Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-17 a Paset)
TI maikadua nga intar dagiti cockhouse iti kanigid ti pasilio iti likudan ti gradas ti nangiturongan ni Elmer kada Ella. Adun a kulongan ti adda kargana ket agtutungtong dagiti para bantay pangur-urayanda iti oras ti panagatar.
“Ditoytayo,” kinuna ni Elmer idi mabatoganda ti maysa a ridaw dagiti kuarto a ‘yan ti uppat a benneg a kulongan ti manok. “Suerte daytoy a lugar. Naminduan nga inawisnak ti am-ammok a taga-Project 8 ket agpada a siento porsiento ti iskormi.”
Apagserrekda, dimteng ti maysa nga agtutubo a nangyawat iti tulbek ken ni Elmer. Sinindian met ni Elmer ti bombilia. Kunam pay, timmannawag dagiti agbambantay kadagiti asidegda a cockhouse.
“Wow, ang seksi naman ng manok nila!” kinuna ti maysa ngem dagiti met muldotan a luppo ni Ella ti mulmulagatanna.
Galiera Queen (MAUDI A PASET)
“Oo nga!” impasaruno ti maysa, tinaliawna dagiti dadduma pay nga agbambantay kadagiti cockhouse iti asidegda ket tinung-edanna dagitoy.
Ania pay, nagmarangmangen dagiti miron iti sango ti cockhouse da Mang Bianong.
Nagbang-es ni Johnny. “Mga manyakis!” indayamudomna. “Sandali lang,” impakadana ket nagdardarasen a rimmuar.
“Apay ngamin a nag-shorts-ka,” indillaw ni Mang Bianong iti balasangna.
“Mas presko, eh!” Nagkatawa laeng ni Ella. “Bay-am ida nga agpangkis. Maalada, aya!”
Madamdama pay, bumanang-es a dimteng ni Johnny.
“Napanam?” sinaludsod ni Mang Bianong.
“Innalak ‘toy tualiak idiay kotsek, sir!” insungbat ni Johnny. Inyawatna ken ni Ella ti dakkel a bumerde a tualia. “Pagbidangmo ta didaka ket pagpiestaan dagita a maniakis!”
Inawat ni Ella ti tualia ngem insalapayna ketdi iti abagana imbes nga irutapna iti shorts-na. Sinangona dagiti nagmarangmang iti ruar a mangtantannawag kenkuana sa kunam la no modelo a nagbannikes, nagpusipos sa nakapimpintas ti lung-ayna a simmango met laeng kadagiti miron.
“Seksi, di ba?” inkatawa ni Ella a nangpallilit kadagiti miron.
Nabainan dagiti miron, nagpipinnarukibda sa maysamaysa nagsubli iti bambantayanda a cockhouse.
“Sika nga ubing, wen!” inngilangil laengen ni Mang Bianong. “Diak la ammon no ania koma ti inaramid ni inam no adda!”
Nagpaggaak la ket ngarud ni Elmer. “Kasta met a talaga dagiti lallaki. Nagangganas kadakuada ti maitaktakaw!”
“Talaga la ketdi a bastosda!” indayamudom met ni Johnny.
Nagsindi dagiti bombilia iti pagaataran ket nagallangogan ti timek ti para awag iti megaphone.
“Ulot na! Ulot na. May premyo ang mga unang mananalo.Ang first twenty winner ay may premyo na two thousand. Twenty one to forty, one thousand five hundred. Forty one to sixty, one thousand pesos!”
Bimmanesbes dagiti nagubba iti manok a pakairamanan ni Elmer a nagturong iti pagataran. Sumarsaruno kenkuana ni Mang Bianong a kakaasi nga iduron ken iwalin dagiti agiinnuna a mapan iti pagataran. Nagbati da Ella ken Johnny iti ‘yan ti cockhouse.
Madamdama pay, okupado aminen dagiti kongkreto a maysa kadapan ti kangatona a pagtugawan dagiti agaatar. Adu pay ketdi ti awan pagtugawanna. Ngem adda dagiti madi nga agtugaw tapno makitada amin dagiti mayatar ket makapilida iti kapkapnekanda a pangilabananda iti manokda.
