Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-19 a Paset)
PINAYAPAYAN ti kasador ti para lista idi agsenias ti handler a kalaban ni Ella.
“Magkano ba talaga? Huwag nang ipitin ang pusta ninyo!” kinuna manen ti kasador.
Ngem di binaliwan ti handler ti seniasna. Sinango ti kasador ti para listana. Ngem dina manen nagawidan ti panangpaludipna kadagiti luppo ni Ella.
“Fifty five ang Full Moon, twenty two ang Queen Ella!” intudo ti kasador ni Ella. Intudona ti Meron a puesto ti kalaban ni Ella.
NOBELA: Apo Baboy Party-List (6)
Tinurong da Elmer ken Ella ti puesto ti Wala. Indisso ni Elmer ti pagpasippit ket innalana ti darisayen ken ni Ella.
“Am-ammom?” insungo ni Ella ti kalabanda.
Nangilangil ni Elmer. “Ita laeng a makitak dayta a handler,” insungbatna. Inliadna ti ulo ti darisayen sa insarangna ken ni Ella ti pingping daytoy. “Sige, pasippitam!”
Nagtungpal ni Ella. Ngem nagkulipagpag ti para pasippit ket naibbatan ni Ella.
“Dimo unay kairuten ti panangiggemmo!” Nagkatawa ni Elmer.
Iti maikadua nga intar ti tugaw a dumna iti gradas, agkalkaling-etan ti dakulap ni Johnny a nakakaut iti bolsana. Petpetpetanna ngamin ti dua ribu a kuartana ket pampanunotenna no ipustana wenno saan. Kasano ngamin ket sapulna dayta a gatad iti walo a konsultasion—dua nga agmukmukat a pusa, uppat nga aso nga adda arietna, ken dua a nasugatan a rabbit nga agpada a bula.
Iti maikapat nga intar ti tugaw iti ringside, di matinong dagiti agabalayan no asino ti pustaanda.
“Kasano, abalayan?” kinuna ti napampandek a mabatbatombalani iti lennek a puseg ni Ella.
“Nagkampeonen ni Ella, ‘balayan. Ngem, ne, agkabaw sa metten ti manokna iti kinalakayna,” insungbat ti nakutkuttong a maratubbog ti ngiwatna. Kasano ngamin ket kasla makakitkita iti salamagi iti panangalunos ti panagkitana kadagiti muldotan a luppo ni Ella.
Binatogan ti kasador dagiti am-ammona a dehadista iti ringside. “Mr. Go, five thousand!” intudona ti butiog a mestizo iti umuna nga intar. “Engineer Acos, limang libo. Attorney Tabag, five thousand!” Sinagadsadna ti nagitudo iti sagsangaribu sana pinakuenta iti para listana.
Iti kornerda, indisso ni Elmer ti darisayen sa inipusna. “Pasikad. Ipusem ’ta iggemmo sa guyodem a paatras,” kinunana ken ni Ella.
Nagtungpal ni Ella. Ngem di man la nagkayabkab a kumamat koma ti darisayen. Gapu i'toy, inubba manen ni Elmer ti darisayen ket pinasippitanna ti luy-ong daytoy. Nagkiok ti darisayen ket napugtitanna la ket ngarud ti bukot ti dakulap ni Elmer. Ti ngamin lulugitanna ti napasippitan ni Ella.
“Bastos!” inrungiit ni Elmer ket inlagidna ti bukot ti dakulapna iti sikigan ti shorts-na.
Imlek ni Ella.
Kalpasan ti napaut a panagkuenta ti kasador ken ti para lista, insenias ti immuna ti larga. Ket bimtak ti innawag idinto ta kunam la no agaarnis dagiti agsisinnenias.
“Meronnn! Meronnn!”
“Walaaa! Sa walaaa!”
Nagiinnuna dagiti liamadista a nangsenias iti nangyawag iti wala.
“Jisss! Jisss!”
Ni Johnny, nabasan iti ling-et ti kuarta a petpetna, ngem di makadesision no pumusta wenno saan. Aggubgubalen ti wen ken saan iti mugingna. Kasano no maabak? Nalaklaka, aya, ti agsapul iti dua ribu? Naay, uray agmalmalemka a magmagna, saan a basta makapidutna iti beinte. Daytanto ketdin dua ribu? No mangabak, ala man. Sumagmamano laeng a danog ken riaw, iggemmon ti dua ribu, boy!
Ngem iti likudan ni Johnny, nakadesisionen ti napampandek a lakay.
