Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-22 a Paset)
KINABBENG ni Ella ti stainless a lebleb ti kubongna. Nagtil-ay a nangtannawag iti sentensiador idinto a tengtenglenna ti panagangesna.
Iti ringside, nakair-irut ti kaem dagiti bibig da Dex ken Jong. Dida pay agkirem a kumitkita iti tengnga ti ring. Saan met a napupuotan ni Johnny a pinagakkub dagiti agkalkaling-etan a dakulap. Ania metten, Apo, inyanil-il ti unegna. Plis naman, saan kadi met, a, indawatna ta agwaliwalin ti ulo ti manokda a binagkat ti sentensiador. Iti agdan, intalmeg ni Elmer ti abaga ti adda iti sangona ket kunam la no masulnot ti tengngedna iti panangtannawagna iti tengnga ti gradas.
“Tarantado! Dalian mo!” adda nangdil-ag iti sentensiador.
“Dalian mo, gunggong!”
NOBELA: Apo Baboy Party-List (6)
Ngem kasla awan mangmangngeg ti sentensiador. Nairuamen kadagiti kasta a kinarugit ti panagngiwngiwat ti adu a mammallot. Ammona met a kaaduan a kasta dagiti kristo ken bassit ti puonanda ta naglasatanna met ti kasta sakbay nga innala ti management ket sinanayda nga agsentensia. Dagiti big time, nungka a mangngegmo nga agtabbaawda no maabakda uray no pagduaduaan no dadduma ti tignay ken desision ti sentensiador. Kuna ngarud ti naipaskil iti gayadan ti barandilias ti bleachers: Final ang desisyon ng reperi. Malaksid no nakaro unayen a kaso ti panangpabor ti madlaw dagiti tao, aglalo dagiti maibilang a big time a mammallot. Iti kasta a kaso, sukatan ti management ti sentensiador. Masuspende wenno maikkat ti sentensiador depende iti kinadagsen ti pammabasol kenkuana.
Inkario ti sentensiador dagiti manok. Lumitemen ti rupa dagiti manok ngem nagsinnippitda latta. Limmukay bassit ti panaganges ni Ella.
Indisso ti sentensiador dagiti manok. Ngem di man laeng immakar dagitoy iti nakaidissuanda. Nagariwawa manen dagiti tao.
“Karyo! Karyooo!”
Uray agkurkuridemdem, simmippit ti manok ni Ella. Uray ti Meron simmippit met.
Iti nagtugawanna, kasla mais-isiten ni Johnny ket di makatalna ti patongna. Nakanganga met lattan da Dex ken Jong.
Saan latta nga immakar dagiti manok iti nakaidissuanda. Agpadada a kasla agdungdungsa.
“Shio! Shiooo! Agriingka, laglag!” indil-ag ni Michael iti ayug-Gonzaga.
“Sige, lumaban ka! Lumaban ka!” imbales met ni Ella.
Ket bimtak ti riaw ken palagapag dagiti liamadista idi simmippit ti agkurkuridemdemen a Meron.
“Isa! Dalawa!”
Insublat ti sentensiador ti manok ni Ella. Ket nagsennaay dagiti dehadista idi saan a simmippit ti pinustaanda. Kasla nabuyatan met iti nalamiis a danum ni Ella idinto a nalpay ti abaga da Dex ken Jong, aglalo ni Johnny. Iti agdan, mapilpilit ti isem ni Elmer nga immulog. Kasta laeng ti pallot, kinunana iti unegna ket naglayonen iti ridaw.
Kunam la no marba ti galiera iti pigsa ti riaw ken sipsipat. Iti kubongna, saanen nga agsarday ti riaw ni Michael.
“Patay kang, seksi ka!” adda nangikiraud.
“Mag-ago-go dancer ka na lang, iha!” adda met nangikantiaw.
Dinilatan ni Ella ti direksion ti naggapuan ti kantiaw sa nagkinnikinni iti kubongna.
Intupak ti sentensiador ti manok ni Ella tapno mariing. Ngem imbes a mariing, nagkidem ketdi ket nagbugsoten daytoy. Indisso ti sentensiador sa binilanganna. Ket ad-addan ti riaw ken palagapag dagiti liamadista. Timmaray met ni Michael ket innalana ti manokna sa lagto a lagto nga immulog iti gradas.
