Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-18 a Paset)
AD-ADDAN ti katawa da Elmer idi arintarayen nga immadayo nga agkilkilliit ni Ella ta nagtinnukma dagiti manok iti asidegna sa nagrapokda ket naikayab dagiti dutdotda a naparut.
Inulit dagiti manok ti nagkinnapet sa nagkinnulipagpagda. Tiniliw metten da Elmer ken Dex dagiti manok. Diniram-osanda dagitoy sa insublida iti takkabda. Kalpasanna, nangala ni Elmer iti sabali a baud ket inabayna ni Ella.
“Kastoy, ne,” kinuna ni Elmer. “Ti kanigidmo, natural, iggemna ti kanigid a bakrang ti manok a mairagpin ti payakna. Kasta met ti kanawanmo. Ngem relaks lang ti panangiggemmo, dimo pespesen tapno di agkulipagpag, nangruna no addan tadina. Yabantem met ti kanigid a dapanmo, agarup maysa kadapan ti baetda iti kanawanmo. Ipaayatmo a kastoy…” indusngo ni Elmer ti iggemna a manok ken ni Dex. “Agsanudka bassit sa an-anatem nga idisso iti kalalainganna iti kaadayo iti kalabanna. Saanmo a pagabayen dagiti dapanmo ta narigrigat ti panagsanud wenno panaglisim no rusher ti kalaban ti manokmo ket sumiag a dagus no maibbatan. Dex, mangalaka ‘ti manok ta padasenyo manen!”
Nagtungpal ni Dex. Kinaptanda iti glab dagiti manok. Inyawat ni Elmer ti iggemna ken ni Ella.
NOBELA: Apo Baboy Party-List (6)
“Relaks lang. Saan a nairut, saan met a nalukay unay ti panangiggemmo,” impalagip ni Elmer. “At huwag tumili! Isipin mo, manok lang ang naglalaban at hindi mga tao!”
Sinurot ni Ella ti imbaga ni Elmer. Ket nagsipat ni Dex idi awan a pulos ti nalipatan ti boss-da iti kinuna ni Elmer. Kangrunaanna, awan a pulos ti nadlawda a nerbios ni Ella iti panangibulosna iti manok.
“Sabali met ti taktika no agresibo ti kalaban ti manokmo sa ground fighter,” kinuna manen ni Elmer. Timmallikud ket nangala iti abang a kunada wenno agur-uray iti atake ti kalabanna ken ammona ti aglisi. Imbagana a mangala ni Dex iti agresibo.
Kinaptan ni Dex ti ipolisna iti glab. Inyawat met ni Elmer ti adda kenkuana a manok idi makaptanna iti glab daytoy.
“Dex, dita adayo bassit ti pangidissuam iti manokmo,” kinuna ni Elmer. Sineniasanna ni Ella. “Idissom lattan iti asidegmo ‘ta manokmo.”
Nagtungpal dagiti dua. Apagidisso ni Dex iti manok nga iggemna, kunam la no naibiat a pana a nangdarup iti manok nga iggem ni Ella. Ngem idi dumanog ti manok ni Dex, rimmasuk ti manok ni Ella ket inipitna iti aire ti kalabanna. Napadata a nanabtuog a nagdisso ti manok ni Elmer. Pinagsinada a dagus dagiti manok.
“Narigat nga idisso ti abang iti adayo unay no flyer ti kalabanna. Amangan no sumurot a tumayab. Atiwen la ketdi ti flyer,” kinuna manen ni Elmer. “Maysa pay a taktika no agresibo ti kalabanmo, idissom ti manokmo iti asideg ti diding. Iti panagsalida ti kalaban, adda posibilidadna nga agdisso daytoy iti asideg wenno ampir ti diding ket di makabuelta a dagus. No alisto ti manokmo, ipidegna dita ti kalabanna ket ayos! Sapay ta mapuruan ti kalabanna, wenno saan, matukkol ti tadina a maitama iti diding!” Nagkatawa. “Ngem naibatay dagiti imbagak iti bukodko a padas. Tunggal handler, adda bukodna nga estilo nga agibbet iti manok,” inlawlawagna.
Naputed ti panagsasarita dagiti tallo idi maiduron ti rikep ti gate ket simrek ni Mang Bianong.
“Kasano dagiti entry-tayo?” sinaludsod ti lakay.
