Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-13 a Paset)
IMMADDANG iti namitlo ti manok ni Elmer sa nagbaribar. Nagpayakpak sa nagkaraykay.
“Naku, namamaalam na!” adda nagkuna.
“Gutom na. Di kasi binigyan ng kape at pandesal kanina!” inkantiaw ti sabali ket nagkakatawa dagiti naray-aw.
Saan a nagkuti iti nakaidissuanna ti manok ni Gino. Nagbaribar ketdi, lineppayna ti kanawan a payakna, sa nagkiet a kunam la no karkaritenna ti kalabanna nga umasideg.
NOBELA: Apo Baboy Party-List (6)
Immaddang manen iti namitlo ti manok ni Elmer, nagbaribar iti kanigidna sa agkarkarekkek a mangingato-mangibaba iti ulona.
Saan latta nga immakar ti manok ni Gino. Ket nagariwawa dagiti agbuybuya.
“Hulihin at gilitan ng leeg. Mga duwag!”
“Nagpapa-picture lang, kayo naman!”
“Anak na lasi! Pue!”
Nagkinnita dagiti handler. Naawatan met ti sentensiador. Inipusna ti manok ni Gino. Tiniliw met ni Elmer ti manok ni Ella.
Kas iti kalabanna, minira ni Elmer no awan met la ti sugat dagiti ramay ti manokna. Idi awan makitana, sinangona manen ti kalabanna.
Kasla nagtulaganda, iti laengen labes bassit dagiti uged iti tengnga ti nangidissuan dagiti handler kadagiti manokda sa siaalistoda a nagkamang kadagiti kubong a para kadagiti agibbet. Nagsanud met ti sentensiador ket di pay agkirem a mangsipsiput kadagiti manok.
Naginnarudok dagiti manok a kasta unay ti seggar dagiti pargayda. Nagulimek met dagiti tao a maymaysa ti turong ti panagkitada.
Pagam-ammuan, kunam la no naigayang a pika ti manok ni Gino ket nagparasapas dagiti sakana. Siaalisto met ti manok ni Ella a limias iti kanigidna. Nupay kasta, nadamgis pay laeng ti tadi dagiti murdong ti kanawan a payakna ket naikayab dagiti dutdot. Nagriaw dagiti dehadista.
Immisem laeng ni Elmer ta ammona a di nasugatan ti manokda. Ngem iti nagtugawanda, uray la naibagkat ni Ella ti patongna idinto ta nagtibbayo ni Johnny.
Ngem nakayamanda idi awan ti agtedted a dara ti manokda.
Inulit ti manok ni Gino a binallasiw ti manok ni Ella. Kaskasdi a nag-side step iti kanigid ti manok ni Ella. Sa apagdisso ti kalabanna, kunam la no agpedpedal a nangkaradap iti daytoy. Kimleb ti manok ni Gino ngem nabagsolan ti krusna. Nagriaw met dagiti dehadista idi naglayon a napakleb ti manok ni Gino a mangikaykayaw-at kadagiti payakna.
Iti nagtugawanna, awan man la ti danag a makita iti rupa ni Gino. Nakataltalna a nakasikkawil a nagliad iti tugawna a saklotna ti nagbasisaw a clutch bag-na. Kasunganina ni Ella nga uray la a timmakder ken um-umkis a mangdandanog iti angin.
“Tira, bata! Tira!”
Iti kubongna, nagtalinaed met a nasimbeng ti rikna ni Elmer. Ammona nga addan bentaheda. Ngem iti kasta a pallot, uray baldadon ti maysa a manok, dakkel pay laeng ti tiansana a mangabak uray pay no napilay ti kanigidna a nakaikabitan ti tadi. Malaksid no nalaing nga ag-finishing, a kunada, ti nakabentahe a manok.
Iti bangir a kubong, nakasimsimbeng met ti langa ti handler a kas iti amona. Ammona, agingga iti umang-anges ti manokda, adda pay la gundawayna a tumabla, wenno mangabak pay ketdi. Napigsa a mangpatpatalged kenkuana ti kaawan pay ti narsing a kabsat ti manokda.
Nagbuelta ti manok ni Ella. Pinarakapakna manen ti bukot ti agkaytkayaw-at a kalabanna. Ad-addan ti riaw dagiti dehadista.
Iti pagbambantayanda, ammo lattan da Jong ken Dex a ti manokda ti maidirdir-i gapu iti pigsa ti riaw ken palagapag dagiti agbuybuya.
