Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-16 a Paset)
ITI dayta a sardam, saan a binuya ni Manang Mameng dagiti kaay-ayona a telenobela. Idi makadigos kalpasan ti panangrabiida, linabsanna laeng ni Mang Bianong iti sango ti telebision ket naglayonen iti kuartoda. Ammo met ni Ella nga agpaspasugnod ni Manang Mameng iti igagatangna manen iti manok, ngem inkeddengna a palamiisanna pay ti inana sananto ay-aywen. Isu nga immuli apaman a nalpas a nangan tapno kontakenna dagiti dadduma pay a farm.
Saan met a mayulo ni Mang Bianong ti buybuyaenna, ngem tiptipdenna ti sumrek iti kuartoda. Kas ken ni Ella, kayatna a lumamiis pay bassit ti ulo ti asawana sa mapan iti kuartoda.
Nalpasen ti padamag iti alas dies idi iddepen ni Mang Bianong ti telebision. Addan ni Sary iti pagturturoganna iti sikigan ti komedor. Naulimek ti siled ni Ella ngem ammo ni Mang Bianong a sangsanguen pay laeng ti balasangna ti laptop-na. Kinitana nga immuna ti ridaw ken dagiti tawa no nasayaat met laeng ti pannakaiserrada sa tinurongna ti siledda.
Babaen ti lawag ti agkurkuridemdem a bassit a lumabaga a bombilia ti altar, naipasirna a nakasikig ni Manang Mameng a sumango iti diding. Nakair-irut ti panangbalkotna iti bagina iti ules.
NOBELA: Apo Baboy Party-List (6)
Nagsay-a ni Mang Bianong sa immatag a nakadata iti asawana. Nagpaliiw. Saan a naballaway ti panaganges ni Manang Mameng ket ammo ni Mang Bianong a siririing pay laeng ti asawana.
“Inada…” inyumbi ni Mang Bianong sa dimmenden.
Saan a nagkuti ni Manang Mameng. Nagsikig ni Mang Bianong ket inrakusna ti kanigidna iti asawana.
Inwadag ni Manang Mameng ni Mang Bianong. “Dagiti manokmo ti inka kaiddaen!” inkiraudna.
“Ania ketdin ni inada,” impapainayad a kinuna ni Mang Bianong ket dinapadapna ti patong ti asawana. “Pati manok, pagimonanna ketdin. Kas kenka kadagiti orchid-mo, paglinglingayak laeng dagiti manokko. Dimo makita, aya, a manmano a mangitadiak?”
“Sika ti tultuladen ‘ta anakmo, Bibiano, isu a dinak dengdenggen! Ania, paglinglingayan laeng ‘ta rinibu ti pategna a manok? Kaykayatnan ti makigaliera ngem ti ageskuela. Paglinglingayan dayta?”
“Maabrotna met, di ba?”
Nagbanang-es ni Manang Mameng. “Kasta, kasta, konsintirem ‘ta anakmo ta kitaek no pagbanaganyo!”
“Maumanto, uray pupuotem, inada…” Naalumamay latta ni Mang Bianong. “Ammomon dagiti agtutubo, naayatda iti adventure. Agsapsapulda ‘ti pakabigbiganda. Saan nga agbayag, maumadanto manen. Uray pupuotem maumanto met laeng ‘ta anakmo. Isunto payen ti mangiriing iti panagbasana manen.”
“Saankan nga agbaud, Bibiano. Sika ti idolona!”
Kasla nakatosan ni Mang Bianong iti kinuna ti asawana. Sanamagan, nakunana iti unegna. Indagdagsenna ketdi ti panangilutna iti patong ti asawana. Awan ti sabali a mapanunotna a pangsumra iti kinuna ni Manang Mameng. “Inada…”
Saan a naguni ni Manang Mameng. Intukol ni Mang Bianong ti kanawan a sikona ket inagkanna ti likudan ti lapayag ni Manang Mameng.
“Bibiano, dinak yaw-awan!” Nagkiet ni Manang Mameng a bulonna a simmango ken ni Mang Bianong. “Dayta man ti paglaingam!” Kinuddotna ti pus-ong ti asawana.
Nalpas, nakuna ni Mang Bianong iti unegna. Tinto la irugrugim. Ket pinadasna nga urayen daydi makailili a sonata ti koronasion iti piesta ti Buguey. Ngem kas man adda nangyellek: bahala ka sa buhay mo!