“Seventy five percent ready na ang mga panlaban natin, boss!” insungbat ni Elmer.
Kinita ni Mang Bianong ni Ella. “Apay nga addaka ditoy a bigbigat?” sinaludsodna.
“Nagpapaturo akong magbitaw ng manok, dad. Gusto kong subukin sa mga entry natin sa Santa Ines!” insungbat ni Ella.
“Nalaka a nakasursuro, boss,” kinuna met ni Dex. “No kaskasano, isu ti umuna a babai a tumayaktak iti tengnga ti gradas ti Santa Ines!”
Napanganga ni Mang Bianong a nangkita iti balasangna. “Ikaw? Kababai mong tao, magbibitaw ng manok sa sabungan? Saan a mabalin. Delikado ‘ta pampanunoten! Madesgrasia pay dagiti beterano, sikanto la ketdin? Babaika, anakko. Mandiak!”
“Si dad naman!” Nagmisuot kampay idi ni Ella. “Napintas nga experience. Kayatko a siak ti first, ti umuna a handler a babai, ti umuna a babai a makitada nga agibbet iti manok dita Santa Ines!”
“Adu ti first, ti umuna a serkem a saan nga agibbet iti natadian a manok. No maammuan ni inam daytoy, siakto manen ti taltalenna. Mandiak!”
“Awan ti agpulong, di ngamin?” Kinita ni Ella da Dex ken Elmer.
Nagpinnarukib dagiti dua sa kinitada ni Mang Bianong.
“Kung kaya ng lalaki, kaya din ng babai, di ba? At meron akong gustong patunayan!” Nakabagbagas ti isem ni Ella kada Dex ken Elmer.
“Mandiak!” kinuna latta ni Mang Bianong. “Nayatak a makigalieraka, ngem agingga laeng dita.”
Kas iti dati no adda kayatna, rinakus ni Ella ti siket ti amana ket siuumbi a nangisadag iti ulona iti barukong ti lakay. “Sige na, dad. Uray ita laeng!”
Saan a simmungbat ni Mang Bianong. Inwarasna ketdi ti panagkitana iti pakabuklan ti mini-farm.
“Sige na, dad. Gusto ko lang maging first. Pagkatapos, stop na ako.”
Kasla nakangngeg ni Mang Bianong iti nasam-it a tokar ti Cabasag Orchestra iti rabii ti koronasion iti piesta ti Buguey iti kinuna ti balasangna. Iniggamanna ti agsumbangir nga abaga ni Ella ket pinerrengna ti anakna. “Totoo?”
Nagtung-ed ni Ella.
Kunam pay, rimmuk-at ni Mang Bianong iti rakus ni Ella. Agkatkatawa a nagturong iti ruangan. “Maragsakan la ketdi ni inam no maammuanna,” kinunana ket nagpukawen iti ruangan.
“Ayos!” inkatek ni Ella. “Sige, maminsan pay,” kinunana ket innalana ti manok iti takkab tapno ituloyna ti agsursuro nga agibbet.
PINANAWAN ni Mang Bianong ti buybuyaenda ken Manang Mameng a programa iti telebision idi adda agtimbre iti gate. Maikatlo iti malem.
“Sino ‘yan?” kinuna ni Mang Bianong a bulonna a nangguyod iti rikep. Nagkiremkirem idi makitana ti nakasilsilap a lumabaga nga sports car iti sango ti ruangan.
“Good afternoon po!” inkablaaw ti agtutubo nga agtaktakder iti gate. Nagaruat daytoy iti lumabaga a polo a lalo a nangpabusnag iti nalinis a kudilna. Pinarisanna daytoy iti uspak a maong a pantalon.
“’Gandang hapon po!” inulit ti agtutubo.
Isu pay la ti pannakabigbig ni Mang Bianong iti sangaili. Ni gayam Jeffrey, ti buridek ti akinkukua iti Del Monte Cockpit.
“O, ikaw pala, iho! Tuloy ka!” kinuna ni Mang Bianong a bulonna a rimmuar. Ginuyodna ti pagatbarukong a rikep ti ruangan. “Tuloy, iho!”
Limmaem ni Jeffrey. Isu met a takderan ni Manang Mameng ti telebision.
