Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-21 a Paset)
NADIGOSEN ni Mang Bianong ti pimmag-ong a kotsena. Ngem idi isublina koman iti garahe, agdardaras nga immasideg kenkuana ni Ella. Naggapu ti balasangna iti mini-farm.
“Dad, sandali lang!” kinuna ni Ella ket ginuyodna ti takiag ti amana. Kinitana ni Manang Mameng iti ‘yan dagiti orkidia daytoy iti sikigan ti balayda a dumna iti kalsada.
“Apay?” Rinikpan ni Mang Bianong ti luganna.
Insenias ni Ella ti mini-farm ket ginuyodna manen ti ima ti amana.
Galiera Queen (MAUDI A PASET)
Tinaliaw ni Mang Bianong ti asawana sa simmurot ken ni Ella. Ket nasdaaw iti nadatnganna a langa da Elmer ken Dex. Nakamasngaad ni Dex iti sango ti kalapawna, intukolna dagiti sikona kadagiti sumilsilap a tumengna ket nagduaanna ti nagtapaya. Nagtugaw met ni Elmer iti sagpatan nga agkuykuyakoy ngem langana ti nanglangan nga imminum ta aragaag dagiti matana.
“Apay, ania ti problemayo?” Pinagsisinnublat a kinita ni Mang Bianong dagiti tallo.
“Bagsakan pala talaga ng nakaw na manok ang pinanggalingan ng binili ni Elmer,” impadamag ni Ella. “Ania aramidentayo, dad?”
“’Nagkuna?” Nagmulagat ni Mang Bianong.
“Ni Jong kano. Immay gayam idi malem ket impadamagna a nai-flash report iti TV iti alas dos a sinerrek dagiti polis ti maysa a bagsakan ti manok dita San Pedro. No kasta, ti naggatangan ni Elmer daydiay.”
Nagsul-oy ni Mang Bianong. Kinitana ni Elmer.
“Daydiay laeng ti bagsakan dagiti biahero idiay San Pedro, boss. Isu daydiay ti rineyd dagiti polis!” kinuna ni Elmer.
Timmakder ni Dex. Pinampagna ti patong ti shorts-na. “Kasano’ttan, boss?” kinunana. “No maespiaanda nga adda ditoy ti dadduma a manok a naggapu iti bagsakan, siak la ketdi ti umuna a maladdit ta siak ti madanonda. Kasanoakon? Di pay siak ti umuna a matiliw ken maibalud?” Agling-eten ni Dex.
“Anong gagawin natin, dad?” Kimpet ni Ella iti takiag ti amana sa winagwagna.
Kinudkod ni Mang Bianong ti ulona. “’Wag munang ilabas o ilaban ang mga manok na ‘yan. At kung may buyer, ibenta na para mawala sa atin,” kinunana.
Ngem nagkutagtag ni Ella. ”Si dad naman!” Nagmisuot ni Ella. “Apay nga ilako ida ket naglalaingda. Binili natin ang mga iyan. No tinakaw, saan met a datayo ti nagtakaw. Ken ginatangtayo met.”
“Ngem adda linteg a mangdusa met iti aggatang iti tinakaw,” impalagip ni Mang Bianong.
“Adda pampanunotek nga aramidentayo no di kayat ni Ella a palusposan dagiti manok. Saanda no kuan a malasin dagiti manok no kas pagarigan!” kinuna ni Dex.
Naiturong ken ni Dex ti panagkita dagiti kaduana.
“Addan sa met iduldulin ni Dex a laing. Ania ti pampanunotem, Dex?” kinuna ni Elmer
Napasablogan ni Dex. “Beri esi!” inkatekna. Innalana ti maysa kadagiti manok a naggapu idiay San Pedro. Iniggaman ti kanawanna ti ipus ti manok. “Kastoy, ne. Tukkolen ti dadduma nga ipusda ken gettengen ti dadduma a dutdot iti bukot ken tengngedda.” Immuestrana. ”Saan metten a bugguan dagiti gurongda tapno agbalinda a ngirngir. Ania ti makunayo?”