“Mapanak dita Meron, abalayan! Agrayuman ‘ta manok ni Ella. Dina payen makukot dagiti tumengna. No angrem, agmalmalem a sungrod ti masapulna!” inyellek ti napampandek.
“Kasta dagiti baak, ‘balayan. Natanangda,” kinuna met ti nakutkuttong. “Maysa laeng a danog, siut! Isu ti pustaak!”
“Kayatmo a sawen kontraennak, abalayan?”
Imbes a sumungbat, pinaludipan ketdi ti nakutkuttong dagiti muldotan a luppo ni Ella.
Kimmaro ti pannakadehado ti manok ni Ella ta nadlaw dagiti pumapago a di makakutkuti ti darisayen. No pasippitan ni Ella, masapul pay a pikpiken ni Elmer ti bakrang daytoy tapno sumippit. Ket immuneg ti pinnusta.
“Animmm! Animmm! Animmm!”
Napatured dagiti dehadista ket nagiinnunada a nangsenias iti nangyawag iti anim, wenno innem a gasut mangabak iti sangaribu.
Iti no namin-anon nga isusurotna iti galiera, adda metten sangkabassit a maawatan ni Johnny iti pinnusta ken sinnenias. Ngem saan latta a maiwaksi ni Johnny a panunoten ti pannakaabakna. Ammona ketdi no mano ti abakenna iti dayta nga innawag.
Ngem idi makadanon iti ‘yanna ti agpagpagna a kristo a kumarkarit iti sampu-anim, saan a napupuotan ni Johnny a kinalbit daytoy.
“Anim!” kinuna ti kristo ket inseniasna ti uppat a ribu ken ni Johnny.
Nakair-irut ti tung-ed ni Johnny. Ket intuloy ti kristo ti nagakar-akar iti ringside.
”Ditaak manok ni Ella a talaga, ’balayan!” kinuna manen ti nakutkuttong idi palutpoten ti abalayanna. Sineniasanna ti maysa pay a kristo tapno nayonanna ti pustana iti manok ni Ella.
“Sika latta, abalayan!” Natamnay ti isem ti napampandek. “Dakdakkel met ngamin ti abakem no kas pagarigan. Ngem ibagak kenka, maysa laeng iti sangapulo ti tiansa ti manok ni Ella a mangabak. Dayta nga idiarna, diak la ammon!”
Nagsenias ti timer. Pinaulogda dagiti immuli iti ring a mangyaw-awag iti pustada. Sineniasan met ti sentensiador a bumaban dagiti agpaspasippit.
“Laglagipem, relaks lang ti panangyayatmo iti manok,” kinuna ni Elmer ken ni Ella. “Saanka a lumas-ud i’ta uged. Tanangem nga idisso iti deretso. Dika agdanag ta baak ti manoktayo. Natanangen nga aggargaraw.”
Nagtungtung-ed ni Ella. Tinurong metten ni Elmer ti agdan.
Napunasanen ti sentensiador ti tadi ti Full Moon. Ngem uray kasano ti panangpatangken ni Ella iti nakemna, saanna a kabaelan a tapayaen ti maysa nga imana ti manokna ket waswasen ti maysa ti singdan ti baina ti tadi. Gapu itoy, tinung-edanna ti sentensiador tapno daytoy ti mangikkat iti baina ti tadi ti manokna.
Pinunasan ti sentensiador ti tadi ti manok ni Ella sa sineniasanna ti balasang. Saan met a maisina ti handler a kalaban ni Ella ti panagkitana kadagiti luppo ti balasang.
“Sandali lang,“ kinuna ni Ella. Impaiggemna ti manokna iti sentensiador. Linislisna pay ti gayadan ti shorts-na sa inisemanna ti kalabanna. Innalana met laeng ti manokna. “Salamat!”
Kinita ti sentensiador ti timer. Nasimpan ti naud-udi ti relo ket tinung-edanna ti sentensiador. “Larga!” kinunana. Pinarukibanna pay naminsan ti puseg ni Ella sa pimmanaw iti nagbaetan dagiti agibbet.
Ruar ti uged ti binaddekan ni Ella sa siaanat a nangyayat iti manokna. Siaanat met laeng a nagsanud bassit sa indissona ti manokna.
Ngem immaddangen iti naminsan ti manok ni Ella, di pay naidisso ti kalabanna ti manokna. Kasla ketdin kulkulukolan ti panagkitana iti lennek a puseg ni Ella.
Addan ni Ella iti kubongna, ngem isursurot pay laeng ti kalabanna ti panagkitana kenkuana. Gapu itoy, nagriaw dagiti agbuybuya.