“Mommy, si Jeffrey!” inyam-ammo ni Mang Bianong ti sangaili ken ni Manang Mameng.
“Tuloy! Kumusta ka, iho?” inkablaaw met ni Manang Mameng. “Tuloy! Umupo ka!”
“Thank you po! Mabuti naman po. Kumusta din po kayo?” kinuna met ni Jeffrey. Nakapimpino ti garawna a nagtugaw.
Nagpakada ni Manang Mameng sa immuli tapno pakaammuanna ni Ella. Sinango met ni Mang Bianong ti sangaili.
Ngem awan ni Ella iti kuartona. Gapu iti daytoy, dinanon ni Manang Mameng ni Sary iti likud ti balay. Imbagana a mapanna kitaen ni Ella iti mini-farm.
Pudno, kaduan ni Sary ni Ella idi agsubli. Immagibas ti balasang iti ‘yan da Jeffrey ken Mang Bianong.
“Sandali lang, Jeff. Maghihilamos lang,” impakada Ella.
Timmakder ni Jeffrey tapno kablaawanna koma ti balasang ngem nakatallikuden daytoy nga agturong iti agdan.
Nakasuoten ni Ella iti umamarilio a tisert ken maong a pantalon idi agsubli iti salas. Nagpakada metten ni Mang Bianong ket sinurotna ni Manang Mameng iti sango ti balayda.
“Kumusta! Naligaw ka yata!” kinuna ni Ella.
“Hindi! Talagang sinadya kong puntahan kita. Bitin kasi ako sa chat natin last night!” insungbat ni Jeffrey.
Iti sango ti ruangan, di mauma da Mang Bianong ken Manang Mameng a mangbuybuya iti nakasilsilap nga sports car ni Jeffrey.
“Porsche? Sagmamano ti kastoy a kotse?” kinuna ni Manang Mameng.
“Ay, minilion, a! Saan nga amin a baknang a Filipino ket maituredna ti gumatang iti kastoy a lugan."
“Wow!” Pinagakkub ni Manang Mameng dagiti dakulapna. “Aniat’ trabahona?”
“Kalleppasna kano ti kursona. Siguro, isu ti mangpataray iti maysa kadagiti negosioda.”
“Saan nga spoiled no kasta. Kasta koma met ‘ta anakmo. Dina la ngata maimpluensiaan? Panagkunam, armenna ‘ta anakmo?”
Nagkatawa ni Mang Bianong. “Diak ammo. Paliiwen, a. “
“Ania ti nadlawmo i’ta anakmo?”
”Awan. Ammom met a ma-PR. Apay, dimo kayat ni Johnny no kas pagarigan?” panangsuot ni Mang Bianong iti asawana.
“Hmm, ket no awan sa met ibagbagana. Am-amang pay nga agkuykuyogda i’ta anakmo. Ti kayatko, ‘tay makaimpluensia koma ken ni Ella tapno ituloyna ti agbasa. Kitaem, no dayta la baimbainna ti tartaraknenna, agubanton dinto pay nakanobia. Agasem, sa la maituredna ti umay no maayaban?”
Ngem iti klinikana, inagawaan ni Johnny ti nangrikep apaman a nakapanaw ti naudi a klientena a nagpakapon iti managanak a pusana. No mano nga aldaw itan a nagbunga ti panangidawdawatna nga umadu ti pasientena nga ayup. Ti makadakes, kaaduanna met a gagayyem wenno kabagianna kano pay laeng dagiti agpaagas kadagiti dingoda. Agasem, adda pay immasideg a kasinsin kano ni tatangna, ngem Cebuano met gayam.
Natulbekanen ni Johnny ti akinsango a ridaw idi sumrek ti balo a para dalusna iti ridaw iti sikigan ti klinika. Bitbit daytoy ti naisupot a sabong a pinagatangna iti flower shop iti asideg ti simbaan. “Sir, no para iti ar-armem, nasaysayaat ti prutas ta makabsog,” kinuna itay ti para dalusna. Ngem saanna nga inkaskaso ti singasing daytoy ta amkenna a kanennanto manen ti dadduma.
