Sarindaniw ni AMADO I. YORO

(Mairuknoy kas pakalaglagipan ken ni Mario Abinsay Albalos a pimmusay idi Marso 3, 1991, ala una iti parbangon ti Domingo. iti St. Francis Hospital, Honolulu, Hawaii. Kas maysa kadagiti kasingedan a gayyem ni MAA, maysa ti autor kadagiti adda iti sibay ni MAA a nakaidda iti kama iti ospital iti dayta a parbangon a simmina.)

Adda saem-saning-i a simngay iti parbangon nga apagligsay
Kalumlumba ti taraudi a pitik, giteb-pulso ken sennaay
Imatang dagiti maibilang a kadaga-kasinged-kapagayam
Riwet ti Marso 3, maudi a darikmat sanaang iti panagpakadam.
[Naisurat, kabsat iti pluma, naisurat: Ecclesiastes 3: adda panawen

Ti amin a panawen dagiti amin a bambanag iti sidong ti biag:
Dagiti panagmula, dagiti panagani, dagiti panagragsak
Wenno panagliday ken panagsangit, dagiti pangrugian ken paggibusan
Uray iti Ultimo Adios ni JPR, morir is descansar, ti patay isu ti inana]
Ket no dagiti panagdaliasatmo kas makidagdagus-agpagpagna
Dimtengdan dagiti ipapanaw ken panagpakada
Imbag koma ngarud ta nasarakam dagiti bambanag iti misionmo
Ket ti dagsen dagiti awitmo iti abagam inka metten maidisso
Tapno aginanaka metten kadagiti adu a puyat ken bambannogmo
Idawdawatandaka met iti nasam-it a pannaturogmo
Iti pannakaimbiernam, iti lamiis ti tanem, imeng ti langitmo
Awan koma ti tubeng, makaay-ayoka koma iti sidong ti Apo.
[Naikari, kabsat iti pluma: awan ti makatawar-makatengngel ti biag
Saantay' a matagikua. Tapok ti naggapuan; tapoktayo a pumulang]
Adda dagiti addang a pakarukodan ti kinaasino i'toy a biag
Adda dagiti tugot a mangibati ti lemma ti kalman
Adda dagiti dallang nga agbukar iti laglagip iti ladawan
Gapu iti kinamaingel ti prinsipiom: nasionalismo, patriotismo
Romantisismo, realismo, simbolismo, ken kinabannuar
Dagiti liniam ti naindaklan a prosa a naisuratdan.
Adda dagiti kansion ken sonata iti panagpakadam: samiweng
Adda dagiti magnum opus, prosa ti biag: dayaw
Adda dagiti kaipapanam iti nalikudam a gimong: integridad
Adda kayaw nga imbatim iti gapuanam: pagtuladan
Similia ti kultura-literatura Ilokano: nakatudo daytoy a pluma.
[Naikeddeng, kabsat iti pluma: awan ti pilien ti dawel
Aplat ti biag. Naikeddeng. Naikari ken naisurat]
Ket dagiti ipapanawmo ta isudan ti inka metten panaginana
Bay-am ta dagiti aramidmo iti agbiag no asinoka
Bay-am a maituloy a suratenda ti epiko ken lirika
A kaibatogan sam-it-sudi iti nakatagibiam darepdep ken sirmata
Bay-am nga agrimat ti pintas ken daeg natennebam a daga
Bay-am a maukagto ti biagmo anag ti kaawanmo: sika latta.
[Nabatad, kabsat iti pluma, dagiti arapaamo iti Samtoy
Di mailibak, kaniak, sika-siak kontemporario-kasinged-kamannurat
Ditoy a daga, nupay ganggannaetta a dua, ammok, ammok
Dagiti arapaapmo: komunidad, gobierno, panagsuratan]

Imbuksilam, impakitam iti aramid ken garaw: OFCC, ISAH, Tri-Media Council
Naibugasda iti SS Marinero 1189; naipeksada iti Aloha Saluyot
Rimkuasda iti Hamog sa Dibdib, Matnag-Mablo, nailabagda iti prosam
Sika a mannurat, sika a mannaniw, sika a dramaturgo
Sika a nobelista, nagtagipuso, nagtagiduri: sika dayaw.
[Di mailibak, pasetnaka ti Dakilang Ugat Awards
Naibinggasda metten iti Pluma: Siit ken Rosas
Thomas Jefferson Award]

Ammomi, ammok, adda kinatured kinamalalaki a riknam
Iti panawen iti kappia ken gubat, iti Diego Garcia wenno Vietnam
Sarikedked ti daga, talna, wenno talna, nagserbika iti pagilian
Natibkerka a pakalatkat; inspirasion kamannurat, kadaram
Iti kinakayumanggim, maysaka a rimat-sirib
Naisurat drama ken sarsuela ti biag iti papel ken pluma
Dagiti entablado ti sirib, dayaw ken bukel iti Amianan.
Natalna a panaginanam: naulimek koma ‘ta kararuam.

---

MANIPUD ITI AUTOR:

Naam-ammok ni Mario babaen iti Bannawag. Ket idi Marso 20, 1976, iti Holiday Inn-Airport, ti umuna a panagkitami iti personal. Sangaili idi iti GUMIL Hawaii iti panagsapata dagiti opisial a pakairamanak. Iti Pearl Harbor, Hawaii ti pakaidestinuanna idi a kas Petty Officer ti US Navy, manipud iti kaudian a destinona idiay California. Nayanak ni Mario idi Oktubre 30, 1950 idiay Cabaroan Daya, Vigan, Ilocos Sur. Pimmusay idi Marso 3, 1991 iti tawenna 40.

Maysa kadagiti kasingedan a kabsat, pagaya,, kamannurat, ken lider ti komunidad ni Mario. Nayasidegak iti Vigan gapu kenkuana, ken da Felipe Abinsay, Jr. ken Priscilla Dela Cruz, a nakaigapuan ti pannakabuangay ti Mario Abinsay Albalos Foundation a maawagan itan iti Mario Albalos Literary Awards nga isponsor ti tinawen a pasalip iti sarita. Adu a banag ti nakayasidegak iti Vigan, maysa a gapu ti awis ni Ms. Jenny Alcausin iti grand opening ti Mario Albalos Library and Museum idiay Cabalangegan-Cabaroan Elementary School idi Pebrero 2, 2018 a kaduami dagiti nasinged a pagayam, da Cles Rambaud, Benjamin Pacris, Prescillano Bermudez, Rudy Contillo, Joe Somera, Alma Campos Somera, Myra Yoro, ken dadduma pay.