Saan a basol ti Filipinas ti kumarkaro a risiris iti West Philippine Sea (WPS), kas kinuna ni Department of National Defense (DND) Secretary Gilberto Teodoro Jr.
Daytoy ti imbatad ni Sec. Teodoro iti bilateral meeting ken ni New Zealand Minister of Defence Judith Anne Collins a naangay iti 21st International Institute for Strategic Studies Shangri-La Dialogue (SLD) iti Singapore itay Hunio 1.
Iti nakuna a bilateral meeting, kinuna ni Collins a maseknan unay ti New Zealand iti mapaspasamak iti WPS.
Insungbat ni Teodoro, saan a ti Filipinas ti mangpatpataud iti parikut iti WPS.
PSC, naka-red alert; seguridad ni Marcos, nadoble kalpasan ti pangta ni Duterte
Ti China ti tudtuduen ti Filipinas a mangiwaywayat iti napeggad a panagtignay dagiti bapor ti China, mang-aramat iti water cannon ken military-grade a laser, ken mangbangbangen, kadagiti bapor ti Filipinas nga aglayag iti WPS.
Kinuna ni Presidente Marcos nga ilegal, coercive, agresibo ken manangallilaw (deceptive) dagiti ar-aramiden ti China.
Kinuna ni Collins a gapu kadagita a mapaspasamak iti WPS, nasken a makiraman ti New Zealand iti Indo-Pacific a rehion. (Martin Sadongdong/Manila Bulletin//Lito Hilidon/Bannawag)
