Rafanan ti Siudad ti Candon, Umuna iti Salip iti Sarita ti 8th Albalos Awards-Bannawag

Inyalat ni Michelle Gamueda-Rafanan ti Brgy. Parioc 1^st, Siudad ti Candon, ti Umuna a Gunggona iti Salip iti Sarita ti 8^th Mario Abinsay Albalos Foundation Literary Awards babaen ti saritana a “Dapo,” kas impakaammo ti Secretariat ti Albalos Awards kalpasan ti naudi a deliberasion ti Hunta Dagiti Hurado.

Fellow iti Pasnaan, literary workshop ti GUMIL Filipinas, ni Gamueda, ken dati a mangisursuro iti SJI Candon City. Dua ti bungada ken Amado G. Rafanan a kaingungotna.

Dagiti kakadua ni M.G. Rafanan a nangabak:

Jorge Richard P. Guerrero ti Brgy. San Pedro, Laoag City, Maikadua a Gunggona, babaen ti saritana a “Pansit Labus.” Fellow met laeng iti Pasnaan, nagturpos ni J.R.P. Guerrero iti BA Philosophy iti University of the Philippines-Diliman ken Bachelor of Laws iti Northwestern University (NWU) iti Siudad ti Laoag. Manarimaan nga agbasbasa ti Master of Arts in Public Administration iti NWU Vedasto J. Samonte School of Graduate Studies. Iti agdama, agserserbi iti Department of Agrarian Reform-Ilocos Norte a kas Agrarian Reform Program Officer II.

Jefferson M. Somera ti Pilar, Abra, Maikatlo a Gunggona, babaen ti saritana a ”Ni Darna iti Lubong a Nabatoganna.” Agdama a kameng ti Philippine Army. Nagpaay a kas Spokesperson ti dua nga Infantry Division (1st ID iti Zamboanga, ken 5th ID iti Isabela) ngem nakadestino itan iti Visayas. Inleppasna ti BS in Criminology iti University of Northern Philippines, Vigan City, idi 2003.

Nagpaay a hurado da Juan Al. Asuncion, Managing Editor ti Bannawag, pangulo; Linda T. Lingbaoan-Bulong, dati a kameng ti Bannawag ken nagretiro a Senior Editor iti UP Press, kameng; ken Ariel S. Tabag, Literary Editor ti Bannawag, kameng.

Narugian ti salip idi Oktubre 15, 2023 ken nagpatingga iti Marso 15, 2024.

Naluktan met ti salip kadagiti amin a mannurat iti Ilokano malaksid kadagiti mangimaton ken asideg a kakabagianda, ken kadagiti kameng ti Bannawag.

Dagiti gunggona: Umuna a Gunggona, P15,000.00; Maikadua, P12,000.00; ken Maikatlo, P10,000.00.

Maipaayan pay dagiti mangabak iti sertipiko ti pammadayaw malaksid iti medalion a maited iti nangyalat iti Umuna a Gunggona

Nabangon ti M.A. Albalos Foundation Literary Awards (Albalos Awards) a kas pangtaginayon iti lagip daydi Dios-ti-aluadna a mannurat ti Bannawag Mario A. Albalos, tubo ti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee ti Estado ti Hawaii a nagnaedanna agingga iti ipupusayna idi Marso 3, 1991 iti edadna a 40.

Ni met Jenny R. Alcausin (tubo ti Cabaroan Laud, Siudad ti Vigan ken agnaed iti California) ti sponsor ti pasalip ti foundation ken agpaay met a mangimaton ti nasao a pasalip da Jun Abinsay ken Priscilla Dela Cruz (agpada nga agnaed iti Hawaii), iti pannakitinnulong dagiti kameng ti Bannawag.

Ti kompleto a listaan dagiti nangabak:

1st Albalos Awards: 1. Ronelyn B. Ramones (“Fina”); 2. Rhea Rose D. Berroy (“Ti Aktibista”); 3. Arnold P. Jose (“Hawaii Ditoyen, Mikiong!”);

2nd: 1. Remedios S. Tabelisma-Aguillon (“No Nairanta nga Agpaay Kaniak”); 2. Roselyn C. Campano (“Sanguek Manen ti Sumaruno a Pannakidangadang”); 3. Florencio B. Bayuga (“Uray Nababa ti Adalmo, Fren”);

3rd: 1. Isaac R. Pedrera (“Ti Naembargo a Daga iti Cagat”); 2. Arnold P. Jose (“Ni Lakay Gapit a Bayog”); 3. Virgilio S. Naungayan (“The Walking Dead”);

4th: 1. Remedios S. Tabelisma-Aguillon (“Naim-imbag Laengen Ngem ‘Diay Awan”); 2. Manuel D. Benosa, Sr. (“Ti Naikamang”); 3. Quezon E. Javier (“Paniang”);

5th: 1. Rodolfo D. Agatep, Jr. (“Marunggay”); 2. Remedios S. Tabelisma-Aguillon (“Agsupadi a Lubong”); ken 3. Arnold P. Jose (“Mister Bin”).

6th (Ababa a Sarita [Flash Fiction]): 1. Jorge Richard P. Guerrero (“Ti Balay ti Padi”), 2. Prodie Gar. Padios (“Lalat”), 3. Lito P. Hilidon (“Ti Balud”), 4. Ryan A. Dulig (“Running Lights”), ken 5. Jobert M. Pacnis (“Idiay Plasa”).

7th: 1. Jorge Richard P. Guerrero (“Ni Angkel Udi”); 2. Hilario A. Espiritu Jr. (“Tawen ken Tiempo”); 3. Lito P. Hilidon (“Ti Suno”).

8th: 1. Michelle Gamueda-Rafanan (“Dapo”), 2. Jorge Richard P. Guerrero (“Pansit Labus”), ken 3. Jefferson M. Somera (“Ni Darna ken ti Nabatoganna a Lubong”). (LITO P. HILIDON)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine