Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-11 a Paset)
ALAS siete pay laeng ngem naluktanen ni Johnny ti klinikana. Imbilinna met iti para dalusna nga agnaed laeng iti likudan ti klinika a sapaen daytoy ti agdalus ta namnamaenna nga adu manen ti agpaagas kadagiti asoda a kas kadagiti napalabas nga aldaw gapu iti kinadagaang ti tiempo. Idi kalman, nalabesen nga alas siete idi mangrikep ta adda tallo a shihtzu nga aso ti baknang a baket a balasang a taga-Dalawantan Subdivision dita ballasiw ti Mindanao Avenue a kimmamakam. Dina koman awaten, ngem impangta ketdin ti baket nga agpulong iti organisasion a mangisaksakit kadagiti ayup tapno kasuanda kano iti cruelty to animals. Iti suronna, arig ibagkongna ti eringgilia idi indieksionanna dagiti aso.
Ngem nabainan idi agbayad ti baket. Nangted daytoy iti tallo ribu a pisos idinto a pito gasut laeng agraman agas ti singirna. Ti laeng dina magustuan, isu ti parimrim ti baket idi agpakada nupay magustuanna ti kuna daytoy nga isublinanto dagiti asona tapno kitaenna no nalaingandan.
Oo, kailangang bumalik kayo tapno mapaneknekantayo a naimbagandan, misis, kinunana met.
Ad-adda la ket ngarud a nagpa-cute ti baket. “Miss pa ako. At tawagin mo na lang akong Med, total, di naman magkakalayo ang edad natin. Med, Medusa.”
Galiera Queen (MAUDI A PASET)
Uray la nagkiet ni Johnny. Di agaddayo ti tawenda? Susmariosep! Ngem, ala, sayang ti tallo ribu. Silulukat a kanayon ti ridaw ti klinikak kadagiti kas kadakayo nga adu ti kuar— ti makukuar— este, adu ti asona. Narigat ti agtaraken iti adu nga aso, di ngamin? kinunana lattan.
No ania la ket ngarud ti napampanunot ni Johnny idi masibet ni Aling Medusa. Ania ngata no purga ti itedna kadagiti aso tapno agtuloy ti panagburisda? Ania ngata no ikapkapsutna ti grado ti agasda tapno napapaut ti panangpaagas ni Aling Medusa kadagiti asona?
Ngem inungtan met laeng konsensiana idi agangay. Sika, BBJ, no ania la ti mapampanunotmo tapno laeng bumaknangka. Bumaknangka met ket uray dimo gundawayan ti padam a tao basta agalibtak ken dimo liplipatan ni Apo Dios!
“Good morning, Boss Johnny!”
Nakigtot ni Johnny. Nakastrek gayamen iti akinlikud a ridaw ti balo nga Ilokana a nangdaldalus iti klinikana.
“Sika, Manang Paniang, naladawka manen a dimteng. Itay pay a nanglukatak,” kinuna ni Johnny.
Nagkatawa ti balo. “Isu met la ti oras ti yaayko, bossing. Nasapsapakay laeng a nanglukat ita. Ken nakaisputingkayo pay. Addan sa ket naisangsangayan a sangailiyo ita, wenno adda date-yo!” kinunana.
Managpaliiw met, nakuna ni Johnny iti unegna. Kasano ngamin ket suotna ti baro a pantalonna a maong ken umasul a tisertna. Ken saanna pay a suot ti gown-na a gagangay nga ipasukotna no adda iti klinikana. “Adu ti umay agpaagas ita kadagiti dingoda. Dimo nadlaw idi kalman?”
“Wen ngarud, bossing. Tiba-tiba kayo. No kanayon a kasta ti kinapigsa ti panagpastrekyo, saan a dakes no mangasawakayon. Kuarentayon san!”
Kunam la no kinagat ti abuos ti piditpidit ni Johnny. “Ne, diak kayat ti kasta a rabakmo, Paniang!” Awanen ti as-asin ti panangawagna iti para dalusna. “Ala, agdaluskan. Madamdama, agsangpeten dagiti agpaagas.”
“Sori, bossing. Agang-angawak laeng!” kinuna ti para dalus. Simrek iti pannakabodega ti klinika. Idi rummuar, iggemnan ti dust pan ken walis.
