Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-23 a Paset)
AGLEPPAY ta agleppay lattan ti ulo ti darisayen nga itartaray ni Elmer. Gapu itoy, inramanna a pinungot ti pargay ti manok tapno saan nga agbissayot ti ulona. Arintarayen met ni Ella a sumarsaruno kenkuana.
Idi mapasungadan ni ‘Dok’ ni Ella, mangigis ti rungiitna a simmabat ket innalana ti manok ken ni Elmer. Ngem napunas ti rungiitna idi makatugaw iti bangkitona. Kasano ngamin ket agsalsalungaygay nga agkurkuridemdem ti darisayen. Nagdanag. Masapul a maagasan ken mapainumna iti antibiotiko ti manok sakbay a magsatan. Sayang ti baratona no matay a dina mapakatan iti first aid.
“Mabubuhay kaya, dok?” sinaludsod ni Elmer. Nagsammaked iti tumengna ket nagrukob a nangsiput iti panangbirok ti para agas iti sugat ti manokda.
“Grabe ba?“ sinaludsod met ni Ella.
Galiera Queen (MAUDI A PASET)
Saan a simmungbat ti ‘doktor.’ Diniram-osanna ketdi ti manok sa inkawalna ti tammudona iti ngiwat daytoy. Adda naisurot a napalet a dara iti tammudona ket insawsawna iti arindaraen a danum iti plastik a tabo. Kalpasanna, pinagdatana ti manok iti saklotna. Inarpawanna iti lumabaga a lupot ti ulo ti manok sa sinukainanna dagiti dutdot daytoy. Ket nagsul-oy ni Elmer idi makitana ti nauyak a sellang ken baba ti kilikili ti manok. Adda pay atiddog a sugat iti luy-ong ti manok a limsotan ti agtiltillayon a bagisna.
“Mabubuhay kaya?” sinaludsod manen ni Ella.
Saan latta a simmungbat ti ‘doktor.’ Pinarutna ketdi dagiti dutdot iti aglawlaw ti sugat iti luy-ong ti manok. Pinunasanna iti rigis a natina iti dara sa inamirisna ti rimmuar a bagis. Ket nagsul-oy ni Elmer idi makitana ti naputed a bagis ti manokda.
“Sus!” nayesngaw ni Dex.
“May pag-asa pa kayang mabuhay?” kinuna met ni Jong.
Bimmislin ni Johnny ket kinitana ti manok. “Naku, huwag nang gamutin. Sayang lang ang gamot at gastos!” kinunana.
Kinusilapan ti ‘doktor’ ni Johnny. “Mabubuhay!” kinunana. “Hawakan sandali.” Inyawatna ti manok ken ni Dex. Arintarayen a nagturong iti restaurant ti galiera. Idi agsubli, addan iggemna a dua katukkol a dadakkel ti kayona a berde a balangeg. Nagtugaw manen iti bangkitona sa innalana ti manok ken ni Dex. Nangkettel iti nasurok a maysa a pulgada ti kaatiddogna iti dakkel ti abutna a balangeg.
“Bakit, anong gagawin mo sa kangkong? Ipakanmo?” sinaludsod ni Johnny.
“Manood ka na lang. Akong bahala.” Pinunasan ti ‘doktor’ ti nakaputdan ti bagis. Insulbongna ti balangeg iti nakaputdan ti bagis. Rinugianna a daiten ti nagsilpuan ti bagis.
Nagkikinnita da Johnny. Nagkulipagpag ti manok ket intalmeg ti doktor.
Saanen a nakateppel ni Johnny. “Kayatmo a sawen, sulbongam iti balangeg sa pagsilpuem?” immulagatna
“Op kors!” kinuna ti ‘doktor’ ket sipapannakkel a nagtungtung-ed. “Manood lang kayo. Expert ako dito!”
Nagmulagat ni Johnny. “Maimpeksion iti ar-aramidem!” imbanang-esna.
“Bakit? Sino ka ba at pinakikialaman mo ako?” inkusilap ti ‘doktor’.
Bimmara ti lapayag ni Johnny. “Beterinaryo ako!”
“E, ano? Ten years experience na ako. Mas mahaba pa kaysa pag-aaral mo! At espesyalisasyon ko ito!”
Kasla nadanog ti darangidong ni Johnny iti kinuna ti ‘doktor.’ Nagngariet. Kugtaranna koman ti ‘doktor’ ngem inggawid ni Ella ti takiagna.
“Easy ka lang! Easy, easy! Saanmo a tutopan. No agpadakayo koma a nakaadal, dina masao ti kasta,” kinuna ni Ella.