Inuyos ni Johnny ti tarheta iti bassit a sobre a naipasurot iti tallo a nalabbasit a rosas. Agtigtigerger dagiti ramayna a nangmulengleng iti tarheta a mangpampanunot iti isuratna. Wen, isuratna laengen imbes a baliksenna iti sango ni Ella ti kayatna nga ibaga. Naawatanna met ngatan no apay a naibagak ken ni Jeffrey a siotak isuna, nakunana iti unegna isu nga insuratna iti dadakkel a letra ti I LOVE YOU SO MUCH. Kalpasanna isublina met laeng dagiti sabong iti supot sa namles.
Iti Karpa Street, kasla di mamati ni Jeffrey a ni Ella a naam-ammona idiay galiera ti kasangsangona ita. Agasem, sangkabassit laeng a make-up, adun nga agparparang iti telebision nga agtutubo nga artista ti atiwenna no kinapintas ti pagsasaritaan. Idiay Del Monte Cockpit, nakasimsimple nga Ella ti naam-ammona. Gayam, adda kinapintas iti likudan ti kinasimple ti balasang.
Awan metten da Mang Bianong ken Manang Mameng iti sango ti gate ta inkeddengda ti agpagnapagna iti subdibision.
“Ba’t tumil ka sa pag-aaral?” sinaludsod ni Jeffrey.
Kinuti ni Ella ti abagana. “Wala lang. Trip ko lang subukin ang pagsasabong. Thrilling talaga!” insungbat ni Ella. “Oh, boy!”
Nagkatawa met iti nakapsut ni Jeffrey. “Ganun? Ako, walang hilig diyan. Kung minsan, nagpupunta ako sa Del Monte pero di ako nanonood.”
“Ay, naku! Sabi ko sa ‘yo, thrilling talaga! Subukin mo!”
Iti ruangan ti Mendoza Subdivision, naglayon lattan ni Johnny ta agdungdungsa ti agbambantay a tanod. Nakalaglag-an man ti riknana ket ikumkumpasna pay dagiti ramayna iti manibela iti tokar ti stereo ti kotsena.
Ngem naimayeng idi asidegen iti ungto ti Karpa Street. Kasano ngamin ket kasla nasulek idi makitana ti sports car iti batog ti gate da Ella.
Nagsardeng idi makadanon iti nagsapalan. Adda bisita ni Ella? Ni Derri? Ni Jeffrey? Dina man ammo ngem nariknana a dimmam-eg ti teltelna. Asino man ti bisita ti balasang, kaipapananna a dida makapagwayas iti balasang. Kayatna a sawen nga awan ti gundawayna a mangipeksa iti sinanayna a binatog a pangibuksilna iti riknana ken ni Ella.
Ania ngarud, naupay manen ni Johnny. Ket imbueltana ti luganna. Addan iti nagsapalan ti Karpa Street ken Kitang Street idi tumpuar da Mang Bianong ken Manang Mameng iti nagkurusan. Nabigbig ni Mang Bianong ti kotse ni Johnny ket winagisanna daytoy. Kapilitan a nagsardeng ni Johnny. Imbabana ti sarming iti kanigidna.
“Naggapuam?” sinaludsod ni Mang Bianong.
“Adda immawag nga agpa-home service dita San Agustin, ngem Mendoza metten ti nastrekko, sir!” inyulbod ni Johhny.
Nagkatawa ni Mang Bianong. “Agsublika iti simrekam ket agpakanawanka. Diretso iti San Agustin daydiay!” inwagisna.
Addan ni Johnny iti Quirino Highway idi malagipna ti sabong a regalona koma ken ni Ella. Kasla nasudak ti barukongna. Ngem ania ti maaramidanna?
Nagpakanawan idi makadanon iti kalsada a lumabas iti simbaan. Nagparada iti labes bassit ti ridaw ti simbaan. Innalana dagiti sabong iti tugaw iti kanawanna sa dimsaag. Napipia laengen ngem ti malaylay nga awan serbina, kunkunana iti unegna. Total, pakairanudan met ti kararuak.
Sineniasanna ti guardia iti asideg ti ridaw ti opisina ti parokia sa naglayon iti ridaw ti simbaan. Indissona dagiti sabong iti sakaanan ti dina am-ammo nga imahen sa nagsubli iti luganna.