Ngem nalabesen a maikawalo, sero pay laeng ni Johnny. Iti alas nuebe, dimteng ti lakay nga agnaed iti ballasiw ti Quirino Highway a manguk-ukod iti asona a kalbo ken kuretret ti kudilna a nalungpos iti gudgod.
Simgar ni Johnny. Arintarayen a napan iti kabinetna ken nangala iti maysa a sachet sa sinabatna ti lakay iti ridaw. “Paliguan mo, ama. Kalpasanna iwarakiwakmo iti bagina,” kinunana. Intedna ti innala a sachet.
“Mabayag sa met ti kasta, dok! ‘Tay alisto koma tapno sumardengen nga agar-areng-eng. Dinak paturogen iti rabii.”
“Pugpogamon, ama, tapno sumardengen nga agareng-eng!” inrabak ni Johnny a sisusuron. “Sige, ket adda serbisak,” impambarna a bulonna a timmallikud.
Idi agalas dies, maupayen ni Johnny. Nalagipna la ket ngarud ti kimmamakam a baket a nagpaagas kadagiti asona. Ti gasat nga agpayso, naisipna. Uray kugtaram kumalay-at. No agmamadi uray kamaten, aglisi.
Mangrikep koman tapno mapan agmerienda iti Jollibee dita Sangandaan idi agkiriring ti teleponona.
“Hello, may I help you…”
“Pa-Ingles-Ingles ka pa diyan. Halika at kailangan kita!”
“Ella?“
“Huwag ka nang magtanong. Halika na!”
’Maykan. Kasapulanka? Ket kunam la no inaplawan ti makasaguyepyep a pul-oy ni Johnny. O, Johnny!
Immawer ti mamayo ni Johnny. Anian, nasapsapa pay koma nga immawag tapno nailisi iti konsumision a bigbigat.
Kasla makabadbaddek iti beggang ni Johnny a limmugan iti kotsena. Pagpiaanna, saan a nagurok ken nagsaiddek ti luganna. Dimmagas iti sango ti simbaan ket gimmatang iti sabong. Madamdama pay bassit, un-unorennan ti Piko Street a tumapuak iti Silvina Subdivision. Ket adda nagpitik iti mugingna. Apay a dina awisen ni Ella a mangaldaw dita Leo’s Carinderia? Naman, naman, insupiat met laeng ti unegna. Ania, agingga laeng iti turo-turo ti panagayatmo ken ni Ella? Ah, dita West Avenue ngarud uray ket dakkel ti napastrekna idi kalman.
Ngem nagdalagudog ti barukong ni Johnny idi masungadnan ti pagtungedan ti Karpa Street. Kasano ngamin ket adda ketdin a nakaparada ti lugan ti tao a dina kayat a makita itoy a gundaway— ti van ni Derri ti Derriyab Farm— iti sango ti ruangan da Ella.
Adda ni Derri? Naunaan ni Derri.?
Ngem imbes a maupay, immingar ketdi ti uneg ni Johnny. 'Ba, uray dina pay naibalikas ti riknana, saan a bato ni Ella tapno dina maawatan dagiti ipakpakitana iti balasang.
Nagsinnungbat a taraok manipud iti uneg ti van ni Derri ti nangsarabo ken ni Johnny idi dumsaag iti luganna. No kasta, umay lakuan ni Derri iti manok ni Ella, nakunana iti unegna ket naglayonen iti ridaw.
“Tuloy!” nangngegna a kinuna ni Ella idi makapagtugtog.
Kas ninamnamana, adda da Ella ken Derri. Kinurbataan ni Derri ti long sleeves-na ket talaga met nga executive ti pustorana.
“Come, BBJ!” impayapay ni Ella. “Magmiryenda ka muna bago natin tingnan ang mga ibinebenta ni Derri sa akin.” Kinitana ni Sary. Binilinna daytoy nga ikkanna ni Johnny iti merienda.
“For you,” kinuna met ni Johnny sa inyawatna dagiti sabong ken ni Ella.
“Wow! Thank you, BBJ!” kinuna met ni Ella sa sinay-opna dagiti sabong.
“Di ba pangkorona ang mga bulaklak na ganyan?” inrabak ni Derri.
Bimmara ti pispis ni Johnny. Dakdakkelak koma man pay, laglag, inridis ti unegna. Ngem nabang-aran idi gaw-aten ken pislen ni Ella ti tumengna.