“Sayang ta saanta a mabuya,” kinuna ni Dex, ngem kaskasdi a linipakna ti nakataya a dakulap ni Jong.
Pagam-ammuan, linikba ti manok ni Ella ti kanawan a payakna, pinasgarna dagiti pargayna sa agsarsarigsig nga umas-asideg iti kalabanna. Pinasgar met ti manok ni Gino dagiti pargayna idinto ta nagkaykayaw-at ta kayatna met a darupen ti kalabanna.
“Hoy, hoy! Malibog ang lintek!”
“Mana sa amo!”
Ngem idi manadaan koman ti manok ni Elmer ti kalabanna, napungot ti naud-udi ti dutdot ti tengnged daytoy. Ket nagriaw dagiti liamadista idi nagparakapak dagiti saka ti manok ni Gino.
“Nakidiallo!” intabbaaw ni Elmer idi nagsagking ti manokda nga immadayo idi naparut ti dutdotna a napungot ti kalabanna. Nagtedted ti dara iti kanigid a sellang ti manok.
In-inut met a napatugaw ni Ella, nagakkub dagiti dakulapna idinto ta agtantanamitim a kumitkita iti gradas. Kasla kayat met ni Johnny ti umisbo idinto ta nagling-et dagiti kilikili ken sellangna. Nagpug-aw iti nakapigpigsa.
Nagkayaw-at ti manok ni Gino ta kayatna nga asitgan ti manok ni Ella. In-inut met a nakulpi dagiti tumeng ti manok ni Ella, agingga iti napatugaw. Nagriaw ken nagpalagapag dagiti liamadista idinto ta napaumel dagiti dehadista.
Plis, plis, huwag naman, insangit ti uneg ni Ella nga agtigtigerger dagiti bibigna a kumitkita iti gradas. Lumaban ka, lumaban ka, baby!
Ngem simmardeng nga agkayaw-at ti manok ni Gino ket nagkuridemdem. Mangrugin a lumitem ti rupana.
“Karyo, karyo!” adda nangiriaw.
“Hoy, tanga! Karyo!”
Naruamen ti sentensiador iti kasta a lengguahe dagiti mammallot isu a kasla nagtartarus laeng dagiti makainsulto a balikas kadagiti lapayagna. Siaalisto a nangtukma iti bukot dagiti manok sa pinagkariona dagitoy. Nagsinnippit dagiti manok ket indisso manen ti sentensiador dagitoy.
Nagkul-ob manen ti manok ni Gino idi maidisso idinto ta agsagsagking ti manok ni Ella nga umasideg iti kalabanna.
“Tumakderka, a, laglag!” inkiraud ti naluklukmeg kadagiti agabalayan idinto ta kasla mais-isit a nanginiin iti patongna iti danagna.
“Unay ket a danagmon, ‘balayan. Beteranon nga agmanmanok ni Gino. Saan a basta-basta ti ilabanna a manok iti two-cock ulutan,” kinuna met ti nakutkuttong.
Pinungot ti manok ni Ella ti tengnged ti manok ni Gino idi maasitganna daytoy. Natukmaan met ti manok ni Gino ti kanigid a payak ti manok ni Ella. Ket kunam la no marba ti Sta. Ines idi nagdanggay ti riaw, palagapag, ken palakpak dagiti liamadista ken dehadista a maay-ayatan a makakita iti dara idi nagkinnuripaspas dagiti manok.
Nagsardeng ti pinnarakapak dagiti manok ket agpadada a napakleb ken nakaukrad dagiti payakda iti tengnga ti gradas. Dimmarup ti sentensiador, tinukmaanna ti bukot dagiti manok sa pinagkariona dagitoy. Agkakapsut a simmippit dagiti manok. Indisso manen ida ti sentensiador.
Ngem saan nga immakar dagiti manok iti nakaidissuanda. Nalitemen ti rupada nga agpadpada. Isu a pinagkario manen ida ti sentensiador.
Ti manok ni Ella ti pinasippit ti sentensiador.
“Isa… dalawa… tatlo!” Nagbilang dagiti dehadista.
Nupay agtibtibbayo, nagpalakpak ni Ella. Nakagin-awa met ni Elmer.
Inngato ti sentensiador ti manok ni Gino ket intayana ti manok ni Ella.