Nakapanawen ni Johnny idi natukay ti interes ti guardia. Napan iti ridaw ti simbaan ket pinidutna dagiti sabong. Apay a ditoy ti nangidatonanna, naisipna. Nakitana ti bassit a sobre. Inyaonna iti supot sa dinutdotna ti tarheta iti bassit a sobre. Nagtanamitin. I Love You So Much. Ah, pagyamanna iti nagdawdawatanna. Napatgan la ketdi ti kiddawna, naisip ti guardia ket impanna dagiti sabong iti altar. Dagiti kasta a tao ti rumbeng a maparaburan. Ammoda ti agyaman no mapatgan ti kararagda. Saan a kas kadagiti dadduma nga isangitda pay ti agdawdawat. Ngem no napatganen ti kiddawda, thank you, dida pay kuna.
“DAKAYO laengen ti mapan,” inkissiim ni Mang Bianong ken ni Ella sa intedna ti pustana. Kalpasanna, tinurongna ti garahe tapno iruarna ti daan a kotsena. Domingo ita, aldaw ti pannakitiendada ken Manang Mameng iti Balintawak. Apaglabes a maikapito iti agsapa.
Apaman a nasibet dagiti dadakkelna, napan iti mini-farm ni Ella. Nakalukat ti gate ket naglaylayon iti kalapaw ni Dex. Nadanonna ditan da Jong ken Elmer a makikapkape ken ni Dex.
“Alas otso, mapantayon,” kinuna ni Ella. “Ang mga manok natin?”
Intudo ni Elmer dagiti entry-da iti three by three. “Urayenmi a makalugitda saminto ikarton,” insungbat ni Elmer.
“Mangitugottayo kadi pay iti pagpasuyot a nakayuperan ti ngipen ti kimat?” sinaludsod met ni Dex.
Pinagsisinnublat a kinita ni Ella dagiti kaduana. “Ania ti makunayo? Nakatulong ngata idi nagkampeontayo?”
“Awan met dakesna no mangitugottayo latta. Ammotayo, aya, no pudno nga adda birtudna,” binagi met ni Jong.
“Sige, mangitugottayo,” kinuna ni Ella a bulonna a timmallikud.
Apagisu a dumteng ni Johnny idi rummuar ni Ella iti mini-farm.
“Sandali lang at magbibihis ako,” kinuna ni Ella. “Ibagam nga isaganadan dagiti manok ta mapantayon. Maktangan dagiti manok no atiddog ti pila a masangpetantayo.
Kas iti sigud, maong a shorts a kumepkep nga agingga iti ngalay ti luppo ti insuot ni Ella. Pinarisanna daytoy iti nalabaga a blusa a kumepkep met laeng nga adda sisiglotanna iti batog ti puseg. Rineppetna iti lastiko ti buokna sa nagpulbos ken naglipstik iti apagapaman. Umis-isem a nagpusipos iti sango ti sarming sa rimmuar iti kuartona. Nakaluganen dagiti kaduana a nadatnganna iti sango ti gate.
Kas iti sigud, nagkakatugaw da Elmer, Jong. ken Dex iti likud. Ni Dex ti nangsaklot iti karton a naglaon kadagiti entry-da ket ni Jong iti single a karton a naglaon iti pagpasippitda.
“’Tay three by three ken kurtina, innalayo met laeng?”sinaludsod ni Ella sakbay a limmugan.
“Kompleto, boss. Addada dita compartment. Nagbalonkami payen iti innapuy ken liningta nga itlog tapno saankamin a mapan mangan iti restaurant. Narigat ti mabisinan a kas idi naminsan,” insungbat ni Dex.
Libreda iti entrada ta tallo ti manokda ken labahero ni Elmer. Kunam pay, matiritir ti tengnged dagiti malabsan ni Ella iti iseserrekda iti galiera. Adda pay dagiti nangipakamat iti sultipda.
Nangted ni Ella iti uppat a ribu ken ni Dex a pagbayadda iti entry fee. Nagtarusda iti restaurant ti galiera pangur-urayanda iti pannakaipakdaar ti panagaatar. Nakipila met da Dex ken Jong iti pagpalistaan ken pagbayadan.
Adda maupaan a pagikulongan iti manok iti Sta. Ines ngem saan a makapagbantay dagiti maseknan kadagiti manokda ta saan a nakuartokuarto dagiti cockhouse. Maysa a security guard ti agbambantay dita.