“Pangkorona man ken para altar ti sabong, okey lang. Ti nasken naimpusuan ti pannakaidaton wenno pannakaisagutna,” kinuna ni Ella.
Inyawis ni Ella ti ipapanda iti mini-farm idi makamerienda ni Johnny. Uppat gayam ti intugot ni Derri a pagpilian ni Ella. Isuna ti nangbitbit iti plastik a nakaikargaan dagitoy. Gapu itoy, ammon ni Johnny no apay nga inawis ni Ella.
Adda sennaay nga agpilit a mauyos iti barukong ni Johnny iti panangsarunona kada Ella ken Derri nga agturong iti ruangan ti mini-farm. Ania kadi met laengen ti dagsen dagiti uppat a manok a naikarga kadagiti plastik a bitbitna no idilig iti sangasako nga irik a baklayenna a yawid manipud iti naggapasanda ta kukua met ngamin ti sangabarangay ti agil-ilus a pasagadda? Kaasika met, BBJ, kunkuna ti unegna. Umelka met ngamin. Para bitbit ken para amiris kadi laengen iti salun-at ti manok ti kaikarian ti panagayatmo ken ni Ella? Naman, naman! Ungapem ngamin ‘ta ngiwatmo, a!
Agpukpukis iti manok ni Dex idi mangngegna ti tugtog iti ruangan. Impisokna iti scratching pen ti manok sa nagdardaras a napan iti ruangan.
“Pinakanmo kadi amin dagiti manok?” sinaludsod ni Ella idi makaunegda.
“Wen, boss, ngem nalpaanda itan. Gumatangka?” Kinitana dagiti bitbit ni Johnny.
“Wen, agpilitayo,” insungbat ni Ella. “Da Elmer ken Jong?”
“Dida pay nag-report manipud idi nangabaktayo.”
“Ilabas mo ang isa,” imbilin ni Derri ken ni Johnny.
Agtungpal koman ni Johnny ngem kasla napitik ti lapayagna. Ania, bilbilinen ni Derri? “Ikaw na,” kinunana.
Ania ngarud, nangiruar ni Derri iti manok. Darisayen daytoy nga umasul ti gurongna. Kaaduan ti kadakkelna.
Innala met ni Dex ti ikonkondisionna a darisayen met laeng ngem puraw ti sakana. Dinagasna dagiti glab a nakasab-it iti sanga ti lugo a linong ti maysa kadagiti kulongan. Inyawatna ti maysa a paris ken ni Derri.
“Bagong palahi ko ang mga ito. Two years na sila. Lahi ng Mel Simms na broodcock na binili ko sa isang farm sa Enrile, Cagayan,” impadamag ni Derri bayad ti panangikapetna iti glab iti manokna.
Apagibbetda kadagiti manok, timmayab ti manok ni Dex. Simmurot ti manok ni Derri, ngem nababbaba ti tayabna.
“Sige, rusodam!” kinuna ni Dex.
Ngem nagpababa ti manok ni Derri. Sakbay a makapagdisso ti manok ni Dex, kunam la no naibiat a pana ti manok ni Derri a dimmarup ket napadata ti manok ni Dex a dinalapusna. Ngem sakbay a masublina ti manok ni Dex, tiniliwen ni Derri ti manokna.
“Mautak maglaro!” kinuna ni Ella. “Mangalaka iti scratch pen ta ilasinmo,” imbilin ni Ella ken ni Dex.
Alimbuyogen ti maikadua a manok ni Derri. “Black Alabama ito, kalahi ng mga unang binili mo,” kinuna ni Derri.
Nakasuron ni Dex iti impakita ti aywanna. Innalana ti namimpaten a nangabak nga alimbuyogen ni Mang Bianong.
Ket di napupuotan ni Ella ti panagpalakpakna idi nagpinnungot dagiti manok sa nagkinnuripaspasda. Naikayab dagiti dutdot ken nagango a ruot.
“Tama na, awatin na sila,” kinuna ni Ella.
Dandani naggiddan da Dex ken Derri a nangtiliw kadagiti manokda. Impisok ni Dex ti manok ni Derri iti sabali pay nga scratdch pen.
Naipolis aminen dagiti manok ni Derri idi dumteng da Elmer ken Jong. Gapu ta saan a kayat ni Derri nga uliten nga ipolis dagiti manokna, ta nakita kano met ni Ella ti labanda, sinaggaysa ni Elmer a sinenialan dagiti manok. Kalpasanna, pinatallikudna dagiti manok sa inunnatna ti gurong dagitoy. Sinirig, binalinglingna dagiti saka dagiti manok.