Agkakapsut ni Ella a rimmuar iti kubong. Tinaldiapanna pay naminsan ti natayen a manokna ket naglayonen iti agdan ti gradas. Pinakamatan manen dagiti sutil iti kantiaw.
“Magpataya ka na lang ng hueteng!”
“Hindi! Mas madali ang magtinda ng sigarilyo!”
Iti ringside, kasla naipigket ti patong ni Johnny iti nagtugawanna. Mapekkelanen ti paniona iti buslon ti panagling-etna. Ket idi agbalaw, awanen da Dex ken Jong iti abayna.
Nadanonen ni Ella da Elmer, Dex ken Jong iti cockhouse. Kinautna ti kuartana iti bolsa ti shorts-na ket inyawatna ti abakna ken ni Elmer. Pinagtipon met da Dex ken Jong ti pustada sa inyawatda ken ni Elmer.
“Ni Johnny?” sinaludsod ni Elmer idi mabilangna ti kuarta. “Dos-dos kaniana!”
“Dakkel ti abak ni BBJ,” kinuna ni Jong. “Nakipinnusta pay iti kinaabayna!”
Intupak lattan ni Ella ti patongna iti plastik a tugaw. Agkakamakam ti panagpug-aw ken panagpunasna iti ling-etna. Nakaul-ulimek met da Dex ken Jong a nagmasngaad iti abay ti takkab a mangmulmulengleng iti lakay a darisayen a nakamattider a kasla agsuysuyaab iti uneg ti takkab.
Dimteng ni Johnny. Nakasaganan ti pagbayadna, ngem inulitna pay a binilang sakbay nga inyawatna ken ni Elmer. Saan a nagbayag, dimteng metten ti tao ti galiera a mangkolekta iti pagbayadda.
Kas kada Dex, nagmasngaad met ni Johnny, intukolna dagiti sikona kadagiti tumengna ket sinarapana ti mugingna. Ngem di nagbayag timmakder met laeng ket nagpagpagna iti pasilio.
“Relaks lang!” Nagkatawa iti nakapsut ni Elmer. “Ita laeng a mapadasanyo ti maabak, kunam la no ginasut a ribun ti abakyo!”
Timmakder ni Ella. “Isaganam ‘ta maikadua,” kinunana.
“Kayatmo a sawen, lumabantayo pay laeng?” kinuna met ni Dex a bulonna a timmakder.
“Kasta ti kayatko a kadua!” Nagtungtung-ed ni Elmer. “Palaban!”
“Ania, lumabantayo pay? Sus, baka maabaktayo manen!” kinuna met ni Johnny.
“Di ba dalawa ang panlaban natin? Ania, yawidtayo ‘ta darisayen a nakasaganan nga ilaban? C’mon, Johnny!” Nagdeppa ni Ella a nagmuestra. “Apay, dimo kayaten ti pumusta? Kasano a maabrotmo ti abakmo no petpetam metten ‘ta natda a puonam?” Kinautna manen ti kuartana sa binilangna. Adda pay walo ribu a nabati, nasursurok ngem tallo ribu tallo gasut a minimum bet.
“Ania ti makunam?” sinaludsod met ni Dex ken ni Jong.
“Bassiten ti kuartak, ngem ipustak ti dadduma,” insungbat ni Jong.
“Mano pay ti kuartam?” sinaludsod ni Ella ken ni Elmer.
Insenias ni Elmer ti lima ribu.
“Six-six kaniak, tres-tres ka na. Ambaganyo ta anayentayo nga onse.” Kinita ni Ella dagiti kaduada.
Ngem nagwingiwing ni Johnny. “Saantay' la koman nga ilaban, baka maabak manen,” kinunana.
“Si BBJ naman!” immulagat ni Ella. “Five hundred ka na at hati sila sa seven hundred.” Insungo ni Ella da Dex ken Jong.
Ania pay, immanges laengen iti dakkel dagiti dua sa timmakderda.
Nalabesen nga alas dos iti malem idi maiwaragawag a matadianen ti umuna a lima iti grupo a nakairamanan ti maikadua a manok ni Ella. Ket inyaon ni Dex ti lakay a darisayen iti takkab tapno mapandan ken Elmer iti pagikabitan iti tadi.