Kas ken ni Elmer. Gapu ta puraw ti saka ti manokda, alimbuyogen ti sapsapulenna nga ataran. Mamati ngamin nga apektado met dagiti manok iti posision ti bulan. Naibatay kano iti padas dagiti lallakay a mammallot isu nga awan dakesna no tuladen met. Kas ita, dandani kumabus ket kalaing kano dagiti puraw ti sakana. Kasellagna ita ket mas superior daytoy ngem ti alimbuyogen ta iti tiempo ti kidem wenno lenned ti panawen ti alimbuyogen. Adda met dagiti lumabaga ti manokna a madi a manglaban iti puraw ti dutdotna. Kontra pelo kano. Mamatida a mas superior ti puraw iti nalabaga ta pagar-ariganda ti itlog. Binungon ti puraw ti nalabaga isu a baludna kano daytoy.
Uray ni Mang Bianong, adda dagiti gundaway nga agturay kenkuana dagiti ibilang ti dadduma a mas superior a dutdot. Ngem saanna met nga ilaksid ti kadakkel wenno kabassit ti manok ken ti kangato ti dara no agyatar wenno agtrebisia.
Naungpoten ni Elmer ti umuna nga intar dagiti nakatugaw nga agiinnatar ngem awan pay ti napilina a pangilabananda iti manokda. Uray iti maikadua nga intar, kaskasdi nga awan alimbuyogen. Gapu i'toy, kinasaritana ni Mang Bianong.
“Ania ti makunam, Sir Boss, no padana a pulang linaw met laengen ti pangilabanantayo? Awan ti naisalog nga alimbuyogen,” kinuna ni Elmer.
“Okey lang basta agkadakkelda,” insungbat ni Mang Bianong.
“Mano a tawennan ‘toy manok? Nadanonmin ken Dex daytoy a manokyo.”
“Aguppaten, ngem diak pay nailaban.”
“Ayos!” Nagtungtung-ed ni Elmer. Sinaggaysana manen a kinita dagiti mayat-atar.
“Dayta man,” insungo ni Mang Bianong ti manok ti nakatallikud kadakuada.
Sinirip ni Elmer ti ipaspasikad ti nakatallikud kadakuada. Kas iti manokda a lumabaga ti dutdotna a puraw dagiti napino ken nakadaldalus a siksikna.
Bimmislin ni Elmer iti intar a sumango iti kayatna nga ataran. “Match na match tayo, pare!” kinunana iti kataebna a mangyat-atar met iti manokna.
“’Yan pala ang hinahanap mong match ng manok mo! Laban na!” insulsol ti maysa a durog.
“Sige, laban na! Mas mababa nang konti kay Pareng Elmer.”
“Sige na, Jobert. Mas mataas ang manok mo,” indurog met ti maysa iti bangir.
Isu met a mabatogan ida ti maysa kadagiti match maker ti galiera. Nakikatugaw ken ni Jobert. Innalana ti manok daytoy sa kinitana ti manok ni Elmer.
“Mas maliit ang manok ko,” kinuna ni Elmer. Pinatakderna ti manokda iti sango ti match maker. Lineppayna dagiti payak ti manokna, inipit dagiti dakulapna ti bagi ti manok sa intalmeg dagiti tanganna iti apagapaman tapno lalo a pumandek daytoy. Kiniddayanna ti match maker. “Okey na okey, di ba, Pol?”
“Magulang ang manok mo, pang-grade one na!” Nagayek-ek ti matchmaker. “Pero mas mataas naman ito. Kung ako ikaw, Jobert, labanan ko na siya. Magandang laban!”
Timmakder ni Pol. “Sandali lang, kakausapin ko ang financier ko. Balik ako agad.” Rimmuar iti pagataran ket naglayon iti ‘yan dagiti cockhouse.
Iti cockhouse-da, nasdaaw ni Ella idi mapasungadanna ni Jeffrey a kinuyog ti maysa kadagiti para lamaw iti manok. Immalsem met ti rupa ni Johnny.
“Siya ba, bossing?” sinaludsod ti para lamaw idi aginnisem da Ella ken Jeffrey.