“Walang masamang kaliskis,” impakaammo ni Elmer. “ Maganda rin ang mga paa. Ikaw, alin diyan ang pili mo? Ilan ang bibilhin?”
“Dua ngarud, para two-cock ulutan. Kayatko a padasen,” kinuna ni Ella. Kinitana ni Johnny. “BBJ, kitaem man no awan met lat’ panatengda.”
Innala ni Johnny ti immuna a naipolis a manok ni Derri. Inyapputna ti tangan ken tammudona iti agong ti manok. Kalpasan ti tallo a segundo, kinitana dagiti ramayna. Nabasa dagiti ramayna.
Nagngilangil ni Johnny idinto ta pinagsuekna ti tanganna. “Di puwede, may sipon,” kinunana.
Insublat ni Johnny ti maysa. Kaskasdi a pinagsuekna ti tanganna. Kasta met laeng iti maikatlo ken maikapat.
Kinudkod ni Derri ti teltelna. “Paano nangyari ‘yon? Kung talagang may sipon, hindi ganun ang performance nila!” improtestana.
“Veterinarian ako, alam ko ang sinasabi ko!” Pinatangar ni Johnny ti rumbeb a timidna. “Mahawa pa ang mga manok dito!”
“Pero alagang-alaga ng mga helper ko, kahit nagbakasyon ang beterinaryo ko!”
“Alisto laeng nga agpanateng ti manok no kastoy ti tiempo,” kinuna met ni Johnny. “Gapu iti dagaang, inumda nga inum. Saan met ngarud a mabalin nga imutan ida iti danum ta sobra ti pudotna,”
Nagngilangil ni Ella. “Wala na bang iba na kalahi ng mga ito?” sinaludsodna.
“Wala na, eh. Kung gusto mo ang Jumper, meron.”
“Ayoko. Pero, bilhin ko na ang mga iyan. Dakamin ti agagas uray ta adda ni Johnny. Maakaran laeng dagiti manokmo no yawidmo pay la ida,” kinuna ni Ella. “Ngem kissayam ti presiom ta dakami met ti mangagas kadagitoy. Baka maakaran pay ketdi dagiti manokmi.”
Saan a kumbinsido, innala ni Derri ti maysa a manokna ket tinuladna ti inaramid ni Johnny. Pudno, adda basa iti tangan ken tammudona.
“Ano, tama ang sinabi ko o hindi?” kinuna ni Johnny. Kiniddayanna ni Ella.
Insublat ni Derri dagiti tallo pay a manokna. Kaskasdi nga adda lemma kadagiti ramayna.
“Mamatika kaniak,” kinuna manen ni Johnny. “Kung ayaw mong maniwala na may sipon ang mga manok mo, amoyin mo ang ilong ng mga ito. No nabangsit, talaga nga agpanateng.”
Ania, angotenna ti agong ti manok? Ket kasla nakaut ti rusok ni Derri. Intallikudna ti tuprana. Kinitana dagiti manokna. Mailalaan, ngem kasanon no maakaran dagiti dadduma a tarakenna? No apay ket ngamin a di nangayab iti suno ti beterinariona.
“Ano, Derri? “ kinuna ni Ella. “Itedmon iti saglilima ribu.”
Kinudkod ni Derri ti ulona. “Malaki ang lugi ko.”
Inipig ni Ella ni Derri sa kimpet iti takiag daytoy. “Mas malaki ang lugi mo kung kumalat ang sipon sa farm mo. Magtulungan tayo.”
Kasla nakuddot ti puso ni Johnny, ngem ania ti karbenganna a mangguyod ken ni Ella? Ket insagawisiwna laengen ti sakit ti nakemna a nangiwaras iti panagkitana iti pakabuklan ti mini-farm.
“Bilhin mo lahat?” sinaludsod ni Derri. Iniggamanna ti dakulap ni Ella.
Ket nagsagawisiw manen ni Johnny. Nakadlaw ni Dex ket intallikudna ti ellekna.
“Wen, isuda nga uppat,” intung-ed ni Ella. Kinitana ni Dex.