Ania ngarud, immawer a dagus ti pungtot ni Johnny iti pannakariknana iti dengngep ti barukong ni Ella. Isu met nga agkuripaspas ti darisayen.
“Sayang! Nasayang ang buhay ng manok sa pakikialam ng doktor kuno!” Ngem ti kinapudnona, ti tangdan ken baratona koma ti kailalaan ti ‘doktor.’ No matay man kalpasan ti panangagasna, awanen ti bibiangna. Basta sibibiag nga isublina ti manok kalpasan ti panangagasna awanen ti bibiangna no maustel daytoy.
Innala ni Jong ti manok ket impisokna iti siled ti karton a kasumbangir ti nangikargaanda iti inabakda. Saandan a pinadalusan daytoy ta igatangdanto kano laengen iti inumenda ti pagbayadda iti pannakadalusna. Di bale ti darisayen ta ipumponda ti matay a manokda
Insagana da Johnny ken Dex dagiti alikamenda tapno agawiddan. Isu met a dumteng ni Elmer nga inawaganda a mangala iti inabakda. Tiniped ni Elmer da Johnny.
“Madamdama nga agawidtayo,” kinuna ni Elmer.
“Malemen. Bareng adda pay pasientek. Sukat ti dadduma nga abakko,” kinuna ni Johnny.
“Mabiit laeng. Urayentayo ti waragawag. Bareng adda premiotayo,” insungbat ni Elmer.
“Premio? Naabaktayo, adda pay la premiotayo? Na-fastest kill-tayo!” Nakalanlanay dagiti mata ni Jong iti lidayna iti pannakaabak ti iduldulinna. Kinupinna ti takkab sa impasanggirna. Insarunona ti tarpaulin a pagab-abbongda iti pagipupokanda. Insarunona nga inkarga iti bag ti pagpasuyotda a nakayuperan ti ngipen ti kimat.
“Urayentayo ti awarding,” kinuna met ni Ella.
Agalas singkon idi maibus ti entry. Saan a nagbayag, narugian metten a maiwaragawag dagiti umawat iti premio iti fastest kill iti tunggal grupo.
Saan a nasdaaw da Ella idi nangabak ti manok ni Fe Garcia ti Gonzaga iti grupoda. Pattapatta ni Ella, apagsurok laeng a sangapulo a segundo a pinatay ti manok ni Garcia ti manokda.
Bitbiten koman ni Johnny ti takkab tapno itulodnan iti luganda idi mangngegda ti pannakapuyot ti mikropono ken say-a ti para waragawag.
“At ang nanalo ng premyo bilang pinakamatagal, pinaka-exciting na laban ay walang iba kundi ang napakaseksi at tinaguriang reyna ng sabongan—si Queen Ellaaa!”
Bimtak ti nakapigpigsa a dir-i ken sipsipat ket kunam la no marba ti galiera.
“Queen Ella, nasaan kaaa?” Nagallangogan ti awag.
Nakiinnapir ni Ella kadagiti kakaduana sa arintarayen a nagturong iti ridaw ti gradas.
“Samahan mo, Johnny!” Induron ni Elmer ni Johnny.
Timmaray met ni Johnny a nangsurot ken ni Ella.
Dir-i, sultip ken sipsipat manen ti nangsabat ken ni Ella idi umuli iti ring. Intag-ayna met dagiti imana kas sungbatna kadagiti tattao.
“Kaano mo siya, Queen Ella?” insungo ti para waragawag ni Johnny idi maawat ni Ella ti naisobre a premiona. “Sidekick? Alalay? Ang suwete niya at napakaganda ang amo niya. Nakakainggit!”
Uray la nagkiet ni Johnny iti nangngegna.
Nadlaw met ni Ella ti reaksion ni Johnny ket kunam la no adingna daytoy a sinallabayna. “Syota ko siya!”
No namin-anon a nangngeg ni Johnny dayta ken ni Ella, ngem kaskasdi a nakigtot daytoy. Dandani met naibbatan ti para waragawag ti mikropono gapu iti dina namnamaen a sungbat n Ella.
“Ta-la-ga?” Di pay la mamati ti para waragawag.
“Yes, syota ko siya!” Nagrukob ni Ella ket binisongna ti pingping ni Johnny.
Dandani natilmon ni Johnny ti angesna.
“See what love can do?” adda nagkuna.