“Oo, siya. Sige, bumalik ka na sa katayan!” insungbat ni Jeffrey. Nagtakder iti ridaw. “Totoo? Nagsasabong ka talaga?” inyisemna a nangperreng ken ni Ella.
“Yes naman. Nakakasawa ang pakikibarkada at outing!” Nagkatawa ni Ella ngem linisianna ti perreng ni Jeffrey. Ania ti adda kadagiti mata daytoy a tao, nakunana iti unegna.
“Tapos ka na sa pag-aaral? Anong course mo?” sinaludsod manen ni Jeffrey.
“Tumigil muna. Nakakapagod. “
“At nag-e-enjoy naman!” kinuna ni Jeffrey.
“Siyempre. At bagong adventure!”
Nagdanggay ti katawada ket lalo a nakasuron ni Johnny. Isu met a dumteng da Mang Bianong ken Elmer.
“May kalaban na tayo!” impakaammo ni Mang Bianong.
“Ano pong number ninyo?” sinaludsod ni Jeffrey.
“Number five.” Ni Elmer ti simmungbat.
Tapno mapaksiat ni Johnny ni Jeffrey, innalana ti three by three a pagikulonganda kadagiti mayatar a manokda sa inukradna iti tengnga ti kuarto. Kapilitan nga impaigid ni Ella ti tugawna.
Nadlaw ni Jeffrey ti tignay ni Johnny ket kimmayakay iti ridaw. “Kung gusto mo, doon ka sa VIP room manood, lalo na sa laban ng manok ninyo. Pupuntahan kita uli pag-start ng soltada. Sige!” Kiniddayanna ni Ella a bulonna a timmallikud.
“Number one to five, tari na!” pagammuan la ta impakdaar ti naka-megaphone.
Duapulo a minuto laengen sa alas dose a panangrugi ti soltada.
“Paunaentayo nga agpatadi ti numero uno agingga iti numero tres. Makigiddantayo iti numero kuatro nga agpatadi,” kinuna ni Elmer. Inyaonna dagiti nakabaina a tadina manipud iti maibarikes a bassit a bagna. Sinaggaysana nga inlagid ti tadem ken tiradda iti murong ti tangan ti imana.
Adda nalagip ni Ella. “Magkano ang parada mo, dad?” sinaludsodna. “Dinala mo ba ang pinatago ninyo kay Dex?”
Kiniddayan ni Mang Bianong ti balasangna. “Saan. Ipustakto daydiay iti labanmo iti 2-cock Ulutan!” insungbatna.
Nakagin-awa ni Ella. Ita laeng a malagipna a dina pay gayam nasukatan ti binulodna ken ni Dex a nayon ti inggatangda iti manok iti Ariana Farm .
Immarimbangaw dagiti tao. Ammo lattan ni Elmer a mangrugin ti laban ket napanna tinannawagan ti pagpipilaan dagiti matadian a manok iti sango ti ridaw a sumrek iti gradas. Addan tallo a paris iti sango ti ridaw. Sinublina ni Mang Bianong.
“Tadiantayon, boss!” kinuna ni Elmer.
Inyaon ni Mang Bianong ti manokna iti takkab. Imbolsana ti plastik a pagpasuyotda sa simmurot ken ni Elmer nga agturongen iti naituding a pagikapetanda iti tadi iti kanawan ti pagataran.
Tadtadianen ni Elmer ti manokda idi bumtak ti riaw dagiti tao. Ammona lattan a nalpasen ti umuna a soltada, ngem nakatantanang latta ni Elmer. Namitlo nga impadasna ti puesto ti tadi, no namin-ano met a sinirigna ti direksion ti tirad daytoy sa rinugianna a binedbedan. Kalpasanna, pinasukotanna manen iti tape. Sa kalpasanna, inunnatna ti gurong ti manok ket sinirigna manen ti posision ti tadi sakbay nga insaluksokna ti baina daytoy. Pinutipotanna met iti ababa a lumabaga a tape ti kanawan a gurong. Maiduma kadagiti padana a gaffer, saanna a sinaggaysa a ginuyod dagiti ramay ti manokda. Innalana ketdi ti plastik a naglaon iti danum iti bolsa ni Mang Bianong sa pinugsitanna bassit ti rupa ti manokda.