“Boss, ibagam, a, ken ni Boss Bianong,” kinuna ni Dex a nakaawat a ti ilemlemmengna a puonan ni Mang Bianong ti kayat a sawen ni Ella.
“Akong bahala. Kunin mo na.” Inruar ni Ella ti nalukot a kuarta iti bolsa ti shorts-na. “Mano ti kuarta ni daddy kenka?”
“Eleven twenty one.”
“Alaem ‘diay sangapulo ta anayak.”
“Dadalaw ako, ha?” inyarasaas ni Derri ken ni Ella idi maipisokna iti petakana ti pinagbayad ni Ella.
“Ikaw ang bahala!” inkatawa met ti balasang.
Arintarayen ni Dex a nagsubli iti ‘yan da Ella ken Johnny idi marikpanna ti ruangan. “Kasanon no maakaran dagiti manoktayo?”
Kinita ni Ella ni Johnny. “Agasam ida, BBJ.”
Nagkatawa ni Johnny. “Saan met a nakaro. Pagsayaatanna, di inangot ni Derri ti ulo dagiti manokna. Siak ti makaammo ‘ti agasda. Ipupokmo pay la ida, Dex,” kinunana.
Agkatkatawa ni Ella a nakilinnipak iti dakulap kada Johnny ken Dex. “Maaasahan ka talaga, BBJ! Gapu ta dakkel ti nainutko iti presio dagiti manok, ipangaldawka!”
“H-ha?” Dandani natilmon ni Johnny ti angesna. Agasem, dayta ti pampanunotenna ngem inunaan ketdin ti balasang?
Ngem nagayeng-eng ni Dex. “Unfair. Siak ti para pakan. Padasek met, a, ti mangan iti class a lugar!”
Nagkatawa ni Ella. “Ala, tallotayo, uray ta adda wheels ni BBJ. “Agdigoska ngarud, a, Dex.”
“Asuts, este, ayos!” inyellek ni Dex ket siaalisto a nangipupok kadagiti kabarbaro nga aywanna.
Ket nakaal-alsem ti isem ni Johnny a nangsaruno ken ni Ella iti panagturongda iti ruangan ti mini-farm.
AGPUGPUG-AW ni Elmer a nangipisok iti ikonkondisionna a manok ni Ella. Ginaw-atna ti tualiana iti pagsalapayan ni Dex ket impunasna iti rupana ken iti barukongna a sumilsileng iti ling-et. Nalawagen. Aglabbeten ti payakpak ken taraok dagiti manok. Awan pay alas kuatro itay sumangpet.
Nagpiapi iti pingir ti kawayan a datar ti kalapaw ni Dex. Tur-og, makais-isem a nangkita ken ni Dex. Nakakukot daytoy, naibalabal ti dulpet nga ulesna manipud iti ulona agingga iti abagana. Saanna la ket ngarud a naigawid ti ellekna ta maal-alus-os ti yudyod a lumabaga a brief ni Dex.
“Bumangonkan, a, ta mangipaburekka iti danum ta agkapeta.” Sinipat ni Elmer ti bukot ti dapan ni Dex.
Inwalin ni Dex ti ulesna sa nagdata. Nagduaanna a kinudkodan ti butitna sa nagngaretnget. Madamdama, nadagsen manen ti panagangesna. Sabagay, as-asugen daytoy ti dagsen ti ulona itay luktanna ti ruangan. Isu a binay-annan daytoy itay agsubli a nagilad, imbes a kaduaen daytoy a mangwatwat kadagiti manokda nga ilabanda iti 2-cock ulutan.
Napakanen ni Dex dagiti manokda idi dumteng da Ella ken Mang Bianong. Umasul a jogging pants ti suot dagiti agama ket ammo lattan da Elmer ken Dex a linawlaw dagiti agama ti Mendoza, Silvina, ken San Agustin Subdivision.
“Kumusta ang lakad mo kahapon?” sinaludsod ni Ella ken ni Elmer.
“Matuloy ti 2-cock ulutan no Lunes,” insungbat ni Elmer.
“Ania kadagiti uppat ti entry?” kinuna met ni Mang Bianong.
“Dad, ania ngata no ilabantayo ida nga uppat? Bale dalawa ang entry natin,”
“Ay, huston ti maysa nga entry,” insungbat ti lakay. “Mano ti entry fee, ti premio ken minimum bet?”