Ket kunam la no agtrangkaso a bimmangon ni Mang Bianong iti kabigatanna kalpasan ti no namin-ano a panagsublisubli ni Sary a nangiriing iti pamigatda.
NAISARDENG ni Ella ti panagbasana iti pagiwarnak idi adda agtimbre. Indissona ti basbasaenna iti lamesita sa nagparidaw. Domingo ita ket napan nakitienda dagiti dadakkelna dita Balintawak. Insurotda ni Sary tapno adda agbitbit kadagiti gatangen ni Manang Mameng.
Nakabisikleta a mensahero ti agur-uray iti sango ti ruangan. Nakalukat a sobre ti inyawatna ken ni Ella.
“Thank you!” Umis-isem a nagpayapay iti babassit ni Ella.
Imbes a sumungbat, nakanganga ketdi ti mensahero a nangmulagat kadagiti luppo ni Ella a lalo a pinabusnag ti nalukot ti gayadanna a lumabaga a shorts-na. Di pay napnek, pinaludipanna ti bassit a lennek a puseg ti balasang nga ipaspasirip ti kunam la no nakamtud a kumepkep a puraw a blusana.
Maniakis, nakuna la ket ngarud ni Ella iti unegna a bulonna a nangtallikud iti mensahero a nakalanlanay dagiti matana. Pinanalbaagna ti rikep. Isu pay la ti pannakatukay ti agar-arapaap a mensahero ket pinasiwetnan ti bisikletana.
Kinita ni Ella ti naggapuan ti surat. Sta. Ines Cockpit Arena. Sigagagar a nanguyos iti linaonna a surat.
Aw-awisenda gayam a makipartisipar iti iti 2-cock ulutan para kadagiti nakapadasen a nagkampeon a maangay iti petsa otso ti masungad a bulan.
Nakarikna iti pannakkel ni Ella. “Yes! Yes!” naidir-ina ket inngatona dagiti gemgemna.
Ngem sakbay a makataray a mangpadamag kada Dex ken Elmer, nalagipna nga awan gayam ti nakasagana a dekalibre a manokda para iti awis ti Sta. Ines. Adda intulod ti Ariana, ngem maymaysa. Nangabak kano iti derby ket dandani naipunget ti kanawan a pamayorna iti labanna. Adda pay met ketdi dagiti dati a manokna a dinawatna iti amana. Ngem dina patien a kabaelan dagitoy ti sumango iti kompetision a nagsasanguan dagiti napili a puli. No makipartisipar man iti kompetision a yaw-awis ti Sta. Ines, masapul a kas kadagiti natay a manokna, wenno nalalaing pay dagiti ilabanna.
Nupay kasta, napanunot ni Ella a nasayaat no mangngegna ti kananakem dagiti kaduana—no mangalada pay iti manok iti Derriyab Farm wenno bumirokda iti sabali. Idi ngamin naminsan a rabii a panangkontakna ken ni Derri, impatangken lattan daytoy ti sangapulo ribu a pisos a presio ti agdua a tawenna a Sweater roundhead. Ken adda kanon nangpauna kadagiti adda a patanorna. Sabagay, nadlaw ni Ella ti kellaat a panangipangina ni Derri iti presiona manipud idi imparupana a dagiti laeng manok daytoy ti type-na iti naudi nga isasarungkarna.
Nakalukat ti ruangan ti mini-farm. Nadatnganna da Elmer ken Dex nga agpadpadigos iti manok.
“Ania, madi latta ni Derri a mangkissay iti presiona?” sinaludsod ni Elmer. Inwaywayna ti kapadpadigosna sa dinagasna nga intangad ti tasana iti sagpatan ti kalapaw ni Dex.
“Awan ti mabalin nga iparis iti darisayen a naggapu iti Ariana?” sinaludsod ketdi ni Ella idinto ta inwarasna ti panagkitana kadagiti kaddigos a manok kadagiti teepee.
“Mabalin met ti pumili kadagita manok ni Sir Bianong,” insungbat ni Dex. Inyaonna iti dakkel a timba a napno iti labutab ti digdigosenna a manok. Inammusayanna, inapnotanna ti ipus ti manok sa impisokna iti three by three iti asidegna.
“Parang ayaw tayong bentahan ni Derri, eh!” kinuna ni Ella. “Kasi, presio ti dina kayat ti aglako ti presiona.”