“Isa…”
Indisso manen ti sentensiador dagiti manok. Nagkidemen ti manok ni Ella idinto ta nagdisso ti sippit ti manok ni Gino iti daga a sagsaggaysa ti dadakkel nga angesna.
Binagkat manen ti sentensiador dagiti manok sa pinagkariona dagitoy.
“Isa! Dalawa! Tatlo!”
Nagpalakpak dagiti dehadista.
Insublat ti sentensiador ti manok ni Gino.
Agbissayoten ti ulo ti manok ni Gino. Gapu itoy, intupak bassit ti sentensiador tapno maungaran. Binaliwanna nga inkario.
Imbes a sumippit ti manok ni Gino, naglayon ketdi a nagtillayon ti nakangisngisiten nga ulo daytoy.
“Huwag mo nang buhayin ang patay!” adda nangkantiaw iti sentensiador.
Kasla awan nangngeg ti sentensiador. Indissona ti natayen a manok ni Gino. Kasta unay met ti rungiit ni Elmer nga immasideg ket inawatna ti manok ni Ella.
Timmakder ni Ella ket agdirdir-i a nangitayag kadagiti gemgemna. Nakapigpigsa met a sipsipat ti impaay dagiti mammallot kenkuana.
Kasla bumtak met ti barukong ni Johnny iti ragsakna uray no awan pustana. Ngem dina nauray ti abrasa ni Ella. Kasano ngamin ket di pay ketdin nalagip ti balasang iti panagdardaras daytoy a nagturong iti ridaw tapno kitaenna ti manokda.
Napigpigsa manen ti palakpak ken katkatawa a nangsabat ken ni Ella idi makadanon iti ‘yan dagiti kaduana. Nag-flying kiss met sa sinangona ti manokna iti saklot ti para agas. Idutdutdotanen daytoy ti sellang ti manok ni Ella.
“Mabubuhay kaya?” sinaludsod ni Ella. Nagrukob a nagsammaked kadagiti tumengna.
“Tingnan natin. Malalim, eh!” insungbat ti para agas. Inkurikorna ti sinipitna a kapas iti sugat ti manok. Nagkarekkek ken naggulagol ti nasaktan a manok. Inikkan ti para agas iti mitsa ti sugat idi daitenna daytoy.
Malaksid iti sellangna, naray-ab pay ti kinarakaran ti manok. Siaannad ti agag-agas a nangdait iti sugat sa winarakiwakanna iti pulbos nga agas.
“Kung buhay pa pagkaraan ng dalawang araw, baka mabubuhay pa,” kinuna ti para agas. Nupay kasta, impaganetgetna a saanda a pakanen ken painumen iti las-ud ti uppat agingga iti lima nga aldaw.
“Baka mamatay!” Naasian ni Ella.
“Saan, “ ni Elmer ti simmungbat. “Ad-adda a matay no pakanen ken painumen.”
Nagsubli da Ella ken Johnny iti ringside. Agalas singkon iti malem. Agbuenas manen ti liamado. Kinapudnona, maysa kadagiti nangabak ti kaparis ti immuna nga impangabak ni Bitangcol. Gapu itoy, kalipikadon ni Bitangcol a mangabak iti pot money wenno premio. Adda pay sangaparis nga entry-na.
Iti Karpa Street, no kuan kitaen ni Mang Bianong ti relona. Napakannan dagiti manokda ket ur-urayenna laengen a maibus ti dadduma dagiti inyalisonna iti pangananda a sobra dagiti di nakaibus iti intedna a kanenda sa agpainum.
Itay lukluktanna ti ruangan, kellaat a nagkukutak dagiti manok ket impagarupna nga adda nakastrek a pusa a kinabuteng dagiti manok. Wenno adda nakitada nga uleg. Adda pay la ngamin makitkitada a ngumisit nga uleg iti mini-farm.
Ngem awan met ti nakita ni Mang Bianong itay makastrek a rumbeng a patbutngan dagiti manok. Ket madamdama, nalagipna da Ella. Naabakda ket nagparikna kadagiti pinanawanda ti pannakatayda? Yad-adayom, nakuna met la ni Mang Bianong idi agangay ket nangkauden iti pagpakanna a conditioner iti sako sa linaokanna iti Ready to Fight ken Platinum. Agpapada ti impakanna kadagiti manok ta dina ammo no ania ti ilalaok ni Dex iti kanen dagiti ikonkondision daytoy.