“Nalag-an laeng,” insungbat ni Elmer. “One five ti entry fee ket fifteen ti premio. Three-three met ti minimum bet.”
Kinita ni Mang Bianong ti balasangna. “May pera ka ba?” kinunana sa kinitana ni Dex.
Linisian ni Dex ti panagkita ni Mang Bianong. Innallana ti plastik a pagpugpugsit ni Elmer kadagiti sansanayenna. Pinugsitanna ti kilikili ken rupa ti maysa kadagiti agal-al-al a baud, inipusna sa binittatayna. Nagpayakpak met iti nakapigpigsa ti manok. Nagtungtung-ed ni Mang Bianong. “Mayat! Napigsa dagiti payakna!” kinunana.
Nakayaman ni Dex. Ammona nga isu ti dayengdengan ti lakay, saan ket a ni Ella, no maammuan daytoy nga impabulodna ti kuarta ti amona.
“Sosyo tayo, dad. Uray ta addanton ti pensionmo para iti daytoy a bulan!” Immaklili ni Ella iti amana.
Kinusilapan kampay idi ni Mang Bianong ti balasangna. “Ammom kadi a kanayon a dayengdengannak ni mommym?” kinunana.
Ngem imlek ketdi ni Ella. “Uray, a, ta naragsak met no baratuak!”
“Basta sumrekkan nga agbasa no June!”
“Ay, inton second semester laengen. Suerteak ita, masapul a pabulonak, dad! Ken nalamlamiiston ti tiempo.”
“Kausapin mo ang mommy mo, bata ka! Naalas man a mailalaokka dita galiera. Balasangka pay met ngarud. Ken saan a dibersion ti pallot. Maysa a sugal, baka akala mo!”
Lalo la ket ngarud nga imlek ni Ella. “Hu, sabi mo lang ‘yan! No dakes ti pallot, apay ngarud a makipalpallotka, dad? O, c’mon, dad!”
Bimtak la ket ngarud ti garakgak da Elmer ken Dex idi saan a nakasungbat ti lakay ket mapitpitpit ti isemna a nangkudkod iti teltelna.
“Ni lakayko, dandanin sa agretiro/ Ta no ‘ti rabii dinak metten ikaskaso…”
Nagkikinnita dagiti uppat idi adda agkanta iti ruar ti ruangan.
“Ni Jong!” kinuna ni Dex a bulonna a nagturong iti ruangan.
Ni Jong nga agpayso a mangigis ti rungiitna ti adda iti sango ti ruangan. Adda kaduana a pandek a kayumanggi ti kudilna. Adda bitbit daytoy a bay-on nga adda abut-abutna. Ammo ni Dex a manok ti naibay-on. Adda met kaserola a bassit a bitbit ni Jong. Ammo pay ni Dex a pulotan ti nagyanna – kappukan wenno kudil ti baka a pinaluknengna.
“Ni Gumer,” pinangyam-ammo ni Jong iti kaduana kada Ella. “Adda ipakitana a manok bareng magustuanyo.”
“Tingnan ko nga!” kinuna ni Ella.
“Ne, kagatgatangmo laeng, mangalaka manen?” impalagip ni Mang Bianong iti balasangna. “Ken malas no mangisangpetka iti manok no irubrubuatmo nga ilaban.”
“No napintas, taraknen pay la ni Jong iti pagkaseraanna sananto itulod ditoy no makapaglabantayo. Sige, ilabas mo ang manok mo.”
Mababain ti isem ni Gumer a nangkita kada Jong ken Dex.
“’Ta manokmo dita bay-on ti kuna ni boss!” inkatawa ni Jong.
Idaw a kasla agmatmata a dalag ti manok ni Gumer. Inamloyanna ti ulo ti manokna sa indissona. Simmarigsig ti manok.
“Polisem,” imbilin ni Ella ken ni Dex.
Napa-wow ni Ella idi timmayab ti idaw ket rinapidona agingga iti baba ti billiten ni Dex. Apagdissoda, inistretna manen ti kalabanna. Tinukmaan metten ni Gumer ti manokna.
“Mayat,” nakuna ni Elmer. “Taga-anoka, lakay?”
“Tuguegarao.”
“Anni linia ob rid y manukmu?”
“Marik ammu nga nangaffut namillima ta tupada yamana.”
Nagkikinnita da Mang Bianong.
“Piga gafu nu gatangakku?”