“Sabagay, adda pay nanginngina. Adda kinse, adda beinte. Ngem nasuboken ti patanor dagiti farm a kasta ti presiona,” immuestra ni Elmer. “Suerteka ta inted ti Ariana iti walo ribu dayta,” insungona ti darisayen a naiwayway iti asideg ti kalapaw.
Imbaga ni Ella ti imbitasion ti Sta. Ines. Imbagana pay a para laeng kadagiti nakapadasen a nagkampeon ti kompetision.
“Ne, okey, a!” inkatek ni Dex.
Nagtungtung-ed met ni Elmer. “Masapul ngarud a dekalidad ti entry-tayo, “ kinunana. “Mabalin pay dayta darisayen, uray ibilang ti dadduma a baldado gapu iti pukolna. Ti problema, panggatangantayo iti parisna?”
“Ken ni Derri laengen, a. Natestingen ti palahina,” insingasing ni Dex. ”Kunwari, paripiripam ‘ti namnama! Baka dayta ti mangsolbar iti problema.”
Nagmusiig ni Ella. “Pakpakawan! Diak kayat a yappan ti bagik tapno maaddaanak laeng iti dekalidad a manok. Ti ket madlawko ken ni Derri, saanna nga ammo a pagsinaen ti negosio ken ti el niya sa pakikitungo sa akin. Alam ko naman na may asawa siya. Sinabi ng isang boy na nakausap ko minsan.”
“Padasem manen ti King Ariana Farm bareng kaya ti presioda,” kinuna ni Elmer.
Nagsul-oy ni Ella. “Bassiten ti kuartak. No gumatangak manen ‘ti agpateg iti pito wenno walo ribu, awanen ti pagpuonantayo,” insungbatna.
Nagkatawa ni Dex. Pinagsinnublatna a kinita da Ella ken Elmer. “Solve na ang problema!” inkiddayna.
“Kasano? Adda urnongmo?” sinaludsod ni Ella.
“Adda manen pinaidulin ni Sir Bianong a kuartana. Ninaynayonanna ti inabakna kadagiti manoktayo iti ab-abakenna no mapan agtrebisia.”
Maraisem a nagtungtung-ed ni Ella. “Mano ti iduldulinmo?” sinaludsodna ken ni Dex.
“Eyt tausan!”
“Tama ka, solve na ang problema!” Nakilinnipak ni Ella iti dakulap kadagiti kakaduana. “Awagak ti King Ariana Farm, ita ta awan pay da mommy!” kinunana a bulonna a timmallikud.
Pudno, awan pay da Mang Bianong idi makasubli ni Ella iti balayda. Inawaganna a dagus ti King Ariana Farm. Ni Leo, ti nangitulod iti pukol a darisayen, ti simmungbat.
“May for sale ba kayong tulad ng breed na dinala ninyo sa akin? Oo, si Miss Ella ito, dito sa Karpa Street. At least twenty four months. Talusapi? Isa na lang ang natira a depaleta ang kanan? A, bahagya lang. Pero mailag at maganda ang tayming na pumalo? Ibig mong sabihin, isa lang ang natalo at isang tumabla sa thirteen na magkakapatid, at ‘yan na lang ang natitira? Magkano naman?”
Napasul-oy ni Ella idi mangngegna ti presio ti medio pilay a manok ti King Ariana Farm. Adda inayonna no bulodenna ti kagudua ti kuarta ni Mang Bianong ken ni Dex. Ngem manonto laengen ti mabati a puonanda no mabayadanna ti entry fee? Ken masapul a bayadanna a dagus ti bulodenna ken ni Dex amangan no makalagip ti amana a makigaliera.
“Bawasan mo naman, bossing, total baldado. Hindi na ako tatawad sa susunod. Six na lang, puwede? O, sige, six-five. Okey. Huwag mo nang dalhin sa bahay. Meet na lang kayo ng handler ko. Sa gate ng Karpa. Oo, sige, seven AM bukas. Bye…”
Nagsubli ni Ella iti mini-farm ket imbagana kadagiti kakaduana ti nagsaritaanda ken ni Leo agraman ti panangsabat ni Elmer iti daytoy a masapa no bigat.
“Ngem apay nga adda sagkingna ti alaem?” indillaw ni Elmer. “Okey lang ‘toy pukol ta awan met diperensia ti pannagnana. Ngem ti sagking, uray kasano ti siglatna , maudi iti arangkada ta nabuntog nga agbuelta. Baka kunada a tsopi wenno para paabak ket pumustatayo iti kalabantayo.”
