Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-24 a Paset)
AGALAS sieten idi dumteng da Mr. ken Mrs. Fernando Cortez a dadakkel ni Tricia. Nakabarong iti maris-gatas ni Mr. Cortez, umasul met a bestido ti suot ni Mrs. Anna Cortez. Pangrapisen ni Mr. Cortez iti takderna a lima a kadapan ket pito a pulgada. Panglawaen ti mugingna ken pangusipeten. Apagsurok met a lima kadapan ni Mrs. Cortez, kayumanggi ken natarabit ket awan duadua nga isu ti immalaan ni Tricia.
Nagsardeng dagiti agsasala idi ipakdaar ni Tricia ti idadateng dagiti dadakkelna. Maysamaysa immasideg a nagmano ken nakibesobeso.
“'Ba, gabi na! Ba’t di pa nag-serve?” kinuna ni Mrs. Cortez.
“Hinihintay po namin kayo!” insungbat ni Tricia. Sinangona dagiti sangailina. ”Gutom na ba kayo, guys?”
Galiera Queen (MAUDI A PASET)
“Yes!” Naggigiddan nga insungbat dagiti bisita sa nagkakatawada.
Sineniasan ni Mrs. Cortez ti pangulo dagiti waiter. Ket madamdama laeng, addaytan dagiti sopas.
Mangmangandan idi nadlaw ni Johnny ti naidumduma a kinaganaygay ken kinatarabit ni Ella. No kuan, iwarasna ti panagkitana sa agkatkatawa a makipinnayapay. Sa in-inut nga immulimek nupay itultuloyna nga iwaras ti panagkitana.
“Tumahimik ka yata?” kinuna ni Johnny. “Tinalaban ka ba?”
Nagkatawa iti nakapsut ni Ella. Dineppelanna iti tissue paper dagiti bibigna sa nagliad. “Maikawaak a makisango manen kadagiti dati a kaklaseak,” kinunana. “Naudiakon a talaga!”
Madamdama pay, agallaallatiwen da Mr. ken Mrs. Cortez kadagiti lamisaan. Agingga iti nakagtengda iti lamisaan ti grupo a pakaibilangan da Ella ken Johnny.
“O, Ella! Kumusta na, nakkong?” kinuna ni Mrs. Cortez. “Ang mommy at daddy mo?”
Timmakder ni Ella ket nakibesobeso ken ni Mrs. Cortez. “Okey naman po sila. Kayo po?”
Timmakder met ni Johnny ket nagmano ken ni Mr. Cortez
“Kumusta, iho! Ikaw ang boyfriend ni Ella?” kinuna ni Mr. Corez.
Napitpit ti isem ni Johnny. Kinitana ni Ella.
“Opo!” insungbat ni Ella. “Nagtapos ng vet med. May sarili na siyang animal clinic sa Novaliches!”
“Oh!” Dandani naggiddan dagiti agassawa a nangkita ken ni Johnny.
Kasla timmayag ni Johnny iti panagriknana iti panangipadayaw ni Ella kenkuana. Sa inalusiis idi pinababa-pinangato dagiti agassawa sa kinitada ni Ella.
“Dika kano manen nagenrol. Agpayso?” sinaludsod ni Mrs. Cortez
Nagkatawa iti nakapsut ni Ella. “Wen, tita!” insungbatna.
“Apay met?” Pinerreng ti baket ni Ella.
Immisem ni Ella. “Wala lang, tita. Nabannogak. Boring!” Naggarikgik.
“’Wag, iha! Iti kaano man, saan a boring ti panangsagana iti masakbayan. Kanayon nga exciting ti masakbayan, ken adda sorpresa nga agur-uray kenka iti masakbayan.”
“Agtuloyakto met laeng, tita!”
“C’mon, Ella, nakkong! Naminsan, inawagak ni mommy-m. Agsangsangit a nangipadamag a nagsardengka nga agbasa. O, sige, kain ka kayo.”
Sinango ni Mrs. Cortez ni Johnny. “Iho, ingatan mo si Ella, ha?” kinunana. “Bata pa siya kaya gabayan mo.”
Nagkiet ni Johnny. Kayatna kadi a sawen a lakayen? Ngem nagtung-ed. “Siyempre naman, tita!” insungbatna.