Ngem idi umulogen da Ella ken Johnny iti gradas, inyayug ketdin ni para waragawag: “Pag-ibig, masdan ang ginawa mo…”
KALLEPPASDA a nangrabii. Kas iti sigud, agpalpalpa da Mang Bianong ken Manang Mameng nga agbuybuya iti telebision. Lunes ita, ket maituloy ti sursurotenda a teleserye. Immuli metten ni Ella iti kuartona tapno agbuya iti telebision wenno kitaenna dagiti anunsio maipapan kadagiti nadumaduma a puli ti manok iti kompiuter.
Iti mini-farm, natuliden ti maysa a nagbukel a botelia ti gin iti abay ti pinggan a naglaon iti nakset a siksik ken siit ti bangus a pinulotan da Elmer, Dex, ken Jong. Tunggal itangadda ti basoda a naglaon iti nakalitlitnaw a gin, “Naimas ti Alfonso,” kunada nga agkatkatawa. Kasano ngamin ket gin ti kakaisuna a mabatogan ti kuartada. Iti tagaang iti sikigan ti kalapaw ni Dex, agsarsaretset ti matuntuno a lapayag ti baboy a kaasmang ti agur-uray a maysa pay a botelia ti gin.
Iti met nakipet a kuarto a pagturturoganna iti likudan ti lamisaan a pagawatanna kadagiti agpaagas kadagiti dingoda, kasla marikrikna pay laeng ni Johnny dagiti nalamuyot ken nabara a bibig ni Ella iti pingpingna. Ala, ket makadominggon ti napalabas kalpasan nga agkan ti balasang. Kinapudnona, dandani sinurotna ti kunkuna dagiti sutil a dina idigdigos dayta tapno di mapukaw ti ganas nga imbati ti agek.
Itay pay a nagidda. Nupay mailalaan iti pagbayadna iti koriente, linuktannan ti aircon bareng makaturog. Kinapudnona, sa laeng luktanna ti aircon no nakakotse ti kustomerna.
Pudno ngata a kayat ni Ella a boyfriend? Di pay la ngata maawatan met ti balasang ti kinatudiona no awisen daytoy a makigaliera?
Kasanon no di maibuksilan ni Ella dagiti ar-aramidenna para kenkuana? Kasanon no adda agarem ken ni Ella a napinget?
Iti salasda, tiniped ni Mang Bianong ti suyaabna idi agkiriring ti telepono iti mesita iti sanguananda. Kinitana ni Manang Mameng a nakakidem gayamen. Kinalbit ni Mang Bianong ti abaga ti asawana.
“Phone, inada!”
Linidlid ni Manang Mameng dagiti matana sa ginaw-atna ti telepono.
“Hello, good evening! May I help you! Who’s calling? Yes, this is Varios residence. Ha? Ikaw si Tricia? Tricia Cortez, ang bunso nina Pareng Fernando at Mareng Ana? Ay, balasangko, nakalagipka man! Komusta da dad ken mommy-m? Wen, nagsardeng nga agbasa ‘toy gayyemmo. Mabiit laeng ta ayabak!”
Arintarayen ni Manang Mameng a napan iti sakaanan ti agdan. “Ella, phone! Dali!”
Naguyod ti rikep ti kuarto ni Ella. “Sinno kano?”
“Si Tricia!”
Siaalisto nga immulog ni Ella. Agkatkatawa a nangbagkat iti telepono. “Hoy, dangnga! Nakalagipka man? Rabrabii. Bakit? Thirty ka na?” Nagkatawa. “Kailan? Sa Saturday? Sa Aberdeen o sa Manila Hotel?” Nagkatawa manen. “Sabagay, mas malapit sa amin ang Aberdeen. Nye, 'la akong syota, ano! Hindi puwede?” Nagpanunot ni Ella. Idi kuan nagkatawa. “O, sige may boyfriend ako, isasama ko siya. Friend na boy, ha? Di puwede? Dangngaka talaga. Ania, no awan met a talaga. Sige, may isasama ako. Oo na, balik school ako. And landi mo talaga. Sige na. Bye-bye!”
Nagpusot ni Ella iti abay ni Manang Mameng. Nagdalikepkep a nakamisuot.
“Bakit?’ kinuna ni Manang Mameng.
“Saan ako kukuha ng boyfriend. Gaga talaga ang Tricia na ‘yan. Di raw ako pupunta kung di ko kasama ang boyfriend ko.” Ad-adda a timmirad ti susob ni Ella.
Nagkatawa ni Mang Bianong. “No problem!” kinunana.
“Sino ti kaduana? Awan met boyfriend-na!” kinuna ni Manang Mameng.