“Ibagatayo a dagus iti kasador, ipakdaarna kadagiti tattao. Addada met kasta a mailablaban, di ngamin? Ipakita met ti handler ti diperensia ti manokna,” inkalintegan ni Ella. “Ken testingentayonto met sakbay a bayadak,” innayonna.
Nagkinnita da Elmer ken Dex, ngem saandan a naguni.
Kinaut ni Ella ti bolsa ti shorts-na. “Bulodek ti three-five ni dad,” kinunana ken ni Dex.
Simrek ni Dex iti kalapawna. Innalana ti salladayna ket kinautna iti supot daytoy ti maysa a sobre. Nangdutdot iti tallo ribu ket lima gasut sa met laeng insublina ti sobre iti pungan. Inyawatna ti kuarta ken ni Ella. Inyawat met ni Ella ti pagbayadda iti manok ken ni Elmer
“Laglagipem, sabtem ni Leo idiay gate ti Karpa tapno saan a makita ni mommy. Pagurayem met idiay ta testingentayo nga umuna ti manok sakbay nga itedmo ti bayadna,” imbilin ni Ella ken ni Elmer.
NABARINGKUAS ni Ella iti panaguni ti selponna iti headboard ti kamana. Kinitana. Ni Leo ti King Ariana Farm ti umaw-awag.
“Hello, Leo! Malapit ka na? Sige, palagay ko, naroon na si Elmer. Magde-deliver ka pa sa Kaybiga? Pero ibitaw ko muna bago ko bayaran. Sige, wait ka ni Elmer sa gate. Text ka lang, okey? Sige, bye!”
Kinalbit ni Ella ni Mang Bianong idi makapamigatda. Maikawalon iti agsapa. Itultuloy ni Manang Mameng ti panagpapugsitna iti para pasabong dagiti orkidiana. Impakita ni Ella ti imbitasion ti Sta. Ines. Nagtalangkiaw ni Mang Bianong sa sinangona ti balasangna.
“Totoo? Ngem awan ti mabalin nga ilabanmo. Saan a sinsinan dagiti entry. Labanan ng mga kampeon!” kinuna ni Mang Bianong ket kinitana ni Manang Mameng iti batog ti nakalukat a tawa.
“No problem, dad!” inkidday ni Ella nga umis-isem. “Addan materials. Inta buyaen ti polisda. Addan ni Elmer!” innayonna ket immunan iti ridaw.
Pinidil ni Mang Bianong ti lunas a timidna. Ti ammo ni Manang Mameng, palpalabsanna ti dina nabasa a pagiwarnak idi kalman sananto isublat ti baro. Ket napaisem idi maisalat ti panagkitana iti stereo component iti nababa a lamisaan iti abay ti telebision.
Nagmasngaad ni Mang Bianong iti sango ti stereo ket sinaggaysana a kinita dagiti CD iti babaen daytoy. Ti koleksion dagiti kadaanan a kanta ken tokar ti pinilina nga insubo iti stereo. Ket idi umaweng ti nalamuyot a boses ni Jo Stafford iti umuna a binatog ti No Other Love, impapainayadnan ti nagparidaw. Ammona, lalo nga inspirado ni Manang Mameng a mangestimar kadagiti mulana no mangngegna ti kanta ket pasurotanna pay iti dayyeng no kua. Saan kadi a dayta a kanta ti patpatokarenna idi nabiitda pay a nagdenna no adda babassit a pinnasugnodda?
Nadatngan ni Mang Bianong da Elmer ken Dex nga agpimpinnasikad kadagiti manok a naggapu iti King Ariana Farm. Agbuybuya ni Ella.
“Laklakay ‘ta darisayen ngem ‘ta dalusapi,” kinuna ni Mang Bianong. “Agpada nga adda diperensiana. Dagita ti materialesyo?” Kinudkodna ti ulona.
“Boss, panoorin mo muna ang bitaw bago husgahan!” kinuna met ni Elmer a nakabagbagas ti isemna. Inubbana ti ipaspasikadna sa nangukrad iti three by three ket impisokna ti manok. “Ipolista ‘ta dalusapi iti pulang linaw ni boss nga ilabantay no Domingo.” Innalana ti dalusapi a puraw ti sakana. Dinagasna dagiti glab a naisab-it iti lansa iti diding ti kalapaw. Impalladawna ti sangaparis ken ni Dex ket inkapetna ti natda kenkuana iti manok ni Mang Bianong.