Saanen a nagbayag dagiti agassawa iti lamisaan da Ella. Kalpasan ti idadagasda iti uppat a lamisaan, nagpakadan dagitoy. “Dimmagaskami laeng ta kayatmi a maammuan no naragsakkayo met laeng,” kinunada. Adda kano met pasken a dar-ayanda. Natibong a sipsipat ti nangitulod kadakuada iti ridaw.
Apagsibet dagiti dadakkelna, innala ni Tricia ti mikropono. “Hanggang ten lang tayo kaya samantalahin. Magsayawan, mag-inuman, at magtsismisan. Kumuha ng maiinom. Open ang bar!” inwaragawagna.
Timmakder ni Ella. “’Lika at kumuha tayo ng mainoum. Pampaganang kumain, sabi nila. Tingnan mo sila, ang tatakaw!” Agkatkatawa a nangguyod iti ima ni Johnny.
Idi makasublida iti lamisaanda, nadlaw ni Johnny a di makaidna ni Ella. Taliaw a taliaw kadagiti dati a kaklaseanna a nakaragragsak nga agpipinnadamag. Agingga iti iniggaman ni Ella ti takiagna sa piniselna.
“Okey ka lang ba kung iwanan kita sandali? Pagbigyan ko lang sila.” Nagwagis ni Ella.
Insurot ni Johnny ti panagkitana iti inwagis ni Ella. Pudno, paypayapayanda ni Ella.
“Sige lang. Di naman ako mawawala!” inrabak met ni Johnny.
Iti panagallaallatiwna iti lamisaan, kumarkaro met ti pannakarikna ni Ella iti kaundayen ti dua a semestre a kaawanna iti uneg ti kuarto ti pagadalan. Ano kasi ang ginagawa mo? Two years ka nang nawawala sa grupo, kunkunada.
Agingga ita, agbaliwbaliw pay laeng ti panunotmo, adda met agkuna. Idi, volleyball, sa chess. Idi kuan, fencing, at kung anu-ano pa. Dimo kuna a pati taste sa pagpili ng boyfriend ay pabago-bago pa rin? adda met nagkuna.
“Kaasi met no dispatsaem pay laeng. Ken sayang, propesyonal na siya!” Pinarukiban ti maysa ni Johnny.
Nageellek ti dadduma iti kinuna ti maysa a dati a kaklasean ni Ella.
“Gago kayo talaga!” Linayatan kampay idi ni Ella dagiti kaduana. Kasano nga ibagana a saanna a boyfriend ni Johnny?
Iti lamisaanda, alusiisen ni Johnny. Pinaatiananna ti basona sa timmakder. Nagturong iti bar.
“Sir, kami na lang ang pupunta sa table ninyo,” kinuna ti pangulo dagiti waiter.
“Okey lang!” insungbat ni Johnny. “Bigyan mo ako ng double.”
Inawat ti bartender ti baso ni Johnny. Nangbukbok iti sabali a baso sa inyawatna ken ni Johnny.
Idi umallatiw ni Ella iti sabali a lamisaan, nasdaaw idi tumakder ti maysa a bisita a lalaki ket sinabat daytoy ni Ella.
“Ikaw nga!” Agkatkatawa ti lalaki. “Ni Ella, kunak la ngaruden itay damo a makitaka!” Pinaklebna ti gemgemna sa insarangna ken ni Ella.
Nupay agduadua, nakipagkatawa met ni Ella ket intim-ogna ti gemgemna iti agur-uray a gemgem ti lalaki.
“Kahit nakabestido ka makikilala pa rin kita!” kinuna manen ti lalaki. “Andrew Bitangcol!” indiayana ti dakulapna. Winagwagna ti dakulap ni Ella sa sinangona dagiti padana a bisita. “Guys, guess who’s with us tonight!”
“Ano na naman ang pakulo ni Andrew?” adda nagkuna.
“Hoy, Bitangcol, upo!” adda met nagkuna.
Ngem kasla awan nangngeg ti nayam-ammo nga Andrew. Sinangona latta ni Ella. “Kunak ngaruden a sika ni Queen Ella dita Del Monte! Sika ti palpalakpakan, sulsultipan, ken idirdir-ida dita Del Monte.”