“Tarantado! Bitawan mo naaa!”
”’Namo, bitawan mo naaa!”
Addan iti nagbaetan dagiti uged ti manok ni Ella idi makapuot ti sentensiador iti naganas a tagtagainepna. Aglabbeten ti riaw dagiti agbuybuya.
Iti puestona, adda naggilap iti muging ni Johnny. Isu pay la ti pannakalagipna iti senias ti kristo a kinapinnustana. Uppat a ribu kadi? No maabak, kasanon ket dua ribu laeng ti badyetna? Mano no kua ti kurangna? Ket timrem dagiti kasla mais a ling-et iti muging ken tuktok ti agong ni Johnny.
Nataranta ti kalaban ni Ella idi makitana nga addan ti manok ti kalaban iti sangona. Ania pay, intupakna lattan ti manokna sa siaalisto a nagsanud ken nagkamang iti kubongna. Idi tumaliaw, kasla inuttotan ti kimat idi naipuruak ti manokna nga inistreyt ti manok ni Ella.
Saan a nagpangngadua ti sentensiador a dimmarup. Uray la immayas dagiti tumengna a nakaparintuod iti panangtukmana iti liamado sa tiniliwna ti manok ni Ella. Impasippitna ti manok ni Ella. Simmippit iti namitlo ti manok ni Ella. Ngem idi isublatna ti liamado, nagbissayoten ti ulo daytoy.
Limmagto ni Ella a rimmuar iti kubongna. Innalana ti manokna ket insulbong met ti sentensiador ti baina ti tadina. Naminsan laeng nga askaw ni Elmer, adda metten iti gradas. Agkatkatawa a nanglipak iti dakulap ni Ella.
“Pasado ka na!” kinuna ni Elmer.
Saan met a nakagaraw ken nakatimek ni Johnny. Mulmulenglenganna lattan ti tengnga ti gradas.
Iti pagbambantayanda, naggiddan da Dex ken Jong a rimkuas iti bassit a bangko a nagtugawanda ket naglinnipakda iti dakulap. Iti pigsa ti riaw ken palagapag, ammoda lattan a nangabak ti dehado, nga awan sabali no di ti manokda.
“Kunakto pay, ‘balayan!” kinuna met ti nakutkuttong a lakay. “Dikanto met ngamin mamati. Dayta ti narigat kenka ta dika agus-usar iti lohika!”
Nagbanang-es ti napampandek a lakay. “Diak ammo ‘ta lohika nga ibagbagam—no lokdit wenno ania!” kinunana ket inlisina ti dakulapna iti abalayanna. Agtigtigerger dagiti ramayna a nangbilang iti pagbayadna iti kinapinnustana.
“One point kay Queen Ella!” inwaragawag ti manager ti galiera.
Intulod dagiti sultip ken sipsipat ni Ella iti panagturongna iti agdan. Sakbay nga immulog, timmaliaw sa nag-flying kiss. Ad-addan ti sultip ken sipsipat dagiti tao.
Kunam la no mangutkuto ti ‘doktor’ dagiti masugatan a manok iti panangsukainna iti dutdot ti manok ni Ella idi mayawat kenkuana. Ngem imbes a maragsakan idi awan nakitana a sugat ti manok, sisusuron ketdi a nangisubli ken ni Dex. Masayangan ngamin iti tres sientos a tangdanna a mangagas ken ti baratona ken ni Ella.
Nakapanawen ni Elmer a mapan agtrebisia idi malagip ni Ella ni Johnny. Kinitana da Dex ken Jong. “Ni BBJ?”
Nagkinnita da Dex ken Jong.
Iti ringside, nakaulin iti gradas ti sumaruno nga aglaban idi asitgan ti kinapinnustana a kristo ni Johnny. Inyawat ti kristo ti nakupin nga uppat a ribu ken ni Johnny sa timmallikud.
Binilang ni Johnny ti kuarta. Uppat a ribu a pisos.
“Parang kulang,” kinuna ti lalaki a kaabay ni Johnny.
“Four thousand ang sinabi nya kanina.”
“Oo nga. Nakita ko pa ang senyas niya!”
“Tama lang ‘to.”
“Tanga!” inkatawa ti kaabayna. “Mahigit anim na libo sana ang panalo mo.”
Nabainan ni Johnny, ngem saanen a simmungbat. Impapainayadna laengen ti rimmuar iti ringside sa nagpaing iti ‘yan da Dex ken Jong.