No namin-ano a nangirukod ni Elmer iti tadi iti saka ti manokda sa inkapetna iti daytoy ti maysa kadagiti kabarbaro a pinaaramidna dita Baesa. Apagisu laeng ti tadi iti tumeng ti manokda.
“Pinatayna ti kalabanna iti dikitan. Masapul a ti nalakana nga isukib ti tadina ti ikapetta. Saan a mabalin ti atiddog unay,” kinuna ni Elmer ken ni Jong.
“Siak ti mangipila bareng mas suerteak,” kinuna ni Dex idi matadianda ti manokda.
Pinabus-oyan met ni Elmer ni Dex. Nagsubli iti cockhouse pangur-urayanna iti batangda iti gradas.
Dua a soltada laengen sa batangda iti gradas idi pagsaludsodan ni Elmer ni Ella.
“Ania, siak pay laeng ti mangibbet?”
“Saan, siakon,” insungbat ni Ella. “’Tay pagpasippit?”
Innala ni Jong ti manok iti kulongan ket inyawatna ken ni Ella. Ni Elmer ti nangubba iti lakay a darisayen.
Kinandaduanda ti cockhouse tapno makabuyada amin. Nagtarus da Dex iti ringside.
Agsasallupang manen a sultip ken nakapigpigsa a sipsipat ti nangsabat ken ni Ella idi umuli iti ring. Ngem adda latta met dagiti sutil.
“Wawaw! Flying kiss naman diyan!”
“Ikembot mo, ikembot mo, bebe!”
“Di makukuha sa paseksihan ang panalo, hoy!”
“Di pa sumikat, laos na, ha-ha-ha!”
Imbes a masuron, nag-flying kiss ketdi ni Ella sa nagkinni a nagpatengnga. Ad-addan a naray-aw dagiti agraem ken ni Ella ket nagkakatawa ken nagsisipatda. Napanunot met ni Ella a sutilen dagiti mangkankantiaw kenkuana. Pinaglukongna ti kanigid a dakulapna, inyapiringna iti lapayagna sa insarangna iti naggapuan ti napigsa a sipsipat. Napigpigsa manen a katkatawa ket sipsipat ti impaay dagiti tao kenkuana. Agkatkatawa a nagwagis sa inasitganna ni Elmer.
Simmaruno nga immuli iti gradas ti kalabanda a handler ken ti para pasippit daytoy. Di pay nakapatengnga iti gradas, pulotanenen dagiti kasla arimbara a lomboy a mata daytoy dagiti luppo ni Ella. Pulos a dina mailinged ti gartemna iti balasang. Nadlaw met da Ella ken Elmer ket naginnisem dagitoy.
Immasideg ti kasador ken ni Ella. “Magkano?”
“Onse!” kinuna ni Ella.
“Ha?”
Inulit ni Ella ket immakaren ti kasador iti kalabanna a handler.
“Thirty three!”
“Thunder 1, thirty three! Queen Ella, eleven!” impakaammo ti kasador sa intudona ti puesto dagiti handler. Kalpasanna, binatoganna dagiti dehadista iti ringside.
Ngem sangapulo ribu laeng ti naala ti kasador a pusta iti ringside. Gapu i'toy, sinangona da Ella ken Elmer.
“Pago lima!”
Ngem sangaribu laeng ti insenias ni Elmer. Ninayonan met ni Ella iti sangaribu.
Tinangad ti kasador dagiti adda iti bleachers. “Tobias, dalawa ka. Asia, dalawa, Lampa, dalawa!” Dua pay ti intudona ket naikasan ti pusta.
Nagariwawa dagiti tao.
“Meronnn! Meronnn!”
“Onse! Onseee!”
Pinasippitan ni Ella ti bukot ti lakay a darisayen. Namindua, namitlo, ngem awan man la ti reaksion ti ilabanda. Imbaga ni Elmer nga idisso ni Ella ti para pasippit, ipusenna daytoy sa paatrasenna ket ipakamatna met ti darisayen. Ngem nagsakuntip ni Elmer ta sagsaggaysa ketdin ti addang ti lakay a darisayen a mangsursurot iti para pasippit. Gapu itoy, pinagliad ni Elmer ti darisayen tapno pasippitan ni Ella ti panga daytoy. Nanalteek ti kudil ti darisayen a nasippit. Ngem naggulagol daytoy a bulonna a kimmarit. Nagtungtung-ed ni Elmer ket pinasippitanda manen ti panga ti darisayen. Ad-adda nga immingar ti manok.
