Maipaayan ni Dionisio Soliven Bulong, editor-in-chief ti Bannawag iti 27 a tawen, iti Dangal ng Panitikan 2026 ti Komisyon sa Wikang Filipino (KWF) para iti Kategoryang Indibidwal, kas paset ti pannakaselebrar ti Bulan ti Literatura 2026.
Maipaay ti pammadayaw bayat ti KWF Araw ng Parangal 2026 a maangay inton Abril 29, 2026 iti Citadines Roces iti 100 Don A. Roces Avenue, Obrero, Siudad ti Quezon. Makaawat ni Bulong iti busto ni Francisco "Balagtas" Baltazar, plake, ken medalia.
Ti Gawad Dangal ng Panitikan ti kangatuan a pammigbig iti nagapuanan iti literatura ti Filipinas wenno maysa a lifetime achievement award. Padpadayawan daytoy dagiti kangrunaan a mannurat ken gunglo dagiti mannurat a nangipaay iti panangipateg iti kultura, pakabigbigan, ken tawid ti puli, malaksid pay iti naisangsangayan a panangitampok iti bukod a sao wenno katutubo a pagsasao.
Maysa kadagiti kalaingan a sumurat iti sarita wenno piksion nga Ilokano, am-ammo pay ni Bulong a kas nobelista babaen dagiti makapakatawa a nobelana a pakaibilangan ti nalatak a serye ti Fighting Pogi a pakasaritaan ken pannakigasanggasat ti maysa nga Ilokano a boksingero a patanor ti Simbaluca (maysa nga away ti Sta. Teresita, Cagayan).
Nangrugi a kas proofreader ti Bannawag, naital-o a kas editor-in-chief idi 1978 agingga iti panagretirona idi 2005. Nagpaay pay a presidente ti GUMIL Filipinas. (rva)