Nadanonen ni Mang Bianong ti kalabanda iti pila. Naglayon ni Elmer iti cockhouse tapno alaenna ti pagpasippitna.
“Isang soltada na lang, tayo na,” kinunana ken ni Ella. “Pumuwesto na kayo.”
Ngem sakbay a makapanaw da Ella ken Johnny iti cockhouse, dimteng ni Jeffrey.
“Come na. Nasa pila na pala ang erpat mo. Sa VIP tayo!” kinunana.
Kinuddot manen ti ilem ti puso ni Johnny. “Saan. Kabarbaro laeng nga am-ammom. Baka maniakis,” inyarasaasna ken ni Ella.
Ngem kasla awan nangngeg ni Ella. My God, ang pogi niya, nakunana iti unegna.
“’Lika na!” Tinung-edan ni Jeffrey ni Ella. “Mas comfortable dun. Siksikan sa itaas.”
“Makitam! Dinak iramraman, a, ta adda panggepna kenka a madi,” kinuna met ni Johnny. “Sika latta no ad-adda a patiem ti tao a kaam-ammom laeng ngem ti nabayagen a mangay-ayat—“ kasla nabekkel ni Johnny iti dandani pannakaikaglis ti dilana. “N-ngem ti tao a nabayagen a kalanglangenmo!”
Makakatkatawa ni Ella a nangkita ken ni Johnny. BBJ ka talaga, nakunana iti unegna. “Thank you na lang, Jeff. Sa susunod na lang. May mga barkada na naghihintay sa amin sa itaas.” Intudona ti batog ti bleacher.
“Ganun ba?” Umis-isem manen ni Jeffrey a nangperreng ken ni Ella. Kinautna ti petakana ket dimmutdot iti card. Inyawatna ken ni Ella. “Ikaw, ‘la ka bang card?”
Nagngilangil ni Ella.
“Di bale, tawagan mo lang ako kung may panahon ka at magkuwentuhan tayo. O chat na lang kaya! Sige, bye!” Nagwagis ni Jeffrey a bulonna a timmallikud.
“Wow!” insul-oy ti maysa a mangsarsaruno kadakuada iti agdan idi umuli da Ella ken Johnny a mapan iti bleachers.
“Ang kinis!” kinuna met ti nasabatda ket natiritir ti tengnged daytoy a nangisurot iti panagkitana kadagiti gurong ni Ella.
Ngem imbes nga agmisuot, umis-isem latta ti balasang a kumkumpet iti takiag ni Johnny a kasta unay ti pannakasalemsem ti barukongna.
Addan da Mang Bianong ken Elmer iti ring idi makapuestoda iti igid ti barandilias iti bleacher. Nadlaw ni Ella nga ipalpalawlaw ni Elmer ti panagkitana a kasarsarita ti kasador. Isu pay la ti pannakalagipna a dina gayam naibaga ken ni Elmer no mano ti iramanna iti paradada.
“Seniasam ni Elmer,” kinuna ni Ella ken ni Johnny.
Kunam pay, nagriaw ni Johnny nga agpalpalakpak. “Elmer! Elmer!”
Pagpiaanna, nabigbig ni Elmer ti kasla timek ti mangnganup a boses ni Johnny ket kinitana ti naggapuan ti pukkaw. Sineniasanna ni Ella idi makitana. Pinagsuek ni Ella ti kanawan a dakulapna. Imbaga metten ni Elmer no mano ti paradada iti kasador.
Intudo ti kasador ti puesto ti Wala kada Mang Bianong.
Binatogan ti kasador dagiti ammona a dehadista. Dayta la nagitudo ti inaramidna. “Sanlibo, sanlibo, sanlibo ka!” Kunam la no sakristan met ti para lista nga umip-ipus kenkuana tapno ilistana ti pusta dagiti itudo ti kasador. Sangapulo laeng a dehadista ti intudo ti kasador, nalitupanen ti pagkurangan ti parada da Mang Bianong.
Ket bimtak ti pukkaw ken nagkikinnurus ti wagis dagiti agpusta. Agapput dagiti masaprian, aglisi met dagiti mawagisan.
“Onse! Onse! Onse!” adda nangyawag.
Awan ti mayat.