Iti balayda, maisardeng latta ni Manang Mameng ti panaggansiliona a sumangsango iti telebision no makangngeg iti andar ti lugan. Ket no nakalabasen ti lugan, ituloyna met laeng ti obrana, a pampanunotenna no ania ti aramidenda tapno matallikudan ni Ella ti pallot.
Paksiatenna da Elmer, Dex, ken Jong? Ngem nakasingsingpet ken nakadaydayaw dagitoy kadakuada nga agassawa. Kasla pay ketdin kameng ti pamiliada dagitoy. No panangisakitda ken ni Ella ti pagsasaritaan, awan ti makaitured a mangrasaw iti balasang, uray dagiti agdindinamag a pilio dita highway ta kaamakda dagiti tallo aglalo ken ni Elmer. Naminsan a nagkukuyog dagiti uppat a napan iti groseria dita highway, adda istambay a nangipig ken ni Ella sa pinidilna ti patong ti balasangna. Napaikkis ni Ella iti kigtotna. Inrakus ni Elmer ti takiagna iti tengnged ti istambay ket kasta unay ti al-al da Dex ken Jong idi sinardenganda a tinambor ti tian ti istambay. Kasta ti inistoria ni Ella idi sumangpetda kalpasan a naala ti barangay ti palawagda.
Agalas saisen idi makaiwakas ni Mang Bianong iti mini-farm ngem nalawag pay laeng. Simmardengen ni Manang Mameng nga aggansilio ken rinikpannan ti telebision tapno makainana dagiti matana.
“Awan pay ‘diay anakmo?” impasabat ni Manang Mameng.
“Di pay nailaban amin nga entry, a!” insungbat ni Mang Bianong. “Baka di pay nailaban ti maysa a manokna.”
“Apay, awan ti agar-arem kenkuana?” kinuna manen ni Manang Mameng.
“Adda, ni Johnny!” inyisem ni Mang Bianong.
“Oh?” Ngimmato dagiti kiday ni Manang Mameng. “No dinan sa pay naibaga ti riknana!”
“Ngem madlaw nga adda riknana ken ni Ella. No awan, saan koman nga agdadael iti oras a mangkuykuyog i’ta anakmo. Agasem, rikpanna lattan ti klinikana no kasapulan ‘diay balasangmo ti serbisiona?”
“Hmmp! Panagkita ken panagriknak, dina pay naipug-aw ti riknana. Idi damo, naisipko a ni Johnny ti maysa a makabaw-ing iti atension ni Ella. Siempre, propesional ket adda latta maibagana a mabalin a makaimpluensia i‘ta anakmo. Ngem, ne, isu met ti naimpluensiaan. Ania ti aramidenta, aya, tapno ituloyna ti agbasa?”
“Ibaonta idiay yan ni manongna,” insungbat ni Mang Bianong.
“Isu met la nga isu. Namak payen no mapanunotna ti sumrek bayat ti panagbakasionna? No maimasanna ti umawat iti sueldo lalo no dakkel, dinan ikaso ti panagtuloyna nga agbasa. Kasta dagiti kasinsinda idiay Sacramento.”
“Uray ta hobby, paglinglingayanna laeng. Inton maumaanna, ta awan met ti tumaud a kabarbaro a banag iti pallot, subliannanto ti panagbasana.”
“Ayna, Bianong, kasta met ti kunam idi agar-aremka. Paglinglingayak laeng, maumaakto met laeng, kunam. Ania ti napasamak? Dimo naumaan ti panagipallotmo kadagiti manokmo, ngem naumaam ti bukodmo a pannakipallot!” Dinanog ni Manang Mameng ti abaga ni Mang Bianong.
Maraisem ni Mang Bianong a nangkudkod iti ulona. Apay a nagturong ti saritaan iti daydiay? nakunana laengen iti panunotna.
Iti Sta. Ines, dandanin madanon ti batang ti maika-48 a soltada, ti laban ti maikadua a manok ni Ella.
“Mapantan,” kinuna ni Dex ken ni Elmer. Inruarna ti alimbuyogen iti kulongan.
“Madamdama bassit,” insungbat ni Elmer. “Tallo a soltada ti sarunuentayo. Bay-am nga umuna ti kalabantayo a mangtadi iti manokda tapno awan a pulos ti kettang ti manoktayo no maibbatan.”
