Nagbalinen a paglintegan ti Republic Act (RA) 11997 wenno ti "Kabalikat sa Pagtuturo Act" kalpasan a pirmaan daytoy ni Presidente Ferdinand "Bongbong" Marcos, Jr. (PBBM) iti Malakanyang itay Hunio 3, 2024.
Ti "Kabalikat sa Pagtuturo Act" ti mangipaay iti PhP5,000 agingga PhP10,000 nga allowance dagiti mannursuro kadagiti pagadalan ti turay.
Maipaayan iti PhP5,000 ti tunggal mannursuro para iti School Year (SY) 2024-2025, ket agbalin a PhP10,000 iti SY 2025-2026 ken kadagiti sumarsaruno pay a tawen.
Segun ken ni House Committee on Basic Education and Culture chair, Pasig City Rep. Roman Romulo, saan a mairaman iti income tax ti teaching allowance ta saan met a benepisio daytoy, no di ket paggastuan, dagiti mannursuro.
PSC, naka-red alert; seguridad ni Marcos, nadoble kalpasan ti pangta ni Duterte
Kinuna met ni Senador Sonny Angara a babaen daytoy nga alawans, saanen a nasken nga usaren ti mannursuro ti bukodna a kuarta a paggatang kadagiti ramit a kasapulan iti panangisurona.
Impanamnama ni PBBM a pangrugian pay laeng daytoy kadagiti kayatda nga ipatungpal agpaay kadagiti mannursuro kadagiti pagadalan ti turay. (Betheena Unite/Manila Bulletin//Lito Hilidon/Bannawag)