“Ne, talaga nga agan-andar ti utekmo, Dex!” Nagkatawa ni Elmer. “Ania ti makunayo, boss?” Kinitana da Ella ken Mang Bianong.
Immanges iti dakkel ni Mang Bianong. “Mabigat dalhin. Tinakaw, eh!” kinunana. “Saantay' san nga ilaban dagita. Maamakak!”
“Kasano ngaruden ti kuartak? Diyo kuna nga aglaklakayda lattan a pakpakanen. Adobuen? Talaga a kailalada. Naglalaing a manok!”
“Sayang met nga agpayso,” impasaruno ni Elmer. “Ania ngata no testingentayo?”
“Kasano?” kinuna met ni Mang Bianong.
“Ilabantayo ti maysa, pangtestingan. Parisantayo iti maysa kadagiti winner-tayo,” insungbat ni Elmer.
“Dakayo. Ngem pumusta? Binallaagankayon. Ngem no agpilitkayo, baliwanyo ti langada!” Nagngilangil ni Mang Bianong.
Ngem nakapagdesisionen ni Ella. Dakkel ti namnamana nga adda laban dagiti kabarbaro a manokna iti fastest kill dita Del Monte.
“Lumabanak dita Del Monte,” nakataltalged ti timek ni Ella.
Saanen a naguni ni Mang Bianong. Ammona ti ugali ti anakna. Saanen nga ubing daytoy tapno agturay pay laeng ti kinaamana kontra iti pagayatan daytoy.
“Ngem adda singasingko,” kinuna ni Mang Bianong idi agangay. “Dua laeng ti ilabanyo. Parisanyo ti kabarbaro iti lakay a darisayen a di nagsugat dita Sta. Ines.”
Kinita ni Ella ni Elmer. “Ania ti makunam?”
Nagtung-ed ni Elmer.
“Nabileg ti pammagbaga ti inauna a manakem. Mayatak iti kuna ni boss,” kinunana.
NAISIBETEN da Mang Bianong ken Manang Mameng a mapan makitienda iti Farmer’s Market. Mailiw kano ngamin ni Mang Bianong iti sinigang sa miso nga ulo ti salmon isu a makitiendada dita. Dita ngamin ti pakaidissaagan ti adu a sadiwa a lames nga aggapu iti nadumaduma a deppaar. Kinapudnona, maayatan ni Mang Bianong no maidaw-as dita a palengke ta adda pay la makitana dita a dalag—maysa kadagiti lames-tamnay a di maliwayan nga ipasarabo kenkuana ni Elmer no agbakasion daytoy idiay Allacapan. Bungonenna no kua iti nagakkub nga ubbak ti saba ket sibibiagto pay la no sumangpet iti aglawag. Tunuenna sa isawsawna iti nakamatisan a digo ti bugguong ti Lingayen.
Iti kuartona, nakasukaten ni Ella. Maong a suysoy nga agingga iti ngatuen ti ngalay ti muldotan a luppona ti gayadanna. Pinarisanna daytoy iti lumabaga a blusa a tangar ti kueliona ken pagatpuseg ti gayadanna. Awan lipstick ken apagapaman laeng ti polbosna, ngem kas 'tay kunadan, saan a nasken a kagatem ‘tay salamagi tapno tumbog ti ngiwatmo. Saan met a nagbangbanglo ngem adda kenkuana ti natural a sayamusom ti sabong a rosal a pinagukrad ti salemsem ti parbangon.
Iti klinikana, itay pay nga agur-uray ti balo a para dalus ni Johnny iti panangibaon ni Johnny kenkuana a mapan gumatang iti balonen daytoy a rummuar. Ammo ngamin ti balo a dua a banag laeng ti gapuna a rummuar ni Johnny iti aldaw ti Domingo—makimisa wenno kuyogenna ti kunkunana a siotana a mapan makigaliera. Nakimisan ti amona itay alas singko isu nga awanen ti ammona a papanan pay daytoy no di kuyogen daytoy ti siotana. No ti siotana ti papanan ti amona, dudua met a banag ti mabalin a pagatang daytoy—sabong wenno makan. Ket idawdawatna a makan koma ti pagatang ni Johnny tapno mailak-amna ti para kenkuana.