Nadlaw dagiti pumapago ti kasla panaglaladut ti manok ni Ella. Kimmaro la ket ngarud ti pannakadehado ti darisayen.
“Anim! Animmm!”
Timmulad ti dadduma ket napatured dagiti dehadista. Uray ni Ella naguyugoy iti kadakkel ti abakenna ket sineniasanna ti maysa a liamadista.
Ngem iti ringside, nakaul-ulimek latta nga agbuybuya ken agdengdengngeg da Dex, Jong, ken Johnny. Ammoda ti kadakkel ti abakenda no kas pagarigan ngem maamakda amangan no maabakda manen. No agbanag a kasta, nakapulpulosdan nga agawid. Uray gin, awanen pagmulumogda.
Nagsultip ti timer tapno umulogen dagiti awan bibiangda iti ring. Ngem adda latta dagiti sulpeng, nangruna dagiti tao met laeng ti galiera ken dagiti kristo dagiti maibilang a big time. Gapu itoy, inusar ti timer ti sound system. Pinaulina ti maysa a guardia ket daytoy ti nangpaulog kadagiti sulpeng.
“Dimo yadayo unay ti pangibbetam,” impalagip ni Elmer ken ni Ella. “Huston ti tallo kadapan a kaadayona iti uged.”
Immuna a pinunasan ti sentensiador ti tadi ti Meron. Kalpasanna, sinuktona ti baina ti tadi ti manok ni Ella sa pinunasanna. Nagtakder iti nagbaetan dagiti handler.
Sineniasan ti timer ti sentensiador. Insenias met ti sentensiador ti larga sa siaalisto a pimmanaw iti nagbaetan dagiti handler. Limteng ti ulimek.
Nagpinnaayat dagiti handler sa nagsanudda. Napaisem manen ni Ella idi nadlawna ti nagartem a panagkita ti kalabanna kadagiti luppona. Indissona ti manokna sa nagkamang iti kubongna.
Nagriaw dagiti tao idi immaddang nga umasideg ti manok ni Ella. Pagsayaatanna, nagsardeng ti darisayen iti nagbaetan dagiti uged, nagpayakpak sa nagtaraok.
Addan ni Ella iti kubongna, ngem kumitkita pay laeng ti kalabanna kenkuana. Makakatkatawa, sige, ‘wag mo nang bitawan ang manok mo, gago, kinunana iti unegna.
Nagdanag met dagiti agbuybuya.
“’Tang ina mo! Bitawan mo na, Dagul!”
“Ibbatamon, laglag! Uttingka a talaga!”
Nakasuron ti maysa nga agbuybuya iti ringside. Kimmaut iti sensilio iti bolsana ket binatona iti lima a pisos ti handler.
“'Ninam! Dika pay la mapisti, laglag. Mangiruboka, a!”
Nanalteek ti ulo ti handler. Iti kigtotna, indissona lattan ti manokna iti sanguananna sa timmaray. Nagkakatawa dagiti agbuybuya.
“‘Tangna mo!” inkiraud ni Dagul idi makastrek iti kubongna.
Nagrakab dagiti manok. Bimtak ti riaw dagiti agbuybuya ket nalmes ti tabbaaw ti nasaktan a handler.
Timmukkaw ti darisayen. Pinasabtan ti ubing nga alimbuyogen iti jab. Intuloy ti darisayen ti dumarup ket natukmaanna ti tengnged ti kalabanna. Simmublat a nagkulipagpag. Nagriaw dagiti agbuybuya idi maidaramudom ti alimbuyogen.
Iti agdan, intalmeg ni Elmer ti abaga ti adda iti sangona tapno makitana dagiti manok. Iti ringside, nakaul-ulimek latta dagiti tallo nga agbuybuya.
Bimmangon ti alimbuyogen ket pinarakapakna ti darisayen. Nakapet met ti darisayen ti alimbuyogen, nagilad sa nagkuripaspasanna daytoy. Nagriaw dagiti dehadista. Ngem idi makabangon dagiti manok, nakita dagiti agbuybuya nga agtedtedted ti dara iti pitso ti manok ni Ella.