Agalas sieten. Adun a pumapago ti nagawid isu a nakatugaw aminen dagiti nabati a pakaibilangan dagiti tahor, nakaipangabak iti entry ken adda pay nabati a puonanna a kayatna ti makaabrot, ken dagiti nakidkidan iti bolsa a mangur-uray laengen iti resulta dagiti maudi a laban tapno makaambingda iti barato a pagpleteda nga agawid.
Nagkuyog da Elmer ken Dex nga immuli iti ring idi madanon ti batangda. Agmaymaysa ti nangatar ken ni Elmer nga immuli. Nagtarus daytoy iti puesto ti Meron ket ammo lattan ni Elmer nga adda karga ti kalaban ti manokda. Gapu itoy, binatoganna ni Ella ket sineniasanna daytoy. Inulit met nga insenias ni Ella ti onse. Idi asitgan ti kasador, inanayan ni Elmer iti five-five ket nagbalin a sixteen five ti paradada.
Patas laeng ti innawag iti Meron ken Wala. Ngem idi makauli ti kadua ti kalabanda, immarimbangaw dagiti liamadista ket nalmes ti awag dagiti dehadista. Ket nasdaaw ni Elmer idi mabigbigna ti immuli a nangala iti brown red a kalaban ti manokda manipud iti nangyuli iti daytoy. Maysa kadagiti tao ni Bitangcol. Kayatna a sawen, maikadua nga entry ni Bitangcol ti kalabanda.
Walopulo ribu ti parada ni Bitangcol. Gapu itoy sineniasan ti kasador ni Elmer nga idissona ti Black Alabama tapno mamingmingan dagiti dehadista. Kunam pay, nagkontra barata idi makita dagiti tao a nataytayag ti manok ni Ella.
“Wala! Wala! Wala!”
“Pu-siyam! Pu-siyam! Pu-siyam!”
“Kasano, ‘balayan?” kinuna ti naluklukmeg a lakay sa pinarukibanna dagiti tumeng ni Ella. “Baka madesgrasia ni Bitangcol, ‘balayan. Kasta dagiti impangabak ni Ella idi naminsan!”
Pinidil ti nakuttong ti lunas a timidna ket pinagsinnublatna a kinita ti manok ni Bitangcol ken ti manok ni Ella a nakatartaraki ti takderna a mangsarsarigsig iti gurong ni Elmer. “Hustoka, ‘balayan. Ngem saan a mangilaban ni Bitangcol iti sinsinan manok no kastoy ti laban!” kinunana.
“Kayatmo a sawen, ti manok ni Bitangcol ti pustaam, ‘balayan?”
“Sika?”
“Awan gumurgura, ‘balayan, manok ni Ella ti pustaak!”
“Siut!”
Ket nagrinnimbaw ti awag dagiti agabalayan a nagduma ti pinustaanda iti umuna a gundaway. Sumangsango ti nalukmeg iti daya, iti laud ti nakuttong.
“Kua-tres! Kua-tres!” inraed ti nalukmeg a nakaimbudo dagiti dakulapna iti ngiwatna.
“Jisss! Jisss!” uray la agpipiok ti nakuttong.
“Hoy, mga gurang, maupo!” adda nagriaw iti akinlikud a tugaw.
Nagkakatawa dagiti tao ket impapainayad dagiti dua a lallakay ti nagtugaw. Isuna laeng ta saandan nga agin-innuni.
Natikaw met ni Johnny. “'Sinno ti liamado?” sinaludsodna ken ni Ella.
“Liamado iti pusta ni Bitangcol, ngem datayo ti liamado kadagiti pumupusta,” inlawlawag ni Ella.
“Makaulaw!” kinuna ni Johnny a mangkudkudkod iti ulona.
“Ania, huston?” sinaludsod ni Dex kalpasan ti panagpinnasikadda ken ni Elmer.
“Sige pa. Kulang pa sa galit!” kinuna ni Elmer. Inubbana ti alimbuyogen, inapputna ti rupa ti manok sa pinagliadna ket insarangna ti napingasan a piditpiditna. Pinasippitan met ni Dex iti namitlo. Kalpasanna, binaliwanda a pinagsinnikad dagiti manok. Uray la pumlatok ti daga nga ikup-ay ti alimbuyogen a bigla nga immingar.
“Sige, bumabakan. Narigat no sobra ti uyongna ta madadael ti diskartena,” kinuna ni Elmer.