Ngem adayo ita ti pasarabo iti panunot ni Johnny. Nabukelna ketdin a pustaanna iti dakkel dagiti manok ni Ella. No mangabak, awisennanto ti balasang a mangrabii idiay Macapagal Avenue. Saan met ngata a pusong-bato a kuna ti kanta ti puso ni Ella tapno di malunag ti asi daytoy kadagiti ar-aramidenna para iti balasang.
Iti mini-farm, nakasagana metten da Elmer, Dex, ken Jong. Maris kape a shorts ken nalabaga a kamiseta ti suot ni Elmer. Naibarikesnan ti bassit a bagna a naglaon kadagiti tadina ken dadduma pay a kasapulanna nga agikabit iti tadi.
Sumilsileng met ti kasla nagpigar a buok ni Dex a pinasikkil ti gel. Maong a shorts ken jacket ti suotna. Kas iti sigud, suot manen ni Jong ti bumerde a kamisetana a kunana a suerte ta mangabakda kano latta no suotna dayta.
Kas insingasing ni Elmer, dua laeng ti ilabanda: ti lakay a darisayen a di nagsugat dita Sta. Ines ken maysa a naggapu idiay San Pedro. Maikatlo a manokda ti pagpasippitda.
Sumagmamano laengen a minuto sakbay ti alas nuebe. Linukot ni Ella ti balonenna a kuarta sa imbolsana. Pinayso ni Mang Bianong ti imbagana a saan a pumusta ngem imbalakadna a di unay kadakkelen ni Ella ti ipustana iti naggapu idiay San Pedro.
Rummuaren ni Johnny idi pagunian ti balo.
“Tay igatangko iti pasarabom, sir!”
“Saanen.” Di pay tinaliaw ni Johnny ti balo.
“Agpadawatka man ngarud igatangko iti pandesal, sir.”
Rinakem ni Johnny dagiti sensilio iti bolsa ti pantalonna ket indissona iti nakataya a dakulap ti balo. Nagdusngi ti balo idi makitana dagiti sensilio. Kasano ngamin ket adda sagbibinting, adda pay sagdidies sentimos.
“Igatangmo aminen. Suplik dagita dita groseri,” kinuna ni Johnny.
“Pagpalamanko?”
“Isawsawmon iti kape,” insungbat ni Johnny a bulonna a timmallikud.
Iti mini-farm, timmakder da Elmer idi matugtog ti rikep ti gate.
“Alis na tayo!” Ni Ella. “Addan ni BBJ!”
Karugrugi ti panagikabit iti legband idi dumteng ti grupo iti Del Monte Cockpit. Atiddogen ti pila.
“Ilan ang entry ninyo? Kaninong manok?” insungo ti maysa kadagiti agilislista dagiti karton a bitbit da Dex ken Jong.
“Tatlo,” insungbat ni Dex. ”Lima kami. Isang mananari. Entry ng Queen Ella.”
“Ikaw pala ang sinasabing reyna ng Sta. Ines!” Uray la nagbusingar ti agong ti maysa kadagiti agbambantay a nakakita ken ni Ella. “Totoo palang napakaseksi mo!”
Nangngeg dagiti dadduma. Idi agbalaw ti grupo, nalawlawdan kadagiti usioso. Isu nga inipig ni Johnny ni Ella. “Paraan!” imbikagna ket imbislinnan ni Ella iti ridaw. Simmaruno metten ni Johnny.
Inruar ni Ella ti bayadda iti legband ket intedna ken ni Elmer. Inyawat met ni Elmer iti agikabkabit iti legband. Ngem idi mapanda koman agpili iti cockhouse, isu met a dumteng ni Jeffrey nga adda nakaaklili kenkuana a kataebna a babai a nakauniporme iti puraw.