Ngem saan a mapnek da Elmer iti seguridad dagiti manok kadagiti cockhouse isu a kaykayatda nga italek dagiti manokda iti sukida nga agag-agas. Kas ita, nagtarus da Dex ken Jong iti puesto ni Cadio, ti sukida a “doktor,” ket inukradda dagiti intugotda a takkab. Impisokda dita dagiti entry-da tapno makainana dagiti saka ken payak dagitoy a naktangan iti karton. Kalpasanna, inabbonganda dagitoy iti tela tapno dida agalikuteg no adda umasideg a nagubba iti manok.
“Agbantayka ta innak pakaammuan ni Elmer,” kinuna ni Dex ken ni Jong. Tinaldiapanna ti relona. Agalas nueben.
Nadatngan ni Dex ni Elmer nga agngilngilangil a mangparpara ken ni Ella a maraisem nga agpalpalawag. Nakaem met dagiti bibig ni Johnny nga agwingwingiwing.
“Boss, delikado ‘ta pampanunotem. No masugatanka, dakami la ketdi ti pabasolen da Sir Bianong ken Ma’am Mameng,” kinuna ni Elmer.
Nagkatawa ketdi ni Ella. “Tinuruan mo akong magbitaw, di ba? Ket kunam met a nasursurok iti las-ud ti dua a lawas laeng ti nasursurom iti nasurok a sangapulo a tawen a panagib-ibbetmo iti manok. At ngayon ang tamang pagkakataon para gamitin ko ang natutunan ko!” kinunana.
Saan a nagtimek ni Elmer. Kinitana ketdi da Dex ken Johnny.
“Ken adda kayatko a paneknekan, a maibatay kadagiti mapalpaliiwko iti pannakigalieratayo!” inkatawa ni Ella. “Dikay' agdanag, saan a mapasamak ti pagam-amkanyo. Thank you iti panangigigiryo kaniak.”
Saanen a nakateppel ni Dex. “Apay, aya?” sinaludsodna.
“Siak ti mangibbet kadagiti manoktayo!” insungbat ni Ella.
Nagnganga ni Dex. Kinitana ni Elmer.
Immanges iti dakkel ni Elmer. Intayagna ti dakulapna. Ania pay, agkatkatawa ni Ella a nangisipat iti dakulapna iti dakulap ni Elmer.
“Dikay madanagan, agan-annadak!”
“Ayos!” kinuna met ni Dex sa linipakna ti dakulap ni Johnny.
“Ania, inyaonyon dagiti manok iti karton?” sinaludsod ni Johnny.
Nagtung-ed ni Dex. Timmakder ni Elmer ket rimmuardan ken Dex iti restaurant.
Nagsindi dagiti bombilia iti pagataran ket nagparaw ti megaphone.
“Ulutan na! Ulutan na, nga kapatid!” inyayug ti para waragawag.
Innala ni Elmer ti darisayen, ti dalusapi ken ni Dex.
“Kumitaka iti ka-match ‘ta dalusapi. ‘Tay basbassit a padana a dalusapi. Ibagam a depaleta ‘ta manokmo tapno ikkandaka iti partida,” imbilin ni Elmer ken ni Dex.
Nagtung-ed ni Dex ket simminan ken ni Elmer idi makastrekda iti pagataran. Kas gagangayna no yatarna ti manokna, rinikus met ni Elmer dagiti intar dagiti agiinnatar tapno kumita iti pangiparisanna iti manokna. Madamdama, inabayna ti adda saklotna a darisayen met laeng nga ub-ubing ngem iti manokna.
Pinatakder ni Elmer ti manokna iti sangona. “Tingnan ko nga ang manok mo, pare. Match yata tayo, a!” kinunana iti kataebna.
Kinita ti kaabay ni Elmer ti manok ni Elmer sa ti manokna. “Naku, magki-kinder na ang manok mo, ba!” inkatawana ket naisurot dagiti adda iti asidegda.
“Ang baba naman ng tingin mo sa manok ko. Grade one na ito!” imbales ni Elmer. “Ba’t ka nagdadala ng uhugin na manok sa sabungan? Kung ako ikaw, lutuin ko na lang tinola ang manok mo. Total, siguradong matatalo dahil bata. Malambot pa 'yan, masarap ang sabaw!”
Nagkakatawa manen dagiti adda iti asidegda. Limabbaga ti at-ataran ni Elmer. Nadlaw pay ni Elmer a dimmukol ti panga daytoy.