Pinasippitan ni Elmer ti piditpidit ti pulang linaw. Inngusangos ti dalusapi ti nakagatna a piditpidit ti kapolisna ket kasta unay ti kulipagpag ti manok ni Mang Bianong.
Nagpinnaayat da Dex ken Elmer sa nagsinnanudda. Nagsanud met da Ella ken Mang Bianong.
Damo pay laeng a panagdinnungparda, pinadulang a dagus ti dalusapi a pigsol ti manok ni Mang Bianong. Sa idi bumales ti pulang linaw, naglisi iti kanawan ti manok ni Ella ket inarmalaytna ti kapolisna.
Agkatkatawa a nagtipat ni Ella idinto ta kasta unay ti labaga ni Mang Bianong a nakapapait ti rungiitna.
Naminsan pay a kinnulipagpag, tinukmaanen da Dex ken Elmer dagiti manok. Kinawkawda ti plastik a tabo a naglaon iti danum ket diniram-osanda dagiti manok.
“Ania, nadlawyo kadi nga adda pilay ti naggapu iti Ariana?” kinuna ni Elmer nga agkatkatawa.
Saan pay laeng a mamati iti nakitana, innala ni Mang Bianong ti dalusapi ken ni Dex. Pinatallikudna sa inunnatna dagiti saka ti manok. Pudno, medio sillakong ti kanawan daytoy ngem normal met ti garawna a maipolis. Dinilpatanna ti kanawan a tanganna sa inlidlidna kadagiti siksik ti manok. Nagtungtung-ed a nangyawat iti manok ken ni Dex kalpasanna.
“Doble apput. Adda pay gettang dagiti akimbaba a sikksik iti sikigan ti kawwetna,” kinuna ni Mang Bianong. “Sige, laban! Saan unay a kadakkelen ti paradana, a, ta adda ngarud diperensia ti kanawanna.”
Innala ni Elmer ti pukol a darisayen iti takkab ket kinaptanna iti glab. “Alaem ti lakay nga idaw a ganador ni boss. Kitaentay' man no nagsublin ti laingna,” kinunana ken ni Dex.
“Wen, nabayagen a diak nakita daydiay. Pangiwaywaywayam, Dex?” Impalawlaw ni Mang Bianong ti panagkitana.
Inlibas ni Dex a pinarukiban ni Ella. Kiniddayan met ni Ella ni Dex.
Tinurong ni Dex ti maysa kadagiti flying pen. Idi agsubli, ubbanan ti idaw a nakadungdungrit dagiti gurongna ken kusokuso ti dutdotna.
Napanganga ni Mang Bianong iti langa ti dati a nakatartaraki a ganador nga idawna. “Apay, dimo digdigosen? Dimo patpatomaren ‘ti bitamina?” Minulagatanna ni Dex.
“Hamman, boss!” Inlisi ni Dex dagiti matana. “Ikonkondisionko ngarud isu nga adda iti flying pen tapno pumigsa dagiti payakna, ken sumlep kadagiti maselna dagiti tomtomarenna a vitamins!”
Saanen a naguni ni Mang Bianong. Kinaptan metten ni Dex iti glab ti idaw.
Iti umuna a panagsabatda iti aire, akinngato ti idaw ket inipitna ti darisayen.
Nagsipat ni Mang Bianong. “Okey ka na, bata!” kinunana.
Ngem apagdissoda, tinukmaan ti darisayen ti idaw, nagilad sa kinuripaspasanna ti kapolisna.
“Wowow!” Batang met ni Ella ti nagtipat.
Intuloy dagiti manok ti nagginnelgel ket agsinsinnublat met da Ella ken Mang Bianong nga agsipsipat. Awan tagtagari da Dex ken Elmer nga agbuybuya, ngem madlaw ti pannakapnek kadagiti isem ken tungtung-edda.
“Tama na. Okey met gayam dagiti material!” kinuna ni Mang Bianong. Innalana ti manokna ken ni Dex. Nagkusipet idi madlawna ti kinalag-an ti idaw ken ti kinatadul ti tulang ti pitsona.
“Pakpakanem wenno saan?” Minulagatan ni Mang Bianong ni Dex.
“Boss, puro pangkondision ti ipakpakanko,” nagdumog ni Dex.