“Hi, Ella! ‘Musta na!” impasabat ni Jeffrey idi mabigbigna ni Ella. “Si Gina, syota ko. Gina, si Ella.”
“Hi, Gina!” Mapilpilit ti isem ni Ella. Dina ammo no apay, ngem dina magustuan ti itsura ni Gina a nakaaklili ken ni Jeffrey. “Sige!” kinunana ket simmuroten kada Elmer ken Johnny.
“Aircon wenno bentilador?” sinaludsod ni Elmer idi sumrekdan iti intar dagiti cockhouse.
“Bentilador lang,” insungbat ni Ella.
Maysa kadagiti adda bentiladorna a cockhouse iti kalikudan nga intar ti napili ni Ella. Idi maited ti agaywan ti tulbek, nagpakada da Elmer ken Jong a mapan agkape. Impisok met ni Dex dagiti manokda iti kulongan. Kalpasanna, inyabbong ni Johnny ti tarpaulin kadagiti kulongan.
Nakasublin da Elmer ken Jong idi maipakdaar a mangrugin ti panagatar. Nagsinsinan da Elmer ken Dex dagiti manokda ket nakiragupda kadagiti agdardaras a mapan iti pagataran.
Pangur-urayanda kada Elmer, innala ni Ella ti daan a pagiwarnak iti rabaw ti kulongan a nalabit imbati ti maysa kadagiti nangusar iti cockhouse sa nagpuesto iti plastik a palangka. Ngem madamdama, nadlaw ni Johnny nga adda manen dagiti aginlalabas sa tannawaganda dagiti luppo ni Ella. Pagsayaatanna, nasaganaanen ni Johnny dayta. Ginuyodna ti tualiana a nakasalapay iti abagana sa inyarpawna iti luppo ni Ella.
“Thank you!” inyisem met ni Ella.
Awan pay tallopulo a minuto, nagsublin da Elmer ken Dex. Addan numero dagiti manokda. Insublida dagiti manok iti kulonganda.
“Darisayen met laeng ti kalaban ti San Pedro,” impakaammo ni Elmer. “Agkataebda iti panagkitak.”
“Dayta lakay?”
“Ubing nga alimbuyogen,” ni Dex ti simmungbat.
“Pustaak ida a dua,” kinuna met ni Johnny. “No mangabak ti umuna, idobladak iti maikadua!”
Naibbatan la ket ngarud ni Ella ti daan a pagiwarnak iti pannakakigtotna, napanganga da Jong ken Dex, idinto ta nagmulagat ni Elmer.
“Totoo ba ang narinig ko?” kinuna ni Ella.
“Ulitem man!” kinuna met ni Elmer.
“Pumustaak!” inulit ni Johnny.
Naginnapir met da Jong ken Dex.
NAGKARADAKAD ti sound system. Isu pay la ti pannakadlawda nga agalas dose gayamen. Madamdama, addaytan ti kasla nabitbit a timek ti naka-megaphone.
“One, two, three, four and five, tari na!”
Napan dagiti naawagan a numero iti naituding a pagikabitan iti tadi iti maysa nga ungto ti pagataran.
Maikadua ken maikatlo a grupo dagiti manokda isu a nagpakada da Elmer ken Jong a mapan agtrabisia. Apagpanawda idi dumteng ni Jeffrey. Ni Dex ti nakapasungad iti daytoy .
“Si Jeff,” kinuna ni Dex.
“Hi, Ella. How are you!” kinuna ni Jeffrey idi makadanon iti ridaw.
“Ang syota mo?” kinuna ketdi ni Ella. “Ang ganda niya!”
Nagkatawa ni Jeffrey. “Oy, mas maganda ka, ha!” kinunana.
Timmakder ni Ella. Kinawitna ti takiag ni Johnny. “’Lika muna, luv, at manood tayo!” kinunana.