“Si Johnny! Laging available ‘yon!”
“Eyow!” Napatakder ni Ella.
“Apay?” Nasdaaw ni Mang Bianong.
“Di ko naman boyfriend, eh!” Nagmusiig ni Ella. “Baka sabihin nagpaparamdam ako. At tsaka…” Insarangna ti kikit ken pasiraw-atna.
Imlek ni Mang Bianong. “Di bale, propesyonal naman si Johnny. Height doesn’t matter itan! Nasayaat kenkuana ta kabesadomon ti ugalina.”
Wen met ngamin,” inyanamong ni Manang Mameng. “Agtalekak kadaydiay nga ubing.
Nagliad ni Ella iti tugawna. Nagpanunot. “Sabagay, kunwari lang naman,” kinunana idi agangay. “Ngem mayat ngata?”
“Si Johnny pa!” Nagkatawa manen ni Mang Bianong. “Dimo kuna a dimo pay nadlaw nga adda riknana kenka!”
“Mapagtalkan, ngem agannadka latta, a!” kinuna met ni Manang Mameng.
Nagpanunot manen ni Ella. Didakto ngata katawaan, naisipna. Saan sa pay ngamin a matukno ni Johnny ti piditpiditna uray flat ti sapatosna. Anianto la ketdin no agsapatos iti tallo pulgada ti takongna? Naimbag ta dua pulgada ti takong ti sapatosna.
Iti siledna, binaliktaden ni Johnny ti punganna ngem kaskasdi a di makadungsa. Atapenna pay ketdin nga adda met mangpampanunot kenkuana. Ala, di bale no ni Ella dayta ta uray makadominggo a di unay makaturturog. Ngem kasanon no dakes ti intension ti tao a di mangpaturog kenkuana. Wenno adda kadi kararua ti immuna a nagyan ditoy a dida pastreken iti ridaw ti langit ta nakurang pay ti panagbabawina ket kasapulanna ti ad-adu pay a panangyendorso babaen ti panangilualo kenkuana?
Ket simgar ni Johnny. Yad-adayom, Apo, naidawatna. Kasanon no al-aliaenda ket mabatibat? Numona ket awan mangriing kenkuana. Isu a napanunotna ti aglualo. Bimmangon ket innalana ti rosario iti uyosan ti lamisaan iti pagawatanna iti kustomer sa nagsubli a nagidda.
Apagngalay ni Johnny ti maikadua a misterio, mangrugin nga agsuyaab. Ket idi rugianna ti maikapat a misterio, ulit-ulitennan ti Amami, in-inut a limmukay ti piritna iti binukel.
Ngem sakbay a mailibay, uray la nagdeppa iti pannakakigtotna iti panaguni ti selponna iti uluananna. Kinarawana ti selponna. Impullatna iti lapayagna.
“Hello, anong kailangan mo?” imbugtak ni Johnny. Ngem kasla napateltelan idi maitimkanna ni Ella. “Ikaw ba talaga ‘yan? Di naman… nagbabasa pa ako! Bakit? Ano, sasamahan kita sa party? Kampay idi, syota mo ako. Sa Saturday na? Sige, okey, okey. Coat and tie, ha. Bye, good night.” Agsensennaay ti uneg ni Johnny a nangidisso iti selponna. Ania koman no adda karbenganna nga agkuna: “Good night, I love you!”
Ket nailibay ni Johnny nga umis-isem.
NAISARDENG da Manang Mameng ken Mang Bianong ti pannakisaritada ken ni Johnny idi adda agdanapeg iti agdan. Napangangada idi makitada ni Ella nga umul-ulog a bitbitna ti ngumisit a high heel-na.
Di napupuotan ni Manang Mameng a pinagakkub dagiti dakulapna. “Nakkong, sika kadi nga agpayso?” kinunana.
“Siyempre, sino pa?” Nagkatawa ni Ella.
Nagpintas ketdin ni Ella, insennaay met ti uneg ni Johnny.
“Siyempre, seksi ang ina, pogi ang ama, equals magandang anak!” kinuna met ni Mang Bianong.
Kasano ngamin ket kunam la no sabong ni Ella a pinagukrad ti nalinnaaw a kidem a sardam kalpasan ti littugaw iti suotna a pagattumeng nga umasul a bestido a nangpaganus iti busnagna.
“Nabayagkan?” inyisem ni Ella ken ni Johnny.
“Itay pay nga agur-uray!” Ni Manang Mameng ti simmungbat.
