Napili a maipaayan ti Gunglo Dagiti Mannurat nga Ilokano iti Filipinas ken Ballasiw-Taaw (GUMIL Filipinas) iti Gawad Dangal ng Panitikan ti Komisyon sa Wikang Filipino (KWF) para iti Kategoryang Institusyon/Samahan, kas paset ti pannakaselebrar ti Bulan ti Literatura itoy a tawen.
Maipaay ti pammadayaw bayat ti KWF Araw ng Parangal 2026 a maangay inton Abril 29, 2026 iti Citadines Roces iti 100 Don A. Roces Avenue, Obrero, Siudad ti Quezon.
Ti Gawad Dangal ng Panitikan ti kangatuan a pammigbig iti nagapuanan iti literatura ti Filipinas wenno maysa a lifetime achievement award.
Padpadayawan daytoy dagiti kangrunaan a mannurat ken gunglo dagiti mannurat a nangipaay iti panangipateg iti kultura, pakabigbigan, ken tawid ti puli, malaksid pay iti naisangsangayan a panangitampok iti bukod a sao wenno katutubo a pagsasao.
Makaawat dagiti mapadayawan iti busto ni Francisco "Balagtas" Baltazar, plake, ken medalia.