Ngem nakapet manen ti darisayen ti alimbuyogen ket nagsiapel. Nagriaw manen dagiti dehadista idi napakin-od ti alimbuyogen sa napatugaw idi ibbatan ti darisayen.
“Patay na! Patay na!”
“Ma-el ang amo, eh!”
Timmukkaw manen ti darisayen, ngem dua a kulipagpag ti impasabat ti alimbuyogen. Napasanud ti darisayen. Nagtedted ti dara iti nalikba a payakna. Nagriaw met dagiti liamadista. Ngem sakbay a makadanog manen ti alimbuyogen, natukmaan ti darisayen ket kinulipagpaganna daytoy iti namindua. Napatugaw ti alimbuyogen ket rinam-edan ti darisayen. Nagtalna dagiti manok. Nagal-alda.
“Lobat na! Lobat na!”
Pagammuan la ta inkuduag ti alimbuyogen ti darisayen. Naiparusisi ti darisayen ngem nakapet daytoy ti kalabanna. Nagtinnaragatagda. Iti aginnibbetna nagtillayon ti dua pulgada a bagis ti darisayen idinto ta inulod ti alimbuyogen ti kanigidna. Saanen nga agpulsot ti riaw ken palagapag dagiti agbuybuya. Iti agdan, impempennek ni Elmer nga intalmeg ti abaga ti adda iti sangona.
“Yumuko ka naman!”
“Nakayuko na nga, eh!” inyingar ti maysa. “Pandak ka kasi, eh!”
“Eh, ano kung pandak?” inyingar ni Elmer, minulagatanna ti kasasaona.
Saanen a naguni ti lalaki. Naglisi bassit tapno makasirip ni Elmer.
Nagkinnapet manen dagiti manok, limmagtoda sa nagpinnarakapakda. Idi sumardengdan, nagkul-ob ti alimbuyogen, nagkiok ket nagbissayot ti napalet a dara iti sippitna. Naglugad met dagiti tumeng ti darisayen ken immatiddog ti bissayot ti bagisna.
“Karyo! Karyo!”
“Tabla na yan! Tabla na!”
Inkario ti sentensiador dagiti manok. Nagsinnippit dagitoy ket indisso manen ida ti sentensiador.
Kinita ti timer ti relo. Adda pay tallo a minuto ti laban.
Kalpasan ti saggaysada a tukkaw, nagkul-ob manen dagiti manok. Manggapun a mauma dagiti agbuybuya.
“Dalawang minuto na lang!” impakdaar ti timer.
Nagsipat ni Ella idi tumakder ti manokna sa agdiwerdiwer nga immasideg iti alimbuyogen a nakakidem ken nangisarukoden iti sippitna iti nabisibisan a daga ti gradas.
“Karyo! Karyo!”
Nagulimeken dagiti agbuybuya. Naumadan wenno nasakiten ti karabukobda nga agririaw. Naipinsanen ti imatangda iti lumabaga a lawag ti relo iti gayadan ti barandilias ti bleachers. Nagdadanggayda a nagbilang.
“Ten! Eleven, twelve…”
Ngumisiten ti rupa ti alimbuyogen idinto nga agtultuloy ti panagkatayna iti dara. Saan metten a tumakder ti darisayen.
“One minute to go!”
“One, two, three…”
“Karyooo!”
Nagkario ti sentensiador. Simmippit iti namindua ti darisayen. Nagsisipat dagiti dehadista.
Insublat ti sentensiador ti alimbuyogen. Simmippit naminsan. Ket indissona manen dagiti manok.
Idi saan latta nga agkuti dagiti manok, nagkario manen ti sentensiador. Simmippit ti darisayen. Insublatna ti alimbuyogen. Nagbugsoten daytoy ket indisso ti sentensiador sa binilanganna. Naibuang metten ti riaw ken palagapag dagiti dehadista.
Timmaray ni Ella a napan iti tengnga tapno awatenna ti manokna, ngem naunaan ni Elmer.
“Ella! Ella!”
“Sayaw, beybi! Sayaw, beybi!”
Ket namagusto ni Ella a kas sungbatna kadagiti nangkantiaw kenkuana. Inngatona dagiti imana, pinalanayna dagiti matana sa nagkinni.
“Giling, bebe! Giling, bebe!”
Ngem timmarayen ni Ella a nangsurot ken ni Elmer nga umul-ulogen iti gradas.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