Nakipagkatawa latta ni Ella. Ngem uray an-anuenna ti agpanunot awan ti malagipna a gundaway a panagsarak ken panagam-ammoda iti daytoy a lalaki. Kinapudnona, adun ti matandaananna a rupa dagiti makalagudlagodna iti galiera, ngem talaga nga ita laeng a makitana daytoy a tao.
Pagam-ammuan nagpalakpak ti lalaki ken inwarasna ti panagkitana. “Guys, your attention, please!” kinunana.
Ngem nagkakatawa ketdi dagiti sangaili.
“Ano ba naman, Andrew. Umupo at kumain ka na lang!” adda nagkuna.
“Ammoyo metten ni Andrew Bitangcol. Frustrated na radio announcer,” sabali pay ti nagkuna.
“Sa peryahan ang dapat sa kanya!”
“Ania a pagperiaan? Agkasador iti galiera, kunam. Total, sabungero naman tulad ng tatay niya!”
Ngem kaskasdi a kasla awan mangmangngeg ni Andrew Bitangcol. “Your silence please!” Inngatona ti imana. “Yam-ammok kadakayo ti maibilang a reyna ti galiera, ti umuna a babai a handler – ni Queen Ella!”
Ngem nagkakatawa ketdi dagiti tao.
“Gina, pagtugawem man ‘ta boyfriend-mo!”
“Lasing na naman si Bitangcol!”
“Umupo ka na’t kumain. Naglabes sa manen ti bisinmo!”
“Pati ni Ella, iramramanmo, ha-ha-ha! May kabag ka yata!”
“Dakayo ti inangin ti ulona ta diyo patien ti ibagbagak. Si Ella ang pinakasikat sa atin ngayon!” Ket insalaysay ni Andrew ti mapaspasamak iti lubong dagiti lokal a sabungero.
Nupay adda latta dagiti di mamati gapu ta birbirngasanda ngarud iti Standard ni Andrew, adu ti napa-ah ken napa-oh!
“Isu siguro a nagsardeng. Naginteres iti pallot,” adda nagkuna.
“Ammoyo metten ni Ella, boring, no kunana, mauma ket mauma lattan. Kumita manen ti kabarbaro a pagduyosan.”
“’Yan si Ella, ang always on the go a friend-ko!” kinuna ni Tricia. Timmakder ket tinarayna a rinakep ni Ella, inngatona sa inweswesna. “Sikat ka na pala, dangnga, dimo ibagbaga!” kinunana nga agkatkatawa.
“Kastanan manipud idi ubbingkami pay!” kinuna met ti sabali.
Iti nagpainganna a tugaw iti pasilio, nakaibusen ni Johnny iti dua a double a brandy. Ngem adayo nga agpasidumre gapu iti panangpanaw ni Ella kenkuana. Itay agpakada ti balasang tapno makiinniliw kadagiti dati a kaklaseanna, nagwen nga awan a pulos ti sugnad a nariknana. Nakarikna pay ketdi iti gin-awa tapno adda rasonna nga agpaing iti ruar. Iti kasta, maliklikanna dagiti ipagarupna a kasla mangsuksukain nga ikikita dagiti padada a sangaili kenkuana.
Tumakder koman ni Johnny tapno dumawat manen iti inumenna idi mapasungadanna ti maysa a seksi iti panagkitana. Saan a kas iti sigud nga awan bibiangna ania man ti makitana, nakarikna ketdin iti essem a makigayyem iti amin a makitana. Ket inisemanna ti sumungad.
“Hi!” inkablaaw ni Johnny.
Lalo a pinagindayon ti sumungad ti patongna a kinepkepan ti umasul a miniskirt. Naglanitok met ti uppat a pulgada a takong ti lumabaga a high heel-na.
“Hello, pogi!” kinuna met ti seksi.
Nalaka met gayam ti makigayyem no kayat, nakuna ni Johnny idi malabsan ti kinablaawanna. Ngem dandani naggarikgik idi madlawna dagiti nagdadakkel a nangisit a tumeng ken agmasmasel a butoy daytoy.
Pagammuan la ta nakangngeg iti agkinkinnamat a kanaktuol ni Johnny. Idi tumaliaw, nakitana ni Ella nga arintarayen nga umas-asideg.
“Aba, natuto ka nang makipaglandian, ha! Halika na!” Ginuyod ni Ella nga inturong iti ridaw ti function room. “Last dance na. No sadino lat’ pappapanam!”