Nakigtot ni Johnny ket dandanina natilmon ti angesna. “Ha? Kuwan…”
Napunas ti isem ni Jeffrey. “Kayo na?”
“Oo, noon pa. Di ba, luv?” inirutan ni Ella kapetna ken ni Johnny. “Makisalaka!”
Imlek ni Dex.
“A-e, wen, wen! Este, yes!” Pinampag ni Johnny ti barukongna ta kasla immilet ti pagangsanna.
“O, sige. Baka hinahanap ako sa takilya!” Bigla a nagpakada ni Jeffrey.
“O, sige, babay!” Nagpayapay met iti babassit ni Ella. Iti pait ti isem ni Jeffrey, ammonan nga adda rikna daytoy kenkuana. Gunggonam, loko, nakunana laengen iti unegna sa bulonna nga immibbet ken ni Johnny.
Nakatugaw manen nga um-umlek ni Ella, ngem di pay naungaran ni Johnny. No daytoy man ti sungbatmo iti daydi sabong, Apo, thank you unay unay, kunkunana iti unegna. Nalagipna ngamin daydi sabong nga itedna koma ken ni Ella ngem imbatina iti sakaanan ti dina am-ammo nga imahen idi nadanonna ti kotse ni Jeffrey iti sango ti balay ti balasang.
Agdardaras a dimteng da Elmer ken Jong idi mayawag ti grupoda nga agpatadi. Ngem alisto ni Elmer. Madamdama, addan iti pila iti sango ti ridaw nga agturong iti agdan ti gradas.
“Mapankan,” kinuna ni Dex ken ni Ella idi makasubli iti cockhouse-da. Inruarna ti pagpasippit ket intedna ken ni Ella.
“Tulbekanyo no kayatyo ti agbuya,” kinuna ni Ella sakbay a pimmanaw.
Natiritir manen ti tengnged dagiti adda iti pila idi sumrek da Ella ken Elmer iti ridaw. Sa idi umulida iti gradas, sultip ken palakpak ti nangsarabo kadakuada.
“Magkano?” sinaludsod ti kasador ken ni Ella.
“Sixteen five!”
Insublat ti kasador ti agtutubo a kalaban ni Ella. “Magkano, Michael?”
Insenias ti agtutubo ti beinte dos.
Sinango ti kasador dagiti tao. “Sixteen–five sa Queen Ella, twenty two sa Rainbow ni Fe Garcia ti Gonzaga, Cagayan!” impakdaarna sa nagitudo iti ringside. Saan a nagbayag, naikasan ti pusta.
“Flyer ti manokmo ket yadayom bassit tapno makabuelo,” kinuna ni Elmer ken ni Ella sakbay nga immulog iti gradas.
Sineniasan ti timer ti sentensiador. Insenias met ti sentensiador ti larga sa pimmanaw iti nagbaetan da Ella ken Michael.
Inyayat ni Ella ti manokna, siniimna ti kalabanna, sa nagsanud ket indissona ti manokna.
Umaddangen nga umasideg iti uged ti manok ni Ella ngem kasla agmalmalanga pay laeng ni Michael. Ania pay, timmakder ni Fe Garcia ket riniawanna ti handler-na.
“Ibbatamon!”
Nakigtot ni Michael. Nagsanud ket kunam la no beggang ti manokna a basta indissona lattan.
Nagriaw dagiti agbuybuya idi nagsabat sa nagtinnukma dagiti manok iti aire. Nagkinnulipagpagda ket naikayab dagiti dutdor.
Imkis ni Ella ket dinanogna ti angin. Ammona ti abilidad ti manokna ket malas laengen no dina naisukib ti tadina.
Ngem kasla nabusalan ni Ella idi nagdata a nagdisso ti manokna. Nagkul-ob met ti kalabanna; insarukodna ti sippitna.
“Karyo! Karyooo!”
“Hoy, tanga, karyo na!”
“Bulag ka ba?”
Nagdayb ti sentensiador ket tinukmaanna ti bukot dagiti manok tapno ikariona dagitoy.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