EKSAKTO nga alas dose idi maipakdaar ti break. Maituloyto kano ti soltada iti ala una.
Nagturong dagiti nangabak iti restaurant ti galiera. Rimmuar ti dadduma tapno agbirokda iti nalaklaka a pangananda. Dagiti dakkelen ti abakda, ken bassit ti puonanda, saandan a pimmanaw iti nagpuestuanda. Immanayen ti maysa a liningta nga itlog wenno saba a pinabulonanda iti danum ket ining-ingatan ken tinigtig-abanda metten dayta iti dadakkel. Dagiti naipanurok ti malasna, namrayanda laengen ti nagpagpagna a nakatallikud dagiti imada pangur-urayanda iti panangrugi manen ti soltada.
Nasibeten da Ella ken Johnny a napan nangaldaw idi dumteng ni Elmer. Adda supot nga inyawatna kada Jong ken Dex. Nagkinnita dagiti dua idi makitada ti sagduduada a balut iti supot. Adda pay saggaysada a naibotelia a danum.
“First installment ti baratok kadakayo! Inton rabii ti maikadua!” inkidday ni Elmer.
“Thank you, boss!” kinuna met ni Jong ta ammona lattan ti kayat a sawen ni Elmer.
“Dakkel sa ti inabakmo!” kinuna met ni Dex.
“Apay, kefuy?” inyellek met ni Elmer.
“Pumik-aptayonto dita Quezon Av!” Pinagrisiris ni Jong dagiti dakulapna.
“Hep!” Pinara ni Elmer dagiti kaduana. “Adda pay labantayo!”
“Sori, boss!” kinuna ni Dex nga um-umlek. Intuktokna ti maysa a balut iti semento, binuttawanna ti littik daytoy sa agkurkuridemdem a nangsusop iti digo ti itlog.
Maikatlo iti malem idi madanonan ti batang ti maikadua a manok ni Ella. Ammo metten ni Elmer no apay a kalikaguman ni Ella nga isu ti agibbet. Nupay kasta, impalagipna latta ti panagannad ti boss-da.
“Magaling ang manok ni Bitangcol kaya listo ka lang,” kinuna Elmer.
Immasideg ti kasador ken ni Ella. Ngem sakbay a masaludsod daytoy ti paradana, impakita ni Elmer ti bassit a sillakong ti kanawan a saka ti manokda.
“Bahagya lang naman. Pero baka sabihin ng mga tao na tiope,” kinuna ni Elmer.
Pinaidisso ti sentensiador ti manok ni Ella. Pinapagnana. Nagtungtung-ed. Pinaitag-ayna ti manok ken ni Elmer ket impakitada kadagiti tao.
“Magkano?” sinaludsod ti kasador ken ni Ella.
“Thirty three!”
Insublat ti kasador ti handler ni Bitangcol. Apagsurok a limapulona, naisem ken naparagsit nga agkutkuti. Ngem kas iti immuna a nakalaban ni Ella, sungsungbatanna ti kasador ngem itaktakawna a paludipan ti puseg ni Ella. No kuan kiddayanna ti para lista ket taldiapan met daytoy dagiti luppo ti balasang.
“Magkano, sabi!” kinuna ti kasador. “Kung saan-saan ka kasi tumitingin, eh!”
“Kay Boss Bitangcol nga!”
“Parada ang tinatanong ko!”
“Sixty six! Tanga!” Agsulsul-oy a nangawid iti puklo ti maong a shorts-na.
Nadlaw da Elmer ken Ella ti reaksion ti kalabanda ket naginnisemda.
Dua laeng a tahor ti intudo ti kasador, naikasan ti pusta ni Bitangcol. Ania ngarud, nagsapri manen ti gigis dagiti kristo. Ngem kas iti immuna, dehado latta iti pinnusta ti manok da Ella.
“Pu-siyam! Pu-siyam!”
“Hoy! Hoy!”
Addayta manen dagiti kasla agaarnis a senias ken sapri dagiti gigis. Pikpikpiken met ti dadduma ti uloda a mangisensenias iti liamado.
Sineniasan ti timer ti sentensiador. Insenias met ti sentensiador nga umulogen dagiti agpaspasippit ken dadduma pay nga immuli iti ring nga agyaw-awag iti pustada.
Pinagsinnikad pay naminsan da Ella ken Elmer dagiti manokda. Kalpasanna, inyawaten ni Elmer ti ilabanda ken ni Ella.
“Abang ang manok natin. Idissom iti apaglabes ti uged,” kinuna ni Elmer ket tinurongnan ti agdan ti gradas.