Ngem simkad ni Johnny. “Baka mabaddekanka manen! Kababain!” kinunana.
Ngem ginuyod latta ni Ella. “Balse la'ng, nalaka a kompasan,” kinunana. “Surotem laeng ti ibagak!”
Timmulok met laeng ni Johnny.
“Kasta, siketennak met. Dumketka, a. Dika met masinit ket! Makatarayen ti takong iti nagbaetanta, 'ba!” Nagkatawa ni Ella. “Sige, surotennak. One step forward, lagtit a kastoy. One step backward, lagtit. Ganyan! Sige, surotem lattan ti imbagak ket pasadokan.”
Ngem nagbalaw ti balasang ta agtimtim-og met lattan dagiti tumengna. “Hoy, bin-ig met a laglagtit ti kukueemon ket!” Agkatkatawa a nangdanog iti abaga ni Johnny. “Sige, bahala ka na, basta huwag mo akong tapakan!”
Ket naggibus ti pasken babaen ti sipsipat ken besobeso.
ITI umuna a gundaway, nadlaw ni Ella a di agpulsot ti isem ni Johnny. Ikomkompasna pay ketdin dagiti ramayna iti manibela iti panangdanggayna iti tango a La Cumparsita. Dinillawna idin, idi damona a mangngeg a patokaren ni Johnny, no apay a gimmatang iti kasta ti kinaduogna a tokar ngem nagkatawa laeng ti baro. Manipud idi, saannan a biniangan. Nalabit dayta ti kompas ti biag a kayat ni Johnny, naisipna.
Pimmegges ti panagpataray ni Johnny idi sumrekdan iti Mindanao Avenue manipud iti North Avenue. Narasay ngamin ti lugan ditoy no kastoy nga adalemen ti sardam.
“Napeggeska, pare ko!” impalagip ni Ella ken ni Johnny. “At lagi kang nakangiti. Lasing ka ba?”
“Hindi, happy lang!” Lalo a limmawa ti rungiit ni Johnny.
“Apay? Gapu ta adu ti naam-ammom a chicks?”
“Secret!” inyayug ketdi ni Johnny. “Basta happy ako!”
Saan a nagbayag, addadan iti Karpa Street. “Dahan-dahan ka na!” impalagip manen ni Ella.
Uray la imkis ti preno idi isardeng ni Johnny ti kotse iti batog ti ruangan da Ella. Naiddepen dagiti silaw malaksid iti bombilia iti batog ti ridaw.
Dimsaag ni Johnny ket siaalisto a nanglukat iti ridaw iti batog ni Ella. Tinarabayna ti balasang babaen ti panangawatna iti kanawan a dakulap daytoy.
“Wow! Talagang lasing ka!” Nagkatawa ni Ella. “Hindi ka dating ganyan!”
Ad-addan ti katawa ni Ella idi kasta unay ti lanay dagiti mata ni Johnny a pimmerreng nga umis-isem. “Ne, kasla met la nagiblengkan iti nagpatnag. Nayadum ti imminum!”
Ngem imbes a mabainan a kas iti dati, indennes ketdi ni Johnny ti tammudona iti pingpingna sa kunam la no nagukrad a sabong ti karabasa ti panagimbudo dagiti bibigna. “Wala bang goodnight kiss?” sa kinunana.
Pimgaak ni Ella ngem pimmardas ti giteb ti barukongna. “Sige na nga at nang makaalis ka na. Antok na ako! Dennes laeng, a!” Insarangna ti kanawan a pingpingna.
Ania a dennes no kunam la no nagsultop iti golden kuhol iti panangbisong ni Johnny ken ni Ella.
Imbes a makaunget, pimgaak ketdi ni Ella a nangdanog ken ni Johnny sa inamlidanna ti pingping daytoy.
“Rapist! Inkan!” induron ni Ella ni Johnny sa induronna ti rikep ti ruangan.
“Yes!” inkiraud ni Johnny iti nakapsut a timek; limmugan, intodona ti La Cumparsita, ket pinasiwetnan ti luganna.
“KITAEM no nakariingen ni Ella,” kinuna ni Manang Mameng ken ni Sary idi yayab ti katulonganda ti pamigatda.