“Pinurgam?”
“Hamman, boss!”
Nagkinnita da Ella ken Dex.
Nagngilangil ni Mang Bianong. “Ikulongmo pay laeng ta bombaem ‘ti bitamina. Dry feeding pay laeng. Ikkam iti Super B Complex ken sagpaminsan a calcium. Ibilagmo iti bigbigat sa ikulongmo. Dim—“ Dina naituloy ta naguni ti selpon ni Ella.
“O, Leo, sige. Papunta na si Elmer!” kinuna ni Ella. Tinung-edanna ni Elmer.
Apaglikud ni Elmer idi mabuak dagiti nakakulong iti iket a binubongan ni Dex iti daan a yero iti igid ti sinabaan iti akin-abagatan a pingir ti mini-farm. Naglagaw ni Dex idi adda nakasari a maysa, a sinaruno ti dua, agingga iti nakaruar amin dagiti sangapulo a bumaro ken dumalaga.
“Addan sa uleg!” kinuna ni Dex. Nangala iti sangaputed nga uno por dos iti ar-aramidenna a kulongan ket tinarayna ti naggapuan dagiti manok. Pudno, adda uleg-tukak nga agkarkarayam a rummuar iti kulongan, agturong daytoy iti karuotan. Ngem idi basnotanna koman, immayas iti karuotan ti uleg ket saannan a nasiputan ti nagturongan daytoy.
Pagpiaanna, naamo dagiti nakabulos a manok ket inyabog ida ni Dex iti kulonganda. Timmulong ni Mang Bianong. Ngem naimayeng idi naikulong aminen dagiti manok. Miningminganna a saggaysa dagiti bumaro. Kalpasanna, tinurongna ti nakaiwaywayan ti idawna sa nagsubli iti ‘yan ni Dex a mangtartarimaan iti rimmuaran dagiti manok. Timmadem dagiti matana.
“Dex, agpudnoka. ‘Sino ti akinnakem nga ag-breed-ka ditoy?”
Kasla adda nangitalmeg iti ulo ni Dex. Saan a simmungbat. Tinaliawna ketdi ni Ella a nakadalikepkep a mangbuybuya kadakuada.
“Imbilinko idi a dikay' agiserrek iti upa ta makalibas dagiti maikonkondision nga agpadakay. Liblib-atendak met gayam. Isu met la a di maikonkondision dayta idaw ta ipampamanadam.”
“Kua, boss…” tinaliaw manen ni Dex ni Ella.
“Dimo ibaga a saanna a putot dagita!” Intudo ni Mang Bianong dagiti bumaro a bin-ig nga idaw.
“B-baka naginawan ti inada ‘ta idaw, boss!” Iti pannakaipasuli ni Dex, no ania la ditan ti naitangtang-abna.
Dandani bimtak ti paggaak ni Mang Bianong iti kinuna ti helper-na. Nupay kasta, naikagumaanna ti nagpormal. “Mabalinka a pagbakasionen nga awan sueldom gapu iti pananglabsingmo iti bilinko…”
Nagdanag ni Dex. Kasano ngamin ket nagatiddogen ti listaan ti utangna iti tianggi dita kanto, a kaaduanna ti empelayt a dagasen ni Elmer sa pailistana iti nagan ni Dex.
Kayat nga ibaga ni Dex a ni Ella ti nagbilin nga ipamanadana ti upa nga insangpet ni Elmer. Ngem nasiputanna ti panangkidmat ni Ella kenkuana a bulon daytoy nga immasideg sa kinawitna ti takiag ti lakay.
“Dad, patawarin mo na si Dex. Ako ang nag-utos sa kanya!” inggarikgik ni Ella. Insadagna ti ulona iti puon ti takiag ti amana. “Ang ganda kasi ng manok mo! Bareng adda umala iti kinasiglatna!”
Nakigtot ni Mang Bianong. “S-sika ti nangibilin? Inyunay-unayko a taraknenna a nasayaat, pagkatapos, pagmanmanadaenna met gayam!”
“Kasalanan ko, dad! Sige na, dad, huwag no na siyang pagalitan. Ako na lang!” Lalo a pinaumbi ni Ella ti timekna.
Ania ngarud, immanges laengen ni Mang Bianong iti dakkel. Ket kas iti sigud, inamloyanna ti ulo ti balasangna. “Sige, sige!” kinunana sa kinitana ni Dex. “Estimarem ‘ta pulang linaw. Ilabantay' dita Del Monte no Domingo,” imbilinna ket tinurongdan ken Ella ti ruangan.
