika koman agbirok manen iti gatangem kenkuana. Isu nga impanginana ti presiona,” kinuna ni Mang Bianong. “Adda kenka no gumatangka pay kenkuana.”
“Adu ti mayan-anunsio nga aglaklako, ngem nasubok ngaruden ti patubo ni Derri. Isu a kayatko ti gumatang manen kenkuana ta ilabanko iti two-cock ulutan.”
Iti kalapaw ni Dex, simmamayen ti nainum da Dex ken Jong. Ngem kasla awan pay epekto ti ininum ni Elmer. Agsisilpo pay laeng ti panagsindina iti sigarilio.
Madamdama, adda nalagip ni Elmer. Timmakder ket ginaw-atna ti basio ti tableta a bitamina iti rabaw ti kabinet a pagiduldulinan ni Dex kadagiti agas dagiti tarakenna. Kinulogna sa linukatanna ti bassit a botelia. Agtungtung-ed a nangisubli iti botelia iti rabaw ti kabinet kalpasan a naalana ti maysa a kapsula.
“No kayatyo ti ag-enjoy, dikay' agbartek tapno maabrotyo ti pagbayadyo,” kinuna ni Elmer kada Dex ken Jong.
Saan a naituloy ni Dex ti panangtagayna iti basona. Nakalawlawa ti rungiitna a nangkita ken ni Elmer. “’Mayak, boss!” kinunana.
“Sika, Jong?”
Nagmusiig ni Jong. “Awan hiligko kadagita,” insungbatna.
“Sika pay la ngarud ti agbantay no sumurot ni Dex,” kinuna ni Elmer.
“Asut, este, ayos!” inyellek ni Dex. “Maysa pay ngarud a tagay.” Binukbokanna ti basona ket di man la nagkuti ti karabukobna a nagayusan ti Alfonso. “Padawatannak ngarud, a, iti MB, bosing!”
Ket naglinnipak dagiti dua iti dakulap.
Iti balayda, natungday ti panagdungsa ni Ella iti sopa idi aguni ti selponna. “O, bakit? Ano? Gusto mo akong dalawin. Ne, awan sakitko, a!” Adda napanunot ni Ella. “Sige na at masakit ang ulo ko. Please, kunam? Mayatak nga istorbuem no mangitugotka iti gatangek. At piliin mo’t ilalaban ko sa two-cock ulutan. Ken ti presio dagiti ginatangko ti pangtedam kaniak. Pasurotam pay iti trio uray kasla gemgemda pay laeng. Ba’t di ka nagsasalita? Ayaw mo yata eh. Sige, din, a, ba-- A, payag ka na. Maghahatid ka bukas! O, sige, see you bukas. Puwede mo na akong dalawin!”
Timmakder ni Ella kalpasan ti panagsaritada ken Derri. “Pumayag din ang kumag!” kinunana a makakatkatawa.
Nangngeg ni Mang Bianong nga isu met a rummuar iti siledda ken ni Manang Mameng ti kinunana. “Mayaten ni Derri?”
“Of course, dad!”
“’Niat' pinangkombinsirmo?”
“Secret!” inyayug ni Ella a bulonna a nagturong iti agdan tapno mapan rumidep iti kuartona.
NAGSIMPAN ti sipnget. Apaggudua pay laeng ti Alfonso ngem impaknin da Elmer. To be continued, kuna ngarud ni Dex.
Nagdiram-os laeng ni Dex ken namlesen daytoy. “Agpupuotka, wen,” kinunana ken ni Jong. “Sikanto met no maminsan. Di bale ta agistoriaakto!”
“Ania, redikan?” sinaludsod ni Elmer nga itay pay nga agur-uray.
“Wen, boss. Tilmonek laengen ‘toy MB,” insungbat ni Dex, a 'Magic Bukel' ti kayatna a sawen. Impisokna ti kapsula iti ngiwatna sa imbatogna ti ngiwatna iti gripo. Ket nakapigpigsa ti tig-abna a nangkamakam ken ni Elmer iti ruangan.
(Maituloyto)
Napalabas a paspaset: 1 | 2 | 3 | 4 | 5 | 6 | 7 | 8 | 9
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