Kimmaro ti pannakadehado da Mang Bianong. Idi kuan, addan mangyawag iti ‘pu-anim.
Kunam la no nakangngeg a tuleng a kunada ni Elmer. Sinangona ti nangyawag iti sampu-anim. Sineniasanna daytoy ket binirokna manen ti sabali pay a mangyaw-awag iti sampu-anim. Sineniasanna met daytoy. Maysa pay ti kinapinnustana ket pinasippitannan ti ilabanda.
Iti Meron, saan a pinasippitan ti nagiggem ti manokda. Pinagsinnikadda laeng iti inyulida iti ring a pangpakaritda laeng iti ilabanda. Adda pay ketdi waywayna a kayatna a sawen, naatap wenno sanguenna ti mangibbet iti daytoy.
Sineniasan ti timer ti sentensiador. Imbaga met ti sentensiador a rummuaren iti ring dagiti para pasippit.
“Good luck!” kinuna ni Mang Bianong ken ni Elmer. Inyawatna ken ni Elmer ti ilabanda ket inawatna met ti para pasippit. “Ammomon ti laban dayta a manok,” innayonna ket nagturongen iti agdan ti gradas.
Immuna ni Elmer a nakaikkat iti baina ti manokna. Pinunasan ti sentensiador iti kapas a nabasa iti alcohol ti tadi ti manokna.
Immuna nga inikkat ti sentensiador ti singdan ti Meron sa ti baina ti tadi. Kalpasanna, nagpuesto iti uneg ti dua nga uged iti tengnga ti gradas ket inurayna ti senias ti timer.
Nagtung-ed ti timer. Insenias met ti sentensiador ti larga ket nagulimek dagiti agbuybuya. Siaalisto met dagiti handler a simrek kadagiti nairanta a pagkamanganda no maibbatanda dagiti manokda.
Linikba ti Meron ti maysa a payakna sa nakatantanang a nagna nga umasideg iti kalabanna. Nagsardeng daytoy idi sangagpa laengen ti baetda iti kalabanna. Nagbaribar sa nagtuktok a nakakarkarit ti langana.
Saan met nga immakar ti Wala iti nangidissuan ni Elmer iti daytoy. Kasla awan bibiangna iti aglawlawna ta nagsariwagwag ketdin sa inurnosna dagiti dutdot dagiti payakna.
“Shiooo! Shiooo! Anak ng tinapa!” imbirakak ti maysa a di makaan-anus.
“Waaa! Waaa! Waaa!” imbugtak met ti sabali sa nagpalagapag.
Immaddang iti namimpat ti Meron sa nagbaribar. Insardeng met ti Wala ti panagurnosna iti dutdotna, pinasgarna dagiti pargayna sa darumog a nanguray iti garaw ti kalabanna. Nagulimek manen dagiti agbuybuya ket siniimda dagiti manok.
Pagam-ammuan, nagkarekkek ti Wala a bulonna a nagkaraykay. Kellaat a timmayab ti Meron. Ngem saan a timmulad ti Wala. Siniputanna laeng ti kalabanna.
Binallasiw manen ti Meron ti Wala. Kaskasdi a siniputan laeng ti Wala ti kalabanna.
Ngem iti panagdisso ti Meron iti maikatlo nga ibaballasiwna, nagriaw dagiti dehadista ta kasla naigayang ti Wala a nangpupog iti kalabanna. Napakleb ti Meron.
Nagbuelta ti Wala. Ngem sakbay a makadanog, pinungot ti Meron ti dutdot iti puon ti tengngedna sa kinulipagpaganna. Simmublat a nagriaw dagiti liamadista idi inulod ti Wala ti kanawan a sakana.
Iti ngato, tinengngel da Ella ken Johnny ti panagangesda. Ikarkarigatan ti manokda a makaasideg iti kalabanna. Ngem idi iwaras ni Ella ti panagkitana, nadlawna nga agririaw dagiti adda iti asidegda ngem dagiti met luppona ti kitkitaenda. Nadlaw met ni Johnny dayta ket inipigna ni Ella.
“Ipasukotmo ‘toy tualia. Pagpipiestaandakan,“ inyarasaas ni Johnny.