Iti Meron, apagbiit laeng ti panangpasippitda iti brown red ni Bitangcol. Itay pay nga immulog iti gradas ti nagpasippit. Gapu itoy, ammo lattan ni Elmer nga agresibo ti kalaban ti Black Alabama.
Sineniasan ti timer ti sentensiador. Sineniasan met ti sentensiador dagiti handler tapno ikkatendan ti baina ti tadi dagiti manokda.
Immuna ti Meron a naikkat ti bainana ket daytoy ngarud ti immuna a napunasan ti tadina. Kalpasanna, nagtakder ti sentensiador iti nagtengngaan dagiti dua nga uged iti tengnga ti gradas. Nagsenias manen ti timer.
“Okey!” kinuna ti sentensiador a bulonna a pimmanaw iti nagbaetan dagiti agibbet.
Pudno ti atap ni Elmer. Inibbatan ti para ibbet ni Bitangcol ti manokna iti las-ud ti uged. Siaalisto met a nagsanud ni Elmer ket inibbatanna ti manokna iti asideg ti fiberglass a diding ti gradas sa nagkamang iti kubong. Limteng ti ulimek.
Timmaray ti brown red a dimmarup ket kunam la no naigayang a nangballasiw iti Black Alabama. Kimleb ti Black Alabama ket nagtartarus ti brown red iti diding. Adda nanakliing.
“Patay!” kinuna ti maysa a pimmusta iti manok ni Bitangcol.
Iti nagtugawanna, uray la nagkiet ni Bitangcol. Ammona, nauped ti dawis ti tadi ti manokna a naitama iti fiberglass wenno natippingan ti tirad ti tadina.
“Siet!” inridis ni Bitangcol a bulonna a nanglinteg iti panagtugaw. Uray no saan a natippingan ti tadi ti manokna, ammona a dakkel unay a bentahe ti kalabanna dayta. Numona ta naipaskil a matuloy ti laban uray no natippingan wenno natukkol ti tadi.
Iti nagtugawanna, makais-isem ni Gino a no kuan mangtaldiap ken ni Bitangcol a likba ti abagana a kumitkita kadagiti manok. Ammona nga iti ania man a kanito, mapasagen ti manok ti karibalna ta saanen a maiwekwek ti tadi daytoy. Maymaysa laeng ti ammona a pangabakan ti manok ni Bitangcol, no mapat-ilan ti ulo ti manok ni Ella ket tumaray. No saan, masugatanna ti bagina. Mapasamak daytoy no nauneg unay ti pannakaikabit wenno turong ti tirad ti tadi, banag a manmano a mapasamak kadagiti beterano a labahero.
“Ayots!” dinanog ni Elmer ti angin.
Nagariangga dagiti agbuybuya a nakadlaw iti napasamak iti tadi ti manok ni Bitangcol. Nagiinnapir dagiti pimmusta iti manok ni Ella idinto ta nagtabbaaw dagiti pimmusta iti manok ni Bitangcol.
Iti nagtugawanna, lininteg ni Ella ti panagtugawna ket agtibtibbayo a nangmulengleng kadagiti manok. Dina maawatan no apay nga agaariangga dagiti agbuybuya.
Iti sabali a bangir, naggarakgak nga agsipsipat ti nalukmeg kadagiti agabalayan. “Maustelkan, maustelkan! Sige, arisadsademon ta mapistin ti 'ninana tapno agulimeken dagiti tanga a pimmusta kaniana!” inyiriagna.
Kasla napitik ti lapayag ti abalayanna ket kinemkem daytoy ti sangina. Kinusilapanna ti abalayanna, ngem saan a nakita ti naud-udi ta kunam la a makibokboksing nga umariwawa a mangbuybuya kadagiti manok.
Inistret ti brown red ti manok ni Ella. Naglisi iti kanigid ti manok ni Ella, nagbuelta a dagus sa tinukmaanna ti ipus ti kalabanna ket intugawna ti nagkuripaspas. Ania pay, ad-addan ti riaw ken palagapag dagiti dehadista.
Ngem saan a nagpaatiw ti manok ni Bitangcol. Limmagto ket natiritir ti ipusna nga inggawid ti kalabanna. Iti apagkirem, nakapagsinnangon dagiti manok ket kunam la no agar-arnis dagiti tadida iti panagkinnusayda. Ad-addan ti riaw ken palagapag dagiti agbuybuya. Ammo dagiti pimmusta iti manok ni Bitangcol nga adda latta magudilan ti tadi daytoy uray no natippingan, kas pagarigan, ti tadina.