Nagtugaw ni Ella iti sopa, nagsikkawil ket insuotna ti high heel-na. Kalpasanna, nagpusipos a kasla modelo iti sanguanan dagiti dadakkelna idinto ta pinarimrimanna ni Johnny. Kimmaro la ket ngarud ti rikna ni Johnny a mangyimut ken ni Ella kadagiti naalikuteg a mata dagiti padana a lallaki.
“Mapantan ket maladawtan,” kinuna ni Ella a bulonna a kimpet iti takiag ni Johnny.
“Bye, mommy, bye, daddy!” Nagpayapay ni Ella sa limmugan iti kotse ni Johnny.
“Aywanam ‘ta adim, Johnny!” impakamakam met ni Mang Bianong.
Adun ti nadatnganda a sangaili ni Tricia. Nagkikilliit da Ella ken dagiti dati a kaklasena idi makapaglilinnasinda. Nagiinnarakupda, nagbibinnisongda. Nakabestidoda amin.
Nagpaigid ni Johnny ta kasla nalipatan ni Ella iti panagkikitada kadagiti gagayyemna. Numona ket awan makitana nga am-ammona kadagiti padana a sangaili. Agingga iti nakitana ti bar.
Madamdama pay, sinango ni Tricia ni Ella. “Dangnga, ‘tay boyfriend-mo?” kinunana. “Sika laeng ti awan siotana!”
Isu pay la ti pannakalagip ni Ella ken ni Johnny. Nagtalangkiaw. Nakitana ni Johnny nga umaw-awat iti kopita iti bar.
“Sandali!” kinuna ni Ella ket tinurongna ti ‘yan ni Johnny. “Halika! Sorry at nakalimutan kita. ‘Mayka ta yam-ammoka.”
Intangad ni Johnny ti natda iti kopitana sa simmurot ken ni Ella.
“Guys, meet my boyfriend, si Johnny!” kinuna ni Ella.
Tinengngel ni Johnny ti panagangesna idi agkikinnita dagiti dati a kaklase ni Ella.
“Isang beterinaryo at may malaking animal clinic!” innayon ni Ella.
“Ohhh!”
“Ahhh!”
“Big time!”
Pinangato-pinababa ti dadduma ni Johnny. Inipig met ti dadduma ni Ella sa nakiapirda.
“Cute siya!”
“Pogi siya!”
“Ikaw naman kasi, nag-high heel-ka pa!”
Ammo lattan ni Johnny a ti kinapandekna ti kayat a sawen ti nagsao, ngem nakatulong ti ininumna a nangpatibker iti riknana. Ket nagtalinaed ti simbeng ti riknana. Nakipagkatawa, nakiangaw kadagiti padana a sangaili. Ket nagsubli iti bar.
Ngem nagbaliw ti templadana idi asitgan ti maysa a natayag ken pogi ni Ella. Immasideg a dagus ket inyawatna ti dakulapna.
“Hi! I’m Johnny! She’s my girl, you know!”
“Oh, fine!” inawat met ti natayag ti dakulap ni Johnny. Winagwagna sa nagpakada.
Ket kasla timmayag ni Johnny iti panagriknana.
Immasideg ni Tricia a nakaaklili iti tisoy. “Johnny, meet Brandon, my boyfriend!” Inyam-ammo ni Tricia ti kaduana.
Kas panglukat iti pasken, naiwaragawag ti panagsala dagiti asmang. Nagdanag ni Johnny.
“’Lika, sayaw tayo!” Ginuyod ni Ella ni Johnny.
Simkad ni Johnny. "Di ako marunong,” inyarasaasna.
“Nayonam ti ininummo tapno tumuredka Didaka met sipsiputan!” induron ni Ella ni Johnny.
Pudno, timmured ni Johnny. Ngem umuna pay la nga addangna, nagsul-oyen ni Ella.
“Paa ko na ‘yan!”
“Sorry!” kinuna ni Johnny ket binaliwanna ti nagkompas. Kunam la no adda suksukdalenna iti panangikompasna iti imada ken Ella. Manen, nabaddekanna ti saka ni Ella.
“Nasasaktan na ako, BBJ!” immisuoten ni Ella.
“Sorry ulit. Sabi ko kasi di ako marunong, eh!”
“Sabayan mo kasi ang tugtog!”
Ket binaliwan ni Johnny ti nagkompas. Imlek la ket ngarud ni Ella. Kasano ngamin ket kunam la no agmasmasa ni Johnny iti rugit ti nuang no agaramidda idi iti pagbilaganda iti irik idiay Sarrat!
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