Nagkatawa laeng iti nakapsut ni Ella. Adda naggilap iti mugingna.
Iti kubongna, nakasimsimbeng ti rikna ni Elmer a mangur-uray iti sumaruno a mapasamak. Pilay ti manokda, ngem babaen ti padasda, kabaelan pay daytoy a patayen ti kalabanna ta saan met a ti kanigidna ti nadangran.
Nagpillagsot ti Meron nga immasideg iti Wala. Timmukkaw, timmukkaw met ti Wala. Nagkinnulipagpagda. Saanen a mapulsot ti riaw ken palagapag dagiti agbuybuya.
Iti sakaanan ti agdan, kakaasi ni Mang Bianong a mangibisbislin iti ulona iti nagbabaetan dagiti adda iti sanguananna. Agtantanamitim, ngem agpulsopulsot met ti panagkararagna.
Iti tengnga ti gradas, nagsardeng dagiti manok kalpasan ti napaut a panagkinnulipagpagda. Nagdisson ti sippit ti Meron iti daga ket nakakidem met a nakalitlitem ti rupa ti Wala.
“Karyo, tanga! Karyo!” adda nagriaw.
Nagparintuod ti sentensiador ket tinukmaanna ti bukot dagiti manok sa inkariona.
“Isa, dalawa…” binilang dagiti tao ti panangsippit ni Wala iti Meron.
Insublat ti sentensiador ti Meron nga inkario. Nagbissayot ti ulo ti Meron. Gapu itoy, intupak ti sentensiador ti manok tapno mariing sa binaliwanna nga imbatog ti sippit daytoy iti ulo ti Wala.
“Hoy, huwag mo nang buhayin ang patay!”
“’Go, patay na yan!”
“Namo! Huwag mo kaming lokohin!”
Adu pay a bassawang ken lunod ti linak-am ti sentensiador manipud kadagiti dehadista. Agingga nga indissona ti natayen a Meron. Timmakder ket inyawatna ti Wala ken ni Elmer. Tinulonganna ni Elmer a nangbaina iti tadi ti manokda.
Kasta unay ti garakgak ni Mang Bianong a dimmarup. Ket innalana ti manokna ken ni Elmer. Ngem apagawatna, nagbugsot metten ti manokna.
“Naimbag la ketdin ta lakay ‘toy manoktayo. No saan, naabak wenno nakitabla laeng,” kinuna ni Elmer idi umulogdan iti gradas.
“Wen, naimbag la ketdin ta nangabak,” kinuna met ni Mang Bianong, ngem madlaw ti liday iti timekna.
Uray ni Ella nalidayan idi nakitana nga akinngato ti karaykay ti manokda a bitbit ni Mang Bianong a rimmuar iti ridaw a pagserkan ken pagruaran dagiti aglalaban.
“Sayang, dad. Ngem di bale, nangabak,” kinunana.
Nagwingiwing ni Mang Bianong a mapilpilit ti isemna. “Wen. Naimbag ta nagkurri ti senialna.”
“Ania ti nabirtud a siksikna, dad?”
Nagtalangkiaw ni Mang Bianong sa inngatona ti bitbitna a natay a baudna. Impakitana ti pamayor ti kanigid a saka ti manok. “Adda gettang ti umuna a siksik ti pamayor. Nagpuniponan iti malas no maabak iti umuna a labanna ti kasta ti siksikna,” kinunana.
Sumungbat koma ni Ella ngem isu met a dumteng ni Elmer a nangkobra iti inabakda. Inyawatna ti inabak ni Ella sa ti kuarta ni Mang Bianong.
“’Tay inabaktayo? Napia la a pulotanyo,” kinuna ni Mang Bianong.
“Sige, umunakayon dita cockhouse ta innak alaen. Dakaminton ken Dex ti mangdalus,” kinuna met ni Elmer ken tinurongna ti paglamawan iti abagatan a sikigan ti galiera.
Addadan iti ridaw ti galiera idi kamakamen ida ni Jeffrey. Saanen a nailinged ni Johnny ti rupangetna.
“Uwi na kayo?” sinaludsod ni Jeffrey. “Maaga pa. Ba’t di kayo mangtrebisya? Suwerte kayo, a!”