Pagammuan la ta nagtalna dagiti manok. Pinandagan ti manok ni Bitangcol ti napadata a manok ni Ella. Saanen nga agpulsot ti riaw, sipsipat ken palagapag dagiti agbuybuya.
Uray la immayas dagiti tumeng ti sentensiador a nakaparintuod a dimmarup. Siaalisto a nangpungot iti bukot dagiti manok. Ngem bayag la a nabagkatna ti manok ni Bitangcol, nagkuripaspasen daytoy. Inibbatan ti sentensiador ti manok ni Bitangcol sa siaalisto nga immadayo.
Imkis ni Ella a rimkuas iti nagtugawanna. Inngatona dagiti dua a gemgemna ket rinapidona ti angin.
“Yesss! Yesss! Yesss!” Inriaw met ni Elmer. Kunam la no toro a nakalusot iti koral. Nagbuatit a rimmuar iti kubongna ket aggargarakgak a nangala iti manokda.
Iti pagbambantayanda, nagkinnita da Jong ken Dex iti bumtak ti nakapigpigsa a riaw ken sipsipat. Ammoda lattan ti kayat a sawen daytoy ket kellaat a nalipatanda ti bilin kadakuada a saanda a panawan dagiti manokda. Naglumbada iti agdan ti gradas. Innala ni Dex ti manok ken ni Elmer ket agririaw nga agtartaray a nangyulog iti daytoy. Agriraw met ni Jong a nangbittatay iti manok ni Bitangcol tapno mapanna palamaw ken padalusan kadagiti matangtangdanan nga agdalus kadagiti maabak a manok.
Iti nagtugawanda, kasla maar-arsangan a bunot ti risaw ti ngiwat ti naluklukmeg a lakay. “Dugyot! Nengneng! Ti la mapuspustaanyo ngamin. Apay, saan a maabak ti manok ni Bitangcol? Wa-ha-ha!”
“’Ditmo! Pangas!” indayamudom ti nakuttong ket pinanawannan ti abalayanna.
Binilang ti nalukmeg a lakay ti nakolektana nga inabakna. Tinangadna dagiti teenager nga agisursursor kadagiti lakoda iti bleachers. “Intan, ‘balayan, ta kapatangta ti labahero nga adda kontakna kadagita nga ubbing ta agha—“ Dina naituloy ta awan gayamen ti abalayanna. Nagtalangkiaw. Talaga a pinanawanen ti abalayanna.
Alas otson idi malpas ti pallot. Impakaammo ti management a lima dagiti nagkampeon a pakaibilangan da Ella ken Bitangcol. Perfect score ngamin ti maysa nga entry ni Bitangcol. Dayo dagiti tallo a nagkampeon. Saggayssa laeng ti nangabak iti dua nga entry ni Gino.
Inaribungbonganda ni Ella bayat ti panangpaagasda kadagiti iwa ti manokda a gapuanan ti natukkol ti murnongna a tadi ti manok ni Bitangcol.
“Ang suwerte mo, bata!” kinuna ti maysa a tahor.
“Kaano laeng a nangrugi daytoy nga ubing, napadasannan ti nagkampeon.”
“Nagasgasat ngem ni Mang Bianong!”
“Uray pupuotenyo, adayo ti magteng dayktoy nga ubing!”
“Bakit pinasok niya ang pagsasabong? Ang gandang bata. Sana mag-aral na lang!”
“Suerte ketdi ‘ta boyfriend-na!” adda met nagkuna a nangisungo ken ni Johnny.
Nangngeg met ni Johnny ket sinalemsem ti luy-ongna. Anian! Pumayso la koma, ama, nakunana iti unegna.
Saanen a nagbayag da Ella idi maagasan ti manokna. Naala metten ni Elmer ti premiona.
Idi makaruarda iti galiera, ginatang amin ni Ella dagiti padaw a lako ti maysa a tindera. Gimmatang pay iti dua a kilo a letson a baboy.
“Birthday ni Boss Bianong?” kinuna ni Elmer.
“He-he-he! Pulotanyo!” insungbat ni Ella. Aggargarakgak a naginnapir da Jong ken Dex.
Pinataray metten ni Johnny ti kotsena.
(Maituloyto)
Napalabas a paspaset: 1 | 2 | 3 | 4 | 5 | 6 | 7 | 8 | 9 | 10 | 11 | 12
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