Kas iti immuna, ti sentensiador ti nangikkat iti baina ti tadi ti manok ni Ella. Kalpasanna, insublat ti sentensiador a pinunasan ti tadi ti manok ni Bitangcol. Nagtakder iti nagbaetan da Ella ken ti kalabanna.
Nagsenias ti timer idi masimpana ti relo. Nagsenias met ti sentensiador sa pimmanaw iti nagbaetan dagiti handler.
Nakaan-annad ni Ella a nangyayat iti manokna iti manok ti kalabanna a kasla agar-aragaag dagiti matana. Sa nakaan-annad manen a nangidisso iti labes ti uged. Nagkamang iti kubongna.
Nagariwawa dagiti tao idi tinaliaw ti handler ni Bitangcol ni Ella.
“Gago, bitawan mo na! Mamamatay ka diyan, tanga!”
“Tamaan sana ang yagba ng ulol na yan!”
Timmakder met ni Bitangcol iti ballasiw ti ring ket winitwitanna ti para ibbetna. “Animal ka! Bitawan mo!”
Nakigtot ti handler. Gapu ta naladawen, intarayna ti manokna iti asideg ti fiberglass a diding. Sarapana ti puklo ti shorts-na, arintarayen a nagkamang iti kubongna.
Kellat a nagulimek dagiti tao idi yarudok ti manok ni Bitangcol ti dumarup. Saggaysa met ti addang ti agpigpigsol a manok ni Ella sa nagsardeng iti nagbaetan dagiti uged.
“Ditoy nga abrotek ti abakko iti immuna a manok ni Ella, abalayan!” kinuna ti napampandek a lakay.
“Ken manayonan met ti inabakko,” insilpo ti nakutkuttong.
Nagriaw dagiti agbuybuya idi tumayab ti manok ni Bitangcol. Ngem saan a simmurot a timmayab ti manok ni Ella. Sinurotna laeng ti nagturongan ti kalabanna.
Bimmallasiw manen ti manok ni Bitangcol. Kaskasdi a sinurot ti manok ni Ella ti nagturtongan ti kalabanna.
Ngem iti maikatlo nga ibaballasiw ti manok ni Bitangcol, simiag ti manok ni Ella ket tinukmaanna ti kalabanna apaman a nagdisso daytoy. Nagriaw dagiti agbuybuya idi agkulipagpag ti manok ni Ella ket naikayab dagiti aglalaok a dutdot.
Nagdir-i ni Ella a nakangato dagiti gemgemna. Iti sakaanan ti agdan, naggarakgak met ni Elmer. Babaen ti padasna, ammonan ti sumaruno a mapasamak. Ti regular ti kaatiddogna a tadi ti inkabitna iti manokda a kas maibatay iti laban daytoy.
Ad-addan ti riaw dagiti dehadista idi aginnibbet dagiti manok. Kasano ket taray-bugsot ti manok ni Bitangcol ket idi madungparna ti diding, bulonnan a nagkuyegyeg.
Ngem naputed ti riaw ni Ella idi kimleb lattan ti manokna iti nangpanawan ti kalabanna iti daytoy. Limmitem ti rupa ti manok nga agkurkuridemdem a nangitukol iti sippitna iti daga.
“Karyo! Karyo!”
Tinaray ti sentensiador ti manok ni Bitangcol sa tinukmaanna ti manok ni Ella. Nagriaw manen dagiti dehadista idi simmippit ti manok ni Ella. Ad-addan ti riaw ken palagapag dagiti agbuybuya idi naguyaoy ti ulo ti manok ni Bitangcol.
Tinaray ni Ella ti manokna. Ngem apagawatna, nagsung-ab metten daytoy. Naragasan ti ragsak ni Ella,
“Sikanto met ngamin, ‘balayan. Bitangcol-ka a Bitangcol a kunam la no kabagiam, pueee!” Nagtupra ti nakutkuttong a lakay.
“Diak kayat ti tenor ti panagsasaom, abalayan!” inngernger met ti napampandek. “Pinilitka, aya, a mangpusta iti manok ni Bitangcol?”
Nagpinnapilit dagiti agabalayan. Agingga iti saanen a nagpakada a pimmanaw ti napampandek.
Agalas singkon iti malem idi malpas ti 2-Cock Ulutan. Iti ababa a seremonia, naideklara ti Queen Ella ken Morning Star nga entry ti taga-Project 8 a co-champion. Malaksid iti premioda, naikkanda pay iti saggaysada a tropeo.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