“Nine hundred laman. Paffletek ng a malubbe ta Tuguegarao. Mawag gare nga makalubbetak ko wagi.”
“Magkano raw?” sinaludsod ni Ella.
“Nine hundred kano, pagpletena nga agawid idiay Tuguegarao. Naminlima kanon a nangabak iti tupada, ngem dina ammo ti breed-na,” insungbat ni Elmer.
“Nalaka daytan,” kinuna ni Ella.
“'Wag muna. Maglaban muna tayo,” inyanawa ni Mang Bianong.
Ngem nakauten ni Ella ti bolsana. Inyawatna ti bukel a sangaribu ken ni Gumer. “Balato mo na ang one hundred,” kinunana. “Yawidmo pay laeng, Jong. Nagam-ammuanyo?”
“Aglaklako iti lames dita lugarmi,” insungbat ni Jong. “’Tay kunam nga ipasurotmo no gatangenda ti manokmo?” kinunana ken ni Gumer.
Inruar ni Gumer ti petakana. Adda inyaonna a nadulpet ken bassit a supot. Nabennat ti tengnged dagiti kasangsangona idi luktanna ti supot.
“Bato?” nayesngaw ni Dex idi makitada ti natayengteng a maris dapo a bato a nagyan iti supot.
“Ano yan?” sinaludsod ni Ella.
“Ngipen ti kimat kano.” Ni Jong ti simmungbat.
Nagmulagat ni Dex. “I-itedmo kadakami?”
Nagtung-ed ni Gumer. “Mangtippingak.”
“Pagan-anok ngarud?” Nagkatawa ni Ella.
“Suerte, kunada man!” kinuna ni Elmer a maraisem.
“Wen. Napuotak pay la daydi lakay a kaarrubami a kunada a nakaala iti ngipen ti kimat iti pinuon ti niogda. Yuperna kano iti danum ti ngipen ti kimat. Ipainum ken idiram-osna kano ti danum iti ilabanna a manok. Awan kano ti naabak a manok daydi lakay!” Kinamat ni Dex ti angesna iti kaatiddog ti panagipadamagna.
Nagpaala ni Gumer iti dua a plais. Nupay naingpis ti bato, kunana a natangken ket saan a nalaka a tukkolen babaen ti ramay.
Sipaparagsit ni Mang Bianong a napan nangala iti dua a plais iti luganna. Kitaem la ti suerte. Uray dimo sapulen sumangppet latta no kayatna, kunkuna ti unegna.
Impakagat ni Dex ti plais iti dakdakkel a parte ti bato, iti basbassit a pingir ken ni Jong. No namin-ano a nagngarietda sa natipping ti bato. Innala ni Gumer ti dakdakkel a tipping ta suertena kano iti negosio. Nagpakadan daytoy ta mapan kano agpareserba iti tugawna iti Florida. Napan metten ni Johnny iti luganna a pangurayanna kada Ella a kaduana a mangaldaw iti West Avenue.
ADDA nagbosina a sinaruno ti rebolusion ti makina iti batog ti ruangan. Indisso ni Ella ti palpalabsanna a pagiwarnak a bulonna a timmakder. Addan ni Johnny.
Nagsennaay manen ni Johnny idi makitana dagiti nawasnay a gurong ni Ella a lalo a bimmusnag iti umasul a shorts daytoy nga inasmanganna iti nakiting nga sleeveless a blusa. Nataranta idi iseman ken pallilitan ni Ella.
“D-da Elmer?” Nasimbalud ti dila ni Johnny.
“Sandali lang,” insungbat ni Ella. Inawaganna da Elmer babaen ti selpon. “Alis na tayo. Handa na ba kayo? Impapatomaryon ti agasda? Pinainum ken diniram-osanyo met la ida iti nakayuperan ti ngipen ti kimat? Very good. ‘Maykay' ngaruden.”
Agtiltil-ay ni Mang Bianong a kimmamakam idi aggunayen ti kotse ni Johnny. Kinatokna ti batog ni Ella. “Two thousand iti umuna. Pagtulidem no mangabak,” kinunana.
“Ayos, dad!” insungbat ni Ella.
Nagbanurbor metten ti kasla kiskisan a kotse ni Johnny.
(Maituloyto)
Napalabas a paspaset: 1 | 2 | 3 | 4 | 5 | 6 | 7 | 8 | 9 | 10
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