Ngem sakbay a makakuti ni Sary, umul-ulogen ni Ella. Nakadigosen daytoy ta nadam-eg pay laeng ti wakray a buokna. Pedal pusher a maong ken puraw a tisert ti suotna.
“Good morning, mom, dad!” inkablaaw ni Ella. Binisongna ti inana sa nagtugaw iti abay daytoy.
Nagkinnita dagiti agassawa. Kasano ngamin ket saandan a malagip no kaano pay daydi naudi a panaggigiddanda a simmango iti panganan.
“Komusta ti party ni Tricia?” sinaludsod ni Manang Mameng.
“Great, mommy! Ang saya namin. Saanda a nagbalbaliw!”
“Aniat’ oras ‘sangpetmo? Diakon nakapuot,” kinuna met ni Mang Bianong.
“Adda met tulbekko, dad.”
Immanges iti dakkel ni Manang Mameng. “Naudikan, nakkong,” panangsuotna iti anakna.
Nagkatawa ni Ella. “Mag-enjoy muna ako, mom!” insungbatna.
Nagkinnita manen dagiti agassawa. Namnamaenda ngamin nga umapal ti anakda kadagiti dati a kaklaseanna.
“Ket ni Johnny, nakidanggay met laeng? Saan met la a nagpaspasuli?” dinamag ni Mang Bianong.
Nagtibbayo ni Ella. Inggagarana nga inamlidan ti pingpingna a sinultop ni Johnny. Kasano ngamin ket kasla ketdin marikriknana pay laeng ti bisong ni Johnny. Apay a naituredna? nasaludsodna iti unegna.
Nadlaw ni Mang Bianong ti pannakaimayeng ni Ella. Nagtibbayo. “Apay, ania ti inaramid ni Johnny kenka? Linokonaka? Agpudnoka, balasangko. Pangpang-orek no kunak, pangpang-orek!” Nagkusipet ni Mang Bianong.
“Si dad naman, high blood agad! Di marunong sumayaw. Nakasaksakit pay la dagiti ramay ti dapanko nga inridisna!” impulong ni Ella.
Uray la nakapugso ni Mang Bianong iti panagkatawana idinto ta nagayek-ek ni Manang Mameng.
Nasinga ti pamilia idi adda agtuktok iti ridaw. Arintarayen ni Sary a simmabat.
Simmirip ni Dex idi mabingngi ni Sary ti ridaw. Nakipatang biit daytoy ken ni Sary sa pimmanaw.
“Sumaglit daw po kayo sa farm mamaya,” impakaammo ni Sary idi agsubli.
Saanen a natutor ni Mang Bianong ti namigat. Adda ngamin nagparikna kenkuana.
Simmaruno ni Ella. Ania ngarud, insurot lattan ni Manang Mameng ti panagkitana kadagiti agama.
Nadatnganda ni Dex a nakaiggem kadagiti naputed a wayway ti baud. Sakbay a makapagsaludsod ni Mang Bianong, nagipadamagen ni Dex.
“Boss, innem ti tinakawda idi rabii, agraman ti tallo a naggapu idiay San Pedro,” kinuna ni Dex.
Nakigtot ni Ella. “Nabartekka man ngatan, a, isu a dika nakapuot!” Naipigsana ti bosesna ket nagdumog ni Dex.
“Diak imminum, boss,” insungbat ni Dex. “Napuyatanak ngamin ta tallon a rabii nga agsisiimak. Madmadlawko ngamin nga adda umar-arubayan.”
Nagsanamtek ni Mang Bianong. Nakitana ngamin ti "high school" a botelia ti empelayt iti nagiddaan ni Dex. “Apay daydiay?”
Napitpit ti isem ni Dex. Nagdumog ket kunam la no nakabasol nga ubing a mangparukib ken ni Ella. “Pinagmulumogko idi rabii, boss, ta nagparawak.”
Imbes a makaunget, intallikud laengen ni Mang Bianong ti isemna. Nagmulumog iti sangabotelia nga arak? Apo Dios!
“Dad, magkano ang isang shotgun?” pagammuan la ta sinaludsod ni Ella.
“D-diak ammo. Apay?”
“Igatanganta ni Johnny!”
Kasla natugkik ti ipel ni Mang Bianong iti nangngegna.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