Ayos, nakuna ni Elmer iti unegna. Iti langa ti at-ataranna, ammona a nainsulto daytoy. Ket timmakder tapno kumita kampay idi iti pangiparisanna iti manokna.
“Sige, fight!” kinuna ti lalaki a bulonna met a timmakder. “Magpa-leg band na,” innayonna ket nagturongen iti ridaw ti pagaataran.
“Nagalit, lakay!” kinuna ti maysa a makaam-ammo ken ni Elmer.
“Manok ng sabungan ‘yon,” kinuna met ti sabali.
Nagkatawa laeng ni Elmer. Tinung-edanna ni Dex nga adda laeng iti likudanna.
“Inka agpa-leg band. Daydiay ti kalabantayo,” kinunana. Insungona ti kalabanda nga agturongen iti lamisaan ti agikabit iti leg band.
Nayataren ni Elmer ti dalusapi idi sublian ni Dex. Billiten ti kalabanda.
“Ania ti namberna?” sinaludsod ni Elmer. Inyawatna ken ni Dex ti dalusapi tapno paikkanna iti legband.
“Number 10.”
Napan ni Elmer iti ‘yan ni Jong. Kinitana ti abbong ti takkab a nakaipupokan ti lakay a darisayen. “Siputam baka adda mangpakan,” imbilinna.
Apagbiit laeng ni Dex . Kasta unay ti rungiitna a nagsubli iti ‘yan da Elmer.
“Salbag! Manok manen ni Bitangcol ti kalabantayo,” impakaammo ni Dex.
“Okey lang. Inabaktayon, di ngamin? Namberna?”
“Number eighteen!”
“Okey. Awanton ti tension no tadiak,” kinuna ni Elmer. Nagpakada ta mapan iti ‘yan da Ella.
“Nayatardan?” impasabat ni Ella ken ni Elmer.
“Okey na. Manok ng sabungan ang kalaban ng talisayin. Kay Bitangcol ang talusapi,” insungbat ni Elmer. “Ania, paysuem ti agibbet?”
“Oo, ba! Para may bago naman dito sa Santa Ines!” Nagkatawa ni Ella. Linipakna ti dakulap ni Johnny ken ti dakulap ni Elmer.
Bayagna la a naipakdaar ti panangrugi ti soltada, nagkaribuson dagiti tao nga immuli iti bleachers. Napunno met a dagus ti ringside kadagiti adda entry-na ken pumupusta.
Apagbiit ti soltada. Kas iti sigud, agab-abak dagiti liamado.
“Six to ten, tari na!” impakdaar ti naka-megaphone.
Innala ni Dex ti lakay a darisayen ket napanda ken Elmer iti pagtadian. Idi matadianda ti manok, inyawat ni Dex ken ni Ella. Innala met ni Elmer ti pagpasippitda. Kunam pay, nagkikinnita dagiti adda iti asidegda idi makitada ti panangubba ni Ella iti natadian a manok ket napan iti pila iti sango ti ridaw ti gradas. Nagarimbangawda a nangisurot iti panagkitada iti balasang.
Ad-addan ti arimbangaw dagiti tao idi madanon ti batangda nga umuli iti ring. Adda nagsultip, adda nagpalakpak tapno tumaliaw ni Ella.
“Wow, ang seksi!”
“Naku po, kahit mamatay na ako bukas!”
Iti ringside, kunam la no masulnot ti tengnged dagiti agabalayan idi makitada ni Ella.
“Apodiosko, ‘balayan! Nagpudawen, aya!” Pinagakkub ti pandek dagiti dakulapna.
“Wen, ‘balayan. Agawidak sa biit!” kinuna met ti nakutkuttong a nakalanlanay dagiti matana.
Madamdama pay bassit, immasideg ti kasador ken ni Ella.
“Magkano ang parada mo?”
“‘Sama mo five-K ko,” kinuna ni Elmer.
“Sixteen five,” kinuna ni Ella.
“Ikaw ang magbibitaw?” sinaludsod ti kasador.
Kiniddayan ni Ella ti kasador. “Oo, ako!” insungbatna.
Nagsul-oy ti kasador ket tumalangkiaw a nagturong iti ‘yan ti handler ti manok ti galiera.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