MARTES, alas dies media iti agsapa. Uppatda laeng iti grupo ta maymaysa ti ilabanda: da Johnny ken Ella iti sango, da Elmer ken Mang Bianong met iti likud ti kotse. Ni Elmer ti nangsaklot iti umasul a plastik a nakaikargaan ti pulang linaw nga ilabanda ken ti pagpasippitda. Nalabsandan ti Monumento ket un-unorendan ti McArthur Highway a sakup ti Malabon.
“Left turn ka, Johnny,” kinuna ni Mang Bianong idi umasidegda iti maysa a nagkurosan.
“Ditoy ti pagsasarakan dagiti bigtime,” kinuna met ni Elmer. “No makalusot ti manokmo ditoy, adda laingenna.”
Awan pay sangagasut a metro manipud iti MacArthur highway, addaytan ti ruangan ti Del Monte Cockpit. Sinabat ida ti guardia a nangipatuldo iti pagparadaanda.
Adun ti nadanonda a lugan, nangruna dagiti motorsiklo ken kotse. Ngem naulimek pay laeng ti galiera.
“Tanghali na, di pa nag-umpisa,” indillaw ni Ella. Binennatna ti narenren a gayadan ti shorts-na a maong a pinarisanna iti nakiting a nalayak a lumabaga a blusa.
“Alas onse a mangrugi ti panagatar ditoy no weekdays,” impakaammo ni Elmer. “Mangrugi a dagus ti soltada no addadan nayatar. Kas idiay Santa Ines, grupo met dagiti maipakdaar nga agpatadi.”
Gapu ta dua laeng ti manokda, napan gimmatang ni Ella iti tiketna. Libre da Mang Bianong ken Johnny, kasta met ni Elmer gapu ta labahero.
Naidisson ni Ella ti sangagasut a pagbayadna iti tiket, ngem di pay innala ti para tiket. Mingmingminganna lattan ni Ella nga umis-isem.
Nakadlaw ni Ella. “Tiket, mister!” kinunana ken induronna ti kuartana iti bassit a tawa ti pagtiketan.
Nagkulagtit ti agpatiket a kataeb ngata ni Ella. Panguloten ken pamudawen. Kaing-ingas ni Jericho Rosales.
"A, e— good morning!” Nataranta ti agpatiket. “Ilan kayo, miss?”
“Ako lang.” Saan nga immisem ni Ella. Kasla dina madaeran ti isem ken perreng ti agpatiket.
“Ano? Magsasabong ka?”
“Sige, tapos na ako. Ako na!” kinuna ti bumaket a simrek iti pagtiketan.
Ngem kasla awan nangngeg ti agtutubo. Umis-isem lattan a mangmingmingming ken ni Ella.
“Ang tiket ko, mister,” impalagip ni Ella.
Isu pay laeng ti panangted ti agtutubo iti tiket ni Ella ngem insublina ti kuarta ti balasang.
“Huwag na!” kinuna ti agtutubo a bulonna a rimmuar iti pagtiketan.
Nasdaaw ni Ella idi makadanon iti pagyawatan iti tiket. Ti agpatpatiket a mismo ti nanglukat iti ruangan ken nangpastrek ken ni Ella.
“Ako si Jeffrey.” Indiaya ti agtutubo ti dakulapna ken ni Ella. “Anong name mo?”
Kinita ni Ella dagiti agur-uray a kakaduana iti uneg sakbay nga inawatna ti dakulap ti agtutubo. “Ella!” insungbatna.
Nagrupanget ni Johnny. Dina man ammo ta sinabatna ketdin nga inatibay ni Ella nga inserrek. “Come na, Ella,” kinunana.
Insursurot pay laeng ni Jeffrey ti panagkitana ken ni Ella idi surotendan ti pasilio a kumamang iti ‘yan dagiti cockhouse iti likud ti pasdek.
“’Sino daydiay?” sinaludsod ni Ella.
“Bugbugtong nga anak ti akinkukua itoy galiera,” insungbat ni Elmer. “Tinamaan yata sa iyo!” Kunam pay, kasla nasudak ti puso ni Johnny. Saan a mabalin. Immunaak a nakaam-ammo ken ni Ella, intebbag ti unegna.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