“May lakad pa,” ni Elmer ti simmungbat.
“Next time na lang,” impasaruno ni Mang Bianong a naglayon iti ridaw. “Baka mabali pa ang suwerte!”
“At maraming presko at makukulit na tao dito,” impasagid met ni Johnny a nangsaruno ken ni Mang Bianong.
Sinango ni Jeffrey ni Ella. “Balik ka, ha! Sana sumali kayo sa pa-derby ni daddy sa susunod na buwan!” kinunana.
“Wala akong panlaban, eh!” insungbat ni Ella. “Kung bibili ka naman sobrang mahal sa may pangalan na farm.”
“Ganun ba? Di baleng mahal basta winning line!”
Tinaliaw ni Mang Bianong ti balasang. “Intayon. Malemen!” kinunana.
Ngem kasla awan nangngeg ni Ella. Itultuloy met latta ni Jeffrey a kapatang ti balasang.
“Ita laeng nga agam-ammoda. Agtalek sa met unayen ni Ella kenkuana,” nakuna la ket ngarud ni Johnny. Dina man ammo ngem nagdardaras ketdin a nagsubli ket iniggamanna ti siko ti balasang. “Halika na. Nagmamadali ang dad mo,” kinunana.
Saan met a nagkitakit ni Ella. Kinitana laeng iti nabagas ni Johnny.
“Pinsan mo? “ sinaludsod ni Jeffrey ken ni Ella.
Inturong ni Johnny ni Ella iti ridaw. Ket dina napupuotan nga intaliaw ken ni Jeffrey. “Syota ko!” Sa kasla adda nangitalmeg iti ulona idi kitaen ni Ella idinto ta intuloyda ti magna nga agturong iti nakaiparadaan ti luganda.
Sintagari, pinasiwet a dagus ni Johnny ti kotsena idi makaruarda iti arubayan ti galiera. Dina maitured a taldiapan ni Ella iti kanawanna, ngem kadagiti suli ti matana, masipsiputanna ni Ella a no kuan kumita kenkuana nga umis-isem. Iti likud, agsisipol pay laeng ti sennaay ni Mang Bianong gapu iti pannakatay ti manokna.
Agtartaraydan iti Edsa idi agkatkatawa ni Ella a nangsipat iti takiag ni Johnny. “Akala ko kung ano ang isasagot mo kay Jeffrey kanina. Marunong ka rin sumupalpal. Ba’t mo sinabing syota mo ako?”
Nakabig ni Johnny ti manibela ket nagdiwer ti kotse iti pannakakigtotna. Bimmara iti kasta unay ti rupana. No adda la mabalin a paglemmenganna, aglemmeng la ketdi tapno malisianna dagiti mata ni Ella ken dina mangngeg ti ania a sawen ti balasang iti inaramidna.
“Adda met gayam ilemlemmengmo nga abilidad,” inyayek-ek met ni Mang Bianong. “Magustuak a kadua ti tao a napardas nga agandar ti utekna!”
Nagsay-a ni Elmer, saan a gapu ta makauy-uyek, ngem kas durogna ken ni Johnny.
Ngem saanen a nagtimek ni Johnny. Nagkambio sa indagsenna ti baddekna iti gasolina ket simiagen ti luganda. Sanamagan, ania ti isilpok, aya, nakunana laengen iti unegna.
NAGKINNITA da Dex ken Elmer. Agduaduada iti imbaga ni Ella.
“Baka maawananak iti trabaho, a!” inkatawa ni Elmer.
“Hindi naman,” insungbat ni Ella. “Gusto ko lang matuto.”
Nagtung-ed ni Dex. Nangala iti manok ket inyawatna ken ni Ella. Kinapetanna iti glab. Kalpasanna, nangala iti sabali.
“Kasano?” Kinita ni Ella ni Elmer idi agsangsangodan ken Dex.
“Sige, aramidem ti ammom saakto agkomento,” insungbat ni Elmer. Tinung-edanna ni Dex.
Nagsanud ni Ella sa indissona ti iggemna a manok. Ngem idi agsinniplagen dagiti manok, kimliit idinto ta nagkidem a nangapput kadagiti lapayagna.
Kasta unay ti katawa da Elmer ken Dex.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
